Lucas

15 Tuláakal túun le máaxoʼob cobrartik impuesto yéetel le j-kʼeban máakoʼoboʼ tu muchʼubaʼob tu yiknal Jesús utiaʼal ka u yuʼuboʼob u tsikbal.+ 2 Le oʼolal le fariseoʼob yéetel le escribaʼoboʼ seguernaj u x-mukul aʼalikoʼob: «Le máakaʼ ku biskuba yéetel j-kʼeban máakoʼob yéetel ku janal tu yéeteloʼob». 3 Jesús túuneʼ tu tsikbaltajtiʼob lelaʼ: 4 «Wa juntúul ichileʼex yaan 100 u túulal u yalakʼ taman chéen baʼaleʼ ku saʼatal juntúuleʼ, ¿máasaʼ jeʼel u pʼatik le 99 u túulal teʼ desierto utiaʼal ka xiʼik u kaxt le saatloʼ?+ 5 Le kéen u kaxteʼ ku kiʼimaktal u yóol yéetel ku naʼaksik tu keléembal. 6 Tsʼoʼoleʼ kéen kʼuchuk tu yotocheʼ ku tʼanik u amigoʼob bey xan u vecinoʼobeʼ ku yaʼaliktiʼob: ‹Kiʼimakchajak a wóoleʼex tin wéetel tumen tsʼoʼok in kaxtik le in walakʼ taman saatal kaʼachoʼ›.+ 7 Kin waʼalikteʼexeʼ maas yaan u yantal kiʼimak óolal teʼ kaʼan yoʼolal juntúul kʼeban máak ku kʼexik u tuukul+ ke yoʼolal 99 utsul máakoʼob maʼ kʼaʼabéet u kʼexik u tuukuloʼobiʼ.

8 Wa juntúul koʼolel yaan diez u pʼéelal u taakʼinil dracma* tiʼ chéen baʼaleʼ ku satik junpʼéeleʼ, ¿máasaʼ ku tʼabik junpʼéel lámpara, ku míistik u yotoch yéetel ku xakʼaltik tubeel tak ken u kaxte? 9 Le kéen u kaxt túuneʼ ku tʼanik u amigaʼob yéetel u vecinaʼob yéetel ku yaʼaliktiʼob: ‹Kiʼimakchajak a wóoleʼex tin wéetel tumen tsʼoʼok in kaxtik le u taakʼinil dracma in satmaj kaʼachoʼ›. 10 Kin waʼalikteʼexeʼ bey xan u kiʼimaktal u yóol u ángeloʼob Dios le kéen u kʼex u tuukul juntúul kʼeban máakoʼ».+

11 Ka tsʼoʼokeʼ Jesúseʼ tu yaʼalaj: «Juntúul máakeʼ yaan kaʼach kaʼatúul u paalal. 12 Le maas chichanoʼ tu yaʼalaj tiʼ u papá: ‹Papá, tsʼáaten le jaats tiʼ le herencia ku tocartenoʼ›. Le taatatsil túunoʼ tu jatsajtiʼob le baʼaxoʼob yaantiʼoʼ. 13 Maʼ sen úuch tiʼ leloʼ le paal maas chichanoʼ tu molaj tuláakal le baʼaloʼob tsʼaʼabtiʼoʼ ka bin táanxel luʼumil tiʼ junpʼéel náanach kaaj, teʼ túunoʼ tu bisaj junpʼéel kʼaakʼas kuxtal yéetel tu xuʼuxupaj le baʼaxoʼob tsʼaʼabtiʼoʼ. 14 Ka tsʼoʼok u láaj xupkeʼ yanchaj junpʼéel jach nojoch wiʼijil tiʼ tuláakal le luʼumiloʼ, le xiʼipal túunoʼ káaj u máansik óotsilil. 15 Yoʼolal lelaʼ yanchaj tak u bin yiknal juntúul tiʼ u kajnáaliloʼob le luʼumoʼ, ka túun túuxtaʼab u kanáant kʼéekʼenoʼob tu kajtalil le máakoʼ.+ 16 Le xiʼipalaʼ ku taaktal kaʼach u jaantik u yoʼoch le kʼéekʼenoʼoboʼ; kex jach wiʼijeʼ mix máak tsʼáaik baʼal u jaante.

17 Ka kʼaʼaj u yiikʼeʼ tu yaʼalaj: ‹¡Le bukaʼaj máakoʼob ku meyajoʼob yiknal in papáoʼ yaʼab waaj yaan utiaʼal u jaantoʼob, chéen baʼaleʼ teneʼ táan in kíimil yéetel wiʼij wayeʼ! 18 Yaan in lukʼul wayeʼ utiaʼal ka xiʼiken tu yiknal in papá, kéen kʼuchkeneʼ yaan in waʼaliktiʼ: «Papá, tsʼoʼok in kʼebantal tu contra Dios* bey xan ta contra. 19 Maʼ tin náajmatik u yaʼalaʼal a hijoen. Tratarten jeʼex juntúul tiʼ a j-meyajoʼobeʼ»›. 20 Letiʼ túuneʼ lukʼ teʼeloʼ ka bin teʼ tuʼux yaan u papáoʼ. Desde náach u taaleʼ ilaʼab tumen u papáeʼ ka chʼaʼab óotsilil tiʼ. U papá túuneʼ bin áalkabil tu yiknaleʼ tu méekʼeʼ ka tu tsʼuʼutsʼaj. 21 Le xiʼipal túunoʼ tu yaʼalajtiʼ: ‹Papá, tsʼoʼok in kʼebantal tu contra Dios bey xan ta contra.+ Maʼ tin náajmatik u yaʼalaʼal a hijoen›. 22 Chéen baʼaleʼ le taatatsiloʼ tu yaʼalaj tiʼ u esclavoʼob: ‹¡Séebkunteʼex!, jóoʼseʼex junpʼéel chowak nookʼ, u maas maʼalobil, ka a takeʼextiʼ, yéetel tsʼáaʼex junpʼéel anillo tu kʼab bey xan xanab tu yook. 23 Taaseʼex xan le chan wakax polokkíintaʼanoʼ, kíimseʼex ka k-jaanteʼex yéetel koʼoneʼex beetik junpʼéel fiesta. 24 Tumen le in hijoaʼ kimen kaʼachi, chéen baʼaleʼ kaʼa kuxlaji;+ saatal kaʼachi, chéen baʼaleʼ kaxtaʼabi›. Letiʼob túuneʼ jach kiʼimakchaj u yóoloʼob.

25 Le u hijo maas nojochoʼ tiʼ yaan kaʼach ich kooleʼ. Le ka joʼopʼ u náatsʼal tu yiknal le najoʼ tu yuʼubaj táan u yúuchul paax yéetel óokʼot. 26 Letiʼ túuneʼ tu tʼanaj juntúul tiʼ le máaxoʼob ku meyajoʼob teʼ najoʼ ka tu kʼáatajtiʼ baʼax le ku beetaʼaloʼ. 27 Letiʼeʼ tu yaʼalajtiʼ: ‹A wíitsʼineʼ tsʼoʼok u suut, toj u yóol úuchik u suut, le oʼolal a papáeʼ tu kíimsaj le chan wakax polokkíintaʼanoʼ ka tu beetaj junpʼéel fiesta›. 28 Chéen baʼaleʼ letiʼeʼ pʼuʼuji yéetel maʼ tu yóotaj ookliʼ. U papá túuneʼ jóokʼeʼ ka joʼopʼ u sen aʼaliktiʼ ka okok. 29 Letiʼeʼ tu yaʼalaj tiʼ u papá: ‹Teneʼ úuch káajak in meyajtikech bey juntúul esclavoeʼ yéetel mantatsʼ kin beetik baʼax ka waʼalik, chéen baʼaleʼ techeʼ mix juntéen ta tsʼáajten juntúul chan chivo utiaʼal ka in jaant yéetel in amigoʼob. 30 Chéen baʼaleʼ chéen pʼelak kʼuchik le a hijo tu xuʼuxupaj* yéetel x-kʼeban koʼoleloʼob le baʼaxoʼob yaantechoʼ techeʼ ta kíimsaj u jaant le chan wakax polokkíintaʼanoʼ›. 31 Letiʼ túuneʼ tu yaʼalajtiʼ: ‹Hijo, techeʼ mantatsʼ way yanech tin wiknaleʼ yéetel tuláakal le baʼaxoʼob in tiaʼaloʼ a tiaʼal xan. 32 Chéen baʼaleʼ bejlaʼeʼ u kʼiinil u kiʼimaktal k-óol yéetel k-kʼamik tubeel a wíitsʼin, tumen letiʼeʼ kimen kaʼachi, chéen baʼaleʼ kaʼa kuxlaji. Saatal kaʼachi, chéen baʼaleʼ kaxtaʼabi›».