Marcos

5 Letiʼob túuneʼ kʼuchoʼob tuláakʼ u tséel le kʼáaʼnáaboʼ, tu luʼum le gerasenoʼoboʼ.+ 2 Jach le ku yéemel Jesús teʼ barcooʼ taal juntúul máak tu yiknal, le máakaʼ chukaʼan kaʼach tumen juntúul demonio yéetel tiʼ jóokʼ teʼ tuʼux yaan le muknaloʼoboʼ. 3 Le máakaʼ tiʼ kajaʼan kaʼach teʼ cementeriooʼ. Tak teʼ kʼiin jeʼeloʼ maʼ páajchajak u kʼaʼaxal tubeel utiaʼal maʼ u púutsʼuliʼ, kex ka kʼaʼaxak yéetel cadena. 4 Letiʼeʼ yaʼab u téenel tsʼoʼok u kʼaʼaxal u kʼaboʼob bey xan u yookoʼob yéetel cadenaʼob, chéen baʼaleʼ ku tʼokikoʼob yéetel ku koʼokotsikoʼob. Tiʼ mix máak kaʼach yaan u muukʼil utiaʼal u jetsʼkúuntik. 5 Bul kʼiin yéetel bul áakʼab táan u máan kaʼach ichil le muknaloʼob yéetel teʼ montañaʼoboʼ, táan u yawat yéetel táan u xoʼoxotik u wíinklil yéetel tuunichoʼob. 6 Chéen baʼaleʼ ka tu yilaj táan u taal Jesúseʼ bin áalkabileʼ ka chinlaj tu táan.+ 7 Ka tu kʼaʼam aʼalaj: «¿Baʼax ka kaxtik wayeʼ Jesús, u Paal le Maas Nojoch Diosoʼ? Kin kʼáat óoltiktech tu kʼaabaʼ Dios maʼ a castigarken».*+ 8 Le demoniooʼ tu yaʼalaj leloʼ tumen Jesúseʼ táan kaʼach u yaʼaliktiʼ: «Jóokʼkech tiʼ le máakaʼ».+ 9 Jesúseʼ tu kʼáatajtiʼ: «¿Bix a kʼaabaʼ?». Letiʼeʼ tu yaʼalaj: «In kʼaabaʼeʼ Legión* tumen yaʼaboʼon». 10 Le demonioaʼ tu sen kʼáat óoltaj tiʼ Jesús maʼ u túuxtaʼaloʼob táanxel luʼumil.+

11 Teʼ montañaoʼ táan kaʼach u janal+ yaʼabkach kʼéekʼenoʼobiʼ.+ 12 Le demonioʼob túunoʼ tu kʼáat óoltoʼob tiʼ Jesús: «Chaʼa k-okol tiʼ le kʼéekʼenoʼoboʼ». 13 Jesús túuneʼ tu chaʼajtiʼob. Le demonioʼoboʼ jóokʼoʼob tiʼ le máakoʼ ka ookoʼob tiʼ le kʼéekʼenoʼoboʼ; tuláakal túun le kʼéekʼenoʼoboʼ tu pulubaʼob teʼ kʼáaʼnáab desde teʼ sen kaʼanal lugar tuʼux yanoʼoboʼ ka láaj búuloʼob, tuláakloʼobeʼ kex 2,000 u túulaloʼob. 14 Le máaxoʼob kanáantik le kʼéekʼenoʼoboʼ púutsʼoʼobeʼ ka bin u yaʼaloʼob teʼ kaajoʼ bey xan teʼ mejen kajtaliloʼoboʼ; le máakoʼob túunoʼ taal u yiloʼob baʼax tsʼoʼok u yúuchul.+ 15 Le ka kʼuchoʼob yiknal Jesúseʼ tu yiloʼob kulukbal le máak okaʼan kaʼach yaʼabkach demonioʼob tiʼoʼ. Le máakaʼ u búukintmaj u nookʼ yéetel tu yóol yaan; letiʼob túuneʼ jach sajakchajoʼob. 16 Le máaxoʼob il bix úuchik u yutstal le máakoʼ bey xan le baʼax úuch yéetel le kʼéekʼenoʼoboʼ tu tsikbaltoʼob tiʼ le máakoʼob bix úuchik tuláakaloʼ. 17 Le máakoʼob túunoʼ joʼopʼ u kʼáat óoltikoʼob tiʼ Jesús ka jóokʼok tu luʼumoʼob.+

18 Le ka naʼak Jesús teʼ barcooʼ le máak chukaʼan kaʼach tumen demoniooʼ káaj u sen kʼáat óoltiktiʼ ka u chaʼa u bin tu yéetel.+ 19 Chéen baʼaleʼ Jesúseʼ maʼ tu yóotiʼ, baʼaxeʼ tu yaʼalajtiʼ: «Xeen ta wotoch, xeen yiknal a láakʼtsiloʼob ka a tsikbalttiʼob baʼaxoʼob tu beetaj Jéeoba ta woʼolal yéetel bix úuchik u chʼaʼiktech óotsilil». 20 Le máak túunoʼ bineʼ ka joʼopʼ u tsikbaltik tu kaajiloʼob Decápolis* tuláakal le baʼaxoʼob tu beetaj Jesús tu yoʼolaloʼ, tuláakal túun le máakoʼob uʼuyoʼ jaʼakʼ u yóoloʼob.

21 Jesúseʼ naʼak teʼ barcooʼ ka suunaj tuláakʼ u tséel le jaʼoʼ, teʼeloʼ yaʼabkach máakoʼob tu muchʼubaʼob tu yiknal; letiʼ túuneʼ pʼáat tu jáal le jaʼoʼ.+ 22 Jairo juntúul u nojchil le sinagogaoʼ bin u yil Jesús, le ka kʼuch tu yiknaleʼ xolaj tu táaneʼ+ 23 ka tu sen kʼáat óoltajtiʼ: «In chan hijaeʼ jach táaj kʼojaʼan.* Koʼox ka a tsʼáa a kʼab tu yóokʼol+ utiaʼal ka utsak yéetel maʼ u kíimil». 24 Jesús túuneʼ bin tu yéetel. Le yaʼabkach máakoʼoboʼ binoʼob tu paach Jesús, letiʼobeʼ táan kaʼach u peʼepechʼkoʼob.

25 Ichil le máakoʼoboʼ tiʼ yaan xan juntúul koʼolel tsʼoʼok 12 años+ káajak u sen máan kʼiʼikʼ tiʼ.+ 26 Letiʼeʼ tsʼoʼok u beetaʼal u sen muʼyaj* tumen yaʼab doctoroʼob yéetel tsʼoʼok u xupik tuláakal u taakʼin, chéen baʼaleʼ maʼ utschajiʼ, baʼaxeʼ maas kʼaschaj u kʼojaʼanil. 27 Le koʼolelaʼ tu yuʼubaj u tsikbaltaʼal le baʼaxoʼob ku beetik Jesúsoʼ, le oʼolal taaleʼ ka tu tsʼotuba ichil le yaʼabkach máakoʼoboʼ, tu natsʼuba paachil tiʼeʼ ka tu machaj u nookʼ.+ 28 Tu beetaj leloʼ tumen ku yaʼalik kaʼachi: «Wa ka in mach kex chéen u nookʼeʼ jach jeʼel in wutstaleʼ».+ 29 Tu séebaʼanil túun xuʼul u sen máan kʼiʼikʼ tiʼ, letiʼeʼ tu yuʼubaj tsʼoʼok u yutstal le yaayaj kʼojaʼanil ku muʼyajtik kaʼachoʼ.

30 Jesúseʼ tu séebaʼanil tu yuʼubaj yaan poder+ tsʼoʼok u lukʼultiʼ, le oʼolal tu sutuba u pakt le yaʼabkach máakoʼoboʼ, ka joʼopʼ u kʼáatik: «¿Máax mach in nookʼ?».+ 31 U discípuloʼob túuneʼ tu yaʼaloʼobtiʼ: «Yuumtsil, táan a wilik táan a peʼepechʼaʼal tumen le máakoʼoboʼ tsʼoʼoleʼ ka kʼáatik: ‹¿Máax machen?›». 32 Chéen baʼaleʼ Jesúseʼ seguernaj u sutkuba u yil máax mache. 33 Le koʼolel túunoʼ tumen u yojel baʼax tsʼoʼok u yúuchleʼ taaleʼ ka xolaj tu táan Jesús, sajak yéetel táan u kikilankil, ka tu yaʼalaj tuláakal u jaajil tiʼ. 34 Jesúseʼ tu yaʼalajtiʼ: «Hija, tu yoʼolal a fejeʼ tsʼoʼok a wutstal, xuʼuluk a chiʼichnaktal,+ maʼ ken u kaʼa beet a muʼyaj le kʼojaʼanilaʼ».+

35 Le táan u tʼaan Jesúsoʼ taal jujuntúul máakoʼob lukʼoʼob tu yotoch Jairoeʼ ka tu yaʼaloʼobtiʼ: «¡A hijaeʼ tsʼoʼok u kíimil! Maʼ tsaaj u seguer a waʼalik tiʼ le j-Kaʼansaj ka taalakoʼ».+ 36 Chéen baʼaleʼ Jesúseʼ tu yuʼubaj le baʼax aʼalaʼaboʼ ka tu yaʼalaj tiʼ Jairo: «Maʼ a chʼaʼik saajkil, chéen eʼes yaan a fe».+ 37 Jesúseʼ maʼ tu chaʼaj u bin uláakʼ máakoʼob tu yéeteliʼ, chéen Pedro bey xan Santiago yéetel Juan, le sukuʼuntsiloʼoboʼ.+

38 Le ka kʼuchoʼob tu yotoch Jairoeʼ, Jesúseʼ tu yuʼubaj táan u sen juum u tʼaan le máakoʼoboʼ. Tu yilaj xan le máakoʼob ku yokʼoloʼob yéetel ku yawatoʼoboʼ.+ 39 Le ka ook teʼ najoʼ tu yaʼalajtiʼob: «¿Baʼaxten táan u juum a tʼaaneʼex yéetel táan a sen okʼoleʼex? Le chan x-chʼúupaloʼ maʼ kimeniʼ, chéen táan u wenel».+ 40 Tu yoʼolal lelaʼ káaj u cheʼejtaʼal tumen le máakoʼoboʼ. Jesús túuneʼ ka tsʼoʼok u láaj jóoʼskoʼobeʼ ook teʼ tuʼux yaan le chan x-chʼúupaloʼ, tu yéeteleʼ ook u taata yéetel u maama le chan x-chʼúupaloʼ bey xan le discípuloʼob taaloʼob tu yéeteloʼ. 41 Tu machaj túun u kʼab le chan x-chʼúupaloʼ ka tu yaʼalajtiʼ: «Tálita kúmi», lelaʼ u kʼáat u yaʼal: «Chan x-chʼúupal, kin waʼaliktech: ¡Líiʼkech!».+ 42 Tu séebaʼanileʼ le chan x-chʼúupaloʼ líikʼeʼ ka joʼopʼ u xíimbal (letiʼeʼ yaan kaʼach 12 años tiʼ). Le máaxoʼob iloʼ jach táaj kiʼimakchaj u yóoloʼob, maʼ tu páajtal kaʼach u creerkoʼob le baʼax tsʼoʼok u yúuchloʼ. 43 Jesús túuneʼ yaʼab u téenel tu yaʼalajtiʼob maʼ u yaʼalikoʼob tiʼ mix máak le baʼax úuchoʼ+ yéetel tu yaʼalaj ka tsʼaʼabak baʼal u jaant le chan x-chʼúupaloʼ.