1 Timoteo

1 Teen Pabloeʼ u apóstolen Cristo Jesús jeʼex u yaʼalmil Dios, le Máax Salvarkoʼonoʼ, yéetel jeʼex u yaʼalmil Cristo Jesús le máax oʼolal yaan baʼax maʼalob k-páaʼtikoʼ.+ 2 Le cartaaʼ a tiaʼal Timoteo,*+ tu yoʼolal le fe yaantoʼonoʼ techeʼ beyech in hijoeʼ.+ Teneʼ kin waʼaliktech:

Ka yanaktech le nojoch utsil, le chʼaʼ óotsilil yéetel le jeetsʼelil ku taal tiʼ Dios le Taataoʼ bey xan le ku taal tiʼ Cristo Jesús k-Yuumtsiloʼ.

3 Le jach taʼaytak u jóokʼol in binbal tu luʼumil Macedoniaoʼ teneʼ tin kʼubéentajtech ka pʼáatkech Éfeso, beoraaʼ táan in kaʼa kʼubéentiktech ka pʼáatkechiʼ utiaʼal ka a waʼal tiʼ jujuntúul máakoʼob maʼ u kaʼanskoʼob yaanal baʼaloʼob. 4 Aʼaltiʼobeʼ maʼ unaj u beetkoʼob u cuentail baʼaloʼob maʼ jaajtakiʼ+ mix unaj u xakʼaltikoʼob máax u yúuchben láakʼtsil máakiʼ. Le baʼaloʼobaʼ mix junpʼéel utsil ku taaskoʼob,+ yéetel tu lugar u beetkoʼob u kaanbal máak tiʼ Dios utiaʼal u nojochtal u fejeʼ chéen ku beetkoʼob u perdertik u tiempo máak. 5 U jaajileʼ le baʼax kin waʼalikaʼ táan in waʼalik utiaʼal ka yanak junpʼéel yaabilaj+ tiʼ máak ku taal tiʼ junpʼéel puksiʼikʼal limpio, tiʼ junpʼéel maʼalob conciencia bey xan tiʼ junpʼéel puksiʼikʼal maʼatech u tuus.+ 6 Úuchik u náachtal jujuntúul máakoʼob tiʼ le baʼaloʼobaʼ binoʼob tu paach tʼaanoʼob minaʼan u biilaloʼob.+ 7 Le máakoʼobaʼ u kʼáat u kaʼansoʼob+ baʼax ku yaʼalik le leyoʼ, chéen baʼaleʼ maʼ tu naʼatkoʼob le baʼaxoʼob ku kaʼanskoʼoboʼ mix le baʼaxoʼob ku sen aʼalikoʼob ka beetaʼakoʼ.

8 Toʼoneʼ k-ojel jach maʼalob le Leyoʼ pero chéen wa ku tsʼoʼokbesaʼal jach jeʼex unajeʼ. 9 Utiaʼal ka beetaʼak beyaʼ unaj u kʼaʼajal tiʼ máakeʼ le leyoʼ maʼ beetaʼab utiaʼal máax toj u kuxtaliʼ, baʼaxeʼ beetaʼab utiaʼal le máaxoʼob ku binoʼob tu contra le leyoʼ,+ máaxoʼob maʼatech u beetkoʼob baʼax ku yaʼalaʼaltiʼob, kʼasaʼan máakoʼob, máakoʼob ku kʼebantaloʼob, máakoʼob minaʼan u yaabilajoʼob, máakoʼob ku mixbaʼalkúuntikoʼob le baʼaloʼob santoʼoboʼ, j-kiimsaj máakoʼob, máakoʼob u kíimsmaj u taataʼob, máakoʼob u kíimsmaj u maamaʼob, 10 máakoʼob ku núupkʼebantaloʼob,* xiiboʼob ku núupchitaloʼob yéetel u yéet xiibiloʼob, secuestradoroʼob, máakoʼob ku tuusoʼob, máakoʼob maʼatech u béeykuntkoʼob baʼax ku jurarkoʼob, bey xan utiaʼal jeʼel baʼalak ku bin tu contra le maʼalob kaʼansajoʼ.+ 11 Le maʼalob kaʼansaj kʼubéentaʼantenaʼ yaan yil yéetel le maʼalob baʼaloʼob ken u beet le Dios kiʼimak u yóoloʼ.+

12 Teneʼ kin tsʼáaik u diosboʼotikil tiʼ Cristo Jesús k-Yuumtsil, máax tu tsʼáajten páajtalil. Letiʼeʼ tumen tu yilaj chúukaʼan in wóoleʼ tu kʼubéentajten junpʼéel meyaj,+ 13 kex teen kaʼacheʼ kin tʼaan tu contra Dios, kin chʼaʼpachtik máaxoʼob meyajtik yéetel minaʼan in suʼtal.+ Chéen baʼaleʼ chʼaʼabten óotsilil tumen minaʼan in fe yéetel maʼ in wojel kaʼach baʼax kin beetkiʼ. 14 Le u nojoch utsil k-Yuumtsiloʼ maas jach nojochchaj tin wóokʼol bey xan le fe yéetel le yaabilaj ku taal tiʼ Cristo Jesúsoʼ. 15 Le baʼax ken in waʼalaʼ jach jaaj yéetel tuláakal máak unaj u creertik: Cristo Jesúseʼ taal way yóokʼol kaab utiaʼal u salvartik le j-kʼeban máakoʼoboʼ.+ Ichil tuláakloʼobeʼ teen le maas kʼebanchajaʼanoʼ.+ 16 Chéen baʼaleʼ kex jach yaʼab in kʼebaneʼ chʼaʼabten óotsilil, yéetel lelaʼ Cristoeʼ tu yeʼesaj tiʼ le máaxoʼob ken u tsʼáa u fejoʼob tiʼ letiʼoʼ de ke letiʼeʼ jach chúukaʼan u yóol tiʼ máak yéetel yaan u tsʼáaiktiʼob kuxtal minaʼan u xuul.+

17 Le Rey minaʼan xuʼulul tiʼoʼ,+ le juntúuliliʼ Diosoʼ,+ le máax maʼ tu kʼastal+ yéetel maʼ tu páajtal u yilaʼaloʼ+ unaj u respetartaʼal yéetel u alabartaʼal utiaʼal kʼiinoʼob minaʼan u xuul. Ka béeyak.*

18 In paal Timoteo, táan in kʼubéentiktech ka a beet lelaʼ: tu yoʼolal le baʼaxoʼob profetizartaʼab ta woʼolaloʼ seguernak a baʼateltik le jach maʼalob baʼateloʼ.+ 19 Maʼ a chaʼik u saʼatal a fe yéetel yanaktech mantatsʼ junpʼéel maʼalob conciencia,+ maʼ jeʼex le máaxoʼob ku pʼatkoʼob juntséelil le baʼaloʼobaʼ yéetel ku saʼatal u fejoʼob jeʼex u búulul junpʼéel barco ichil le jaʼoʼ. 20 Himeneo+ yéetel Alejandroeʼ bey tsʼoʼok u yúuchultiʼoboʼ, yéetel tsʼoʼok in kʼubkoʼob tu kʼab Satanás,+ utiaʼal ka u kanoʼobeʼ maʼ unaj u tʼaanoʼob kʼaas tu contra Diosiʼ.