Juan

15 Teen le u jaajil cheʼil uvaoʼ, in Taataeʼ letiʼe máax meyajtikoʼ. 2 Tuláakal in kʼaboʼob maʼ tu yichankiloʼoboʼ ku luʼsaʼal tumen in Taata, chéen baʼaleʼ tuláakal in kʼaboʼob ku yichankiloʼoboʼ in Taataeʼ ku podarkoʼob utiaʼal ka maas yaʼabchajak u yichoʼob.+ 3 Yoʼolal le baʼax tin kaʼansajteʼexoʼ tsʼoʼok a podartaʼaleʼex, tsʼoʼok u luʼsaʼalteʼex le baʼax maʼ maʼalob yaanteʼex kaʼachoʼ.+ 4 Pʼáatkeʼex junmúuchʼ tin wéetel, teen xaneʼ yaan in pʼáatal junmúuchʼ ta wéeteleʼex. Jeʼex u kʼab le cheʼ maʼ tu páajtal u tsʼáaik ich chéen tu juunal wa maʼ taakʼal tiʼ u cheʼiloʼ teʼex xaneʼ maʼ tu páajtal a tsʼáaikeʼex ich wa maʼ ta pʼáatleʼex junmúuchʼ tin wéetel.+ 5 Teen u cheʼil le uvaoʼ, teʼexeʼ u kʼaboʼob. Le máax ku pʼáatal junmúuchʼ tin wéetel, yéetel kin pʼáatal junmúuchʼ tu yéeteleʼ yaʼab ich ken u tsʼáae.+ Tumen wa maʼ junmúuchʼ yanileʼex tin wéeteleʼ junpuliʼ maʼ tu páajtal a beetkeʼex mix baʼal. 6 Wa yaan máax maʼ tu pʼáatal junmúuchʼ tin wéeteleʼ yaan u píikchʼintaʼal jeʼex u beetaʼal tiʼ u kʼab le cheʼoʼ, yéetel yaan u tijil. Le jeʼeloʼobaʼ ku moʼolol yéetel ku píikchʼintaʼal ich kʼáakʼ utiaʼal ka tóokaʼakoʼob. 7 Wa ka pʼáatleʼex junmúuchʼ tin wéetel bey xan wa ku pʼáatal ta puksiʼikʼaleʼex le baʼaxoʼob kin waʼalikteʼexoʼ teʼexeʼ yaan u páajtal a kʼáatkeʼex jeʼel baʼaxak ka a tsʼíibolteʼexeʼ, lelaʼ yaan u yúuchul jeʼex ta kʼáatileʼexoʼ.+ 8 Wa ku seguer a tsʼáaikeʼex yaʼab ich yéetel ka weʼeskeʼex jach in discípuloʼexeʼ yaan u alabartaʼal in Taata.+ 9 Le Taataoʼ u yaabiltmen,+ teen xaneʼ in yaabiltmeʼex, le oʼolaleʼ maʼ a náachtaleʼex tiʼ in yaabilaj. 10 Teneʼ tsʼoʼok in beetik baʼax ku yaʼalik in Taata yéetel tsʼoʼok in pʼáatal ichil u yaabilaj. Le oʼolaleʼ wa ka beetkeʼex le baʼaxoʼob kin waʼalikteʼexoʼ yaan xan a pʼáatleʼex ichil in yaabilaj.

11 Teneʼ tsʼoʼok in waʼalikteʼex le baʼaloʼobaʼ utiaʼal ka kiʼimakchajak a wóoleʼex jeʼex teen kiʼimak in wóoleʼ, bey túunoʼ jach tu jaajil yaan u kiʼimaktal a wóoleʼex.+ 12 Lelaʼ letiʼe baʼax kin waʼalikteʼex ka a beeteʼexaʼ: ka a paklan yaabiltabaʼex jeʼex teen tsʼoʼok in yaabiltikeʼexoʼ.+ 13 Le bix maas nojoch jeʼel u páajtal u yeʼesik u yaabilaj máakoʼ letiʼe ka u kʼub u kuxtal tu yoʼolal u amigoʼoboʼ.+ 14 Teʼexeʼ in amigoʼex wa ka beetkeʼex baʼax kin waʼalikteʼex.+ 15 Beoraaʼ maʼ tin waʼalik in esclavoʼex, tumen le esclavooʼ maʼ u yojel baʼax ku beetik u tsʼuuliliʼ. Chéen baʼaleʼ kin waʼalikteʼex in amigoʼex, tumen tuláakal le baʼaxoʼob tsʼoʼok u yaʼalikten in Taataoʼ teneʼ tsʼoʼok xan in tsʼáaik a wojéelteʼex. 16 Maʼ teʼex yéeyeneʼexiʼ, baʼaxeʼ teen yéeyeʼex utiaʼal maʼ u xuʼulul a tsʼáaikeʼex maʼalob ich, le ichaʼ yaan u pʼáatal utiaʼal mantatsʼ. Beyoʼ jeʼel baʼalak ka a kʼáateʼex tiʼ le Taata tin kʼaabaʼoʼ yaan u tsʼáaikteʼex.+

17 Leloʼ letiʼe baʼax tsʼoʼok in waʼalikteʼex utiaʼal ka a paklan yaabiltabaʼexoʼ.+ 18 Chéen baʼaleʼ wa le yóokʼol kaab ku pʼektikeʼexoʼ a wojleʼex teen tu yáax pʼekten táanil tiʼ u pʼektikeʼex.+ 19 Wa teʼex yóokʼol kaabileʼexeʼ le yóokʼol kaaboʼ jeʼel u yaabiltikeʼexeʼ tumen u tiaʼaleʼex. Chéen baʼaleʼ teʼexeʼ maʼ yóokʼol kaabileʼexiʼ,+ tumen tsʼoʼok in yéeyikeʼex tiʼ le yóokʼol kaaboʼ, le oʼolaleʼ le yóokʼol kaaboʼ ku pʼektikeʼex.+ 20 Maʼ u tuʼubulteʼex le baʼax tsʼoʼok in waʼalikteʼexaʼ: le esclavooʼ maʼ maas nojoch tiʼ u tsʼuuliliʼ. Wa teen tsʼoʼok in chʼaʼpachtaʼal tumen le máakoʼoboʼ teʼexeʼ yaan xan a chʼaʼpachtaʼaleʼex.+ Wa letiʼob tsʼoʼok u beetkoʼob baʼax kin waʼalikeʼ yaan xan u beetkoʼob baʼax ka waʼalikeʼex. 21 Chéen baʼaleʼ tuláakal le baʼaloʼobaʼ yaan u beetkoʼob ta contraʼex tu yoʼolal in kʼaabaʼ, tumen letiʼobeʼ maʼ u kʼaj óoloʼob le Máax túuxtenoʼ.+ 22 Wa maʼ in taal yéetel maʼ in tʼankoʼob kaʼacheʼ bejlaʼa minaʼan u kʼebanoʼobeʼ,+ chéen baʼaleʼ beoraaʼ maʼ tu páajtal u yaʼalikoʼob wa maʼ kʼeban le baʼax ku beetkoʼoboʼ.+ 23 Le máax u pʼekmeneʼ u pʼekmaj xan in Taata.+ 24 Wa maʼ in beetik kaʼach ichiloʼob le baʼaloʼob mix juntéen beetaʼak tumen uláakʼ máakoʼ bejlaʼa minaʼan kaʼach u kʼebanoʼobeʼ,+ chéen baʼaleʼ beoraaʼ tsʼoʼok u yilkoʼob yéetel tsʼoʼok u pʼektikenoʼob, tsʼoʼok xan u pʼektikoʼob in Taata. 25 Lelaʼ úuch utiaʼal ka béeychajak le baʼax tsʼíibtaʼan tu Leyoʼobaʼ: ‹Tu pʼektenoʼob kex minaʼan baʼax oʼolal›.+ 26 Kéen kʼuchuk le espíritu santo kun áantkeʼexoʼ yaan u yeʼesik máaxeniʼ.+ Le espíritu santo ken in túuxteʼexoʼ letiʼe ku taal tiʼ le Taataoʼ, letiʼ kaʼansik u jaajil.+ 27 Teʼex xaneʼ yaan a tsʼáaikeʼex ojéeltbil máaxen,+ tumen teʼexeʼ tiʼ yaneʼex tin wéetel desde le ka joʼopʼ in kaʼansajoʼ.