Isaías
30 Jéeobaeʼ ku yaʼalik: «Óotsil le paalaloʼob tercoʼoboʼ,+
letiʼobeʼ maʼatech u beetkoʼob baʼax kin waʼalik, baʼaxeʼ ku beetkoʼob chéen baʼax ku tuklikoʼob,+
letiʼobeʼ ku nupkubaʼob yéetel uláakʼ kaajoʼob kex maʼ uts tin tʼaan ka u beetoʼobiʼ,
bey túunoʼ maʼ tu xuʼulul u niktal u kʼebanoʼob.
2 ¡Letiʼobeʼ sin ke u kʼáatkoʼobteneʼ ku binoʼob Egipto+
utiaʼal u kaxtikoʼob u yáantaj Faraón,+
yéetel utiaʼal u jupkubaʼob yáanal u boʼoy Egipto!
3 Pero ikil u kaxtikoʼob u yáantaj Faraóneʼ yaan u yantal baʼax oʼolal u chʼaʼikoʼob suʼtal,
yéetel ikil u jupkubaʼob yáanal u boʼoy Egiptoeʼ yaan u yantal baʼax oʼolal u mixbaʼalkúuntaʼaloʼob.+
4 U príncipeʼobeʼ tiaʼanoʼob tu kaajil Zoaneʼ,+
le máaxoʼob u túuxtmoʼ tsʼoʼok u kʼuchloʼob tu kaajil Anés.
5 Tuláakloʼobeʼ yaan u suʼlaktaloʼob
tu yoʼolal junpʼéel kaaj maʼ tu páajtal u taasik utsil tiʼ letiʼob,
junpʼéel kaaj maʼ tu páajtal u tsʼáaik áantaj yéetel mix junpʼéel utsil ku taasik,
chéen ku beetik u chʼaʼik suʼtal máak yéetel ku beetik u bin kʼaasil tiʼ máak».+
6 Lelaʼ letiʼe baʼax ku yaʼalaʼal tu contra le baʼalcheʼob yanoʼob noojoloʼ:
letiʼobeʼ ku máanoʼob tiʼ junpʼéel luʼum tuʼux séeb u yúuchul loob yéetel tuʼux maʼ chéen chʼaʼabil u máanoʼobiʼ,
tuʼux yaan leónoʼob, leónoʼob ku yáakamoʼob,
tsʼíitsʼik kaanoʼob yéetel chiʼibal kaanoʼob ku xikʼnaloʼob.*
Letiʼobeʼ ku biskoʼob u ayikʼaliloʼob tu yóokʼol burroʼob,
yéetel ku biskoʼob tuláakal baʼax kʼaʼabéettiʼob tu yóokʼol camelloʼob.
Chéen baʼaleʼ le baʼaloʼobaʼ mix junpʼéel utsil ken u taasoʼob tiʼ le kaajoʼ.
7 Mix baʼal u biilal u yáantaj Egipto,+
le oʼolal tsʼoʼok in tsʼáaik u kʼaabaʼt: «Raab,+ juntúul máax mix baʼal ku beetik».
8 «Beoraaʼ xeen tu táanoʼobeʼ ka a tsʼíibt yóokʼol junpʼéel jaajay tuunich
yéetel tiʼ junpʼéel libro le baʼax tsʼoʼok in waʼalikoʼ,+
leloʼ yaan u meyaj maas táanil
utiaʼal u yeʼesik baʼax in waʼalmaj kex jeʼel bukaʼaj kʼiinoʼob ka máankeʼ.+
9 Tumen letiʼobeʼ junpʼéel kaaj+ maʼatech u yuʼubikoʼob tʼaan,+ chéen tuus ku beetkoʼob,
letiʼobeʼ paalaloʼob maʼatech u yóotik u yuʼuboʼob baʼax ku yaʼalik* Jéeoba.+
10 Letiʼobeʼ ku yaʼalikoʼob tiʼ le máaxoʼob suuk u yilkoʼob baʼax ku taal u kʼiinoʼ: ‹Maʼ a wilkeʼex mix baʼal›,
yéetel tiʼ le profetaʼoboʼ ku yaʼalikoʼob: ‹Le kéen a waʼaleʼex baʼax ku taal u kʼiineʼ maʼ a waʼalikeʼex u jaajil,+
aʼaleʼex baʼaloʼob jatsʼuts k-uʼuyik. Aʼaleʼex baʼaloʼob jatsʼutstak kex maʼ jaajtakoʼobiʼ.+
11 Náachkuntabaʼex tiʼ le bejoʼ, jóokʼeneʼex tiʼ le bejoʼ.
Xuʼuluk a tʼaaneʼex tiʼ le Máax Santo yaan Israeloʼ›».+
12 Le Máax Santo yaan Israeloʼ ku yaʼalik:
«Teʼexeʼ maʼ ta kʼamkeʼex baʼax kin waʼalik,+
ka kʼubik a wóoleʼex tiʼ kʼasaʼanil yéetel tiʼ tuus,
ka confiareʼex tiʼ le baʼaloʼobaʼ.+
13 Yoʼolal le baʼax maʼ maʼalob ka beetkeʼexoʼ a kaajaleʼexeʼ bey junpʼéel pakʼ xiʼixikeʼ,
bey junpʼéel kaʼanal pakʼ tsʼoʼok u chʼéebel yéetel taʼaytak u níikileʼ.
Chéen ken téek lúubuk tiʼ junpʼéel súutuk maʼ táan u páaʼtaʼaliʼ.
14 Yaan u pʼuʼupʼuyaʼal jeʼex u pʼuʼupʼuyaʼal le tinajaʼob de kʼatoʼ,
tumen jach yaan u xiixkúuntaʼaleʼ maʼ kun pʼáatal mix junxéetʼ
utiaʼal u joʼopaʼal chúuk teʼ kʼáakʼoʼ
mix utiaʼal u joʼopaʼal jaʼ».
15 Lelaʼ letiʼe baʼax ku yaʼalik Kiʼichkelem Yuum Jéeoba, le Máax Santo yaan Israeloʼ:
«Utiaʼal a salvarkabaʼexeʼ unaj a suuteʼex tin wiknal yéetel u xuʼulul a beetkeʼex le baʼax táan a beetkeʼexoʼ.
Wa ka pʼáatleʼex tranquiloil yéetel ka weʼeskeʼex a kʼubmaj a wóoleʼex tiʼ teneʼ yaan u yantal a muukʼeʼex».+
Pero teʼexeʼ maʼ ta wóotaj a beeteʼexiʼ.+
16 Baʼaxeʼ ta waʼaleʼex: «¡Maas maʼalob ka púutsʼkoʼon yóoʼ tsíiminoʼob!».
Le oʼolal jach tu jaajil yaan a púutsʼleʼex.
Ta waʼaleʼex xan: «¡Yaan k-bin yóoʼ tsíiminoʼob chich u yáalkaboʼob!».+
Le oʼolal le máaxoʼob chʼaʼpachtikeʼexoʼ chich xan kun binoʼob ta paacheʼex.+
17 Mil u túulal tiʼ teʼexeʼ yaan u kikilankil chéen tu yoʼolal juntúul máak.+
Chéen cinco u túulal máakoʼob kun beetik u jóokʼol a wáalkabeʼex,
tak ken pʼáatkeʼex jeʼex junpʼéel cheʼ pʼichikbal tu juunal yóokʼol junpʼéel montañaeʼ,
jeʼex junpʼéel cheʼ tsʼaʼan bey señal yóokʼol junpʼéel puʼukeʼ.+
18 Jéeobaeʼ jach táan u páaʼtik u súutukil utiaʼal u yeʼesikteʼex u yutsil,+
letiʼeʼ yaan u líikʼil yéetel yaan u chʼaʼikteʼex óotsilil,+
tumen Jéeobaeʼ juntúul Dios ku beetik justicia.+
Kiʼimak u yóol tuláakal le máaxoʼob jach táan u páaʼtkoʼob* baʼax ken u beet Diosoʼ.+
19 Le kéen suunak u kaajil Sión utiaʼal u kaʼa kajtal Jerusaléneʼ,+ techeʼ maʼ bíin kaʼa okʼolnakechiʼ.+ Dioseʼ* seguro yaan u yeʼesiktech u yutsil kéen u yuʼub táan a sen kʼáatik áantaj, letiʼeʼ yaan u núukik a oración chéen pʼelak u yuʼubik.+ 20 Jéeobaeʼ yaan u beetik a muʼyaj, leloʼ yaan u pʼáatal bey a woʼocheʼ, yéetel yaan u pechʼ óoltikech,+ leloʼ yaan u pʼáatal bey jeʼex le jaʼ ka wukʼikoʼ. Chéen baʼaleʼ maʼ ken u kaʼa taʼakuba tiʼ teech le Máax jach maʼalob u kaʼansikechoʼ,+ a wichoʼobeʼ yaan u yilkoʼob le Máax jach maʼalob u kaʼansajoʼ. 21 Tsʼoʼoleʼ wa ka kʼéechleʼex ta x-noʼojeʼex bey xan wa ka kʼéechleʼex ta x-tsʼíikeʼexeʼ a xikneʼexeʼ yaan u yuʼubikoʼob junpʼéel tʼaan paachil tiʼ teʼex ku yaʼalik: «Lelaʼ letiʼe bejaʼ,+ xeeneʼexiʼ».+
22 Unaj a kʼaskúuntik a imagenoʼob yibaʼan plata tu paachoʼoboʼ bey xan a imagenoʼob de metal yibaʼan oro tu paachoʼoboʼ.+ Unaj a píikchʼintkoʼob jeʼex u píikchʼintaʼal junpʼéel nookʼ ku manchar tu kʼiinil menstruacióneʼ yéetel unaj a waʼaliktiʼob: «¡Maʼ in kʼáat in kaʼa ileʼexiʼ!».*+ 23 Dios túuneʼ yaan u beetik u kʼáaxal jaʼ tu yóokʼol le baʼax ka pakʼik ta terrenooʼ.+ Le luʼumoʼ yaan u piimtal u yich yéetel yaan u tsʼáaik maʼalob baʼaloʼob utiaʼal jaantbil.+ Teʼ kʼiinoʼob jeʼeloʼ a walakʼ baʼalcheʼobeʼ yaan u máan u janaloʼob tuʼux yaan yaʼab suʼuk.+ 24 Le wakaxoʼob yéetel le burroʼob ku meyajtikoʼob le luʼumoʼ yaan u tsʼaʼabal u jaantoʼob jejeláas maʼalob baʼaloʼob xaʼakʼtaʼanoʼob. Tuláakal le baʼaloʼobaʼ saltaʼan u sojliloʼob yéetel pala bey xan yéetel rastrillo. 25 Tu kʼiinil le nojoch xuʼulsaj le kéen lúubuk le nukuch torreʼoboʼ, tiʼ tuláakal nukuch montaña yéetel tiʼ tuláakal kaʼanal puʼukoʼobeʼ yaan u yáalkab jaʼiʼ yéetel yaan u beetik u beel le jaʼoʼ.+ 26 Le luna llenaoʼ yaan u juul jeʼex u juul le Kʼiinoʼ, le Kʼiinoʼ yaan u pʼáatal siete u téenel maas sáasil u juul, jeʼel bix u sáasilil siete díaseʼ.+ Bey kun úuchul le kʼiin ken u vendart Jéeoba le tuʼux uchaʼan loob tiʼ u kaajaloʼ+ bey xan le kʼiin ken u tsʼak le nojoch loob úuchtiʼ le ka tu jatsʼoʼ.+
27 ¡Ilawileʼex! Jéeobaeʼ desde náach ku taal.
Letiʼeʼ tʼaabal u kʼiʼikʼel, táan u taal yéetel box múuyaloʼob.
U chiʼeʼ bey chuup yéetel u sen pʼujaʼanileʼ,
u yaakʼeʼ bey junpʼéel kʼáakʼ ku tóokik baʼax yaan tu beeleʼ.+
28 U múus iikʼeʼ bey yaʼabkach jaʼ ku kʼuchul tak tu kaal le kaajoʼob
utiaʼal u suʼusutkoʼob yéetel u woʼoltikoʼob le kéen u xuʼulstiʼoboʼ.
Letiʼeʼ yaan u tsʼáaik junpʼéel freno tu chiʼ+ le kaajoʼob utiaʼal u biskoʼob tiʼ junpʼéel bej maʼ maʼalobiʼ.
29 Le kʼaay ken a beeteʼexoʼ bey jeʼex le kʼaay ka kʼaykeʼex de áakʼab
A puksiʼikʼaleʼex xaneʼ yaan u kiʼimaktal u yóol
jeʼex juntúul máak u chʼaʼamaj junpʼéel flauta
le táan u bin tu montaña Jéeoba, le máax bey junpʼéel nuxiʼ tuunich utiaʼal Israeloʼ.+
30 Jéeobaeʼ yaan u beetik u yuʼubaʼal u kíilbal u tʼaan,+
yaan u yeʼesik le páajtalil yaan tiʼ u kʼab+ le kéen u yéems tumen jach pʼujaʼanoʼ,+
yaan u taal yéetel junpʼéel kʼáakʼ ku tóokik baʼax yaan tu beel,+
yéetel kʼaʼamkach jaʼ,+ yéetel u jaatsʼ cháak bey xan yéetel nukuch bat.+
31 Le kéen tʼaanak Jéeobaeʼ yaan u sen kikilankil Asiria.+
Letiʼeʼ yaan u jatsʼik Asiria yéetel junxóotʼ cheʼ.+
32 Cada ken jaʼatsʼak Asiria yéetel le cheʼ tumen Jéeobaoʼ
yaan u paʼaxal panderetaʼob yéetel arpaʼob,+
bey kun úuchul cada ken u yéems u kʼab utiaʼal u jatsʼik
mientras táan u baʼateʼel tu yéeteloʼ.+
33 Tsʼoʼok u preparartaʼal le tuʼux kun xuʼulsbil tiʼ*+ Asiriaoʼ,
preparartaʼan xan utiaʼal le reyoʼ.+
Dioseʼ u beetmaj junpʼéel lugar taam yéetel kóoch
yéetel tsʼoʼok u nikkúuntik siʼiʼ, yaʼab siʼ yaniʼ yéetel maʼalob tʼaablil.
U múus iikʼ Jéeobaeʼ bey kʼáakʼ
kun taal utiaʼal u tʼabik le lugaroʼ.