1 Tesalonicenses
2 Jach jeʼex a wojlileʼexoʼ, sukuʼuneʼex, maʼ chéen kunel úuchik k-bin xíimbalteʼexiʼ.+ 2 Jeʼex a wojlileʼexeʼ toʼoneʼ beetaʼab k-muʼyaj yéetel taasaʼaboʼon mix baʼalil tu kaajil Filipos,+ chéen baʼaleʼ k-Dioseʼ tu yáantoʼon utiaʼal maʼ k-chʼaʼik saajkil k-tsikbaltteʼex le maʼalob baʼaloʼob ken u beetoʼ,+ lelaʼ t-beetaj kex táan k-sen chʼaʼpachtaʼal kaʼachi.* 3 Le baʼax k-aʼalikteʼex ka a beeteʼexoʼ jach maʼalob, maʼ táan k-aʼalikteʼex tumen kʼaas bix k-tuukuliʼ mix tumen wa k-kʼáat tuseʼexiʼ, 4 baʼaxeʼ k-aʼalikteʼex tumen Dioseʼ tu yéeyoʼon utiaʼal k-máan tsikbalt le maʼalob baʼaloʼob ken u beetoʼ. Tsʼoʼoleʼ maʼ táan k-aʼalik utiaʼal k-lúubul utsil tiʼ wa máaxiʼ, baʼaxeʼ utiaʼal k-lúubul utsil tiʼ Dios le máax xakʼaltik k-puksiʼikʼaloʼ.+
5 Tsʼoʼoleʼ a wojleʼex mix juntéen meyajnajtoʼon jatsʼuts tʼaanoʼob chéen utiaʼal k-kaxtik k-lúubul utsil tiʼ máak, yéetel mix juntéen t-beetaj wa baʼax chéen tumen táan k-tsʼíiboltik u tsʼaʼabaltoʼon wa baʼax.+ ¡Dioseʼ u yojel jaaj lelaʼ! 6 U jaajileʼ tumen u apóstoloʼon Cristoeʼ jeʼel u páajtal kaʼach k-kʼáatik ka a boʼotoʼoneʼexeʼ,+ chéen baʼaleʼ mix juntéen t-kaxtaj ka alabartaʼakoʼon tumen le máakoʼoboʼ mix ka a alabartoʼoneʼexiʼ. 7 Baʼaxeʼ le ka yanchajoʼon ta wiknaleʼexeʼ t-kanáanteʼex jeʼex u beetik juntúul maamatsil ku kanáantik yéetel yaabilaj u mejen paalaleʼ. 8 Bey túunoʼ tumen jach k-yaabiltmeʼexeʼ+ yéetel kiʼimak óolal t-tsikbaltajteʼex le maʼalob baʼaloʼob ken u beet Diosoʼ, yéetel jeʼel tak k-kʼubik k-kuxtal ta woʼolaleʼexeʼ.+
9 Jach in waʼalikeʼ, sukuʼuneʼex, kʼajaʼanteʼex bix úuchik k-tsʼáaik k-óol yéetel bix úuchik k-xupikba meyaj. Le ka t-tsikbaltajteʼex le maʼalob baʼaloʼob ken u beet Diosoʼ meyajnajoʼon bul kʼiin yéetel bul áakʼab tumen maʼ k-kʼáat ka xuupnak mix juntúul tiʼ teʼex t-oʼolaliʼ.+ 10 Sukuʼuneʼex, teʼexeʼ a wojleʼex jach t-tsʼáaj k-óol áanteʼex, mantatsʼ t-beetaj baʼax toj yéetel mix juntéen t-beetaj baʼax kʼaas tiʼ teʼex. Lelaʼ tak Dios u yojel jach jaaj. 11 Teʼexeʼ jach a wojleʼex mantatsʼ t-aʼalajteʼex baʼax unaj a beetkeʼex, t-líiʼsaj a wóoleʼex yéetel t-tsolaj u nuʼuk tiʼ teʼex+ jeʼex u beetik juntúul taatatsil+ yéetel u paalaleʼ. 12 Beyoʼ teʼexeʼ yaan u seguer a máaneʼex jeʼex uts tu tʼaan Dioseʼ,+ le máax tʼaneʼex utiaʼal ka a kʼameʼex u Reino+ yéetel u páajtaliloʼ.+
13 Toʼoneʼ maʼ tu xuʼulul k-tsʼáaik gracias tiʼ Dios,+ tumen le ka ta wuʼuyeʼex u tʼaan Dios t-tsikbaltajteʼexoʼ, ta kʼameʼex bey u tʼaan Dioseʼ maʼ bey u tʼaan máakoʼobeʼ. Sukuʼuneʼex, lelaʼ jach tu jaajil u tʼaan Dios yéetel táan u yáantkeʼex ichil a kuxtaleʼex. 14 Tumen teʼexeʼ, sukuʼuneʼex, ta beeteʼex jeʼex tu beetil u múuchʼuliloʼob Dios yéetel Cristo Jesús yanoʼob Judeaoʼ, tumen beetaʼab xan a muʼyajeʼex tumen a wéet luʼumileʼex+ jach jeʼex u beetaʼal u muʼyaj le múuchʼuliloʼob yanoʼob Judea tumen le judíoʼoboʼ. 15 Le máakoʼobaʼ kʼuch tak u kíimsoʼob Yuumtsil Jesús+ bey xan le profetaʼoboʼ yéetel tsʼoʼok xan u chʼaʼpachtikoʼonoʼob.+ Le judíoʼobaʼ maʼ tu lúubloʼob utsil tiʼ Dios yéetel maʼ u kʼáatoʼob ka xiʼik utsil tiʼ mix máakiʼ. 16 Letiʼobeʼ táan u yilkoʼob bix jeʼel u kʼatkoʼob k-beel utiaʼal maʼ k-tʼaan yéetel le j-táanxel luʼumiloʼoboʼ tumen maʼ u kʼáatoʼob ka u salvartubaʼobiʼ,+ le kéen u beetoʼob beyaʼ ku maas yaʼabkuntkoʼob u kʼebanoʼob. Chéen baʼaleʼ u pʼujaʼanil Dioseʼ tsʼoʼok u taal tu yóokʼoloʼob.+
17 Sukuʼuneʼex, le ka náachkuntaʼaboʼon ichil junpʼíit tiempo tiʼ teʼexeʼ toʼoneʼ t-beetaj tuláakal le ku páajtal utiaʼal k-kaʼa bin xíimbalteʼex, tumen jach taak k-ilkeʼex tu kaʼatéen (náachkuntaʼaboʼon, chéen baʼaleʼ maʼ xuʼul k-kʼaʼajsikeʼexiʼ). 18 Toʼoneʼ taakchaj k-bin ta wiknaleʼex. Teen Pabloeʼ kaʼatéen tin wóotaj biniʼ, chéen baʼaleʼ Satanáseʼ tu kʼataj k-beel. 19 ¿Baʼax le táan k-páaʼtikoʼ, yéetel máakalmáak le kiʼimak óolal yaantoʼonoʼ? ¿Máakalmáak le premio* ku taasiktoʼon kiʼimak óolal tu táan Yuumtsil Jesús tu kʼiiniloʼob way yaneʼ?* ¿Maʼ wa teʼexiʼ?+ 20 Jach beyoʼ teʼex beetik u jach kiʼimaktal k-óol.