Filipenses
3 In sukuʼuneʼex, maʼ u xuʼulul u kiʼimaktal a wóoleʼex tu yoʼolal Yuumtsil.+ Teneʼ maʼ nak óol in wilik in kaʼa tsʼíibtikteʼex le baʼaloʼobaʼ, tumen jeʼel u kanáantkeʼexoʼob utiaʼal maʼ u binteʼex kʼaasileʼ.
2 Kanáantabaʼex tiʼ le máaxoʼob beyoʼob peekʼoʼoboʼ,* kanáantabaʼex tiʼ le máaxoʼob ku beetkoʼob kʼaasoʼ, kanáantabaʼex tiʼ le máaxoʼob ku yaʼalikoʼob unaj u circuncidarkuba* máakoʼ.*+ 3 Toʼon, le máaxoʼob jach tu jaajil circuncidartaʼanoʼoboʼ,+ táan k-meyaj yéetel u espíritu santo Dios yéetel táan k-nojbaʼalkúuntikba tu yoʼolal Cristo Jesús,+ maʼ táan k-kʼubik k-óol tiʼ luʼumkabil baʼaloʼobiʼ. 4 Chéen baʼaleʼ wa yaan juntúul máax jach tu jaajil yaan baʼax oʼolal u kʼubik u yóol tiʼ luʼumkabil baʼaloʼobeʼ, le máak jeʼeloʼ teen.
Wa yaan máax ku tuklik yaan baʼax oʼolal u kʼubik u yóol tiʼ luʼumkabil baʼaloʼobeʼ, teneʼ maas yaan baʼax oʼolal in beetik: 5 circuncidartaʼaben ocho días síijken,+ síijen tu luʼumil Israel, tu tribu Benjamín, hebreoen tumen in taataʼobeʼ hebreoʼob,+ teen kaʼacheʼ juntúul fariseoen jach ku tsʼoʼokbesik le leyoʼ.+ 6 Teneʼ jach tin kʼubaj in wóol in chʼaʼpacht le múuchʼuliloʼ+ yéetel jach tin wilaj in beetik le baʼax ku yaʼalik le ley unaj u beetaʼaloʼ. 7 Kex beyoʼ, tuláakal le baʼaloʼob jach yaan u tojoloʼob in tiaʼal kaʼachoʼ, bejlaʼeʼ tu yoʼolal Cristoeʼ, tsʼoʼok in wilik minaʼan u tojoloʼob.*+ 8 U jaajileʼ kin wilik minaʼan u tojol tuláakal le baʼaloʼob wa ka in ket yéetel le u tojol le yaʼabkach baʼaloʼob tsʼoʼok in kanik tiʼ Cristo Jesús in Yuumtsiloʼ. Tu yoʼolal letiʼeʼ, teneʼ tsʼoʼok in xúumpʼattik tuláakal le baʼaloʼoboʼ yéetel kin wilkoʼob chéen bey u nikiʼ basuraeʼ.* Lelaʼ tin beetaj utiaʼal ka in tiaʼalint Cristo 9 bey xan utiaʼal ka ilaʼak junmúuchʼ yanilen tu yéetel, maʼ tu yoʼolal in toj kuxtal ikil in tsʼoʼokbesik le baʼax ku yaʼalik le Leyoʼ, baʼaxeʼ tu yoʼolal le toj kuxtal ku taal tiʼ u tsʼáaik u fe máak+ tiʼ Cristooʼ.+ Lelaʼ letiʼe u yaʼalaʼal toj u kuxtal máak tumen Dios tu yoʼolal le fejoʼ.+ 10 Teneʼ taak in kʼaj óoltik Cristo bey xan le páajtalil líiʼs ichil le kimenoʼoboʼ.+ Taak in muʼyaj jeʼex úuchik u muʼyaj letiʼoʼ+ yéetel taak in kíimil jeʼex kíimik letiʼoʼ,+ 11 utiaʼal beyoʼ in wilik wa jeʼel u páajtal in wantal ichil le máaxoʼob kun yáax líiʼsbiloʼob ichil le kimenoʼoboʼ.+
12 Lelaʼ maʼ táan in waʼalik wa tumen tsʼoʼok in kʼamik le premiooʼ, mix tumen wa tsʼoʼok in pʼáatal perfectoiliʼ, baʼaxeʼ mantatsʼ in tsʼaamaj in wóol+ utiaʼal in wilik wa jeʼel u páajtal in chukpachtik le baʼax oʼolal tu yéeyen Cristo Jesúsoʼ.+ 13 Sukuʼuneʼex, tak beoraaʼ maʼ tin wilkinba bey juntúul máak tsʼoʼok u kʼamik le baʼax aʼalaʼab u tsʼaʼabaltiʼoʼ, chéen baʼaleʼ yaan junpʼéel baʼal jach jaaj: tsʼoʼok in tuʼubsik le baʼaxoʼob yaan paachiloʼ+ yéetel táan in xachkinba in chukpacht le baʼaxoʼob yaan maas táaniloʼ.+ 14 Táan xan u seguer in tsʼáaik in wóol utiaʼal in chukpachtik le premiooʼ,+ lelaʼ letiʼe kuxtal teʼ kaʼan+ ken u tsʼáatoʼon Dios tu yoʼolal Cristo Jesúsoʼ. 15 Toʼon yiijchajaʼan k-tuukuleʼ tuukulnakoʼon beyoʼ,+ chéen baʼaleʼ wa ka tuukuleʼex yaanal bixeʼ, Dios kun eʼesikteʼex bix unaj a tuukuleʼex. 16 Jeʼel bixakeʼ, tak tuʼux tsʼoʼok k-náakleʼ, maʼ u xuʼulul k-bin táanil jeʼex tsʼoʼok k-beetkoʼ.
17 Sukuʼuneʼex, tuláakleʼexeʼ beeteʼex jeʼex in beetkoʼ,+ jach pakteʼex le máaxoʼob táan u máanoʼob jeʼel bix tsʼoʼok k-eʼesiktiʼoboʼ. 18 Tumen yaʼab máakoʼobeʼ —suuk kaʼach in chʼaʼchiʼitkoʼob, chéen baʼaleʼ beoraaʼ táan xan in wokʼol le kéen in chʼaʼchiʼitoʼob— táan u kuxtaloʼob bey enemigoʼob tiʼ u cheʼil u muʼyaj Cristoeʼ. 19 Le máakoʼobaʼ yaan u xuʼulsaʼaloʼob. U diosoʼobeʼ u nakʼoʼob, ku nojbaʼalkúuntkubaʼob tu yoʼolal le baʼaloʼob unaj u chʼaʼikoʼob suʼtaloʼ yéetel u tuukuloʼobeʼ chʼiikil tiʼ u baʼalubaʼob le luʼumaʼ.+ 20 Chéen baʼaleʼ toʼoneʼ, k-kaajaleʼ+ tiaʼan teʼ kaʼanoʼ+ yéetel táan k-jach páaʼtik juntúul salvador, k-Yuumtsil Jesucristo, le máax tiaʼan teʼ kaʼanoʼ.+ 21 Tiʼ letiʼeʼ yaan u meyaj u nojoch páajtalil utiaʼal u beetik u pʼáatal le k-wíinklil minaʼan u muukʼ jeʼex u kiʼichkelem wíinklil letiʼoʼ,+ yéetel utiaʼal ka u tsʼáa tuláakal baʼal yáanal u páajtalil.+