2 Corintios

7 Sukuʼuneʼex, in yaabiltmeʼex. Tu yoʼolal le baʼaxoʼob aʼalaʼan u tsʼaʼabaltoʼonoʼ+ koʼoneʼex limpiokíintikba tiʼ tuláakal baʼax jeʼel u yéekʼkuntik k-wíinklil yéetel k-tuukuleʼ,+ utiaʼal beyoʼ ka pʼáatkoʼon maas santoil ikil k-respetartik Dios.

2 Jeʼekʼabteʼex a puksiʼikʼaleʼex tiʼ toʼon.+ Toʼoneʼ maʼ k-beetmaj kʼaas tiʼ mix máakiʼ, maʼ k-kʼaskúuntmaj u kuxtal mix máakiʼ yéetel maʼ k-tusmaj mix máak utiaʼal k-kaxtik k-utsiliʼ.+ 3 Lelaʼ maʼ táan in waʼalik utiaʼal ka in juzgarteʼexiʼ. Tumen jeʼex tin yáax aʼalajteʼexeʼ, teʼexeʼ tiʼ yaneʼex t-puksiʼikʼaleʼ, beyoʼ wa ka kíimleʼexeʼ k-múul kíimil ta wéeteleʼex yéetel wa ka kuxtaleʼexeʼ k-múul kuxtal ta wéeteleʼex. 4 Jach yéetel u jaajil in wóol kin tʼankeʼex. Jach yaan baʼax oʼolal in nojbaʼalkúuntkinba ta woʼolaleʼex. Jach tsʼoʼok u líikʼil in wóol yéetel jach kiʼimak in wóol kex táan k-máansik yaʼab muʼyajil.+

5 U jaajileʼ le ka kʼuchoʼon Macedoniaeʼ+ maʼ yanchajtoʼon jeetsʼeliliʼ, baʼaxeʼ láayliʼ jejeláas bix táan kaʼach u beetaʼal k-muʼyajeʼ. Le máakoʼoboʼ tiaʼanoʼob kaʼach t-contraeʼ yéetel ichil le múuchʼuliloʼ yaan kaʼach saajkiliʼ. 6 Chéen baʼaleʼ Dios, le máax líiʼsik u yóol le máaxoʼob yaachajaʼan u yóoloʼoboʼ,+ tu líiʼsaj k-óol úuchik u yantal Tito t-iknal. 7 Chéen baʼaleʼ maʼ chéen úuchik u yantal t-iknaliʼ, baʼaxeʼ úuchik xan a líiʼskeʼex u yóol, tumen le ka suunaj t-iknaleʼ tu yaʼalaj jach a kʼáat a wileneʼex, jach yaachajaʼan a wóoleʼex yéetel jach ka tuukuleʼex tin woʼolal, le oʼolal maas jach kiʼimakchaj in wóol.

8 Kex tin beetaj u yaatal a wóoleʼex tu yoʼolal le baʼax tin tsʼíibtajteʼexoʼ,+ teneʼ maʼ tu yaatal in wóol. U jaajileʼ tu káajbaleʼ yaachaj in wóol (kin tsʼáaik cuentaeʼ le baʼax tin tsʼíibtajteʼexoʼ tu beetaj u yaatal a wóoleʼex, pero chéen junsúutuk). 9 Beora túunaʼ kiʼimak in wóol, maʼ tumen tin beetaj u yaatal a wóoleʼexiʼ, baʼaxeʼ tumen leloʼ tu yáanteʼex a kʼex a tuukuleʼex. Teʼexeʼ yaachaj a wóoleʼex jeʼex uts tu tʼaan Dioseʼ, le oʼolal jeʼel u páajtal k-aʼalikeʼ maʼ t-loobiltaj a puksiʼikʼaleʼex yéetel le baʼax t-aʼaloʼ. 10 Tumen u yaatal u yóol máak tu táan Dioseʼ ku beetik u kʼexik u tuukul utiaʼal ka yanak salvación tiʼ, lelaʼ maʼ unaj u beetik u yaatal u yóol máakiʼ.+ Chéen baʼaleʼ le u yaatal u yóol máak jeʼex u beetik le yóokʼol kaabaʼ ku bisik máak tiʼ kíimil. 11 ¡Ilawileʼex bukaʼaj utsil tsʼoʼok u taasikteʼex úuchik u yaatal a wóoleʼex jeʼex uts tu tʼaan Dioseʼ! ¡Tu beetaj a weʼeskeʼex minaʼan baʼax kʼaas a beetmeʼex!, ¡tu beetaj a pʼektikeʼex baʼax kʼaas!, ¡tu beetaj a maas respetarkeʼex Dios!, ¡tu beetaj a jach tsʼíiboltkeʼex a kʼexik a tuukuleʼex!, ¡tu beetaj a jach tsʼáaik a wóoleʼex!, ¡tu beetaj a wutskíintikeʼex le problemaoʼ!+ Tiʼ tuláakal baʼax ta beeteʼexeʼ ta weʼeseʼex minaʼanteʼex u culpail le baʼax úuchoʼ. 12 Kex tsʼíibnajen tiʼ teʼexeʼ, maʼ tin beetaj tu yoʼolal le máax kʼebanchajoʼ mix tu yoʼolal le máax beetaʼab kʼaas tiʼoʼ,+ baʼaxeʼ tsʼíibnajen utiaʼal k-ilik wa jeʼel a weʼeskeʼex tu táan Dios jach tu jaajil taak a wuʼuyikeʼex k-tʼaaneʼ. 13 Leloʼ ku beetik u líikʼil k-óol.

Chéen baʼaleʼ, kex tsʼoʼok u líikʼil k-óoleʼ, beoraaʼ maas ku kiʼimaktal k-óol yoʼolal u kiʼimak óolal Tito, tumen tuláakleʼex ta líiʼseʼex u yóol. 14 Tumen wa tsʼoʼok in tʼaan maʼalob ta woʼolaleʼex tu táan Titoeʼ, maʼ ta pʼateneʼex kʼaasiliʼ. Tumen jeʼex jaaj tuláakal le baʼaxoʼob t-aʼalajteʼexoʼ bey xan jaaj le baʼaxoʼob maʼalobtak t-aʼalaj tiʼ Tito ta woʼolaleʼexoʼ. 15 Tsʼoʼoleʼ le nojoch yaabilaj ku yuʼubik Tito ta woʼolaleʼexoʼ ku maas nojochtal le kéen kʼaʼajaktiʼ jach ka wuʼuyikeʼex tʼaan,+ bey xan le kéen kʼaʼajaktiʼ bix úuchik a jach respetarkeʼex le ka ta kʼameʼexoʼ. 16 Jach kiʼimak in wóol, tumen tiʼ tuláakal baʼaleʼ jeʼel u páajtal in confiar tiʼ teʼexeʼ.*