Génesis

22 Ka tsʼoʼok túun leloʼ, junpʼéel kʼiineʼ le u jaajil Diosoʼ tu chʼaʼtuklaj u yilik bukaʼaj nojchil u fe Abrahán,+ ka tu yaʼalajtiʼ: «¡Abrahán!». Letiʼeʼ tu núukajtiʼ: «¡Way yaneneʼ!». 2 Dios túuneʼ tu yaʼalajtiʼ: «Chʼaʼ a hijo Isaak,+ le a juntúuliliʼ hijo jach a yaabiltmoʼ.+ Tsʼoʼoleʼ xeen tu luʼumil Moria.+ Tiʼ junpʼéel tiʼ le montañaʼob ken in weʼestech teʼeloʼ, tiʼ unaj a kʼubikten Isaak bey junpʼéel tóokbil ofrendaeʼ».

3 Jach temprano túuneʼ Abraháneʼ líikʼeʼ ka tu tsʼáaj u montura u yalakʼ burro, tu chʼaʼaj xan kaʼatúul u sirvienteʼob bey xan Isaak u hijo. Tu bujaj xan u siʼil le tóokbil ofrenda ken u kʼuboʼ ka káaj u binoʼob tak teʼ tuʼux aʼalaʼabtiʼ tumen le u jaajil Diosoʼ. 4 Tu tres días túun káajak u binoʼobeʼ, Abraháneʼ tu líiʼsaj u paakateʼ ka tu yilaj le lugar desde náachiloʼ. 5 Abrahán túuneʼ tu yaʼalaj tiʼ u sirvienteʼob: «Teʼexeʼ way a pʼáatleʼex yéetel le burrooʼ, chéen baʼaleʼ teen yéetel in hijoeʼ yaan k-bin adorar tak teʼeloʼ, le kéen tsʼoʼokkeʼ k-suut».

6 Le ka tsʼoʼokeʼ Abraháneʼ tu chʼaʼaj u siʼil le ofrenda ken u tóokoʼ ka tu tsʼáaj tiʼ Isaak utiaʼal u kuche. Tsʼoʼoleʼ tu chʼaʼaj le kʼáakʼ yéetel le cuchillooʼ ka seguernaj u xíimbaloʼob. 7 Isaak túuneʼ tu yaʼalaj tiʼ Abrahán: «¡Papá!». Abraháneʼ tu núukajtiʼ: «¿Baʼaxiʼ hijo?». Ka túun tu yaʼalaj Isaak: «Yaantoʼon u kʼáakʼil bey xan u siʼil le ofrenda ken a tóokoʼ, pero ¿tuʼux yaan le tamanoʼ?». 8 Abraháneʼ tu núukajtiʼ: «Hijo, Dios ken u tsʼáa le taman utiaʼal le tóokbil ofrendaoʼ».+ Tu kaʼatúulaloʼob túuneʼ seguernaj u xíimbaloʼob.

9 Le ka túun kʼuchoʼob teʼ lugar tuʼux aʼalaʼabtiʼ tumen le u jaajil Diosoʼ, Abraháneʼ tu beetaj junpʼéel altareʼ ka tu tsʼapaj le siʼ yóokʼoloʼ. Tsʼoʼoleʼ ka tu kʼaxaj u kʼab yéetel u yook Isaakeʼ ka tu chikúuntaj yóokʼol le altar tuʼux u tsʼapmaj le siʼoʼ.+ 10 Abrahán túuneʼ tu tichʼaj u kʼabeʼ ka tu chʼaʼaj le cuchillo utiaʼal u kíimsik u hijooʼ.+ 11 Chéen baʼaleʼ u ángel Jéeobaeʼ, desde teʼ kaʼanoʼ, tu tʼaneʼ ka tu yaʼalajtiʼ: «¡Abrahán, Abrahán!». Letiʼeʼ tu núukajtiʼ: «¡Way yaneneʼ!». 12 Le ángel túunoʼ tu yaʼalajtiʼ: «Maʼ a kíimsik le xiʼipaloʼ yéetel maʼ a beetik mix junpʼéel loob tiʼ. Tumen beoraaʼ tsʼoʼok in wilkeʼ jach tu jaajil ka beetik tuláakal baʼax ku yaʼaliktech Dios, tumen ta wóotaj a kʼubten a hijo, kex chéen letiʼe juntúuliliʼ yaantechoʼ».+ 13 Le ka túun tu líiʼsaj u paakat Abraháneʼ tu yileʼ maʼ sen náach tiʼ letiʼeʼ tiaʼan juntúul taman leechel u baak tiʼ junkúul cheʼ. Abrahán túuneʼ bineʼ ka tu chʼaʼaj le tamanoʼ ka tu tóokaj utiaʼal u kʼubik tu lugar u hijooʼ. 14 Le oʼolal Abraháneʼ tu tsʼáaj u kʼaabaʼt le lugaroʼ Jéeoba-yiré.* Le beetik tak bejlaʼeʼ suuk u yaʼalaʼal lelaʼ: «Jéeobaeʼ yaan u tsʼáaik le baʼax kun kʼaʼabéettal teʼ tu montañaoʼ».+

15 U ángel Jéeobaeʼ tu kaʼa tʼanaj Abrahán desde teʼ kaʼanoʼ, 16 ka tu yaʼalajtiʼ: «Jéeobaeʼ ku yaʼalik:+ ‹Yoʼolal le baʼax tsʼoʼok a beetkaʼ yéetel tumen ta wóotaj a kʼubten a juntúuliliʼ hijooʼ,+ kin jurartiktech yoʼolal in kʼaabaʼeʼ, 17 teneʼ jach tu jaajil yaan in bendecirkech yéetel jach tu jaajil yaan in beetik u yaʼabtal a chʼiʼibal* bey jeʼex le estrellaʼob yanoʼob teʼ kaʼanoʼ yéetel bey jeʼex le arena yaan tu jáal le kʼáaʼnáaboʼ.+ A chʼiʼibal xaneʼ yaan u chʼaʼik le kaajoʼob tuʼux yaan u enemigoʼoboʼ.+ 18 Tsʼoʼoleʼ tu yoʼolal a chʼiʼibaleʼ+ tuláakal le luʼumoʼob yaan yóokʼol kaaboʼ yaan u bendecirtaʼaloʼob, tumen techeʼ ta wuʼuyaj in tʼaan›».+

19 Ka tsʼoʼok túun leloʼ Abraháneʼ suunaj tuʼux yaan u sirvienteʼoboʼ, líikʼoʼobeʼ ka suunajoʼob Beer-seba.+ Abrahán túuneʼ pʼáat kajtal Beer-seba.

20 Juntéenjeakil túuneʼ aʼalaʼab tiʼ Abrahán: «Milkáeʼ tsʼoʼok xan u yantal u paalal yéetel a sukuʼun Nakor:+ 21 u yáax hijoeʼ Uz, u kaʼatúuleʼ Buz, u yóoxtúuleʼ Kemuel, u papá Aram. 22 Uláakʼ u hijoʼob Milkáeʼ: Késed, Azó, Pildás, Jidlaf yéetel Betuel».+ 23 Betueleʼ u papá Rebeca.+ Lelaʼ letiʼe ocho hijoʼob yanchaj tiʼ Milká yéetel Nakor, u sukuʼun Abrahánoʼ. 24 Nakoreʼ yanchaj uláakʼ juntúul u yatan,* u kʼaabaʼeʼ Reumá. Letiʼeʼ yanchaj xan u hijoʼob tu yéetel, u kʼaabaʼobeʼ Teba, Gajam, Taas, yéetel Maaká.