Sofonías
1 Lelaʼ letiʼe baʼaxoʼob tu yaʼalaj Jéeoba* tiʼ Sofonías* tu kʼiiniloʼob Josías+ u hijo Amón+ u reyil Judáaʼ. Sofonías kaʼacheʼ u hijo Cusí, Cusíeʼ u hijo Guedalías, Guedalíaseʼ u hijo Amarías, yéetel Amaríaseʼ u hijo Ezequías.
2 Jéeobaeʼ ku yaʼalik: «Yaan in xuʼulsik tiʼ tuláakal baʼax yaan teʼ luʼumoʼ».+
3 Jéeobaeʼ ku yaʼalik: «Yaan in xuʼulsik tiʼ le wíinikoʼoboʼ bey xan tiʼ le baʼalcheʼoboʼ,
yaan in xuʼulsik tiʼ le chʼíichʼoʼob yanoʼob teʼ kaʼanoʼ bey xan tiʼ le kayoʼob yanoʼob ichil le kʼáaʼnáaboʼ,+
yaan in xuʼulsik tiʼ le baʼaloʼob ku beetik u tʼóochpajal máakoʼ*+ bey xan tiʼ le kʼasaʼan máakoʼoboʼ.
Yaan in xuʼulsik tiʼ le máakoʼob teʼ yóokʼol kaaboʼ.
4 Yaan in líiʼsik in kʼab tu contra Judá
yéetel tu contra tuláakal u kajnáaliloʼob Jerusalén.
Tiʼ tuláakal baʼax yaan yil yéetel Baal+ teʼ lugaraʼ yaan in xuʼulsiktiʼ,
yaan in beetik maʼ u kaʼa kʼaʼajsaʼal le sacerdoteʼob meyajtik le yaanal diosoʼoboʼ bey xan le u maasil sacerdoteʼoboʼ.+
5 Yaan in xuʼulsik tiʼ le máaxoʼob ku naʼakloʼob teʼ techo utiaʼal u chintaloʼob tu táan le baʼaloʼob yanoʼob teʼ kaʼanoʼ.+
Yaan in xuʼulsik tiʼ le máaxoʼob ku chintaloʼob tu táan Jéeoba+ yéetel ku yaʼalikoʼob yaan u adorarkoʼob chéen letiʼoʼ,
chéen baʼaleʼ ku yaʼalikoʼob xan tiʼ Malcam* chéen letiʼ ken u adorartoʼob.+
6 Yaan in xuʼulsik tiʼ le máaxoʼob ku náachtaloʼob tiʼ Jéeobaoʼ,+
bey xan tiʼ le máaxoʼob maʼ tu kaxtikoʼob Jéeoba mix le nuʼuktaj ku tsʼáaikoʼ».+
7 Mak a chiʼex tu táan Jéeoba, le máax yaan tuláakal autoridad tiʼoʼ, tumen u kʼiinil Jéeobaeʼ táan u náatsʼal.+
Jéeobaeʼ tsʼoʼok u preparartik junpʼéel sacrificio, tsʼoʼok u pʼatik limpioil le máaxoʼob u yaʼalmaj ka xiʼikoʼoboʼ.
8 «Tu kʼiinil le sacrificiooʼ, teen Jéeobaeʼ, yaan in castigartik le príncipeʼoboʼ,
u paalaloʼob le reyoʼ+ bey xan le máaxoʼob ku búukintikoʼob le nookʼ ku tsʼáaik le j-táanxel luʼumiloʼoboʼ.
9 Teʼ kʼiin jeʼeloʼ yaan xan in castigartik tuláakal le máaxoʼob yanoʼob naatsʼ teʼ tronooʼ,
le máaxoʼob maʼ tu xuʼulul u tuusoʼob yéetel u beetkoʼob loob tu yotoch u tsʼuuliloʼoboʼ».
10 Jéeobaeʼ ku yaʼalik: «Teʼ kʼiin jeʼeloʼ
yaan u yuʼubaʼal u yáakam máak desde teʼ joonaj ku kʼaabaʼtik u Joonajil Kayoʼ,+
yaan u yuʼubaʼal u yúuchul awat okʼol desde teʼ Túumben Colonia yaan teʼ kaajoʼ,+
yéetel desde teʼ puʼukoʼoboʼ* yaan u yuʼubaʼal u wáakʼal wa baʼax.
11 U kajnáalileʼex Maktés,* awat okʼolnakeʼex,
tumen tsʼoʼok u xuʼulsaʼal* tiʼ tuláakal le máaxoʼob ku koonoloʼoboʼ,
tsʼoʼok u xuʼulsaʼal tiʼ tuláakal le máaxoʼob ku pesarkoʼob plataoʼ.
12 Teʼ kʼiinoʼob jeʼeloʼ yaan in máan in kaxt Jerusalén yéetel lámparaʼob.
Teneʼ yaan in castigartik le máaxoʼob maʼakʼóoloʼoboʼ, le máaxoʼob ku yaʼalikoʼob ichil u puksiʼikʼaloʼoboʼ:
‹Jéeobaeʼ maʼ ken u beet mix baʼal, mix uts mix kʼaas›.+
13 Le baʼaloʼob yaantiʼoboʼ yaan u láaj toʼokoltiʼob yéetel yaan u niʼikil u yotochoʼob.+
Letiʼobeʼ yaan u beetik u yotochoʼob, chéen baʼaleʼ maʼ kun kajtaloʼobiʼ,
yaan u pakʼikoʼob uva, chéen baʼaleʼ maʼ ken u yukʼoʼob vino.+
14 ¡U nojoch kʼiinil Jéeobaeʼ naatsʼ yanil!+
¡Naatsʼ yanil, yéetel séebaʼan u taal!+
U juum u taal u kʼiinil Jéeobaeʼ ku beetik u sen sajaktal máak.+
Teʼ kʼiin jeʼeloʼ juntúul soldadoeʼ yaan u kʼaʼam awat.+
15 Teʼ kʼiin jeʼeloʼ jach yaan u pʼuʼujul Dios,+
yaan u sen yaatal u yóol máak yéetel yaan u sen muʼyaj,*+
yaan u yantal kʼaʼamkach jaʼ yéetel xuʼulsajil.
Le kʼiin jeʼeloʼ yaan u yéeʼjochʼeʼental yéetel jach yaan u booxtal,+
yaan u nookoytal yéetel yaan u yantal box múuyaloʼob.+
16 Teʼ kʼiin jeʼeloʼ le kaajoʼ yaan u yustik baak yéetel yaan u yawat utiaʼal u bin baʼateʼel,+
yaan u bin baʼateʼel tu contra le kaajoʼob yaan u baʼpakʼiloʼoboʼ yéetel tu contra le kaʼanal torreʼob yanoʼob tu esquinail le pakʼoʼoboʼ.+
17 Yaan in beetik u sen muʼyaj le máakoʼoboʼ,
yéetel yaan u máanoʼob jeʼex u máan le chʼóopoʼoboʼ,+
tumen tu contra Jéeoba kʼebanchajoʼob.+
U kʼiʼikʼeloʼobeʼ yaan u peʼechaʼtaʼal jeʼex le luʼumoʼ,
yéetel u bakʼeloʼobeʼ* yaan u pʼáatal jeʼex u taʼ baʼalcheʼeʼ.+
18 Teʼ kʼiin ken pʼuʼujuk Jéeobaoʼ maʼ kun salvarbiloʼob tumen le plataoʼ mix tumen le oro yaantiʼoboʼ.+
U pʼujaʼanil Dioseʼ bey junpʼéel kʼáakʼ yaan u tóokik tuláakal le luʼumoʼ.+
Letiʼeʼ yaan u xuʼulsik tiʼ tuláakal u kajnáaliloʼob yóokʼol kaab, jach kʼaas le xuʼulsajil ken u taasoʼ».+