Isaías
26 Teʼ kʼiin jeʼeloʼ tu luʼumil Judáeʼ+ yaan u kʼaʼayal le kʼaayaʼ:+
«K-kaajaleʼ jach yaan u páajtalil.+
Dioseʼ ku salvartik máak, jeʼex u beetik junpʼéel nuxiʼ pakʼ bey xan junpʼéel kaʼanal lugareʼ.+
2 Jeʼekʼabteʼex le joonajoʼob+ utiaʼal ka okok le kaaj ku beetik baʼax tojoʼ,
le kaaj chúukaʼan u yóol u beet baʼax maʼaloboʼ.
3 Techeʼ yaan a kanáantik le máaxoʼob kʼáatiktech áantajoʼ.
4 Mantatsʼ ka a kʼub a wóoleʼex tiʼ Jéeoba.+
Jéeobaeʼ* junpʼéel Tuunich, Jéeobaeʼ junpʼéel Tuunich utiaʼal kʼiinoʼob minaʼan u xuul.+
5 Letiʼeʼ tsʼoʼok u beetik u lúubul le máaxoʼob kajaʼanoʼob kaʼanaloʼ, le kaaj kaʼanal yaniloʼ.
Letiʼeʼ ku beetik u níikil,
ku beetik u lúubul tak luʼum.
Ku beetik u jáayal u xiixel tak luʼum.
6 Yaan u yayaʼchaʼataʼal,
yaan u yayaʼchaʼataʼal tumen le máaxoʼob ku muʼyajoʼob yéetel tumen le óotsiloʼoboʼ».
7 Le utsul máakoʼ toj u beel.*
In Dios, tumen ka beetik baʼax tojeʼ
yaan a táaxkuntik u beel le utsul máakoʼ.
8 Jéeoba Dios, tiʼ teech k-kʼubmaj k-óol
mientras táan k-bin tu bejil le justiciaoʼ.
Toʼoneʼ k-yaabiltmaj a kʼaabaʼ yéetel k-tsʼíiboltik maʼ u tuʼubsaʼal.
9 De áakʼabeʼ teneʼ jach tu jaajil in wóol kin yaayamtikech,
jach beyoʼ, kin kaxtikech yéetel tuláakal in puksiʼikʼal.+
Le kéen a beet justicia way luʼumeʼ
u kajnáaliloʼobeʼ ku kankoʼob baʼax le justiciaoʼ.+
10 Kex ka eʼesaʼak utsil tiʼ juntúul kʼasaʼan máakeʼ,
letiʼeʼ maʼ ken u kan u beet baʼax maʼalob.+
Tak teʼ luʼum tuʼux ku beetaʼal baʼax tojoʼ, letiʼeʼ yaan u beetik baʼax kʼaas,+
le oʼolal maʼ ken u yil le páajtalil yaan tiʼ Jéeobaoʼ.+
11 Jéeoba Dios, kex a líiʼsmaj a kʼabeʼ letiʼobeʼ maʼatech u yilkoʼob.+
Le kéen u yiloʼob bukaʼaj a yaabiltmil a kaajaleʼ yaan u suʼlaktaloʼob.
Le kʼáakʼ ku taal tiʼ techoʼ yaan u xuʼulsik tiʼ a enemigoʼob.
12 Jéeoba Dios, teech beetik u yantaltoʼon jeetsʼelil,+
tuláakal baʼax tsʼoʼok k-beetkeʼ
teech tsʼáatoʼon u muukʼil k-beetik.
13 Jéeoba Dios, yaan máaxoʼob tsʼoʼok u gobernaroʼob t-óokʼol aparte tiʼ teech,+
chéen baʼaleʼ k-Dios, chéen a kʼaabaʼ k-kʼaʼajsik.+
14 Letiʼobeʼ kimenoʼob, maʼ kun kaʼa kuxtaloʼob.
Mix baʼal ku páajtal u beetkoʼob, maʼ kun kaʼa líikʼloʼob.+
Tumen tsʼoʼok a sutkaba tu tojiloʼob utiaʼal a xuʼulsiktiʼob
yéetel utiaʼal a beetik u tuʼubsaʼaloʼob.
15 Jéeoba Dios, tsʼoʼok a nojochkíintik le kaajoʼ,
tsʼoʼok a beetik u nojochtal le kaajoʼ.
Tsʼoʼok a weʼesik minaʼan uláakʼ jeʼex techeʼ.+
Tsʼoʼok a beetik u maas nojochtal u luʼumil Israel.+
16 Jéeoba Dios, letiʼobeʼ tu natsʼubaʼob ta wiknal tu kʼiinil táan u muʼyajoʼob.
Le táan a tojkíintikoʼoboʼ orarnajoʼob tiʼ teech yéetel u jaajil u yóoloʼob.+
17 Jéeoba Dios, tu yoʼolal le baʼax ka beetkoʼ
k-muʼyaj yéetel k-tataj awat
jeʼex juntúul koʼolel embarazada jach taʼaytak u yantal u chaambaleʼ.
18 Pʼáatoʼon bey koʼolel embarazadaeʼ, t-uʼuyaj u kʼiʼinamil u síijsaʼal paalal,
chéen baʼaleʼ mix baʼal t-síijsaj.
Maʼ t-taasaj salvación tiʼ le luʼumoʼ,
maʼ síij mix máak utiaʼal u kajtal teʼ luʼumoʼ.
19 «Yaan u kaʼa kuxtal le máaxoʼob kimenoʼob techoʼ.
Yaan u kaʼa líikʼil le máaxoʼob kimenoʼob tenoʼ.+
Teʼex tiaʼaneʼex teʼ luʼumoʼ,
¡ajakeʼex, awatnakeʼex yéetel kiʼimak óolal!
Tumen le pʼuuljaʼ ku lúubul ta wóokʼoloʼ bey jeʼex le pʼuuljaʼ ku yantal tempranooʼ,+
le luʼumoʼ yaan u jóoʼsik le kimenoʼob yaan ichiloʼ.*
Taʼakaba junsúutuk,
páaʼt u máan u pʼujaʼanil Dios.+
21 ¡Uʼuy a wuʼuy lelaʼ! Jéeobaeʼ yaan u lukʼul teʼ tuʼux yanoʼ,
yaan u taal u beet cuenta yéetel u kajnáaliloʼob luʼum yoʼolal le baʼax u beetmoʼoboʼ.
Le luʼumoʼ yaan u yeʼesik le kʼiʼikʼ wekaʼan tu yóokʼoloʼ,
yéetel maʼ ken u taʼak le máaxoʼob kíimsaʼanoʼoboʼ».