Jeremías
10 U kaajil Israel, jach uʼuyeʼex le baʼax tsʼoʼok u yaʼalik Jéeoba ta woʼolaleʼexoʼ. 2 Lelaʼ letiʼe baʼax ku yaʼalik Jéeobaaʼ:
«Maʼ a beetkeʼex le baʼax suuk u beetik le kaajoʼoboʼ,+
yéetel maʼ a kikilankileʼex tu yoʼolal le señaloʼob ku yilaʼaloʼob teʼ kaʼan
jeʼex u kikilankil le kaajoʼob tu yoʼolaloʼoboʼ.+
3 Tumen chéen kunel* le baʼax suuk u beetik le kaajoʼoboʼ.
Juntúul máakeʼ ku chʼakik junkúul cheʼ teʼ kʼáaxoʼ,
tsʼoʼoleʼ ku póolik junpʼéel imagen yéetel le cheʼoʼ.+
4 Le máakoʼoboʼ ku meyajtiʼob plata yéetel oro utiaʼal u jatsʼutskíintikoʼob,+
tsʼoʼoleʼ utiaʼal maʼ u lúubuleʼ ku meyajtiʼob martillo yéetel clavos utiaʼal u clavarkoʼob.+
5 Le imagenoʼoboʼ maʼ tu páajtal u tʼaanoʼob,+ chéen beyoʼob junpʼéel jaʼasaj óol chʼíichʼ tsʼaʼan tuʼux pakʼaʼan pepinoeʼ.
Letiʼobeʼ kʼaʼabéet u kuʼuchul bisbiloʼob tumen maʼ tu páajtal u xíimbaloʼob.+
Maʼ a sajaktaleʼex tiʼ letiʼob tumen maʼ tu páajtal u beetkoʼob loob,
mix tu páajtal xan u beetkoʼob uts».+
6 Jéeoba Dios, minaʼan uláakʼ jeʼex techeʼ.+
Techeʼ jach yaan a muukʼ, a kʼaabaʼeʼ tuláakal tuʼux kʼaj óolaʼan yéetel jach yaan u páajtalil.
7 Teech u Reyil tuláakal le luʼumoʼoboʼ,+ ¿máax maʼ ken u chʼaʼtech saajkil? Techeʼ jach ka náajmatik ka respetartaʼakech.
Ichil tuláakal le máaxoʼob yaan u naʼatoʼob yaan tiʼ tuláakal le kaajoʼob yéetel tiʼ tuláakal le luʼumoʼoboʼ
minaʼan mix juntúul jeʼex techeʼ.+
8 Tuláakloʼobeʼ tercoʼob yéetel minaʼan u naʼatoʼob.+
Junpʼéel imagen beetaʼan yéetel cheʼeʼ chéen ku beetik u bin máak tu paach baʼaloʼob minaʼan u biilal.*+
9 Desde Tarsis+ ku taasaʼal platoʼob de plata yéetel desde Ufaz ku taasaʼal oro,
le baʼaloʼobaʼ ku meyaj tiʼ le máax ku póol cheʼ yéetel tiʼ le máax meyajtik metal utiaʼal u jatsʼutskíintikoʼob le cheʼ póolaʼanoʼ.
U nookʼ le imagenoʼoboʼ beetaʼan yéetel hilo azul bey xan yéetel lana* color morado.
Le imagenoʼoboʼ beetaʼanoʼob tumen máaxoʼob jach u yojel u beetoʼob.
10 Chéen baʼaleʼ Jéeobaeʼ jach tu jaajil Dios.
Letiʼ le Dios kuxaʼanoʼ+ yéetel le Rey utiaʼal mantatsʼoʼ.+
Le kéen pʼuʼujukeʼ tak le luʼum kun kikilankiloʼ,+
yéetel le kéen tsʼíikilnakeʼ mix junpʼéel kaaj kun pʼáatal waʼatal tu táan.
11 * Lelaʼ letiʼe baʼax unaj a waʼaliktiʼobaʼ:
«Le diosoʼob maʼ tu beetoʼob kaʼan yéetel luʼumoʼ
mix juntúul kun pʼáatal way luʼumeʼ mix yáanal kaʼan».+
12 Chéen baʼaleʼ Dioseʼ tu beetaj le luʼum yéetel le poder yaantiʼoʼ.
Yéetel u naʼateʼ tu beetaj le luʼum utiaʼal u pʼáatal mantatsʼoʼ.+
Le naʼat yaantiʼoʼ meyajnajtiʼ utiaʼal u jayik le kaʼanoʼ.+
13 Le kéen juumnak u tʼaaneʼ,
ku woʼoltikuba le jaʼob yaan teʼ kaʼanoʼ,+
yéetel ku beetik u líikʼil le múuyaloʼob* desde tu xuul yóokʼol kaaboʼ.+
Letiʼeʼ ku beetik u yantal rayoʼob le kéen kʼáaxak jaʼ,*
yéetel ku beetik u jóokʼol le iikʼ teʼ tuʼux u taʼakmoʼ.+
14 Tuláakal máakeʼ terco yéetel minaʼan u naʼat.
Tuláakal máax meyajtik metaleʼ yaan u paʼajal u suʼtal tu yoʼolal le imagen u beetmoʼ.+
15 Tuláakloʼobeʼ mix baʼal u biilaloʼob,* tu yoʼolaloʼobeʼ ku yaʼalaʼal baʼal tiʼ máak.+
Le kéen kʼuchuk u kʼiinil u kʼáataʼaltiʼob cuentaeʼ yaan u xuʼulsaʼaltiʼob.
16 Pero u Dios Jacobeʼ* maʼ bey jeʼex le imagenoʼoboʼ.
U Dios Jacobeʼ letiʼ beetmil tuláakal baʼal,
yéetel Israeleʼ letiʼe baʼax maas jatsʼuts yaantiʼoʼ.+
U kʼaabaʼeʼ Jéeoba, le máax gobernartik le ángeloʼoboʼ.+
17 Koʼolel, techeʼ baʼpachtaʼanech,
chʼaʼ a kuuch pekekbal teʼ luʼumoʼ.
18 Tumen Jéeobaeʼ ku yaʼalik:
«Beoraaʼ teneʼ nikaʼaj in xáakchʼint u kajnáaliloʼob le luʼumaʼ,+
yéetel yaan in beetik u sen muʼyajoʼob».
19 ¡Jach óotsilen tu yoʼolal baʼax ku yúuchulten!+
Maʼ tu páajtal u tsʼaʼakal le loob uchaʼantenoʼ.
Le oʼolal tin waʼalaj: «Jach yaj le kʼojaʼanil yaantenaʼ, kʼaʼabéet u chúukpajal in wóol in muʼyajte.
20 Tsʼoʼok u kʼaskúuntaʼal le naj de nookʼ yaantenoʼ yéetel tsʼoʼok u kóotspaytaʼal u suumiloʼob.+
Tsʼoʼok in xúumpʼattaʼal tumen in paalaloʼob, tsʼoʼok u pʼáatal minaʼan in paalal.+
Minaʼan mix máak utiaʼal u waʼakúuntik le naj de nookʼ yaantenoʼ, minaʼan mix máak líiʼsik u nookʼiloʼob.
21 Le j-kanan tamanoʼoboʼ tsʼoʼok u yeʼeskoʼob minaʼan u naʼatoʼob,+
yéetel maʼatech u kaxtikoʼob u nuʼuktaj Jéeoba.+
Le oʼolal chéen minaʼan u cuentail baʼax ku beetkoʼob,
yéetel tsʼoʼok u kʼiʼitpajal tuláakal u yalakʼ baʼalcheʼob».+
22 ¡Uʼuy a wuʼuyeʼex baʼax ku yaʼalaʼal!
Yaan junpʼéel baʼal ku taal u kíilbal tu tojil xaman,+
táan u taal utiaʼal u chʼéejsik u kajnáaliloʼob Judá, chéen chacaloʼob* kun kajtal tu kaajiloʼob.+
23 Jéeoba Dios, teneʼ jach in wojleʼ wíinikeʼ maʼ tu páajtal u nuʼuktik u kuxtal.
Máakeʼ maʼ tu páajtal mix tak u yéeyik tuʼux kun xíimbal.+
24 Jéeoba Dios, tojkíinten jeʼex a wilik maʼalobeʼ,
pero maʼ a beetik ichil a pʼujaʼanil+ utiaʼal maʼ a xuʼulsken.+
25 Láal a pʼujaʼanil yóokʼol le luʼumoʼob maʼ tu beetkoʼob a cuentailoʼ,+
bey xan yóokʼol le kaajoʼob maʼatech u meyajtiʼob a kʼaabaʼoʼ.