Santiago
4 ¿Tuʼux u taal le baʼateʼel yéetel le sakachtʼaanoʼob yaan ichileʼexoʼ? ¿Maʼ wa tiʼ u taaloʼob tiʼ u tsʼíibolal a bakʼeleʼex ku baʼateʼel ichil a wíinklileʼexoʼ?+ 2 Teʼexeʼ ka tsʼíiboltkeʼex wa baʼax, chéen baʼaleʼ maʼ ta kʼamkeʼex. Teʼexeʼ maʼ tu xuʼulul a pʼektikeʼex u maasil* yéetel a tsʼíiboltkeʼex baʼax maʼ a tiaʼaleʼexiʼ, chéen baʼaleʼ kex beyoʼ maʼ tu páajtal a tiaʼalintkeʼex. Maʼ tu xuʼulul a sakachtʼaaneʼex yéetel a baʼateleʼex.+ Minaʼanteʼex baʼax a kʼáateʼex tumen maʼ ta kʼáatkeʼex. 3 Tsʼoʼoleʼ wa ka kʼáatkeʼexeʼ maʼ ta kʼamkeʼex, tumen ka kʼáatkeʼex yéetel kʼaakʼas tuukul chéen utiaʼal a tsʼoʼokbeskeʼex u tsʼíibolal a bakʼeleʼex.
4 J-kʼeban máakeʼex,* ¿maʼ wa a wojleʼexeʼ le máax ku biskuba yéetel le yóokʼol kaaboʼ ku tsʼáaikuba tu contra Dios? Le oʼolaleʼ jeʼel máaxak u kʼáat u beetuba amigoil tiʼ le yóokʼol kaabaʼ táan u beetkuba enemigoil tiʼ Dios.+ 5 A tuklikeʼexeʼ, ¿chéen wa kunel le baʼax ku yaʼalik le tsʼíibaʼ?: «Ichil k-wíinklileʼ kajaʼan u tuukulil k-tsʼíiboltik baʼax maʼ k-tiaʼaliʼ, le oʼolal tsʼoʼok u suuktaltoʼon k-tsʼíiboltik jejeláas baʼaloʼob».+ 6 Chéen baʼaleʼ le nojoch utsil ku yeʼesiktoʼon Diosoʼ ku yáantkoʼon utiaʼal k-náachtal tiʼ le kʼaakʼas tsʼíibolaloʼoboʼ. Le oʼolal tsʼíibtaʼan lelaʼ: «Dioseʼ ku tsʼáaikuba tu contra le máaxoʼob nojbaʼal u taaskubaʼoboʼ,+ chéen baʼaleʼ ku yeʼesik u nojoch utsil tiʼ le máaxoʼob maʼatech u creerkubaʼoboʼ».+
7 Le oʼolaleʼ tsʼáabaʼex yáanal u páajtalil Dios+ yéetel tsʼáabaʼex tu contra le Kʼaasilbaʼaloʼ,*+ letiʼ túuneʼ bíin áalkabnak tiʼ teʼex.+ 8 Natsʼabaʼex tu yiknal Dios, letiʼ túuneʼ bíin u natsʼuba ta wiknaleʼex.+ Pʼoʼex a kʼabeʼex, j-kʼeban wíinikeʼex.+ Teʼex kaʼapʼéelchajaʼan a tuukuleʼexeʼ limpiokíint a puksiʼikʼaleʼex.+ 9 Yaachajak a wóoleʼex, tristechajkeʼex yéetel okʼolneneʼex.+ A cheʼejeʼexeʼ suunak yaayaj óolalil, a kiʼimak óolaleʼexeʼ suunak chiʼichnakil. 10 Yéetel kiʼimak óolal ka a tsʼáabaʼex yáanal u páajtalil Jéeoba,+ letiʼ túuneʼ yaan u nojbaʼalkúuntikeʼex.+
11 Sukuʼuneʼex, xuʼuluk a paklan aʼalikeʼex baʼal ichileʼex.+ Le máax ku tʼaan tu contra juntúul sukuʼun wa ku juzgartik u sukuʼuneʼ táan u tʼaan tu contra le leyoʼ yéetel táan u juzgartik le leyoʼ. Bey túunoʼ wa ka juzgartik le leyoʼ maʼ táan a tsʼoʼokbesikiʼ, baʼaxeʼ táan a beetkaba juezil. 12 Chéen juntúuliliʼ le Máax ku tsʼáaik leyoʼob yéetel ku beetik u Jueziloʼ.+ Letiʼeʼ ku páajtal u salvartik máak bey xan u xuʼulsik tiʼ máak.+ Chéen baʼaleʼ, ¿máaxech teech utiaʼal a juzgartik a wéet máakil?+
13 Teʼexeʼ ka waʼalikeʼex: «Bejlaʼa wa sáamaleʼ yaan k-bin teʼ kaaj jeʼeloʼ. Teʼeloʼ yaan k-máansik junpʼéel añoiʼ, yaan k-koonoliʼ yéetel yaan k-náajaliʼ»,+ chéen baʼaleʼ uʼuyeʼex lelaʼ: 14 teʼexeʼ maʼ a wojleʼex baʼax kun úuchul yéetel a kuxtaleʼex tu kʼiinil sáamaliʼ.+ Tumen beyeʼex jeʼex le sereno ku yilaʼal chéen junsúutukoʼ yéetel ken tsʼoʼokkeʼ ku saʼatal.+ 15 Baʼax unaj a waʼalikeʼexeʼ letiʼ lelaʼ: «Wa Jéeoba u kʼáateʼ+ yaan k-kuxtal, yéetel yaan k-beetik lelaʼ wa leloʼ». 16 Chéen baʼaleʼ teʼexeʼ yoʼolal le baʼax ka waʼalikeʼexoʼ ka taaskabaʼex nojbaʼalil. Jach kʼaas le bix a nojbaʼalkúuntkabaʼexoʼ. 17 Le oʼolaleʼ wa yaan máax u yojel u beet baʼax maʼalob, chéen baʼaleʼ maʼ tu beetkeʼ, leloʼ junpʼéel kʼeban.+