Le bix jeʼel u pʼaʼatal le masturbacionoʼ

Le masturbacionoʼ upʼéel vicio jeʼel u beetik u náachtal máak tiʼ Dioseʼ, tumen ku beetik u tuukul máak chéen tu yoʼolal yéetel ku kʼaskúuntik u tuukul máak.a Máaxoʼob yantiʼob le vicioaʼ ku yilkoʼob u maasil chéen bey baʼaloʼob utiaʼal u béeykuntik u kʼaakʼas tsʼíibolaloʼobeʼ. Maʼ tu yilkoʼob le núupchital bey upʼéel baʼal utiaʼal u yeʼesaʼal yaabilaj ichil le tsʼokaʼan u beeloʼoboʼ, baʼaxeʼ ku yilkoʼob bey upʼéel baʼal ku taasik junsúutuk kiʼimak óolaleʼ yéetel ku jetsʼik u tsʼíibolaloʼob. Le masturbacionoʼ maʼatech u jetsʼik u kʼaakʼas tsʼíibolal máak, baʼaxeʼ ku maas ajsik le tsʼíibolaloʼ yéetel jeʼel u beetik u núupkʼebantal máak bey xan u beetik uláakʼ baʼaloʼob kʼaastakeʼ (Colosailoʼob 3:5).

Le apóstol Pablooʼ tu yaʼalaj: «In yaabilaj sukuʼuneʼex, leloʼobaʼ letiʼ le tsʼaabil tʼaanoʼob yaan tiʼ toʼonaʼ. Le oʼolaleʼ unaj k-pʼoʼikba tiʼ jeʼel baʼalak ku páajtal u paʼapaʼakʼik k-wíinklil yéetel k-pixaneʼ. Yéetel unaj chúukaʼan k-kʼubikba tiʼ Jajal Dios ichil u sajakilil» (2 Corintoiloʼob 7:1). Yaan máaxoʼobeʼ ku talamtal u beetkoʼob le baʼax ku yaʼalik le apostolaʼ; baʼaleʼ maʼ unaj u tuklikoʼob wa maʼ tu páajtal u beetkoʼobiʼ, tumen Jéeobaeʼ utúul Dios ku «saʼatsaj siʼipil» yéetel ku yáantik máak (Salmo 86:5; Lucas 11:9-13). Maʼ xaaneʼ jeʼel u kaʼa lúubuloʼob teʼ vicioaʼ, baʼaleʼ ku yeʼeskoʼob u kʼáat u pʼatoʼob tumen ku yaʼalaʼaltiʼob tumen u concienciaʼob maʼ maʼalob baʼax tu beetoʼobiʼ yéetel ku yilik u pʼatikoʼob. Maʼ u tuʼubultoʼoneʼ «Jajal Dioseʼ [maas] nojoch tiʼ k-puksiʼikʼal, yéetel letiʼeʼ u yojel tuláakal» (1 Juan 3:20). Letiʼeʼ maʼ chéen ku yilik le baʼaloʼob kʼaastak k-beetikoʼ, baʼaxeʼ ku yilik tak le baʼaloʼob maʼalobtakoʼ. Letiʼeʼ u kʼaj óoloʼon maʼalob, le oʼolaleʼ jach jeʼel u yáantkoʼoneʼ. Jeʼex utúul chan xiʼipal ku kʼáatik ka áantaʼak tumen u taataeʼ, bey xan unaj k-kʼáatik tiʼ Jéeoba yéetel kabal óolal ka u yáantoʼon. Jéeoba túuneʼ yaan u yáantkoʼon utiaʼal ka yanaktoʼon upʼéel maʼalob concienciaeʼ (Salmo 51:1-12, 17; Isaías 1:18). Baʼaleʼ maʼ chéen yaan yéetel k-kʼáatik ka u yáantoʼoniʼ, kʼaʼabéet xan k-ilik beetik le baʼax k-kʼáatikoʼ, jeʼex ka k-xuʼuluk chaʼantik pornografía yéetel ka xuʼuluk k-bisikba yéetel máaxoʼob jeʼel u kʼaskúuntkoʼob k-tuukuleʼ.b

Wa yaan máax táan u talamtaltiʼ u pʼatik le vicioaʼ unaj u yilik u tʼaan yéetel u taata (wa u maama) ku meyajtik Jéeoba, wa u tʼaan xan yéetel utúul sukuʼun (wa kiik) úuch joʼopʼok u meyajtik Jéeoba yéetel jach u kʼáat áantaj (Proverbios 1:8, 9; 1 Tesalonicailoʼob 5:14; Tito 2:3-5).c