Bix jeʼel k-utskíintik le talamil ku yantal yoʼolal upʼéel negociooʼ

Le apóstol Pablooʼ, tiʼ 1 Corintoiloʼob 6:1-8, tu yaʼalaj baʼax unaj u beetik máak ken yanak talamiloʼob yéetel le sukuʼunoʼoboʼ. Yáaxeʼ, tu yaʼalaj maʼ maʼalob u yilik u bin jujuntúul sukuʼunoʼob yanoʼob Corinto «tak pool tu táan máakoʼob maʼ [u yéet oksaj óoloʼoboʼ]» (versículo 1). Tu yaʼalaj xan ka u yutskíintkoʼob le talamiloʼob ichil le múuchʼuliloʼ, maʼ tu táan uláakʼ máakoʼobiʼ. Koʼox ilik jujumpʼéel baʼax oʼolal tu yaʼalaj bey unaj u beetaʼaloʼ, tsʼoʼoleʼ yaan k-ilik bey tiʼ baʼaxoʼob maʼ tu meyaj le baʼax tu yaʼalajoʼ.

Ken yanaktoʼon wa baʼax talamil yéetel le sukuʼunoʼob yoʼolal upʼéel negocioeʼ, Jéeobaeʼ u kʼáat ka k-utskíint jeʼel bix u yaʼalikoʼ, maʼ jeʼex k-tuklik toʼoneʼ (Proverbios 14:12). Jeʼex tu yaʼalil Jesusoʼ maʼ unaj k-páaʼtik u máan yaʼab kʼiinoʼob utiaʼal k-utskíintik le talamiloʼ (Mateo 5:23-26). Yaan sukuʼunoʼobeʼ tumen chéen u kʼáatoʼob baʼateleʼ ku binoʼob tak pool tu táan autoridad. Baʼaleʼ Pabloeʼ tu yaʼaleʼ «kʼaas u yantal baʼateliloʼob» ichil le sukuʼunoʼoboʼ. ¿Baʼaxten? Tumen ku beetik u yaʼalaʼal baʼal tiʼ Jéeoba yéetel tiʼ le múuchʼuliloʼ. Utiaʼal maʼ u yúuchul lelaʼ, maʼalob ka k-beet le baʼax tu yaʼalaj le apostolaʼ: «¿Baʼaxten maʼ táan a mukʼyajtikeʼex u beetaʼalteʼex kʼaas?» (versículo 7).

Pabloeʼ tu yaʼaleʼ Dioseʼ yaan baʼax u tsʼaamaj utiaʼal u yutskíintaʼal le talamiloʼoboʼ. Tu yaʼaleʼ teʼ múuchʼuliloʼ yaan máaxoʼob yiijchajaʼan u tuukuloʼob ikil u xokikoʼob le Bibliaoʼ. Le ancianoʼoboʼ letiʼe máaxoʼob tsʼaʼanoʼob utiaʼal «pʼis óoltik [...] ichil [le] sukuʼunoʼob» «u baʼaloʼobil le kuxtalaʼ» (versículo 3 tak 5). Jesuseʼ tu yaʼaleʼ utiaʼal u yutskíintaʼal upʼéel nojoch talamil, jeʼex u yaʼalaʼal baʼax maʼ jaaj tu contra utúul sukuʼun, wa u yoklaʼal wa baʼaxeʼ, jeʼel u páajtal u beetaʼal óoxpʼéel baʼaloʼobeʼ. Yáaxeʼ, k-tʼaan chéen tu yéetel le sukuʼun yantoʼon le talamiloʼ; baʼaleʼ wa maʼ tu yutstal le talamiloʼ, u kaʼapʼéel baʼax jeʼel k-beetkeʼ, letiʼe k-tʼaan tu yéetel tu táan utúul wa kaʼatúul sukuʼunoʼoboʼ, wa mix bey ku yutstal le talamiloʼ, u yóoxpʼéeleʼ letiʼe k-aʼalik tiʼe ancianoʼoboʼ (Mateo 18:15-17).

Baʼaleʼ, le ancianoʼoboʼ maʼ unaj u meyajoʼob bey abogadoʼobeʼ, tumen maʼ letiʼe meyaj tsʼaʼantiʼob teʼ múuchʼuliloʼ. Maʼ letiʼob unaj u yaʼalikoʼob jach baʼax unaj u beetik cada utúul sukuʼun utiaʼal u yutskíintik le talamil yantiʼoboʼ. Baʼaxeʼ u meyajoʼobeʼ letiʼe u yilkoʼob ka u beet cada utúul sukuʼun le baʼax ku yaʼalik le Biblia utiaʼal ka yanak kiʼimak óolal ichiloʼoboʼ. Wa jach nojoch le talamiloʼ jeʼel u páajtal u yaʼalikoʼob tiʼ le superintendente tiʼ circuitooʼ wa tiʼ u Najil Betel. Baʼaleʼ, maʼ xaaneʼ yaan tiʼ baʼaxoʼob maʼ tu páajtal u meyaj le baʼax tu yaʼalaj Pablooʼ. Koʼox ilik tiʼ baʼaxoʼob.

Yaan kʼiineʼ maʼ tumen kʼasaʼan máak ku bin tu táan autoridadiʼ. Maʼ xaaneʼ chéen kʼaʼabéet u chuʼupul upʼéel juʼun tu táan autoridad utiaʼal maʼ u yantal kʼuuxilil. Jeʼex, utiaʼal upʼéel divorcio, utiaʼal u yilik le taatatsiloʼob tiʼ máax kun pʼáatal u hijoʼoboʼ, utiaʼal u yilaʼal bajux ken u tsʼáa le taatatsil utiaʼal u tséentaʼal u paalal, utiaʼal u cobrartaʼal upʼéel seguro, utiaʼal u yilaʼal bukaʼaj taakʼin unaj u tsʼaʼabal tiʼ máak úuchik u bin kʼaasil tiʼ upʼéel negocio wa utiaʼal u beetaʼal upʼéel testamento. Maʼ xaan xaneʼ utúul máax meyajtik Dioseʼ jeʼel u páajtal u beetik upʼéel contrademanda úuchik u taʼakal u pool yoʼolal baʼax maʼ tu beetiʼ.a

Utúul máax meyajtik Dios ku bin tu táan autoridadeʼ, maʼatech u bin tu contra le baʼax tu yaʼalaj le apóstol Pablooʼ, wa maʼ yéetel u tuukulil u kaxtik baʼateliʼ.b Maʼ u tuʼubultoʼoneʼ le baʼax maas kʼaʼabéet k-ilkoʼ, ka nojbeʼenkúuntaʼak u kʼaabaʼ Jéeoba yéetel ka yanak jeetsʼelil yéetel kiʼimak óolal ichil le múuchʼuliloʼ. Unaj u yilaʼal táan k-beetik le baʼax tu yaʼalaj Jesús tu yoʼolal le yaabilaj yaan ichiloʼonoʼ, upʼéel yaabilaj «maʼ tu kaxtik [chéen] baʼal utiaʼal» (1 Corintoiloʼob 13:4, 5; Juan 13:34, 35).