Tsʼoʼokbes baʼax ka prometertik

1. 1) ¿Baʼax tu beetaj Jefté bey xan Ana? (Ilawil le dibujo yaan tu káajbal le xookaʼ.) 2) ¿Máakalmáak le kʼáatchiʼob kun núukbil teʼ xookaʼ?

JEFTÉ kaʼacheʼ juntúul juez jach u yojel baʼateʼel yéetel maʼ saajkiʼ. Anaeʼ tu yeʼesaj kabal u yóol, jach tu atendertaj u yíicham yéetel u yotoch. Tu kaʼatúulaloʼobeʼ tu meyajtoʼob Jéeoba yéetel yaan baʼax tu beetoʼob yoʼolal u yaabilajoʼob tiʼ. Letiʼobeʼ yaan baʼax tu prometertoʼob tiʼ Jéeoba yéetel chúukpaj u yóol u tsʼoʼokbesoʼob. Le máaxoʼob u beetmoʼob junpʼéel promesa tiʼ Jéeobaeʼ yaʼab baʼax jeʼel u kankoʼob tiʼ letiʼobeʼ. Teʼ xookaʼ yaan k-ilik u núukil le kʼáatchiʼobaʼ: ¿Baʼax junpʼéel promesa? ¿Baʼaxten maʼ chéen báaxal u beetaʼal junpʼéel promesa tiʼ Diosiʼ? ¿Baʼax jeʼel k-kanik tiʼ Jefté yéetel tiʼ Anaeʼ?

2, 3. 1) ¿Baʼax junpʼéel promesa? 2) ¿Baʼax ku yaʼalik le Biblia yoʼolal le promesaʼob ku beetik máakoʼ?

² Le Bibliaoʼ ku yaʼalikeʼ junpʼéel promesaeʼ letiʼe u yaʼalik máak tiʼ Dios yaan u beetik wa baʼaxoʼ. Maʼ xaaneʼ ku yaʼalik yaan u beetik wa baʼax tu yoʼolal, u tsʼáaik junpʼéel siibal tiʼ, u yaʼalik yaan u xupkuba u meyajte yéetel yaan u kanáantik maʼ u beetik jujunpʼéel baʼaloʼob. Junpʼéel promesaeʼ tu juunal máak ku chʼaʼtuklik u beetik, mix máak obligartik. Chéen baʼaleʼ ken u beet máak junpʼéel promesa tiʼ Dioseʼ jach kʼaʼabéet u yilik u tsʼoʼokbesik tumen Dioseʼ bey u páaʼtik ka beetaʼakoʼ. Le Bibliaoʼ ku yaʼalikeʼ junpʼéel promesaeʼ bey jeʼex junpʼéel juramento ku beetaʼal tiʼ Dios utiaʼal u yaʼalaʼaltiʼ yaan baʼax ken u beet máak wa yaan baʼax maʼ ken u beete (Gén. 14:22, 23; Heb. 6:16, 17). ¿Baʼax ku yaʼalik le Biblia yoʼolal le promesaʼob ku beetaʼal tiʼ Diosoʼ?

³ Le Ley tsʼaʼab tiʼ Moisesoʼ ku yaʼalik: «Le ken u beet wa máax junpʼéel [promesa] wa ku kʼaxtʼantik jeʼel bix u náajmal junpʼéel jalaʼach tʼaaneʼ; unaj u tsʼoʼokbesik le tʼaanoʼ yéetel u beetik le baʼax tu [prometertoʼ]» (Núm. 30:2). Ka máan kʼiineʼ Salomoneʼ tu yaʼalaj: «Le ken [a beet junpʼéel promesa tiʼ Dioseʼ] maʼ u xáantal a tsʼoʼokbesik; tumen tiʼ letiʼeʼ maʼ tu lúubul utsil le j-maʼ ojéelajoʼoboʼ. Beet le baʼax ta [prometertoʼ]» (Ecl. 5:4). Ka máan kʼiineʼ Jesuseʼ tu yeʼesaj xan u kʼaʼabéetil u tsʼoʼokbesik máak le baʼax ku prometertikoʼ, tu yaʼalaj: «Maʼ unaj a jurar wa maʼ ken a béeykuntiʼ. Baʼaxeʼ unaj a beetik tuláakal le baʼax a waʼalmaj tiʼ Jéeobaoʼ» (Mat. 5:33).

4. 1) ¿Bix unaj k-ilik le promesaʼob k-beetik tiʼ Jéeobaoʼ? 2) ¿Baʼax ken k-il yoʼolal Jefté yéetel Ana?

⁴ Jeʼex k-ilkoʼ maʼ chéen báaxal u beetaʼal junpʼéel promesa tiʼ Jéeobaiʼ. Le bix u tsʼoʼokbesik máak le baʼax u prometermoʼ ku yeʼesik bukaʼaj u yaabiltmaj Jéeoba. Davideʼ bey tu yeʼesil le ka tu yaʼalaj: «¿Máax jeʼel u páajtal u naʼakal tu puʼukil Yuumtsileʼ? ¿Máax jeʼel u páajtal [u] pʼáatal tu kiliʼich [temploeʼ]?». Le baʼax tu yaʼalaj ka tsʼoʼokoʼ ku yeʼesik chéen ku kʼamik le máax ku béeykuntik le baʼax ku jurartikoʼ (Sal. 24:3, 4). Teʼ xookaʼ yaan k-ilik máakalmáak le promesa tu beetaj Jefté yéetel Anaoʼ bey xan wa chéen chʼaʼabil úuchik u tsʼoʼokbeskoʼob.

TU TSʼOʼOKBESOʼOB BAʼAX TU YAʼALOʼOB TIʼ DIOS

5. ¿Baʼax promesail tu beetaj Jefté, yéetel baʼax úuchi?

⁵ Le táan u baʼateʼel Jefté tu contra le ammonitaʼoboʼ tu beetaj junpʼéel promesa, tu kʼáat óoltaj tiʼ Dios ka áantaʼak u ganart le baʼateʼel tu contra u enemigoʼoboʼ (Jue. 10:7-9). Jefteeʼ tu yaʼaleʼ wa ka kʼuʼubuk le ammonitaʼob tu kʼaboʼ yaan u kʼubik tiʼ Jéeoba le máax kun yáax jóokʼol u chʼaʼ u beel le ken suunak tu yotochoʼ. Dioseʼ tu núukaj le oración tu beetoʼ, le oʼolal tu yáantaj u ganart le baʼateloʼ. Le ka suunaj tu yotocheʼ u hija jóokʼ chʼaʼik u beel. Le x-chʼúupalaʼ letiʼe máax kun kʼubbil tiʼ Jéeobaoʼ (Jue. 11:30-34). ¿Baʼax kun úuchul wa ku kʼamik le x-chʼúupal le baʼax tu yaʼalaj u taataoʼ?

6. 1) ¿Baʼaxten maʼ chéen chʼaʼabil úuchik u tsʼoʼokbesik Jefté yéetel u hija baʼax tu prometertoʼob tiʼ Diosiʼ? 2) ¿Bix u yeʼesik Deuteronomio 23:21 yéetel 23 bey xan Salmo 15:4 u kʼaʼanaʼanil u tsʼoʼokbesik máak baʼax ku prometertik tiʼ Jéeoba?

⁶ Utiaʼal u béeykuntik le x-chʼúupal le baʼax tu yaʼalaj u taataoʼ yanchaj u bin u meyajt Jéeoba teʼ tabernáculo tuláakal u kuxtaloʼ. ¿Chéen wa tu jáan beetaj Jefté junpʼéel promesa tiʼ Jéeoba? Maʼatech, maʼ xaaneʼ letiʼeʼ deporsi u yojel u hija kun jóokʼol chʼaʼik u beel. Kex maʼ u yojel wa jach bey kun úuchloʼ, letiʼeʼ tu chʼaʼtuklaj u tsʼoʼokbesik le promesa tu beetaj tiʼ Jéeoba kex maʼ chéen chʼaʼabiliʼ. Jefteeʼ tu yuʼubaj yeʼetsʼ u puksiʼikʼal le ka tu yilaj u tíipʼil u hijaoʼ. Le ka tu yojéeltaj le x-chʼúupal le baʼax tu yaʼalaj u beetik u taataoʼ, letiʼeʼ tu kʼáataj ka chaʼabak u bin u yóoʼt mix bikʼin kun tsʼoʼokol u beel. ¿Baʼaxten tu kʼáataj? Tumen Jefteeʼ minaʼan uláakʼ u paal yéetel wa maʼ tu tsʼoʼokol u beeleʼ mix bikʼin kun yantal u yáabiloʼob. Lelaʼ yaan u beetik u saʼatal u kʼaabaʼ u taata. Kex beyoʼ letiʼobeʼ tu yeʼesoʼob maas táanil yaan Jéeoba tiʼ le bix u yuʼubikubaʼoboʼ. Utiaʼal u yeʼesik baʼax maas kʼaʼanaʼaneʼ, Jefteeʼ tu yaʼalaj: «[¡]Tin beetaj junpʼéel [promesa] tiʼ Yuumtsil yaan in tsʼoʼokbesik!» (Jue. 11:35-39). Letiʼobeʼ chúukpaj u yóol u tsʼoʼokbesoʼob baʼax tu prometertoʼob tiʼ Dios kex maʼ chéen chʼaʼabil úuchik u beetkoʼobiʼ (xok Deuteronomio 23:21, 23 yéetel Salmo 15:4, TNM).

7. 1) ¿Máakalmáak le promesa tu beetaj Anaoʼ, yéetel baʼaxten? 2) ¿Bix tu núukil Jéeoba le baʼax tu kʼáat óoltoʼ? 3) ¿Baʼax kun úuchul yéetel Samuel yoʼolal le promesa tu beetaj u maamaoʼ? (Ilawil le tsolajiloʼ.)

⁷ Ana xaneʼ tu beetaj junpʼéel promesa tiʼ Jéeoba. Lelaʼ tu beetaj teʼ kʼiinoʼob jach yaachajaʼan u yóol tumen maʼ tu páajtal u yantal u paaloʼ, tsʼoʼoleʼ ku sen pʼaʼastaʼal tu yoʼolal (1 Sam. 1:4-7, 10, 16). Le táan u tsikbaltik tiʼ Jéeoba bix u yuʼubikubaeʼ, tu beetaj le promesaaʼ: «Yuumtsil tiʼ máax yaan tuláakal páajtalil: Wa ka beet uts a paktik u mukʼyaj a x-palitsil utiaʼal ka kʼaʼajaken tiʼ teech tu yoʼolal a tsʼáaikten juntúul in xibil paaleʼ, teneʼ bíin in junpáaykunt tuláakal u kʼiiniloʼob u kuxtal utiaʼal u meyajtech, ku tsʼoʼokoleʼ utiaʼal u chíikulal le junpáaykunajoʼ maʼ bíin kʼoʼosok u tsoʼotsel u pooliʼ» (1 Sam. 1:11).a Jéeobaeʼ tu yuʼubaj le baʼax tu kʼáat óoltoʼ, ka máan junpʼéel jaʼabeʼ anchaj juntúul u hijo tu tsʼáaj u kʼaabaʼt Samuel. Anaeʼ jach kiʼimakchaj u yóol yéetel maʼ tu tuʼubsaj u promesaiʼ. Le oʼolal ka síij le chaambaloʼ tu yaʼaleʼ letiʼe u kʼáatmaj tiʼ Jéeobaoʼ (1 Sam. 1:20).

8. 1) ¿Chéen chʼaʼabil wa úuchik u beetik Ana le baʼax tu prometertoʼ? 2) Le baʼax ku yaʼalik le Salmo 61, ¿baʼax ku kaʼansiktoʼon yoʼolal Ana?

⁸ Le ka tu chukaj kex óoxpʼéel jaʼab tiʼ Samueleʼ, Anaeʼ tu tsʼoʼokbesaj baʼax tu prometertaj tiʼ Jéeoba. Letiʼeʼ tu bisaj Samuel teʼ tabernáculo yaan Siló tu táan Elí, juntúul tiʼ u nojchil le sacerdoteʼoboʼ, ka tu yaʼalaj: «Tin kʼáataj tiʼ Yuumtsil ka u tsʼáa tiʼ teen le xibil paalaʼ, letiʼeʼ tu tsʼáaj tiʼ teen. Teen xaneʼ tsʼoʼok in junpáaykuntik tiʼ Yuumtsil, tuláakal u kʼiiniloʼob bíin kuxlakeʼ, junpáaykuntaʼan utiaʼal Yuumtsil» (1 Sam. 1:24-28). Desde teʼ kʼiinoʼ Samueleʼ kuxlaj teʼ tabernaculooʼ. Le Bibliaoʼ ku yaʼalikeʼ Samueleʼ joʼopʼ «u bin u nojochtal tu táan Yuumtsil» (1 Sam. 2:21). Anaeʼ maʼ chéen chʼaʼabil úuchik u tsʼoʼokbesik le promesa tu beetoʼ. ¿Baʼaxten? Tumen maʼ kun béeytal u yilik bix kun nojochtal u chan hijo mix kun béeytal u yantal tu yéetel. Kex beyoʼ Anaeʼ tu yilaj maas kʼaʼanaʼan u tsʼoʼokbesik le promesa tu beetaj tiʼ Jéeobaoʼ, maʼ tuukulnaj chéen tiʼ u yutsiliʼ (1 Sam. 2:1, 2; xok Salmo 61:1, 5, 8).

9. ¿Baʼax kʼáatchiʼiloʼob ken k-núuke?

⁹ Beora tsʼoʼok k-naʼatik baʼaxten unaj k-tsʼoʼokbesik junpʼéel promesaeʼ, koʼoneʼex ilik u núukil le kʼáatchiʼobaʼ: ¿Baʼax promesailoʼob jeʼel k-beetik tiʼ Jéeobaeʼ? ¿Yaan wa k-tsʼoʼokbeskoʼob kex maʼ chéen chʼaʼabiliʼ?

A KʼUBIK A KUXTAL TIʼ JÉEOBA

10. ¿Máakalmáak le promesa maas nojoch k-beetik tiʼ Jéeobaoʼ, yéetel baʼax ku páaʼtaʼal ka k-beete?

¹⁰ Le promesa maas nojoch ku beetik máak tiʼ Jéeobaoʼ letiʼe u yaʼalik tiʼ yaan u kʼubik u kuxtal utiaʼal u meyajtikoʼ. Lelaʼ ku beetik máak ken u yaʼal tiʼ Jéeoba ich oración yaan u meyajtik tuláakal u kʼiiniloʼob u kuxtal kex jeʼel baʼaxak ka úuchkeʼ. Jesuseʼ tu yaʼaleʼ kʼaʼabéet ‹u pʼektkuba› máak, lelaʼ u káat u yaʼaleʼ yaan u beetik táanil baʼax ku yaʼalik Jéeoba maʼ chéen le baʼax uts tu tʼaanoʼ (Mat. 16:24). Desde ken k-aʼal tiʼ Jéeoba tsʼoʼok k-kʼubik k-kuxtal tiʼeʼ «u tiaʼaloʼon» (Rom. 14:8). Toʼoneʼ k-ojel jach kʼaʼanaʼan k-tsʼoʼokbesik le baʼax k-prometertik tiʼ Jéeobaoʼ. Le beetik k-uʼuyikba jeʼex le salmista tu yaʼalaj: «¿Bix jeʼel u páajtal in boʼotik tiʼ Yuumtsil tuláakal le uts u beetmaj tenoʼ? Yaan in tsʼoʼokbesik in tsʼaatʼaanoʼob tiʼ Yuumtsil tu táan tuláakal u kaajal» (Sal. 116:12, 14).

11. ¿Baʼax ta weʼesaj le ka okjaʼanajechoʼ?

¹¹ ¿Tsʼoʼok wa a kʼubik a kuxtal tiʼ Jéeoba yéetel tsʼoʼok a wokjaʼ utiaʼal a weʼesik tiʼ u maasil a kʼáat a meyajte? Wa beyoʼ, jach maʼalob baʼax tsʼoʼok a beetik. ¿Máasaʼ le ka máansaʼab u tsoltʼaanil a wokjaʼeʼ le sukuʼunoʼ tu kʼáataj wa tsʼoʼok a kʼubik a kuxtal tiʼ Jéeoba ich oración yéetel ka naʼatik le a kʼubik a kuxtal yéetel a wokjaʼoʼ junpʼéel bix a weʼesik u j-jaajkunajech Jéeoba? Le ka ta núukaj «beyoʼ», tuláakal le muchʼukbaloʼoboʼ u yojloʼob tsʼoʼok a kʼubik a kuxtal tiʼ Jéeoba yéetel yaan a beetik tuláakal baʼax ku yaʼalik. ¿Máasaʼ jach kiʼimakchaj u yóol Jéeoba yoʼolal lelaʼ?

12. 1) ¿Tiʼ baʼax kʼáatchiʼiloʼob maʼalob ka tuukulnakoʼon? 2) ¿Máakalmáak le modos tu yaʼalaj Pedro unaj u yantaltoʼonoʼ?

¹² Le ka okjaʼanajecheʼ ta waʼalaj tiʼ Jéeoba yaan a meyajtik yéetel yaan a beetik baʼax ku yaʼalik. Chéen baʼaleʼ le okjaʼoʼ chéen u káajbal a meyajtik Dios. Jeʼex u máan le kʼiinoʼoboʼ unaj k-ilik wa láayliʼ táan k-meyajtik Jéeoba jeʼex t-aʼalajtiʼeʼ. Unaj k-tuklik: «Desde ka okjaʼanajeneʼ, ¿kin weʼesik wa in tsʼaamaj in wóol in maas meyajt Dios? ¿Láayliʼ wa táan in meyajtik yéetel tuláakal in puksiʼikʼaleʼ? (Col. 3:23.) ¿Láayliʼ wa kin orar tiʼeʼ? ¿Sáamsamal wa kin xokik le Bibliaoʼ? ¿Kin bin wa tiʼ tuláakal le muchʼtáambaloʼoboʼ? ¿Kin wilik wa in jóokʼol kʼaʼaytaj tak tuʼux ku páajtal? ¿Tsʼoʼok wa u pʼáatal maʼatech in jach tsʼáaik in wóol in beet le baʼaloʼobaʼ?». Apóstol Pedroeʼ tu yaʼaleʼ wa maʼ t-kanáantikbaeʼ jeʼel u xuʼulul k-meyajtik Jéeoba jeʼex t-aʼalajtiʼoʼ. Utiaʼal maʼ u yúuchultoʼoneʼ unaj k-muʼukʼaʼankúuntik k-fe, u maas yantaltoʼon kʼaj óolal, chúukaʼan óolal yéetel u tsʼíibolalil k-kʼubik k-óol k-meyajt Dios (xok 2 Pedro 1:5-8).

13. ¿Baʼax maʼ unaj u tuʼubsik le máax ku kʼubik u kuxtal tiʼ Jéeoba yéetel ku yokjaʼoʼ?

¹³ Maʼ tu páajtal k-jubik junpʼéel promesa k-beetmaj tiʼ Jéeoba. Juntúul máax ku kaʼanal wa ku náakal u yóol u meyajt Jéeobaeʼ maʼ tu páajtal u yaʼalik wa junpuliʼ maʼ tu kʼubaj u kuxtal tiʼ Jéeobaiʼ yéetel tsʼoʼok u jubik le okjaʼ tu beetoʼ.b Tsʼoʼoleʼ wa ku lúubul tiʼ junpʼéel nojoch kʼebaneʼ yaan u kʼubik cuenta tiʼ Jéeoba bey xan tiʼ le múuchʼuliloʼ (Rom. 14:12). Toʼoneʼ maʼ k-kʼáat k-beet jeʼex le máaxoʼob aʼalaʼabtiʼob tumen Jesusoʼ: «Tsʼoʼok u xuʼulul a weʼesik le yaabilaj yanchajtech tu káajbaloʼ». Baʼaxeʼ k-kʼáat ka u yaʼaltoʼon: «In wojel baʼaxoʼob ka beetik, in wojel yaan a yaabilaj, yaan a fe, ka meyajtik Dios yéetel chúukaʼan óolal, yéetel in wojel maas yaʼab le baʼaxoʼob ka beetik bejlaʼoʼ ke le bukaʼaj ka beetik kaʼachoʼ» (Apo. 2:4, 19). Wa ku chúukpajal k-óol k-tsʼoʼokbes le promesa t-beetaj tiʼ Jéeobaoʼ yaan u kiʼimaktal u yóol.

A WAʼALIK TIʼ A NÚUP MAʼ KEN A PʼATE

14. ¿Máakalmáak le uláakʼ nojoch promesa ku beetik máakoʼ, yéetel baʼaxten?

¹⁴ Ken tsʼoʼokok u beel máakeʼ ku beetik junpʼéel nojoch promesa, ku yaʼalik tiʼ u núup maʼ ken u pʼate. Tu táan Dioseʼ u tsʼoʼokol u beel máakeʼ junpʼéel baʼal jach kiliʼich. Le promesa ku yaʼalik le máaxoʼob ku tsʼoʼokol u beeloʼoboʼ ku yuʼubaʼal tumen Jéeoba bey xan tumen u maasil. Ku yaʼalikoʼob yaan u yaabiltik u núupoʼob, yaan u kanáantkoʼob yéetel yaan u yeʼeskoʼob tsiikil tiʼ tuláakal u kʼiiniloʼob u kuxtal mientras tsʼokaʼan u beeloʼob. Maʼ xaaneʼ yaan uláakʼ máaxoʼob tsʼoʼok u beeloʼobeʼ maʼ jach bey tu yaʼaliloʼoboʼ, chéen baʼaleʼ tu táan Dioseʼ láayliʼ tu beetoʼob junpʼéel promesaeʼ. Le ka tsʼoʼok u beetik u promesaʼobeʼ, tsʼoʼoksaʼab u beeloʼob (Gén. 2:24; 1 Cor. 7:39). Jesuseʼ tu yaʼalaj: «Le baʼax tsʼoʼok u nuʼupul tumen Diosoʼ mix máak unaj u jatsik». Le máaxoʼob ku tsʼoʼokol u beeloʼoboʼ maʼ unaj u tuklikoʼobeʼ jeʼel u páajtal u divorciarkubaʼob wa maʼ tu bintiʼob maʼalobileʼ (Mar. 10:9).

15. ¿Baʼaxten le máaxoʼob meyajtik Diosoʼ maʼatech u yilkoʼob le tsʼoʼokol beel jeʼex u yilik u máakiloʼob le yóokʼol kaabaʼ?

¹⁵ U jaajileʼ mix máak perfecto le oʼolal le máaxoʼob ku tsʼoʼokol u beeloʼoboʼ ku yantal problemas tiʼob. Le beetik le Bibliaoʼ ku yaʼalikeʼ le máaxoʼob tsʼokaʼan u beeloʼoboʼ «yaan u yantaltiʼob muʼyajiloʼob» cada wa baʼax kʼiin (1 Cor. 7:28). U máakiloʼob le yóokʼol kaabaʼ maʼatech u yilkoʼob le tsʼoʼokol beel jeʼex u yilik Diosoʼ. Ku yaʼalikoʼobeʼ wa maʼ tu bin utsil tiʼobeʼ jeʼel u páajtal u pʼatkubaʼobeʼ. Chéen baʼaleʼ le máaxoʼob meyajtik Diosoʼ maʼ bey u tuukuloʼobiʼ. Letiʼobeʼ u yojloʼobeʼ ken tsʼoʼokok u beel máakeʼ táan u beetik junpʼéel promesa tu táan Dios. Wa ku jubikoʼob le promesa u beetmoʼoboʼ bey táan u tuskoʼob Dioseʼ, yéetel jeʼex k-ojliloʼ letiʼeʼ u pʼekmaj le tuusoʼ (Lev. 19:12; Pro. 6:16-19). Le máaxoʼob tsʼokaʼan u beeloʼoboʼ unaj u kʼaʼajsikoʼob baʼax tu yaʼalaj apóstol Pablo: «¿Yaan wa a watan? Xuʼuluk a wilik bix jeʼel a pʼatkeʼ» (1 Cor. 7:27). Pabloeʼ tu yaʼalaj le tʼaanoʼobaʼ tumen u yojleʼ Jéeobaeʼ u pʼekmaj le máaxoʼob ku divorciarkubaʼoboʼ, le máax beetik beyaʼ táan u traicionartik u núup (Mal. 2:13-16).

16. ¿Baʼax ku yaʼalik le Biblia yoʼolal u divorciarkuba yéetel u pʼatkuba máakoʼ?

¹⁶ Jesuseʼ tu kaʼanseʼ le Kiliʼich Tsʼíiboʼoboʼ ku yaʼalikeʼ chéen jeʼel u páajtal u divorciarkuba máak wa juntúul tiʼ letiʼobeʼ ku núupkʼebantal yéetel maʼ tu perdonartaʼal tumen u núup (Mat. 19:9; Heb. 13:4). Le máaxoʼob tsʼokaʼan u beeloʼoboʼ, ¿jeʼel wa túun u páajtal u pʼatkubaʼobeʼ? Lelaʼ ku tsolik xan le Bibliaoʼ (xok 1 Corintoiloʼob 7:10, 11). Chéen baʼaleʼ maʼ tu yaʼalik jach baʼax oʼolal jeʼel u páajtal u pʼatkuba máakeʼ. Maʼ xaaneʼ yaan baʼax oʼolal jeʼel u chʼaʼtuklik máak u pʼatkubaʼeʼ. Yaan máax tuklikeʼ tumen kʼasaʼan u núup wa tumen tsʼoʼok u suut apostataileʼ, deporsi kʼaʼabéet u pʼatik tumen wa maʼeʼ jeʼel u náachkuntaʼal tiʼ Jéeobaeʼ wa jeʼel tak u tsʼáaik u kuxtal tu táan kíimileʼ.c

17. ¿Baʼax unaj u beetik le tsʼokaʼan u beeloʼob utiaʼal u biskubaʼob maʼaloboʼ?

¹⁷ Wa juntúul sukuʼun yéetel u yatan ku bin u kʼáatoʼob áantaj tiʼ le ancianoʼob utiaʼal u yaʼalaʼaltiʼob bix jeʼel u yutskíintikoʼob le problemaʼob yaantiʼoboʼ, le ancianoʼoboʼ unaj u kʼáatiktiʼob wa tsʼoʼok u chaʼantikoʼob le video ¿Jach wa tu jaajil yaabilaj?, yéetel wa tsʼoʼok u xokikoʼob le folleto Jeʼel u yantal kiʼimak óolal ichil a familiaeʼ. Le publicacionoʼobaʼ jeʼel u yáantik u maas yaabiltubaʼobeʼ. Juntúul sukuʼun yéetel u yataneʼ, tu yaʼaloʼob: «Desde ka káaj k-xokik le folletooʼ k-uʼuyik maas maʼalob k-bisikba». Juntúul kiik veintidós años tsʼoʼokok u beeleʼ jach óolak u pʼat u yíicham. Chéen baʼaleʼ ka tsʼoʼok u chaʼantik le video ¿Jach wa tu jaajil yaabilaj?, tu yaʼalaj: «Kex tu kaʼatúulaloʼon okjanajaʼanoʼoneʼ pʼáat minaʼan yaabilaj ichiloʼon. Baʼaleʼ le videooʼ jach maʼalob lúubiktoʼon yéetel bejlaʼeʼ jach maʼalob bix k-bisikba». U jaajileʼ wa le máaxoʼob tsʼokaʼan u beeloʼob ku tsʼáaikoʼob ichil u kuxtaloʼob le tsolnuʼukoʼob yaan teʼ Bibliaoʼ ku bin utsil tiʼob yéetel ku yantaltiʼob kiʼimak óolal.

SUKUʼUNOʼOB KU XUPKUBAʼOB BUL SEMANA U MEYAJTOʼOB DIOS

18, 19. 1) ¿Baʼax tsʼoʼok u beetik yaʼab taatatsiloʼob? 2) ¿Baʼax jeʼel u páajtal k-aʼalik yoʼolal le sukuʼunoʼob ku xupkubaʼob bul semana u meyajtoʼob Diosoʼ?

¹⁸ Tsʼoʼok k-tʼaan tiʼ le promesa tu beetaj Jefté bey xan Anaoʼ. Tu yoʼolal le promesaʼob tu beetaj u taataʼoboʼ, u hija Jefté yéetel Samueleʼ tu meyajtoʼob Jéeoba junpʼéel bix maʼ yaʼab máax beetiʼ. Teʼ kʼiinoʼobaʼ yaʼab taatatsiloʼob xaneʼ ku animartik u paalaloʼob utiaʼal u xupkubaʼob u meyajtoʼob Dios, ikil u beetkoʼob beyaʼ ku pʼatkoʼob u kuxtaloʼob tu kʼab Jéeoba utiaʼal u beetkoʼob baʼax ku yaʼalik. Tuláakloʼon jeʼel u páajtal k-animartik le táankelmoʼob utiaʼal maʼ u pʼatik u meyajtikoʼob Jéeoba jeʼex u beetkoʼoboʼ (Jue. 11:40; Sal. 110:3).

¹⁹ Teʼ kʼiinoʼobaʼ yaan kex 67,000 sukuʼunoʼob yéetel kiikoʼob táan u xupkubaʼob u meyajtoʼob Dios bul semana tiʼ tuláakal yóokʼol kaab. Yaneʼ ku meyaj Betel, tiʼ construcción wa ku beetik u superintendenteil tiʼ circuito. Uláakʼoʼobeʼ instructoroʼob, precursor especialoʼob, misioneroʼob, ku kanáantkoʼob u Najiloʼob Asamblea wa le tuʼuxoʼob ku beetaʼal le escuelaʼob ku yantal ichil u kaajal Jéeobaoʼ. Tuláakloʼob ku chupikoʼob junpʼéel juʼun ku kʼaabaʼtik Voto de Obediencia y Pobreza, teʼ juʼunaʼ ku yaʼalikoʼob yaan u beetkoʼob baʼax ku yaʼalaʼaltiʼob yéetel yaan u kuxtaloʼob chéen yéetel baʼax ku tsʼaʼabaltiʼob. Ku prometerkoʼob u tsʼáaik u yóol u meyajtoʼob Jéeoba jeʼel tuʼuxak ka aʼalaʼaktiʼobeʼ, u kuxtaloʼob chéen yéetel baʼax kʼaʼabéettiʼob yéetel maʼatech u náajaloʼob wa maʼ tsʼaʼan permiso tiʼobiʼ. Letiʼobeʼ beyoʼob jeʼex u maasil máakoʼobeʼ, chéen baʼaleʼ tsʼaʼan u beetoʼob junpʼéel jatsʼuts meyaj ichil u kaajal Jéeoba. Tsʼoʼoleʼ maʼatech u tuʼubskoʼob le baʼax u prometermoʼob tiʼ Jéeoba le táan u xupkubaʼob bul semana u meyajtoʼoboʼ.

20. ¿Bix unaj k-ilik le promesaʼob k-beetik tiʼ Jéeobaoʼ, yéetel baʼaxten?

²⁰ Tiʼ le óoxpʼéel promesaʼob tsʼoʼok k-ilik teʼ xookaʼ, ¿yaan wa a beetmiʼ? Maʼ unaj k-tuʼubsikeʼ le promesaʼob k-beetik tiʼ Jéeobaoʼ maʼ chéen báaxaliʼ, le oʼolal unaj k-ilik k-tsʼoʼokbeskoʼob (Pro. 20:25). Wa maʼ t-beetik le baʼax k-promertermaj tiʼ Jéeobaoʼ jeʼel u bin kʼaasiltoʼoneʼ (Ecl. 5:6). Unaj k-beetik jeʼex le salmista ka tu yaʼalaj: «Jeʼel in kiʼikiʼtʼantik a kʼaabaʼ mantatsʼeʼ, bey xan jeʼel in tsʼoʼokbesik in tsʼaatʼaanoʼob sáamsamaleʼ» (Sal. 61:8).