Jesúseʼ tu kaʼa kuxkíintaj Lázaro

Jesúseʼ yaan kaʼach óoxtúul u amigoʼob kajaʼanoʼob Betania. U kʼaabaʼobeʼ Lázaro, María yéetel Marta, letiʼobeʼ sukuʼuntsiloʼob. Juntéenjeak le tiaʼan Jesús tuláakʼ juntséel le río Jordánoʼ túuxtaʼab aʼalbiltiʼ tumen María yéetel Marta: «Yuumtsil, le máax jach a yaabiltmeʼ kʼojaʼan». Chéen baʼaleʼ Jesúseʼ maʼ séeb biniʼ. Tu páaʼtaj u máan kaʼapʼéel kʼiin, tsʼoʼoleʼ tu yaʼalaj tiʼ u discípuloʼob: «K-amigo Lázaroeʼ táan u wenel, chéen baʼaleʼ teneʼ táan in bin teʼeloʼ utiaʼal ka in wajse». Le apóstoloʼoboʼ tu yaʼaloʼob: «Yuumtsil, wa táan u weenleʼ jeʼel u yutstaleʼ». Jesús túuneʼ tu yaʼalajtiʼob: «Lázaroeʼ tsʼoʼok u kíimil».

Ka kʼuch Jesús Betaniaeʼ, Lázaroeʼ tsʼoʼok u máan kanpʼéel kʼiin kíimik. Yaʼab máakoʼob bijaʼanoʼob u líiʼsoʼob u yóol Marta yéetel María. Martaeʼ tu yojéeltaj tsʼoʼok u kʼuchul Jesús, le oʼolal bin áalkabil u yile. Tu yaʼalajtiʼ: «Yuumtsil, wa way yanech kaʼacheʼ bejlaʼa maʼ tu kíimil in wíitsʼineʼ». Jesúseʼ tu núukajtiʼ: ‹A wíitsʼineʼ yaan u líikʼil. ¿Ka creertik wa lelaʼ?›. Letiʼeʼ tu yaʼalajtiʼ: ‹Teneʼ kin creertik yaan u líikʼil ken kaʼa kuxkíintaʼak le kimenoʼoboʼ›. Jesús túuneʼ tu yaʼalajtiʼ: «Teen le kuxtaloʼ, bey xan le kaʼa kuxtaloʼ».

Martaeʼ bin u yaʼal tiʼ María: «Le j-Kaʼansajoʼ way yaneʼ». Maríaeʼ bin áalkabil teʼ tuʼux yaan Jesúsoʼ ka bin le máakoʼob tu paachoʼ. Ka kʼuch tu yiknaleʼ, tu xóolkʼabtubaeʼ ka joʼopʼ u sen okʼol. Tu yaʼalajtiʼ: «Yuumtsil, wa way yanech kaʼacheʼ, bejlaʼa maʼ tu kíimil in sukuʼuneʼ». Ka tu yilaj Jesús táan u sen okʼol Maríaeʼ, káaj u yokʼol xan. Ka tu yilaj le máakoʼob táan u yokʼol Jesúseʼ joʼopʼ u yaʼalikoʼob: «¡Ilawil bukaʼaj u yaabiltmil kaʼachi!». Chéen baʼaleʼ yaneʼ táan kaʼach u yaʼalik: ‹¿Baʼaxten maʼ tu beetaj mix baʼal yoʼolal u amigoiʼ?›. Koʼox ilik baʼax ken u beet Jesús.

Jesúseʼ bin teʼ tuʼux yaan le muknaloʼ, lelaʼ junpʼéel sajkab kaʼachi yéetel makaʼan yéetel junpʼéel tuunich. Letiʼeʼ tu yaʼalaj: «Luʼseʼex le tuunichoʼ». Chéen baʼaleʼ Martaeʼ tu yaʼalajtiʼ: «Yuumtsil, míin tsʼoʼok u káajal u yantal u book, tumen tsʼoʼok kanpʼéel kʼiin muʼukuk». Kex beyoʼ tu luʼsoʼob le tuunichoʼ, ka orarnaj Jesús: ‹In Yuum, kin tsʼáaiktech gracias tumen tsʼoʼok a wuʼuyik in oración. In wojel mantatsʼ ka wuʼuyiken, pero táan in tʼaan kʼaʼam utiaʼal ka u creert le yaʼabkach máakoʼobaʼ teech túuxtmilen›. Ka tsʼoʼokeʼ tu kʼaʼam aʼalaj: «¡Lázaro, jóokʼen!». Teʼ súutukoʼ jóokʼ Lázaro teʼ muknaloʼ, bakʼaʼan u wíinklil yéetel nookʼ. Jesús túuneʼ tu yaʼalaj: «Luʼseʼex le nookʼoʼob bakʼaʼantiʼoʼ utiaʼal ka páajchajak u xíimbal».

Yaʼab tiʼ le máaxoʼob tu yiloʼob le baʼax úuchoʼ tu tsʼáaj u fejoʼob tiʼ Jesús, chéen baʼaleʼ yanoʼobeʼ bin u tsikbaltoʼob tiʼ le fariseoʼoboʼ. Desde le kʼiin jeʼeloʼ le fariseoʼoboʼ tu chʼaʼtukloʼob bix ken u kíimsoʼob Lázaro yéetel Jesús. Judas Iscariote, juntúul tiʼ le 12 apóstoloʼoboʼ, taʼakumbail úuchik u bin u yil le fariseoʼoboʼ ka tu kʼáatajtiʼob: «¿Baʼax ken a tsʼáaʼexten utiaʼal ka in kʼub Jesús ta kʼabeʼex?». Letiʼobeʼ tu yaʼalaj u tsʼáaikoʼob 30 u pʼéelal u taakʼinil plata tiʼ. Judaseʼ tu kʼamaj le taakʼinoʼ ka joʼopʼ u kaxtik bix jeʼel u kʼubik Jesús tiʼobeʼ.