Ku kʼuʼubul Cristo yéetel ku maʼachal

Tsʼoʼok maas tiʼ chúumuk áakʼab. Le sacerdoteʼoboʼ u yaʼalmaj u boʼotkoʼob 30 u taakʼinil plata tiʼ Judas utiaʼal u kʼubik Jesús tiʼob. Judaseʼ bin yéetel yaʼabkach sacerdoteʼob yéetel escribaʼob utiaʼal u kaxtikoʼob Jesús. Tsʼoʼoleʼ bin xan u jaats u soldadoiloʼob Roma tu yéetel bey xan juntúul u comandanteiloʼob.

Maʼ xaaneʼ le ka lukʼ Judas teʼ tuʼux tu jaantoʼob le Pascuaoʼ, u taatsʼ úuchik u bin yiknal u nuuktakil le sacerdoteʼoboʼ (Juan 13:27). Letiʼobeʼ tu kaxtoʼob uláakʼ máakoʼob kun bin tu yéeteloʼob bey xan junmúuchʼ soldadoʼob. Maʼ xaaneʼ Judaseʼ bin tu yéetel teʼ cuarto tuʼux tu kʼiinbesoʼob le Pascuaoʼ. Baʼaleʼ beoraaʼ tsʼoʼok u chʼaktikoʼob u táax luʼumil Cedrón, táan u binoʼob tu jardinil Getsemaní. U machmaj u espadaʼob, u lamparaʼob yéetel u antorchaʼob utiaʼal u kaxtikoʼob Jesús.

Tumen Judas nuʼuktik tuláakal le máaxoʼob ku binoʼoboʼ, u yojel yaan u kʼuchul yiknal Jesús. Teʼ semana máanikoʼ, Jesús yéetel u apostoloʼobeʼ yaʼab u téenel viajarnajoʼob Betania tak tu kaajil Jerusalén, letiʼobeʼ yaʼab u téenel jeʼeloʼob tu jardinil Getsemaní. Baʼaleʼ tumen tsʼoʼok u yáakʼabtaleʼ, maʼ xaaneʼ tiaʼanoʼob yáanal u cheʼiloʼob le olivoʼoboʼ. Le oʼolaleʼ, ¿bix túun kun kʼaj óoltbil tumen le soldadoʼob, wa mix juntéen u yiloʼoboʼ? Judaseʼ tu yaʼalajtiʼob baʼax ken u beet utiaʼal u kʼaj óoltikoʼob. Tu yaʼalajtiʼob: «Le máax ken in tsʼuʼutsʼoʼ, letiʼ; macheʼex ka a biseʼex yéetel u yáantaj le soldadoʼoboʼ» (Marcos 14:44).

Ka ook Judas yéetel le máaxoʼob ku binoʼ, tu yilaj Jesús yéetel u apostoloʼob, ka bin tu yiknal Jesús. Ka tu yaʼalajtiʼ: «¿Bix a beel, j-Kaʼansaj?», ka tu tsʼuʼutsʼaj. Jesús túuneʼ tu yaʼalajtiʼ: «Amigo, ¿baʼax oʼolal way yanecheʼ?» (Mateo 26:49, 50). Ka tu kaʼa aʼalajtiʼ: «Judas, ¿yéetel junpʼéel tsʼuʼutsʼ ka traicionartik u Paal máak?» (Lucas 22:48). Bey úuchik u traicionartik Jesusoʼ.

Jesús túuneʼ joʼopʼ u bin tu tojil le lamparaʼob yéetel le antorchaʼoboʼ, ka tu yaʼalaj: «¿Máax ka kaxtikeʼex?». Ka aʼalaʼab tumen le máakoʼoboʼ: «Jesús le Nazaretiloʼ». Letiʼeʼ tu yaʼalajtiʼob: «Teen le máax ka kaxtikeʼexoʼ» (Juan 18:4, 5). Le máakoʼoboʼ maʼ u yojloʼob baʼax ken u beetoʼobiʼ, ka lúuboʼob luʼum.

Wa u kʼáat Jesuseʼ jeʼel kaʼach u páajtal u púutsʼul ichil le éeʼjochʼeʼeniloʼ, baʼaxeʼ tu kaʼa kʼáatajtiʼob máax ku kaxtikoʼob. Ka tu kaʼa aʼaloʼob «Jesús le Nazaretiloʼ», letiʼeʼ tu yaʼalajtiʼob yéetel x-maʼ saajkil: «Teen, tsʼoʼok in waʼalikteʼex. Le oʼolaleʼ wa teen ka kaxtikeneʼexeʼ, chaʼex u bin leloʼobaʼ». Tak teʼ súutuk jeʼeloʼ, kʼajaʼan tiʼ Jesús le úuchik u yaʼalik maʼ u sat mix juntúul tiʼ le máaxoʼob tsʼaʼabtiʼoʼ (Juan 6:39; 17:12). Jesuseʼ tsʼoʼok u yáantik tuláakal u apostoloʼob, chéen «u paal le xuʼulsajil» wa Judas tu satoʼ (Juan 18:7-9). Le oʼolal tu yaʼalaj ka chaʼabak u bin u maasil apostoloʼob chúukaʼan u yóoloʼob tsaypachtikoʼ.

Ka joʼopʼ u náatsʼal le soldadoʼob yiknal Jesusoʼ, le apostoloʼoboʼ tu tsʼáajoʼob cuenta baʼax kun úuchul tiʼ. Letiʼobeʼ tu yaʼaloʼob: «Yuumtsil, ¿k-xíikchʼaktoʼob wa yéetel le espadaoʼ?» (Lucas 22:49). Táanil tiʼ u núukaʼal tumen Jesuseʼ, Pedroeʼ tu chʼaʼaj junpʼéel tiʼ le kaʼapʼéel espada bisaʼan tumen le apostoloʼoboʼ, ka tu jéenchʼaktaj Malco, u palitsil u nojchil le sacerdoteoʼ, ka tu kúulchʼaktaj u x-noʼoj xikin.

Jesuseʼ tu machaj u xikin Malcoeʼ ka utschaji. Ka tu kaʼansaj junpʼéel baʼal jach kʼaʼanaʼan, tu yaʼalaj tiʼ Pedro: «Oks a espada teʼ tuʼux ta jóoʼsajoʼ, tumen tuláakal le máaxoʼob ku meyaj espada tiʼobeʼ bíin kíimsaʼakoʼob yéetel espada». Jesuseʼ maʼ sajak ka maʼachkiʼ, le oʼolal tu yaʼalaj: «¿Bix kun béeychajal le baʼax ku yaʼalik le Kiliʼich Tsʼíiboʼob unaj u yúuchloʼ?» (Mateo 26:52, 54). Tu yaʼalaj xan: «Le copa tu tsʼáajten le Taataoʼ, ¿maʼ wa unaj in wukʼikiʼ?» (Juan 18:11). Jesuseʼ u kʼáat u beet tuláakal le baʼax aʼalaʼantiʼ tumen Diosoʼ, kex ka yanak u kíimsaʼal.

Jesuseʼ tu kʼáataj tiʼ le máakoʼoboʼ: «¿Jóokʼeʼex yéetel espadaʼob bey xan yéetel cheʼob utiaʼal a taal a chukeneʼex jeʼel bix u bin chukbil juntúul j-ookoleʼ? Sáamsamal kin kutal kaʼach kaʼansaj teʼ templooʼ, baʼaleʼ teʼexeʼ maʼ ta macheneʼexiʼ. Baʼaleʼ tuláakal lelaʼ úuch utiaʼal ka béeychajak le baʼaxoʼob tu tsʼíibtaj le profetaʼoboʼ» (Mateo 26:55, 56).

Le soldadoʼob yéetel u nuuktakil le judíoʼob túunoʼ tu kʼaxoʼob Jesús. Ka tu yilaj le apostoloʼob lelaʼ ka púutsʼoʼob. Baʼaleʼ «juntúul táankelem xiʼipal», maʼ xaaneʼ, disipulo Marcos, pʼáat ichil le máakoʼob utiaʼal u bin tuʼux ku bisaʼal Jesusoʼ (Marcos 14:51). Baʼaleʼ kʼaj óoltaʼabi, ka taakchaj u maʼachal, letiʼ túuneʼ tu pʼataj u nookʼ de linoeʼ ka púutsʼi.