¿Bix u modos Jesús?

Jeʼex kun bin k-maas kaanbal tiʼ le baʼaxoʼob tu beetaj Jesús ka anchaj way Luʼumeʼ bey kun bin k-maas kʼaj óoltik xan u jatsʼuts modosoʼ. Leloʼ ku yáantkoʼon utiaʼal k-maas náatsʼal tiʼ letiʼ bey xan tu yiknal Jéeoba. ¿Máakalmáak u jatsʼuts modos Jesús? ¿Bix jeʼel k-eʼesik u jatsʼuts modosoʼobeʼ?

1. ¿Baʼaxten k-aʼalikeʼ Jesúseʼ chíikaʼan tiʼ u Taata?

Jesúseʼ tsʼoʼok u máan u millonesil años tiaʼan teʼ kaʼan táan u kaanbal tiʼ u Taataoʼ. Le oʼolal ku tuukul yéetel ku yeʼesik yaabilaj jeʼex u Taataeʼ (xok Juan 5:19). Juntéenjeakeʼ hasta tu yaʼalaj: «Le máax tsʼoʼok u yilkeneʼ tsʼoʼok xan u yilik le Taataoʼ» (Juan 14:9). Le beetkeʼ le kéen a maas kʼaj óolt Jesúseʼ táan xan a kʼaj óoltik Jéeoba. Jesúseʼ jach tu chʼaʼaj óotsilil tiʼ le máakoʼoboʼ, Jéeoba xaneʼ bey xan u chʼaʼiktoʼon óotsililoʼ.

2. ¿Bix tu yeʼesil Jesús jach u yaabiltmaj u Taata?

Juntéenjeakeʼ Jesúseʼ tu yaʼalaj: «Utiaʼal ka u yojéelt le yóokʼol kaab in yaabiltmaj le Taataoʼ kin beetik le baʼax tsʼoʼok u yaʼalikten le Taata ka in beetoʼ» (Juan 14:31). Le ka anchaj Jesús way Luʼumeʼ tu yeʼesaj jach u yaabiltmaj u Taata úuchik u yuʼubik u tʼaan tak teʼ súutukoʼob jach táan u sufriroʼ. Tsʼoʼoleʼ jach uts tu tʼaan u tsikbal yoʼolal u Taata utiaʼal u kʼaj óoltaʼal Jéeoba tumen le máakoʼoboʼ (Juan 14:23).

3. ¿Bix tu yeʼesil Jesús jach u yaabiltmaj wíinik?

Le Bibliaoʼ ku yaʼalikeʼ Jesúseʼ jach kiʼimakchaj u yóol yoʼolal «u kajnáaliloʼob le luʼumoʼ» (Proverbios 8:31). Jesúseʼ tu yeʼesaj yaabilaj, le kéen u yáant kaʼach máakeʼ maʼ tu páaʼtik ka suʼutuk tiʼ u jeel le favor tu beetoʼ. Le milagroʼob tu beetoʼ tu yeʼeseʼ yaan u poder yéetel ku chʼaʼik óotsilil (Marcos 1:40-42). Jesúseʼ jach uts u modos, maʼalob u tratartik tuláakal máak yéetel ku líiʼsik u yóol le máaxoʼob chʼenxikintikoʼ. Letiʼeʼ u yaabiltmaj tuláakal máak, le oʼolal tu tsʼáaj u kuxtal yoʼolal wíinik. Chéen baʼaleʼ maases u yaabiltmaj le máaxoʼob beetik le baʼax ku yaʼalikoʼ (xok Juan 15:13, 14).

UTIAʼAL A MAAS NAʼATIK

4. Jesúseʼ jach u yaabiltmaj u Taata

Jesúseʼ tu kaʼansajtoʼon bix unaj k-eʼesik yaabilaj tiʼ Jéeoba. Xokeʼex Lucas 6:12 yéetel Juan 15:10; 17:26. Kéen tsʼoʼokok a xokikeʼex cada tekstoeʼ ka tsikbaltikeʼex lelaʼ:

• ¿Bix jeʼel k-eʼesik yaabilaj jeʼex tu beetil Jesúseʼ?

6. Jesúseʼ jach uts

Kex maʼ ayikʼal Jesús kaʼacheʼ tu síiaj le baʼaxoʼob yaantiʼoʼ yéetel tu kaʼansajtoʼon ka k-síi xan le baʼaxoʼob yaantoʼonoʼ. Xokeʼex Hechos 20:35, kéen tsʼoʼokkeʼ ka tsikbaltikeʼex lelaʼ:

• Jeʼex tu yaʼalil Jesús teʼ tekstooʼ, ¿baʼax beetik u kiʼimaktal u yóol máak?

Chaʼanteʼex le VIDEOOʼ, kéen tsʼoʼokkeʼ ka tsikbaltikeʼex lelaʼ:

VIDEO: «Maas ku taasik kiʼimak óolal u tsʼaʼabal wa baʼax ke u kʼaʼamal wa baʼax» (junxóotʼ) (4:00)

• Kex maʼ jach yaʼab baʼaloʼob yaantoʼoneʼ, ¿bix jeʼel k-síik le baʼaloʼob yaantoʼonoʼ?

¿A wojel wa?

Le Bibliaoʼ ku kaʼansikeʼ le kéen orarnakoʼon tiʼ Jéeobaeʼ unaj k-beetik tu kʼaabaʼ Jesús (xokeʼex Juan 16:23, 24). Wa k-beetik beyoʼ yaan k-eʼesik junpʼéel nojoch siibal le baʼax tu beetaj Jesús utiaʼal k-bisikba yéetel Jéeobaoʼ.

BAʼAX TSOʼOLI

Jesúseʼ u yaabiltmaj Jéeoba bey xan wíinik. Letiʼeʼ chíikaʼan tiʼ u Taata, le oʼolaleʼ wa ka maas kʼaj óoltikeʼ yaan xan a maas kʼaj óoltik Jéeoba.

Baʼax ta kanaj

• ¿Bix jeʼel k-eʼesik k-yaabiltmaj Jéeoba jeʼex tu beetil Jesúsoʼ?

• ¿Bix jeʼel k-eʼesik k-yaabiltmaj u maasil máakoʼob jeʼex tu beetil Jesúsoʼ?

• ¿Máakalmáak u modos Jesús maas jatsʼuts a wilik?

KAN U MAASIL

Ilawil bey máakalmáak u jatsʼuts modos Jesús jeʼel u páajtal a weʼesikeʼ.

«Jeʼex Jesuseʼ:» (Jesús: le bejoʼ, le jaajoʼ yéetel le kuxtaloʼ, página 317)

Kan baʼaxten unaj k-orar tu kʼaabaʼ Jesús.

«¿Baʼaxten kʼaʼabéet k-orar tu kʼaabaʼ Jesús?» (U Pʼíich Tulumil Kanan, 1 tiʼ abril tiʼ 2008)

¿Ku yaʼalik wa le Biblia bix u yilaʼal Jesús kaʼachoʼ?

«¿Bix kaʼach Jesús?» (Xok teʼ jw.org)

¿Baʼax k-kanik tiʼ bix tu tratartil Jesús le koʼoleloʼoboʼ?

«Dioseʼ ku respetartik le koʼoleloʼoboʼ» (U xookil U Pʼíich Tulumil Kanan)