Ku beetik milagroʼob, kex beyoʼ maʼatech u kʼaʼamal Nazaret

Jesuseʼ jach yaʼab baʼaxoʼob tu beetaj teʼ kʼiin jeʼeloʼ. Ka kʼuch tu luʼumil Decápoliseʼ tu tsʼakaj juntúul koʼolel ku máan kʼiʼikʼ tiʼ yéetel tu kaʼa kuxkíintaj u hija Jairo. Baʼaleʼ láayliʼ maʼ áakʼabchajkeʼ. Ka lukʼ tu yotoch Jairoeʼ joʼopʼ u tsaypachtaʼal tumen kaʼatúul chʼóopoʼob, letiʼobeʼ joʼopʼ u yaʼalikoʼob: «Chʼaʼtoʼon óotsilil, u Paal David» (Mateo 9:27).

Tu yaʼaloʼob tiʼ Jesús «u Paal David» utiaʼal u yeʼeskoʼob ku creertikoʼob letiʼe máax kun kutal tu trono Davidoʼ yéetel letiʼe Mesíasoʼ. Jesuseʼ tu beetaj bey maʼ tu yuʼubaj u yawatoʼobeʼ, maʼ xaaneʼ utiaʼal u yilik wa yaan u seguer u kʼáatkoʼob u yáantaj. Le ka ook Jesús ichil junpʼéel najeʼ, letiʼob xaneʼ ookoʼobiʼ. Jesuseʼ tu kʼáatajtiʼob: «¿Ka creertikeʼex wa jeʼel u páajtal in tsʼáaik u sáasilil a wicheʼexeʼ?». Letiʼobeʼ tu yaʼaloʼob: «K-creertik, Yuumtsil». Jesús túuneʼ tu machaj u yichoʼobeʼ ka tu yaʼalaj: «Úuchukteʼex le baʼax ka creertikeʼexoʼ» (Mateo 9:28, 29).

Tu séebaʼanileʼ sáasilchaj u yichoʼob. Jeʼex suukileʼ Jesuseʼ tu yaʼalajtiʼob maʼ u tsikbaltikoʼob tiʼ mix máak. Baʼaleʼ tumen kiʼimak u yóoloʼobeʼ joʼopʼ u tsikbaltikoʼob tiʼ u maasil.

Le ka jóokʼ le kaʼatúul máakoʼobaʼ, taasaʼab tu yiknal Jesús juntúul máak maʼ tu páajtal u tʼaan, tumen okaʼan juntúul demonio tiʼ. Jesuseʼ tu jóoʼsaj le demoniooʼ, le máak túunoʼ káaj u tʼaan. Le máakoʼoboʼ jach jaʼakʼ u yóoloʼob, ka joʼopʼ u yaʼalikoʼob: «Mix juntéen ilaʼak tu luʼumil Israel junpʼéel baʼal beyaʼ». Baʼaleʼ tiaʼan xan le fariseoʼoboʼ. Letiʼobeʼ maʼ tu páajtal u yaʼalikoʼob wa maʼ jaaj ku beetik milagroʼob Jesusiʼ, baʼaleʼ ku yaʼalikoʼob: «Letiʼe máax gobernartik le demonioʼob tsʼáaik páajtalil tiʼ utiaʼal u jóoʼsik le demonioʼoboʼ» (Mateo 9:33, 34).

Ka tsʼoʼokeʼ Jesuseʼ suunaj yéetel u disipuloʼob Nazaret, u kaajal. Kex junpʼéel jaʼab paachileʼ kaʼansajnaj teʼ sinagoga yaan teʼ kaajoʼ. Ka káajeʼ le máakoʼoboʼ jaʼakʼ u yóoloʼob yoʼolal baʼax ku yaʼalik, baʼaleʼ kʼuuxilnajoʼob yoʼolal le baʼaxoʼob tu kaʼansoʼ ka taakchaj u kíimskoʼob. Beoraaʼ taal tu kaʼatéen u yil wa jeʼel u páajtal u kaʼanskoʼobeʼ.

Utiaʼal sabadoeʼ suunaj kaʼansaj teʼ sinagogaoʼ. Le máakoʼoboʼ jaʼakʼ u yóoloʼob ka joʼopʼ u yaʼalikoʼob: «¿Bix jach yanchajik u naʼat le máakaʼ? ¿Bix u páajtal u beetik le milagroʼobaʼ? ¿Maʼ wa u paal le carpinterooʼ? ¿Maʼ wa María u maamaiʼ? U yíitsʼnoʼobeʼ ¿maʼ wa Santiago, José, Simón yéetel Judasiʼ? ¿Maʼ wa u yíitsʼnoʼobeʼ láayliʼ way yanoʼob teʼ kaajaʼ? ¿Tuʼux túun tu kanaj le baʼaloʼobaʼ?» (Mateo 13:54-56).

Le máakoʼoboʼ ku yilkoʼob Jesús chéen jeʼex u maasil u yéet kaajaloʼobeʼ. Letiʼobeʼ joʼopʼ u tuklikoʼob: «Toʼoneʼ t-ilaj u nojochtal, bix kun aʼalbil wa letiʼ le Mesíasoʼ». Bey túunoʼ maʼ tu kʼamoʼob Jesús kex tu yiloʼob jach yaan u naʼat yéetel tu yiloʼob le milagroʼob ku beetkoʼ. Mix tak u láakʼtsiloʼob kʼame, tumen tu yiloʼob bix úuchik u líikʼil. Le oʼolal Jesuseʼ tu yaʼalaj: «Juntúul profetaeʼ maʼ tu utsul kʼaʼamal teʼ luʼum tuʼux síijoʼ, mix tu najil» (Mateo 13:57).

Jesuseʼ jelaʼan úuchik u yilik minaʼan u fejoʼob, le oʼolal maʼ tu beetaj mix junpʼéel milagroiʼ, «chéen tu tsʼáaj u kʼab yóokʼol jujuntúul kʼojaʼanoʼob utiaʼal u tsʼakikoʼob» (Marcos 6:5, 6).