¿Baʼax uts u beetaʼal tu kʼiinil sábado?

Tuláakʼ sabadoeʼ Jesuseʼ ook tiʼ junpʼéel sinagoga, maʼ xaaneʼ tu luʼumil Galilea. Teʼeloʼ tiʼ yaan juntúul máak tikin u x-noʼoj kʼabiʼ (Lucas 6:6). Le escribaʼob yéetel le fariseoʼoboʼ táan u jach ilkoʼob baʼax ken u beet Jesús. Le oʼolal tu kʼáatoʼobtiʼ: «¿Maʼalob wa ka tsʼaʼakak máak tu kʼiinil Sábado?» (Mateo 12:10).

Le u nuuktakil le judíoʼoboʼ ku yaʼalikoʼobeʼ chéen jeʼel u páajtal u tsʼaʼakal máak tu kʼiinil sábado wa jach talam yanileʼ. Ku yaʼalikoʼobeʼ teʼ kʼiin jeʼeloʼ maʼ maʼalob ka utskíintaʼak junpʼéel baak tuukʼuliʼ mix ka kʼaʼaxak junpʼéel baak oopʼoliʼ, tumen maʼ tu jaan kíimsik máak. Baʼaleʼ le escribaʼob yéetel le fariseoʼoboʼ maʼ tu kʼáatoʼob tiʼ Jesús baʼax unaj u beetaʼal chéen tumen ku chʼaʼikoʼob óotsilil tiʼ le máax ku muʼyajoʼ. Baʼaxeʼ chéen táan u kaxtikoʼob bix jeʼel u binoʼob tu contra Jesuseʼ.

Baʼaleʼ Jesuseʼ u yojel baʼax ku tuklikoʼob. Letiʼeʼ tu tsʼáaj cuenta chéen ku píit máanoʼob tiʼ le baʼax ku yaʼalik le Kiliʼich Tsʼíiboʼoboʼ, le oʼolal ku yaʼalikoʼob yaʼab baʼax maʼ unaj u beetaʼal tu kʼiinil sabadoiʼ (Éxodo 20:8-10). Letiʼobeʼ tsʼokaʼaniliʼ u yáax aʼalikoʼob baʼal tiʼ Jesús yoʼolal le milagroʼob ku beetkoʼ. Beoraaʼ Jesuseʼ tu beetaj junpʼéel baʼal beet u maas pʼuʼujuloʼob. Tu yaʼalaj tiʼ le máakoʼ: «Líikʼen ka waʼalakech chúumuk» (Marcos 3:3).

Jesuseʼ tu paktaj le escribaʼob yéetel le fariseoʼoboʼ ka tu yaʼalajtiʼob: «Wa juntúul tiʼ teʼex chéen juntúul u yalakʼ taman yaan, baʼaleʼ ku lúubul ichil junpʼéel jool tu kʼiinil Sabadoeʼ, ¿máasaʼ jeʼel u bin u jóoʼseʼ?» (Mateo 12:11). Juntúul tamaneʼ koʼoj, le beetik wa ka lúubuk ichil junpʼéel jooleʼ maʼ tu páaʼtkoʼob tak tu láakʼ kʼiin utiaʼal u jóoʼskoʼob, tumen jeʼel u kíimileʼ. Tsʼoʼoleʼ le Kiliʼich Tsʼíiboʼoboʼ ku yaʼalik: «Le máak noʼojaʼan u kuxtaleʼ u yojel ku muʼyaj u yaalakʼoʼob» (Proverbios 12:10).

Le oʼolal Jesuseʼ tu yaʼalajtiʼob: «¿Maʼ wa maas nojoch u tojol juntúul máak tiʼ juntúul tamaniʼ? Le oʼolaleʼ, maʼalob ka beetaʼak baʼax uts tu kʼiinil Sábado» (Mateo 12:12). Bey túunoʼ Jesuseʼ maʼ tu mixbaʼalkúuntaj le sábado úuchik u tsʼakik le máakoʼ. U nuuktakil le judíoʼoboʼ maʼ tu kaxtoʼob mix baʼal u yaʼaloʼob yoʼolal le baʼax tu yaʼalaj Jesusoʼ, tumen u yojloʼob jach jaaj.

Jesuseʼ kʼuuxilnajeʼ ka tu paktaj le máakoʼob yanoʼob tu baʼpachoʼ, ka tu yaʼalaj tiʼ le máakoʼ: «Tichʼ a kʼab» (Mateo 12:13). Le ka tu tichʼaj u kʼab tikinoʼ ka utschaji. Leloʼ jach tu beetaj u kiʼimaktal u yóol le máakoʼ. Baʼaleʼ ¿bix túun tu yuʼubiluba le escribaʼob yéetel le fariseoʼoboʼ?

Maʼ kiʼimakchaj u yóoloʼobiʼ, baʼaxeʼ jóokʼoʼob «yéetel u j-tsaypachoʼob Herodes utiaʼal u chʼaʼtuklikoʼob baʼax ken u beetoʼob utiaʼal u kíimskoʼob» Jesús (Marcos 3:6). Ichil le máakoʼobaʼ táakaʼan tak le saduceoʼoboʼ. Le saduceoʼob yéetel le fariseoʼoboʼ maases maʼatech u biskubaʼob, kex beyoʼ tu nupubaʼob utiaʼal u binoʼob tu contra Jesús.