Jesuseʼ ku yéeyik u apostoloʼob

Tsʼoʼok kex óoliʼ junpʼéel jaʼab yéetel táanchumuk aʼalaʼak tumen Juan Bautista, Jesuseʼ u Taman Dios. Le ka tu káajsaj u kʼaʼaytaj Jesusoʼ jujuntúul máakoʼob u yaabiltmoʼob Dioseʼ tu beetubaʼob u disipuloʼob, a kʼaabaʼobeʼ Andrés, Simón Pedro, Juan, maʼ xaaneʼ Santiago (u sukuʼun Juan), Felipe yéetel Bartolomé (ku yaʼalaʼal xan tiʼeʼ Natanael). Ka máan kʼiineʼ tu nupuba uláakʼ máakoʼob tu yéeteloʼob utiaʼal u tsaypachtikoʼob Cristo (Juan 1:45-47).

Beoraaʼ Jesuseʼ tsʼoʼok u kʼuchul u yorail u yéeyik u apostoloʼob. Letiʼobeʼ yaan u biskubaʼob tu yéetel, tsʼoʼoleʼ yaan u kaʼansaʼal yaʼab baʼaloʼob tiʼob. Baʼaleʼ táanil tiʼ u yéeyaʼaloʼobeʼ, Jesuseʼ bin tu juunal tiʼ junpʼéel wits, maʼ xaaneʼ naatsʼ tiʼ u kʼáaʼnáabil Galilea yéetel tiʼ u kaajil Capernaum. Letiʼeʼ tu máansaj tuláakal le áakʼab táan u orar tiʼ Diosoʼ, maʼ xaaneʼ utiaʼal ka nuʼuktaʼak yéetel ka áantaʼak. Ka sáaschajeʼ tu tʼanaj u disipuloʼobeʼ ka tu yéeyaj 12 u túulal ichiloʼob utiaʼal ka u beet u apostoliloʼob.

Jesuseʼ tu yéeyaj le seis u túulal tsʼoʼok k-yáax aʼalik u kʼaabaʼoboʼ bey xan Mateo, le kulukbal tu oficina le ka tʼaʼaneʼ. Le uláakʼ cinco u túulaloʼ Judas (le máax ku yaʼalaʼal Tadeo tiʼoʼ yéetel «u paal Santiago»), Simón, juntúul cananitail, Tomás, Santiago u paal Alfeo yéetel Judas Iscariote (Mateo 10:2-4; Lucas 6:16).

Desde teʼ kʼiin jeʼeloʼ tu doceiloʼob joʼopʼ u máanoʼob yéetel Jesús, le oʼolal jach tu kʼaj óoltoʼob. Yaan tiʼ letiʼobeʼ u láakʼtsiloʼob. Maʼ xaaneʼ Santiago yéetel Juaneʼ u primoʼob Jesús. Tsʼoʼoleʼ wa Alfeo u sukuʼun José, u majan taata Jesús, jeʼex u tuklaʼaloʼ, u kʼáat u yaʼaleʼ le apóstol Santiagooʼ u primo xan.

Jesuseʼ maʼ talam u kʼaʼajsik u kʼaabaʼ u apostoloʼobiʼ. ¿Kux túun teech? ¿Jeʼel wa u béeytal a kʼaʼajskoʼobeʼ? Junpʼéel baʼax jeʼel u yáantkech a kʼaʼajseʼ kaʼatúuleʼ ku kʼaabaʼtik Simón, kaʼatúuleʼ Santiago yéetel kaʼatúuleʼ Judas. Simoneʼ (Pedro) yaan juntúul u yíitsʼin, Andrés, Santiagoeʼ (u paal Zebedeo) yaan xan juntúul u yíitsʼin, Juan. Lelaʼ jeʼel u yáantkech a kʼaʼajs u kʼaabaʼ ocho apostoloʼobeʼ. Le uláakʼ kantúuloʼ tiaʼan le máax ku cobrartik le impuestoʼob kaʼachoʼ (Mateo), uláakʼ juntúuleʼ kaʼapʼéelchaj u tuukul (Tomás), uláakʼ juntúuleʼ tiaʼan yáanal junkúul cheʼ ka tʼaʼaneʼ (Natanael), letiʼeʼ yaan juntúul u amigo (Felipe).

Once apostoloʼobeʼ tiʼ u taaloʼob Galilea, le tuʼux u taal xan Jesusoʼ. Natanaeleʼ tiʼ u taal tu kaajil Canaeʼ. Felipe, Pedro yéetel Andreseʼ tiʼ u taaloʼob tu kaajil Betsaidaeʼ. Pedro yéetel Andreseʼ binoʼob kajtal Capernaum, le tuʼux kajaʼan Mateo xanoʼ. Santiago yéetel Juaneʼ tiʼ kajaʼanoʼob xaniʼ wa naatsʼ tiʼ, letiʼobeʼ chuk kay ku beetkoʼob kaʼachi. Judas Iscariote, le máax traicionart Jesusoʼ, maʼ xaaneʼ chéen letiʼ ku taal tu luʼumil Judea.