¿Baʼax ku péeksikech a beet le siibal tu tsʼáajtoʼon Diosoʼ?

KEN siʼibiktoʼon wa baʼaxeʼ ku taaktal k-tsʼáaik u diosboʼotikil. Lelaʼ bey tu yeʼesil Jesús le ka tu tsʼakaj diez máakoʼob yaantiʼob kaʼach junpʼéel kʼojaʼanil minaʼan u tsʼaakil teʼ kʼiinoʼoboʼ. Juntúul tiʼ le diez máakoʼobaʼ «suunaj táan u kiʼikiʼtʼantik Dios jach kʼaʼam». Jesuseʼ tu yaʼalaj: «Tu diezil tsʼaʼakoʼob, ¿máasaʼ? ¿Tuʼux túun tsʼoʼok le uláakʼ nueve máakoʼoboʼ?» (Lucas 17:12-17). ¿Baʼax ku kaʼansiktoʼon lelaʼ? Ku kaʼansiktoʼoneʼ séeb jeʼel u tuʼubultoʼon le baʼax ku beetik u maasil t-oʼolaloʼ.

Jeʼex t-ilaj teʼ xookoʼob máanikoʼ le boʼol tu tsʼáaj Diosoʼ junpʼéel nojoch siibal yéetel minaʼan uláakʼ siibal u tsʼáatoʼon wa máax jeʼex lelaʼ. Le oʼolaleʼ, ¿baʼax unaj u péeksikoʼon k-beet le jatsʼuts siibal tu tsʼáajtoʼon Diosoʼ?

• Kʼaj óolt le máax tsʼáa le siibaloʼ. Le boʼoloʼ maʼ chéen bey ken u jáan tsʼáa kuxtal minaʼan u xuul tiʼ tuláakal máakoʼ. Le ka orarnaj Jesús tiʼ Jéeobaeʼ tu yaʼalaj: «Lelaʼ letiʼe baʼax ku tsʼáaik kuxtal minaʼan u xuuloʼ: ka kʼuchuk u kʼaj óoltechoʼob, teech le u juntúuliliʼ jaajil Diosoʼ, bey xan ka u kʼaj óoltoʼob Jesucristo, le máax ta túuxtoʼ» (Juan 17:3). Wa ka aʼalaʼaktech yaan máax salvartech ta chichnileʼ, ¿máasaʼ jeʼel u taaktal a kʼaj óoltik yéetel a wojéeltik baʼaxten tu salvartecheʼ? Jéeoba Dios, le máax tsʼáatoʼon le boʼol utiaʼal k-salvartikbaoʼ, u kʼáat ka k-kʼaj óolt maʼalob yéetel ka k-amigote. Le Bibliaoʼ ku yaʼalik: «Natsʼabaʼex tiʼ Dios, letiʼ túuneʼ bíin u natsʼuba tiʼ teʼex» (Santiago 4:8).

• 

  Tsʼáa a fe tiʼ le boʼoloʼ. «Le máax ku tsʼáaik u fe tiʼ le Paaloʼ yaan u yantal kuxtal minaʼan u xuul tiʼ» (Juan 3:36). ¿Baʼax u kʼáat yaʼal lelaʼ? U kʼáat u yaʼaleʼ le fe yaantoʼonoʼ yaan k-eʼesik yéetel le baʼaxoʼob k-beetkoʼ (Santiago 2:17). ¿Bey baʼaxoʼob unaj k-beetkeʼ? Ken tsʼaʼabaktoʼon junpʼéel siibaleʼ k-tichʼik k-kʼab utiaʼal k-machik, beyoʼ k-eʼesik táan k-kʼamik. Láayliʼ xan bey unaj a beetik yéetel le boʼol wa le siibal tu tsʼáajtoʼon Diosoʼ, unaj a weʼesik ka kʼamik. ¿Bix jeʼel a beetkeʼ? Kan bix u kʼáat Dios ka kuxlakech yéetel beet baʼax ka kanik.a Orarnen tiʼ Dios utiaʼal ka u perdonartech yéetel ka yanaktech junpʼéel maʼalob conciencia. Natsʼaba tiʼ Dios yéetel jach creert le boʼol tsʼaʼaboʼ junpʼéel baʼax eʼesik jach tu jaajil yaan k-kuxtal mantatsʼ ich jeetsʼelil yéetel kiʼimak óolal (Hebreoʼob 11:1).

• 

  Ilawil a bin tu Kʼaʼajsajil u kíimil Jesús. Utiaʼal maʼ k-tuʼubsik le boʼol tsʼaʼaboʼ Jesuseʼ tu yaʼalaj ka k-kʼaʼajs cada año. Le ka tu káajsaj le kʼiinbesajaʼ, tu yaʼalaj: «Maʼ u xuʼulul a beetkeʼex lelaʼ utiaʼal a kʼaʼajsikeneʼex» (Lucas 22:19). Teʼ añoaʼ u j-jaajkunajoʼob Jéeobaeʼ yaan u beetkoʼob u kʼaʼajsajil u kíimil Jesús tu kʼiinil martes 11 tiʼ abril tiʼ 2017, ken tsʼoʼokok u tʼúubul kʼiin. Le Kʼaʼajsajilaʼ maʼ ken u chuk mix junpʼéel hora; teʼeloʼ yaan u tsoʼolol baʼaxten tu tsʼáaj u kuxtal Jesús yéetel baʼax utsiloʼob ku taasiktoʼon bejlaʼeʼ bey xan ichil junpʼíit kʼiin. Le año máanoʼ óoliʼ 20 millones máakoʼob binoʼob teʼ Kʼaʼajsajil tiʼ tuláakal yóokʼol kaaboʼ. K-invitartikech ka a láakʼintoʼon teʼ kʼiinaʼ, beyoʼ yaan a weʼesik ka tsʼáaik gracias tiʼ Dios yoʼolal le nojoch siibal tu tsʼáajtoʼonoʼ.