Le baʼax unaj k-kʼaʼaytikoʼ

«TSIK [DIOS], TSʼOʼOKBES U YAʼALMAJ TʼAANOʼOB»

YAʼAB u bin u taal Cristoeʼ, Jéeobaeʼ tu yaʼalaj tiʼ Abrahán baʼax kun meyajtiʼ utiaʼal u beetik u bin utsil tiʼ «tuláakal [...] u múuchʼ kaajiloʼob yóokʼol kaab» (Gén. 22:18). Tu beetaj xan u tsʼíibtaʼal tumen Salomón baʼax unaj u beetik tuláakal wíinik: «Tsik [Dios], tsʼoʼokbes u yaʼalmaj tʼaanoʼob, tumen leloʼ tuláakal utiaʼal wíinik» (Ecl. 12:13). Baʼaleʼ ¿bix jeʼel u kʼuchul u yojéelt tuláakal máak le baʼax unaj u beetkaʼ?

Desde ka káaj u yantal wíinikeʼ tsʼoʼok u yantal máaxoʼob ku tsʼáaik u fejoʼob tiʼ Dios, baʼaleʼ le Bibliaoʼ ku yaʼalikeʼ le maʼalob péektsiloʼ yaan u maas kʼaʼaytaʼal tiʼ tuláakal luʼumiloʼob tu «kʼiinil Yuumtsil», lelaʼ káaj tu jaʼabil 1914 (Apo. 1:10). Apocalipsis 14:6, 7, le ka tʼaanaj yoʼolal le kʼiinoʼob jeʼeloʼ, tu yaʼaleʼ yáanal u nuʼuktaj le angeloʼoboʼ yaan u kʼaʼaytaʼal le maʼalob péektsil «tiʼ tuláakal luʼumoʼob, chʼiʼibaloʼob, tʼaanoʼob yéetel kaajoʼob». Yéetel tiʼ tuláakal máakeʼ yaan u yaʼalaʼal: «Chʼaʼex saajkil tiʼ Dios, yéetel nojbeʼenkúunteʼex, tumen tsʼoʼok u kʼuchul u kʼiinil le juicio ken u beetoʼ; le oʼolaleʼ, adorarteʼex le Máax beet kaʼan, Luʼum, kʼáaʼnáab, bey xan u sayabiloʼob le jaʼoʼ». Dioseʼ u kʼáat ka kʼaʼaytaʼak tuláakal tuʼux le maʼalob péektsilaʼ, toʼoneʼ yáantoʼon u páajtalil k-táakpajal k-beet le meyajaʼ.

U jaajil Dios. Tu kʼiiniloʼob táan u yilaʼal máax u jaajil Dioseʼ, letiʼe ka tu yaʼalaj Jéeoba «Teʼexeʼ in j-jaajkunajeʼex» (Isa. 43:10). Le oʼolaleʼ le baʼax unaj k-kʼaʼaytikoʼ maʼ chéen ku kaʼansik unaj u yantal máak ichil junpʼéel religioniʼ yéetel u creertik juntúul diosiʼ. Baʼaxeʼ unaj k-áantik le máakoʼob u kanoʼobeʼ le máax beet le kaʼan yéetel le Luʼumoʼ chéen letiʼ u jaajil Dios (Isa. 45:5, 18, 21, 22; Juan 17:3). Chéen letiʼ jeʼel u páajtal u yaʼalik jach baʼax ku taal u kʼiin u yúuchleʼ, le oʼolal unaj k-eʼesiktiʼobeʼ le baʼaxoʼob tu beetaj Jéeoba úuchjeakiloʼ ku yeʼesik yaan u láaj béeykuntik le baʼax u yaʼalmaj u beetik ichil junpʼíit kʼiinoʼ (Jos. 23:14; Isa. 55:10, 11).

Teʼ kʼiinoʼobaʼ yaʼab máaxoʼobeʼ jejeláas diosoʼob ku adorartikoʼob wa ku yaʼalikoʼob mix juntúul ku adorartikoʼobiʼ. Utiaʼal ka u chʼenxikintechoʼobeʼ unaj a tʼaan tiʼ baʼaloʼob jeʼel u taaktal u yuʼubikoʼobeʼ. Utiaʼal lelaʼ maʼalob ka k-beet jeʼex tu beetil Pabloeʼ; u libroil Baʼaxoʼob 17:22-31 ku yaʼalikeʼ kex tu kanáantaj bix u tʼaaneʼ, tu yaʼalaj tuláakal máak ken u kʼub cuenta tiʼ le máax beet le kaʼan yéetel le Luʼumoʼ.

Tsʼáa ojéeltbil u kʼaabaʼ Dios. Unaj k-tsʼáaik ojéeltbileʼ u kʼaabaʼ le jaajil Diosoʼ, Jéeoba wa Yahveh, letiʼeʼ bey u kʼáat ka kʼaj óoltaʼakoʼ (Isa. 42:8). Letiʼeʼ tu beetaj u chíikpajal teʼ Biblia maas tiʼ siete mil u téenel u kʼaabaʼoʼ, utiaʼal beyoʼ ka kʼaj óoltaʼak. Le oʼolal toʼoneʼ unaj k-kaʼansik tiʼ le máakoʼoboʼ (Jer. 16:21).

Utiaʼal ka u salvartuba le máakoʼoboʼ kʼaʼabéet u kʼaj óoltikoʼob Jéeoba yéetel u tsʼáaik u fejoʼob tiʼ letiʼ (Joel 2:32; Mal. 3:16; 2 Tes. 1:8). Baʼaleʼ yaʼab máakeʼ, tak le máaxoʼob ku yaʼalikoʼob ku adorartikoʼob Diosoʼ, maʼ u kʼaj óoloʼobiʼ. Kex ku xokik u Bibliaʼobeʼ, maʼ xaaneʼ maʼ u yojloʼob u kʼaabaʼ Diosiʼ, tumen tiʼ yaʼab Bibliaʼobeʼ luʼsaʼaniʼ. Yaan horaeʼ chéen u yojloʼob maʼ unaj u yaʼalikoʼob le tʼaan Jéeobaoʼ, tumen bey aʼalaʼaniltiʼob tumen u nojchil u religionoʼob.

¿Bix maas maʼalob jeʼel k-kaʼansik u kʼaabaʼ Dioseʼ? Letiʼe ka k-eʼes yéetel le Bibliaoʼ, wa ku páajtaleʼ tu Biblia le máax yéetel k-tsikbaloʼ. Yaan tiʼ Bibliaʼobeʼ yaʼab u téenel ku chíikpajliʼ, baʼaleʼ tiʼ uláakʼoʼob, jeʼex teʼ Quiliʼich Bibliaoʼ, le tʼaan Yahvehoʼ ku chíikpajal tiʼ jujunpʼéel tekstoʼob jeʼex tiʼ Isaías 42:8; Jeremías 32:18 wa Amós 4:13. Tiʼ yaʼab Bibliaʼobeʼ tuʼux unaj u bin u kʼaabaʼ Dioseʼ ku tsʼaʼabal «Yuumtsil» wa «Dios» yéetel ku kʼeʼexel bix u tsʼíibtaʼal u letrailoʼob. Utiaʼal u yeʼesaʼal tuʼux luʼsaʼan u kʼaabaʼ Dios teʼ túumben Bibliaʼoboʼ, jeʼel u páajtal u meyaj tiʼ máak junpʼéel Biblia maas chan úuch jóoʼsaʼakeʼ. Tsʼoʼoleʼ yaan tiʼ luʼumiloʼobeʼ teʼ kʼaayoʼob ku beetaʼal tumen uláakʼ religionoʼoboʼ ku chʼaʼchiʼitaʼal u kʼaabaʼ Diosiʼ wa tiʼ tsʼíibtaʼan tiʼ wa baʼax monumentoileʼ.

Le baʼax ku yaʼalik Jeremías 32:17-19, jeʼel u yáantik tak máaxoʼob ku adorartikoʼob yaanal diosoʼobeʼ, tumen maʼ chéen ku chʼaʼchiʼitik u kʼaabaʼ Diosiʼ, baʼaxeʼ ku tsolik máaxiʼ.

Unaj u meyajtech le kʼaabaʼ Jéeobaoʼ, maʼ a kʼexik chéen yéetel le tʼaanoʼob «Dios», «Yuumtsil» wa yéetel uláakʼ tʼaanoʼob, jeʼex u beetik le religionoʼob maʼatech u kaʼanskoʼob u jaajiloʼ. Baʼaleʼ maʼ tsaaj ka meyajnaktech cada ken a káajs junpʼéel tsikbaliʼ. Wa ka beetkeʼ le máaxoʼob maʼ u kʼáat u yuʼuboʼob le kʼaabaʼoʼ yaan u taaktal u xotʼkoʼob a tsikbal. Baʼaleʼ ken a wil tsʼoʼok u chʼaʼik bej a tsikbal tu yéeteleʼ, jeʼel u páajtal u meyajtech le kʼaabaʼ Jéeobaoʼ.

Teʼ Bibliaoʼ maas yaʼab u téenel ku chíikpajal u kʼaabaʼ Diosiʼ ke le uláakʼ tʼaanoʼob ku tsʼaʼabaloʼob (jeʼex «Yuumtsil» yéetel «Dios»). Baʼaleʼ le máaxoʼob tsʼíibt le Bibliaoʼ, maʼ tu yilaj u tsʼáaikoʼob u kʼaabaʼ Dios cada juntéen ka tʼaanajoʼob tu yoʼolaliʼ, tu yilaj u tsʼíibtikoʼob tuʼux maʼalob u yuʼubaʼal yéetel tu beetoʼob xan yéetel tsiikil; toʼon xaneʼ bey unaj k-beetkoʼ.

Le Máax tiaʼalintik le kʼaabaʼoʼ. K-ojéeltik yaan u kʼaabaʼ Dioseʼ junpʼéel baʼal jach kʼaʼanaʼan. Baʼaleʼ maʼ chéen yaan yéetel ka k-ojéeltiʼ.

Utiaʼal k-yaabiltik Jéeoba yéetel utiaʼal k-tsʼáaik k-fe tiʼ letiʼeʼ, kʼaʼabéet k-ojéeltik jach bix letiʼ. Le ka tu yaʼalaj tiʼ Moisés bix u kʼaabaʼeʼ, maʼ chéen yaʼab u téenel tu yaʼalaj le kʼaabaʼ Jéeobaoʼ, baʼaxeʼ tu yaʼalaj le jatsʼuts modos yaantiʼoʼ (Éxo. 34:6, 7, NM). Beyoʼ tu yeʼesajtoʼon bix unaj k-beetik.

Ken tʼaanakech yéetel máaxoʼob maʼ úuch joʼopʼok u kaanbaloʼob wa ken a máans junpʼéel tsoltʼaan bey xan ken tʼaanakech tiʼ baʼaxoʼob ken u beet le Reinooʼ, eʼes xan baʼax ku kaʼansiktoʼon tu yoʼolal Dios. Ken tʼaanakech tiʼ u leyoʼob Dioseʼ eʼes bix u chíikbeskoʼob u naʼat yéetel u yaabilaj. Tsʼoʼoleʼ u leyoʼobeʼ maʼ bey junpʼéel kuuch jach aaleʼ, baʼaxeʼ utiaʼal k-utsil (Isa. 48:17, 18; Miq. 6:8). Ken tʼaanakech yoʼolal le nojoch páajtalil yaan tiʼ Jéeobaoʼ tsol baʼax ku kaʼansiktoʼon tu yoʼolal u jatsʼuts modos, u nuʼuktajoʼob yéetel yoʼolal le baʼaxoʼob ken u beetoʼ. Aʼal bix jach maʼalobil u yeʼesik u jatsʼuts modos. Tʼaanen tiʼ bukaʼaj a yaabiltmil Dios, beyoʼ yaan xan a beetik u yaabiltaʼal tumen u maasil.

Le baʼax k-kʼaʼaytikoʼ ku péeksik uláakʼ máakoʼob utiaʼal ka u chʼaʼob saajkilil tiʼ Dios. Bey túunoʼ le baʼaxoʼob k-aʼalikoʼ unaj u yeʼesik k-chʼaʼik maʼalob saajkilil tiʼ letiʼ, lelaʼ u kʼáat u yaʼaleʼ unaj k-eʼesik tsiikil tiʼ (Sal. 89:7). Le maʼalob saajkilaʼ ku yáantkoʼon k-ileʼ Jéeobaeʼ letiʼ máax ku juzgartikoʼon yéetel unaj k-beetik baʼax uts tu tʼaan utiaʼal ka xiʼiktoʼon utsil (Luc. 12:5; Rom. 14:12). Bey túunoʼ le maʼalob saajkil k-uʼuyik tu yoʼolaloʼ ku yeʼesik k-yaabiltmaj yéetel k-kʼáat beet baʼax uts tu tʼaan (Deu. 10:12, 13). Ku yáantkoʼon xan utiaʼal k-pʼektik baʼax kʼaas, utiaʼal k-uʼuyik u tʼaan yéetel utiaʼal k-adorartik yéetel u jaajil k-óol (Deu. 5:29; 1 Cró. 28:9; Pro. 8:13). Ku kanáantkoʼon xan utiaʼal maʼ k-yaabiltik u baʼalubaʼob le yóokʼol kaabaʼ (1 Juan 2:15-17).

U kʼaabaʼ Dioseʼ bey «u kúuchil maʼalob taʼakbesajeʼ». Máax jach tu jaajil ku kʼuchul u kʼáaj óolt Jéeobaeʼ ku yuʼubik kanáantaʼan. Baʼaleʼ maʼ chéen tumen ku chʼaʼchiʼitik u kʼaabaʼiʼ wa tumen u yojel máakalmáak u jatsʼuts modosiʼ, baʼaxeʼ tumen ku kʼubik u yóol tiʼ letiʼ. Yoʼolal le máakoʼob beyaʼ, Proverbios 18:10 ku yaʼalik: «U kʼaabaʼ Yuumtsileʼ bey u kúuchil maʼalob taʼakbesajeʼ tuʼux ku binoʼob [le toj u] kuxtaloʼob utiaʼal ka kanáantaʼakoʼo[boʼ]».

Ilawil a wáantik tiʼ tuláakal súutukil le máaxoʼob uʼuyikechoʼ utiaʼal ka u kʼub u yóoloʼob tiʼ Jéeoba (Sal. 37:3; Pro. 3:5, 6). Ken k-beet beyoʼ k-eʼesik k-fe tiʼ letiʼ bey xan tiʼ baʼaxoʼob u yaʼalmaj u beetik (Heb. 11:6). Le Bibliaoʼ ku yaʼalikeʼ le máaxoʼob chʼaʼchiʼitik u kʼaabaʼ Jéeobaeʼ yaan u salvarkubaʼob, baʼaleʼ chéen wa ku beetkoʼob tumen ku creertikoʼob letiʼ u yuumil tuláakal baʼal, u yaabiltmoʼob u leyoʼob yéetel ku creertikoʼob chéen letiʼ jeʼel u salvartik máakeʼ (Rom. 10:13, 14). Ken a kaʼans uláakʼ máakoʼobeʼ, áant ka u yeʼes u fejoʼob ichil tuláakal u kuxtaloʼob.

Yaʼab máakoʼobeʼ ku aktáantkoʼob yaʼab talamiloʼob ichil u kuxtaloʼob, maʼ xaaneʼ ku yilkoʼob bey minaʼan utskíinajil tiʼobeʼ. Líiʼs u yóoloʼob utiaʼal ka u kanoʼob baʼax uts tu tʼaan Jéeoba, ka u kʼub u yóoloʼob tiʼ letiʼ yéetel ka u tsʼáa ichil u kuxtaloʼob le baʼax ku tsolnuʼuktikoʼ (Sal. 25:5). Aʼaltiʼob ka u kʼáatoʼob tiʼ Jéeoba ka áantaʼakoʼob yéetel ka u tsʼáaʼob nib óolal tiʼ yoʼolal u yutsil ku yeʼesiktiʼob (Fili. 4:6, 7). Letiʼobeʼ ku kʼuchul u kʼaj óoltoʼob Jéeoba, maʼ chéen ikil u xokikoʼob jujunpʼéel tekstoʼobiʼ, baʼaxeʼ tumen tsʼoʼok u yilkoʼob bix u yáantaʼaloʼob tumen Jéeoba ichil u kuxtaloʼob, yoʼolal lelaʼ ku kʼuchul u yuʼububaʼob jach kanáantaʼanoʼob (Sal. 34:8; Jer. 17:7, 8).

Unaj k-ilik k-áantik le máakoʼob utiaʼal ka u yiloʼob unaj u chʼaʼabal junpʼéel maʼalob saajkilil tiʼ Jéeoba yéetel unaj u tsʼoʼokbesaʼal u leyoʼob.

UNAJ K-TʼAAN TU YOʼOLAL JESÚS

KA TSʼOʼOK u kaʼa kuxkíintaʼal Jesús yéetel táanil tiʼ u suut teʼ kaʼanoʼ, tu yaʼalaj tiʼ u disipuloʼob: «Yaan a beetkabaʼex j-jaajkunajil tiʼ teen [...] tak tu maas náachil le Luʼumaʼ» (Bax. 1:8). Le Bibliaoʼ ku yaʼalik xaneʼ teʼ kʼiinoʼobaʼ máaxoʼob meyajtik Dioseʼ «kʼubéentaʼantiʼob u meeyjil u jaajkúuntikoʼob le baʼaxoʼob yaan yil yéetel Jesusoʼ» (Apo. 12:17). ¿Táan wa a jach tsʼáaik a wóol tiʼ le meyajaʼ?

Yaʼabkach máakoʼobeʼ ku yaʼalikoʼob ku creertikoʼob Jesús, baʼaleʼ maʼ u yojloʼob wa tiʼ yaan kaʼach teʼ kaʼan táanil tiʼ u taal way Luʼumeʼ. Maʼ u jach yojloʼob baʼax meyajiloʼob tsʼaʼan u beet utiaʼal u béeytal le baʼax u yaʼalmaj Diosoʼ. Maʼ u yojloʼob baʼax táan u beetik teʼ kʼiinoʼobaʼ mix u yojloʼob baʼax ken u beet ichil junpʼíit kʼiiniʼ. Maʼ xaaneʼ ku tuklikoʼobeʼ u j-jaajkunajoʼob Jéeobaeʼ maʼatech u creertikoʼob Cristo. Baʼaleʼ tsʼaʼantoʼon u páajtalil k-tsʼáaik u yojéeltoʼob u jaajil yoʼolal le baʼaloʼob tsʼoʼok k-aʼalikaʼ.

Yaan máaxoʼob xaneʼ, ku yaʼalikoʼobeʼ le Jesús ku chʼaʼchiʼitaʼal teʼ Bibliaoʼ maʼ anchajiʼ. Yanoʼobeʼ ku yaʼalikeʼ chéen juntúul wíinik tu beetaj yaʼab baʼaloʼob maʼalobtak, baʼaleʼ maʼ u Hijo Dios biniʼ. Ken tʼaanakoʼon tu yoʼolal Jesús yéetel máakoʼob beyaʼ, kʼaʼabéet k-kanáantik bix ken k-tʼaan yéetel u chúukpajal k-óol k-kaʼansoʼob.

Kex jejeláas baʼaxoʼob ku creertik le máakoʼoboʼ, kʼaʼabéet u kʼaj óoltikoʼob Jesucristo utiaʼal ka yanaktiʼob le kuxtal minaʼan u xuul ku yaʼalik u tsʼáaik Diosoʼ (Juan 17:3). Jéeobaeʼ u kʼáat tuláakal máak «ka u yaʼal tu táan tuláakaleʼ Jesucristoeʼ Yuumtsil» bey xan ka u tsʼáauba yáanal u páajtalil (Fili. 2:9-11). Le oʼolaleʼ maʼ unaj u pʼáatal maʼ k-aʼalik u jaajil tu yoʼolal Jesús tiʼ le máaxoʼob maʼ maʼalob baʼax ku creertikoʼob tu yoʼolaloʼ. Yaan kʼiineʼ yaan u páajtal k-jach tʼaan yoʼolal Jesús ken yáax tsikbalnakoʼon yéetel wa máax, baʼaleʼ yaan kʼiineʼ jujunpʼíitil unaj k-utskíintik le baʼax ku tuklik yoʼolal Cristooʼ. Maʼ xaaneʼ unaj k-ilik bix ken k-seguert k-tʼaan tu yoʼolal Jesús ken kaʼa suunakoʼon. Kex ka k-beet beyaʼ maʼ kun béeytal k-láaj tsoliktiʼ baʼaloʼob yaan yil yéetel Cristo tak ken k-káajs junpʼéel xook tu yéetel (1 Tim. 2:3-7).

Le meyaj ku beetik Jesús utiaʼal ka béeyak baʼax u tukultmaj Diosoʼ. Kʼaʼabéet k-áantik le máakoʼob u yiloʼob unaj u tsʼáaik u fejoʼob tiʼ Jesús utiaʼal ka u bisubaʼob yéetel Diosoʼ. Lelaʼ beyoʼ tumen Cristoeʼ letiʼ «le bejoʼ» yéetel «mix máak ku náatsʼal tu yiknal le Taata wa maʼ» tu yoʼolaloʼ (Juan 14:6). Wa maʼ tu naʼatkoʼob baʼax meeyjil u tsʼaamaj Jéeoba tiʼ u yáax Paaleʼ, maʼ ken u naʼatoʼob baʼax ku kaʼansik le Bibliaoʼ. ¿Baʼaxten? Tumen Jesús ku meyaj tiʼ Jéeoba utiaʼal u béeykuntik le baʼaxoʼob u tukultmaj u beetkoʼ (Col. 1:17-20). Le profecíaʼoboʼ ku tʼaanoʼob tu yoʼolal Jesús (Apo. 19:10). Letiʼ máax yéeyaʼan utiaʼal u yutskíint tuláakal le talamiloʼob tu beetaj u yantal Satanás bey xan le anchaj yoʼolal u kʼeban Adanoʼ (Heb. 2:5-9, 14, 15).

Utiaʼal k-naʼatik le meyajoʼob ku beetik Cristooʼ, unaj k-tsʼáaik cuenta jach yaj yaniloʼon, tumen kʼeban máakoʼon yéetel chéen toʼoneʼ mix baʼal ku páajtal k-beetik tu yoʼolal. Lelaʼ ku beetik k-sen muʼyaj yéetel ku biskoʼon tiʼ kíimil (Rom. 3:23; 5:12). Áant le máaxoʼob yéetel ka tsikbal u naʼatoʼob lelaʼ, ken tsʼoʼokkeʼ aʼaltiʼobeʼ Jéeobaeʼ yaan u salvartik tiʼ le kʼeban yéetel tiʼ le kíimil le máaxoʼob ku tsʼáaik u fejoʼob tiʼ u kuxtal Cristo tu kʼuboʼ (Mar. 10:45; Heb. 2:9). Wa ku beetkoʼobeʼ, jeʼel u kuxtaloʼob utiaʼal minaʼan u xuuleʼ (Juan 3:16, 36). Chéen yaan u salvarkubaʼob wa ku tsʼáaik u fejoʼob tiʼ Jesucristo (Bax. 4:12). Baʼaleʼ ken a tsʼáa xook wa ken kaʼansajnakech teʼ múuchʼuliloʼ, maʼ chéen unaj a tʼaan tiʼ le jeʼeloʼ, kʼaʼabéet xan u chúukpajal a wóol a beet u yaabiltaʼal Jesús úuchik u tsʼáaik u kuxtal t-oʼolal. Ken kʼuchuk u yaabiltoʼob le baʼax tu beetaj Jesusoʼ, yaan u kʼexik bix u tuukuloʼob yéetel bix u kuxtaloʼob (2 Cor. 5:14, 15).

Kex Jesús chéen juntéen tu kʼubaj u kuxtal t-oʼolaleʼ, bejlaʼeʼ láayliʼ táan u meyaj bey juntúul Nojoch Sacerdoteeʼ (Heb. 9:28). Áant le máaxoʼob uʼuyikech utiaʼal ka u naʼatoʼob baʼax u kʼáat u yaʼal leloʼ. ¿Yaan wa baʼax beetik u chiʼichnaktaloʼob, u lúubul u yóoloʼob, yaan wa baʼax ku muʼyajtikoʼob, yaan wa máax tratartikoʼob kʼaasil? Ka kuxlaj way Luʼumeʼ, Jesuseʼ tu aktáantaj tuláakal le baʼaloʼobaʼ, le oʼolal ku naʼatik bix k-uʼuyikba. Tumen k-beetik baʼaloʼob maʼ maʼalobtakeʼ, kʼaʼabéet k-kʼáatik tiʼ Dios ka u perdonartoʼon. Wa k-kʼáatik tiʼ Dios ka u perdonartoʼon ikil k-tsʼáaik fe tiʼ u kuxtal u Hijo tu kʼuboʼ, Jesuseʼ yaan u yáantkoʼon, yaan u «tʼaan t-oʼolal tu táan Dios» (1 Juan 2:1, 2; Rom. 8:3). Úuchik u kʼubik u kuxtal Jesús t-oʼolal bey xan yoʼolal le meyajoʼob ku beetik bey sacerdoteeʼ, jeʼel u páajtal k-natsʼikba «tiʼ u trono Dios, le máax eʼesik nojoch utsil tiʼ máakoʼ», utiaʼal ka u yáantoʼon (Heb. 4:15, 16). Kex kʼeban wíinikoʼoneʼ, Cristoeʼ ku yáantkoʼon k-meyajt Dios yéetel junpʼéel maʼalob tuukul (Heb. 9:13, 14).

Tsʼoʼoleʼ tiʼ Jesuseʼ yaan nojoch páajtalil, tumen Dioseʼ u tsʼaamaj bey u Poolil le múuchʼuliloʼ (Mat. 28:18; Efe. 1:22, 23). Yéetel le páajtalil tsʼaʼantiʼaʼ ku nuʼuktik le múuchʼulil jeʼex u yilik ku kʼaʼabéettaleʼ yéetel jeʼex uts tu tʼaan Dioseʼ. Ken kaʼansajnakecheʼ unaj a weʼesikeʼ Jesús u Poolil le múuchʼuliloʼ, maʼ juntúul wíinikiʼ (Mat. 23:10). Desde ken yáax tsikbalnakech yéetel máax taak u kaanbaleʼ, invitart utiaʼal ka xiʼik teʼ muchʼtáambaloʼoboʼ, tumen tiʼ k-xokik le Biblia yéetel u yáantaj le jóoʼsaʼaniloʼob ku tsʼáaik «le palitsil chúukaʼan u yóol yéetel yaan u naʼat[oʼ]». Tsoltiʼ máax «le palitsilaʼ» bey xan máax le tsʼuuloʼ, utiaʼal ka u naʼat le páajtalil yaan tiʼ Cristooʼ (Mat. 24:45-47). Presentart le ancianoʼob tiʼoʼ yéetel aʼaltiʼ baʼaxoʼob ku páaʼtaʼal ka u beetoʼob (1 Tim. 3:1-7; Tito 1:5-9). Tsoltiʼ maʼ letiʼe ancianoʼob u yuumiloʼob le múuchʼuliloʼ, chéen ku yáantajoʼob utiaʼal ka kuxlak máak jeʼex tu beetil Jesuseʼ (Bax. 20:28; Efe. 4:16; 1 Ped. 5:2, 3). Aʼaltiʼeʼ tiʼ tuláakal yóokʼol kaabeʼ yaan máaxoʼob ku meyajtikoʼob Dios yáanal u nuʼuktaj Cristo.

Le Evangelioʼoboʼ ku yaʼalikoʼobeʼ le ka ook Jesús Jerusalén, le maʼ yaʼab u bin u kíimsaʼaloʼ, u disipuloʼobeʼ tu kʼamoʼob bey «le Máax ku taal bey Rey tu kʼaabaʼ Jéeobaoʼ» (Luc. 19:38). Le j-xoknáaloʼoboʼ ken u maas kʼaj óoltoʼob baʼax ku yaʼalik le Bibliaoʼ, ku kankoʼobeʼ Jesús tsʼaʼan u beet u reyil tu yóokʼol tuláakal máak (Dan. 7:13, 14). Ken a máans junpʼéel jaats teʼ muchʼtáambal yéetel ken a kaʼans wa máaxeʼ, áant u naʼat baʼax utsiloʼob jeʼel k-kʼamik yáanal u gobierno Jesuseʼ.

Utiaʼal leloʼ aʼaleʼ le bix k-kuxtaloʼ ku yeʼesik wa k-ilik Jesucristo bey k-Reyeʼ yéetel wa k-tsʼáaikba yáanal u páajtalil. Aʼal baʼax meeyjil tu kʼubéentaj Jesús tiʼ u disipuloʼob le ka tsʼoʼok u beetaʼal reyiloʼ (Mat. 24:14; 28:18-20). Tʼaanen tiʼ baʼaxoʼob kʼaʼabéet k-tsʼáaik táanil ichil k-kuxtal, jeʼex tu kaʼansil Jesús, le j-Maʼalob Tsolnuʼukoʼ (Isa. 9:6, 7, NM; Mat. 6:19-34). Tsol baʼax modosil ku páaʼtaʼal ka u yeʼes u disipuloʼob le u Reyil Jeetsʼeloʼ (Mat. 20:25-27; Juan 13:35). Maʼ a juzgartikoʼob wa maʼ táan u tsʼáaik u yóol u beetoʼob le baʼax ku páaʼtaʼal tiʼoboʼ, baʼaxeʼ áant u yiloʼob wa táan u tsʼáaikubaʼob yáanal u nuʼuktaj Cristo. Ken tʼaanakech tiʼ tuláakal le baʼaxoʼob tsʼoʼok u yaʼalaʼalaʼ, kʼaʼabéet a weʼesik tak teech unaj a beetik beyoʼ.

Cristo u chuunpakʼil. Le Bibliaoʼ ku yaʼalikeʼ u kaʼansaʼal juntúul máakeʼ bey jeʼex u beetaʼal junpʼéel najeʼ, u chuunpakʼileʼ Jesús (1 Cor. 3:10-15). Le oʼolaleʼ kʼaʼabéet k-áantkoʼob yéetel le Biblia u kʼaj óoltoʼob bix letiʼoʼ. Kʼaʼabéet u naʼatkoʼobeʼ Cristo unaj u tsaypachtikoʼob maʼ teechiʼ (1 Cor. 3:4-7).

Unaj u kaʼansaʼal tiʼ le j-xoknáaloʼoboʼ Cristoeʼ tu pʼatajtoʼon «junpʼéel eʼesajil utiaʼal ka xíimbalnak[oʼon] jach jeʼex úuchik u beetkoʼ» (1 Ped. 2:21). Utiaʼal ka maas kaanbalnakoʼobeʼ, aʼaltiʼob ka u xokoʼob le Evangelioʼoboʼ yéetel ka u yil u beetkoʼob le baʼax ku kankoʼoboʼ. Áant u yiloʼob le jatsʼuts modos tu yeʼesaj Jesusoʼ yéetel ka tuukulnakoʼob tiʼ bix tu yeʼesaj u yaabiltmaj u Taata, bix úuchik u aktáantik le talamiloʼoboʼ, baʼax tu beetaj utiaʼal maʼ u lúubul tiʼ baʼax kʼaas, bix úuchik u yuʼubik u tʼaan Dios yéetel bix úuchik u tratartik le máaxoʼob tu aktáantoʼob jejeláas talamiloʼoboʼ. Eʼes baʼax meeyjil jach tu tsʼáaj u yóol u beet Cristo. Beyoʼ ken u chʼaʼtukult le j-xoknáaloʼob baʼax ken u beetoʼob wa ken u aktáantoʼob wa baʼax talamileʼ, ka u tukloʼob: «¿Baʼax jeʼel u beetik kaʼach Cristo wa ka u aktáant le talamilaʼ? ¿Yaan wa in weʼesik kin tsʼáaik nib óolal tiʼ yoʼolal baʼax tsʼoʼok u beetik tin woʼolal?».

Ken a máans junpʼéel jaatseʼ, maʼ a tuklik tumen le sukuʼunoʼob yaan u fejoʼob tiʼ Cristooʼ, maʼ tsaaj a tʼaan tu yoʼolaliʼ. Le baʼaxoʼob ken a waʼaloʼ kʼaʼabéet u maas muʼukʼaʼankúuntik u fe le máaxoʼob uʼuyikechoʼ. Ken tʼaanakech tiʼ le muchʼtáambaloʼoboʼ, eʼes baʼax yaan yil yéetel le meyaj ku beetik Jesús, u poolil le múuchʼuliloʼ. Wa ka tʼaan tiʼ le kʼaʼaytajoʼ, eʼes bix úuchik u kʼaʼaytaj Jesús yéetel aʼal bix u táakpajal bejlaʼa teʼ kʼaʼaytaj utiaʼal u muchʼik le máaxoʼob ken u salvartubaʼoboʼ.

Jeʼex tsʼoʼok k-ilkoʼ, le máakoʼoboʼ maʼ chéen unaj u kankoʼob jujunpʼéel baʼaloʼob tu yoʼolal Jesusiʼ. Utiaʼal u beetkubaʼob u disipuloʼobeʼ kʼaʼabéet u tsʼáaik u fejoʼob tiʼ letiʼ yéetel u yaabiltikoʼob. Le yaabilajaʼ yaan u péeksikoʼob u beetoʼob baʼax ku yaʼalik (Juan 14:15, 21). Tsʼoʼoleʼ yaan xan u yáantkoʼob utiaʼal u chúukpajal u yóol u aktáantoʼob talamiloʼob, utiaʼal u kuxtaloʼob jeʼex kuxlajik Cristoeʼ yéetel utiaʼal u yeʼeskoʼob taamchajaʼan u mootsoʼob yéetel pʼaatloʼob «yóokʼol le chuunpakʼoʼ» (Efe. 3:17). Ken u beetoʼob lelaʼ yaan u nojbeʼenkúuntkoʼob Jéeoba, u Dios yéetel u Taata Cristo.

«U MAʼALOB PÉEKTSILIL LE REINOAʼ»

ICHIL le baʼaxoʼob tu yaʼalaj Jesús kun eʼesik tiʼ yanoʼon tu tsʼook kʼiinoʼobeʼ, tiʼ yaan le baʼax tu yaʼalaʼ: «U maʼalob péektsilil le Reinoaʼ yaan u kʼaʼaytaʼal tiʼ tuláakal yóokʼol kaab utiaʼal ka ojéeltaʼak tumen u kajnáaliloʼob tuláakal kaajoʼob, ken tsʼoʼokkeʼ letiʼ túun ken taalak u xuul» (Mat. 24:14).

¿Baʼax tiʼ ku tʼaan le maʼalob péektsil unaj u kʼaʼaytaʼaloʼ? Tiʼ le gobierno tu yaʼalaj Jesús ka kʼáataʼak tiʼ Dios le ka tu yaʼalaj: «Taalak a Reino» (Mat. 6:10). Apocalipsis 11:15 ku yaʼalikeʼ le reinoaʼ, «u Reinoil [...] k-Yuumtsil [Jéeoba] yéetel u Cristo»; lelaʼ bey u yaʼalikaʼ tumen le gobiernooʼ utiaʼal Jéeoba chéen ku tsʼáaik tiʼ Cristo. Jeʼex k-ilkoʼ le baʼax k-kʼaʼaytik bejlaʼoʼ, maas chúukaʼan tiʼ le baʼax tu kʼaʼaytaj le disipuloʼob teʼ yáax siglo le ka tu yaʼaloʼob: «U Reino Dioseʼ tsʼoʼok u náatsʼal ta wiknaleʼex» (Luc. 10:9). Teʼ kʼiinoʼob jeʼeloʼ, tiʼ yaan Jesús ichiloʼobeʼ, le máax tsʼoʼok u yéeyaʼal utiaʼal u beet u reyiloʼ. Baʼaleʼ jeʼex u yaʼalik Mateo 24:14, Jesuseʼ tu yaʼalaj yaan u kʼaʼaytaʼal tiʼ tuláakal yóokʼol kaab uláakʼ baʼaxoʼob yaan yil yéetel le Reinooʼ.

Tiʼ profeta Danieleʼ tsʼaʼab u yil uláakʼ baʼaxoʼob kun úuchul. Letiʼeʼ tu yilaj «juntúul máak chíikaʼan tiʼ u paal xiib» (Jesucristo) táan u tsʼaʼabaltiʼ tumen «le Nuxiboʼ» (Jéeoba Dios) «páajtalil, u nojbeʼenil yéetel u [reino], u kajnáaliloʼob tuláakal le luʼumaʼ yéetel u tʼaanoʼobeʼ ku meyajtikoʼob kaʼachi» (Dan. 7:13, 14). Lelaʼ béeychaj teʼ kaʼan tu jaʼabil 1914, le ka puʼul Satanás yéetel u kʼasaʼan angeloʼob way Luʼumeʼ (Apo. 12:7-10). Desde teʼ kʼiinoʼob jeʼeloʼ le kʼasaʼan yóokʼol kaabaʼ ook tu tsʼook kʼiinoʼob. Baʼaleʼ táanil tiʼ u xuʼulsaʼaleʼ, táan u kʼaʼaytaʼal tsʼoʼok u káajal u gobernar Cristo teʼ kaʼanoʼ. Lelaʼ tiʼ tuláakal máak táan u tsʼaʼabal u yojéelte; le máaxoʼob ku kʼamkoʼob le maʼalob péektsilaʼ ku yeʼeskoʼob u kʼáatoʼob antal yáanal u gobierno Dios, máax yaan u «páajtalil tu yóokʼol u kaajiloʼob luʼum» (Dan. 4:32).

U jaajileʼ yaʼab baʼaxoʼob ku bineltik u yúuchul. Le beetik láayliʼ táan k-kʼáatik: «Taalak a Reino». Ken k-kʼáat ka taalakeʼ maʼ tumen wa táan k-tuklik maʼ u tsʼaamaj u Reino Diosiʼ, baʼaxeʼ k-kʼáatik ka taalak tumen k-ojel yaan u béeykuntik profecíaʼob jeʼel bix Daniel 2:44 yéetel Apocalipsis 21:2-4. Yaan u sutik paraísoil le Luʼumaʼ tuʼux kun kajtal máakoʼob u yaabiltmoʼob Dios yéetel u yéet máakiloʼob. Ken k-kʼaʼayt «u maʼalob péektsilil le Reinoaʼ», k-tʼaan tiʼ le jatsʼuts baʼaxoʼob ken u beetoʼ, baʼaleʼ k-kaʼansik xaneʼ Jéeobaeʼ tsʼoʼok u tsʼáaik tiʼ u Hijo u páajtalil u beetik u reyil. Ken a kʼaʼayt le maʼalob péektsiloʼ, ¿ka tʼaan wa tiʼ le baʼaloʼobaʼ?

Tsol baʼax le Reinooʼ. ¿Bix unaj a kʼaʼaytik le Reinooʼ? Kex maʼalob ka tʼaanakech tiʼ baʼaloʼob jeʼel u taaktal u yuʼubaʼaleʼ, kʼaʼabéet u séeb tsʼaʼabal cuenta táan a tʼaan tiʼ le Reinooʼ.

Baʼax jach kʼaʼanaʼan u beetaʼaleʼ letiʼe u xoʼokol wa u chʼaʼchiʼitaʼal tekstoʼob ku tʼaanoʼob tiʼ le Reinooʼ. Ken tʼaanakech tu yoʼolaleʼ, kʼaʼabéet u naʼataʼal tiʼ le baʼax ka tʼaanoʼ. Maʼ chéen unaj a waʼalik junpʼéel gobiernoiʼ, tumen yaan máakoʼobeʼ talam u creertikoʼob u yantal junpʼéel gobierno maʼ tu páajtal u yilaʼal. Wa ka tʼaan yéetel juntúul máax bey u tuukulaʼ, kʼaʼabéet a wilik bix ken a tsoliltiʼ. Maʼ xaaneʼ jeʼel u páajtal a waʼalikeʼ, kex le iikʼ maʼ tu páajtal u yilaʼaloʼ jach kʼaʼabéet utiaʼal u kuxtal máak. Kex maʼ tu páajtal xan k-ilik máax beetmil le iikʼoʼ, k-ojel jach nojoch le páajtalil yaantiʼoʼ. Teʼ Bibliaoʼ ku yaʼalaʼaltiʼ «le Rey minaʼan xuʼulul tiʼoʼ» (1 Tim. 1:17). Uláakʼ bix jeʼel a tsolikeʼ, letiʼe a waʼalik kex yaan u gobiernoil junpʼéel nojoch luʼumileʼ, óoliʼ mix máak u kʼaj óol le tuʼux ku yúuchul gobernaroʼ yéetel mix juntéen tʼaanak yéetel le presidenteoʼ. Maʼ xaaneʼ tumen ku yuʼubikoʼob teʼ noticiaʼoboʼ u yojloʼob yaan junpʼéel gobierno. Le Biblia jóoʼsaʼan ich maas tiʼ dos mil doscientos idiomaʼoboʼ, ku tʼaan tu yoʼolal u Reino Dios, ku yaʼalik máax tiʼ tsʼoʼok u tsʼaʼabal le gobiernoaʼ yéetel baʼax táan u beetik teʼ kʼiinoʼobaʼ. U Pʼíich Tulumil Kanan, le revista ku jóoʼsaʼal tiʼ maas yaʼab idiomaʼoboʼ, tu táaneʼ ku yaʼalik «Táan u kʼaʼaytik u Reino Jéeoba».

Uláakʼ bix jeʼel k-áantik le máaxoʼob uʼuyikoʼon utiaʼal ka u naʼatoʼob baʼax le Reinooʼ, letiʼe k-aʼalik baʼaxoʼob u kʼáat máak ka u beet le gobiernoʼoboʼ: jeʼex ka u beetoʼob u yantal meyaj, jeetsʼelil, ka u xuʼulsoʼob u beetaʼal loob, ka tratartaʼak igual tuláakal máak, ka tsʼaʼakak máak tubeel yéetel ka tsʼaʼabak maʼalob kaʼansaj. Eʼestiʼobeʼ tuláakal le baʼax ku tsʼíiboltkoʼobaʼ bey xan le uláakʼ baʼaxoʼob kʼaʼabéet utiaʼal u yantal kiʼimak óolaloʼ, yaan u láaj béeykuntaʼal tumen u Reino Dios (Sal. 145:16).

Ilawil u maas tsʼíiboltkoʼob u yantaloʼob yáanal le Reino kun nuʼuktbil tumen Jesucristooʼ. Aʼaleʼ le milagroʼob tu beetoʼ tu chíikbesaj le baʼaloʼob maas maʼalobtak ken u beetoʼ. Tʼaanen tiʼ le jatsʼuts modos tu yeʼesoʼ (Mat. 8:2, 3; 11:28-30). Tsoleʼ tu kʼubaj u kuxtal t-oʼolal yéetel kaʼa kuxkíintaʼab tumen Dios teʼ kaʼan, teʼ tuʼux kun gobernaroʼ (Bax. 2:29-35).

Kʼaʼabéet xan a jach eʼesikeʼ u Reino Dioseʼ tsʼoʼok u káajal u gobernar desde teʼ kaʼanoʼ. Baʼaleʼ maʼ u tuʼubultecheʼ yaʼab tiʼ le máaxoʼob uʼuyikechoʼ maʼ tu yilkoʼob le baʼaxoʼob ku tuklikoʼob unaj u yeʼesik tsʼoʼok u káajal u gobernaroʼ. Aʼaltiʼob jaaj maʼ táan u yilaʼal le baʼax ku páaʼtkoʼob u yilaʼaloʼ yéetel kʼáattiʼob wa u yojloʼob baʼax tu yaʼalaj Jesucristo tu yoʼolal lelaʼ. Eʼestiʼob baʼaxoʼob kun ilbil tu tsʼook kʼiinoʼob jeʼex u yaʼalik le capítulo 24 tiʼ Mateo, capítulo 13 tiʼ Marcos yéetel capítulo 21 tiʼ Lucas. Tsoltiʼobeʼ le baʼaxoʼob ku yaʼalik le tekstoʼobaʼ ku yeʼeskoʼobeʼ Jesuseʼ tsʼoʼok u káajal u gobernar teʼ kaʼanoʼ; utiaʼal lelaʼ xoktiʼob Apocalipsis 12:7-10, 12.

Utiaʼal a weʼesik jach tu jaajil táan u meyaj u Reino Dios teʼ kʼiinoʼobaʼ, xok Mateo 24:14 yéetel tsoltiʼ bix táan u kaʼansaʼal le baʼax ku yaʼalik le Biblia tiʼ tuláakal yóokʼol kaaboʼ (Isa. 54:13). Tʼaanen tiʼ le jejeláas escuelaʼob ku meyajoʼob utiaʼal u kaʼansaʼal u j-jaajkunajoʼob Jéeobaoʼ, baʼaleʼ aʼaleʼ teʼ Biblia ku chʼaʼabal le baʼax ku kaʼansaʼaloʼ yéetel maʼatech u cobrartaʼal. Aʼaleʼ maʼ chéen k-kʼaʼaytaj joonaj joonajiliʼ, baʼaxeʼ ich maas tiʼ 230 luʼumiloʼobeʼ k-kaʼansik xan x-maʼ boʼolil baʼax ku yaʼalik le Biblia tiʼ le máakoʼob tu yotochoʼoboʼ. ¿Yaan wa uláakʼ gobierno jeʼel u tsʼáaik junpʼéel maʼalob kaʼansaj maʼ chéen tiʼ le máaxoʼob yaan tu luʼumil, baʼaxeʼ tak tiʼ le yanoʼob tuláakal yóokʼol kaaboʼ? Invitart le máaxoʼob uʼuyikech utiaʼal ka xiʼikoʼob teʼ muchʼtáambaloʼob yéetel teʼ asambleaʼob utiaʼal ka u yiloʼob bix u modos le máaxoʼob tsʼoʼok u kaʼansaʼaloʼob tumen Diosoʼ (Isa. 2:2-4; 32:1, 17; Juan 13:35).

Baʼaleʼ ¿ku naʼatik wa le máax uʼuyikech le baʼax unaj u beetkoʼ? Maʼ xaaneʼ jeʼel u páajtal a waʼaliktiʼ yéetel tsiikil binech a xíimbalt utiaʼal a tsikbaltiktiʼeʼ tiʼ tuláakal máak tsʼaʼan u páajtalil u yéeyik u kuxtal yáanal u Reino Dios. ¿Bix u yeʼeskoʼob táan u yéeyikoʼob u kuxtaloʼob yáanal le Reinooʼ? Ikil u kankoʼob baʼax uts tu tʼaan Dios yéetel u beetkoʼob (Deu. 30:19, 20; Apo. 22:17).

Áantoʼob u tsʼáaʼob táanil le Reinooʼ. Ken tsʼoʼokok u kʼamik u maʼalob péektsilil le Reinooʼ, yaan uláakʼ baʼaxoʼob kʼaʼabéet u chʼaʼtuklik. ¿Yaan wa u tsʼáaik táanil le Reino ichil u kuxtaloʼ? Jesuseʼ tu yaʼalaj tiʼ u disipuloʼob maʼ u xuʼulul u kaxtikoʼob táanil u Reino Dios (Mat. 6:33). ¿Bix jeʼel a wáantik le sukuʼunoʼob ka u beetoʼob beyoʼ? Letiʼe ka a weʼestiʼob bix a beetik techoʼ yéetel ka a waʼaltiʼob bix jeʼel u beetkoʼob xaneʼ. Kʼáattiʼob wa yaan uláakʼ baʼaxoʼob tsʼoʼok u tuklik u beetkoʼob yéetel tsikbaltiʼob baʼaxoʼob tsʼoʼok u beetik uláakʼ sukuʼunoʼob utiaʼal u tsʼáaikoʼob táanil le Reinooʼ. Tsikbalttiʼob jujunpʼéel baʼaxoʼob ku yaʼalik le Biblia utiaʼal ka u maas yaabiltoʼob Jéeobaoʼ. Tsʼoʼoleʼ aʼal jach táan u meyaj le Reinooʼ yéetel jach kʼaʼanaʼan u kʼaʼaytaʼal. U suukileʼ maʼ chéen unaj a waʼalik baʼax unaj u beetaʼaliʼ, baʼaxeʼ unaj a beetik u tsʼíiboltaʼal u beetaʼal.

Jeʼex tsʼoʼok k-ilkoʼ le maʼalob péektsil unaj k-kʼaʼaytikoʼ ku tʼaan tiʼ Jéeoba Dios, tiʼ Jesucristo yéetel tiʼ le Reinooʼ. Kʼaʼabéet k-tʼaan tiʼ le baʼaxoʼob yaan yil yéetel le Reino ken kʼaʼaytajnakoʼonoʼ, ken kaʼansajnakoʼon teʼ múuchʼuliloʼ yéetel unaj k-eʼesik ichil k-kuxtal k-kʼáat antal yáanal u nuʼuktaj. Beyoʼ yaan k-eʼesik jach táan k-jóoʼsik u yutsil le Escuela utiaʼal k-Kaʼansik u Tʼaan Diosoʼ.