¿Bix jeʼel u yantal kiʼimak óolal ichil a familiaeʼ? (Kaʼa jaats)

U paalal máakeʼ junpʼéel jatsʼuts regalo ku taal tiʼ Jéeoba. Letiʼeʼ u kʼáat ka kanáantaʼak tubeel le regalo tsʼoʼok u tsʼáaik tiʼ le taatatsiloʼoboʼ. Le oʼolal ku tsʼáaik maʼalob consejoʼob utiaʼal u beetkoʼob beyoʼ. Tsʼoʼoleʼ ku tsʼáaik xan consejo tiʼ le paalaloʼob utiaʼal u kiʼimaktal u yóol le familiaoʼ.

1. ¿Baʼax consejoiloʼob ku tsʼáaik Jéeoba tiʼ le taatatsiloʼoboʼ?

Jéeobaeʼ u kʼáat ka yaabiltaʼak le paalaloʼob tumen u taataʼoboʼ yéetel ka u jóoʼsoʼob tiempo utiaʼal u yantaloʼob tu yéeteloʼob. U kʼáat xan ka kanáantaʼakoʼob yéetel ka kaʼansaʼaktiʼob baʼax ku yaʼalik le Bibliaoʼ (Proverbios 1:8). Le Bibliaoʼ ku yaʼalik tiʼ le taatatsiloʼob ka u líiʼs u paalaloʼob «yéetel u kaʼansaj bey xan yéetel u tsolnuʼuk Jéeoba» (xok Efesios 6:4). Dioseʼ u kʼáat ka kaʼansaʼak le paalaloʼob tumen u taataʼoboʼ maʼ tumen yaanal máakiʼ.

2. ¿Baʼax consejoiloʼob ku tsʼáaik Jéeoba tiʼ le paalaloʼoboʼ?

Jéeobaeʼ ku yaʼalik tiʼ le paalaloʼoboʼ: «Uʼuyeʼex u tʼaan a taataʼex» (xok Colosenses 3:20). Wa juntúul paal ku yuʼubik tʼaaneʼ ku kiʼimakkúuntik u yóol u taataʼob bey xan Jéeoba (Proverbios 23:22-25). Tu chichnileʼ Jesúseʼ tu tsʼáaj junpʼéel maʼalob ejemplo, kex perfecto kaʼacheʼ tu yuʼubaj u tʼaan u taataʼob yéetel tu respetartoʼob kex kʼeban máakoʼob kaʼachi (Lucas 2:51, 52).

3. ¿Baʼax jeʼel u beetik le familia utiaʼal u natsʼkuba tiʼ Jéeobaoʼ?

Wa yaan a paalaleʼ maʼ xaaneʼ a kʼáat ka u yaabiltoʼob Jéeoba jeʼex a yaabiltmiloʼ. Chéen baʼaleʼ, ¿bix jeʼel u páajtal a beetkeʼ? Le Bibliaoʼ ku yaʼalik bixiʼ: «Kʼaʼabéet a kaʼansik [baʼax ku yaʼalik Jéeoba] tiʼ a paalaleʼex yéetel a tsikbaltikeʼextiʼob le kéen kulakeʼex ta wotocheʼex, [yéetel] le kéen xíimbalnakeʼex teʼ bejoʼ» (Deuteronomio 6:7). Utiaʼal u kaʼansaʼal wa baʼax tiʼ máakeʼ kʼaʼabéet u yaʼalaʼaltiʼ yaʼab u téenel. Maʼ xaaneʼ techeʼ a wojleʼ utiaʼal a kaʼansik wa baʼax tiʼ a paalaleʼ kʼaʼabéet a waʼaliktiʼob láalaj hora utiaʼal maʼ u tuʼubultiʼob. Le tekstooʼ u kʼáat u yaʼaleʼ kʼaʼabéet a kaxtik u súutukil utiaʼal a kaʼansik a paalal yoʼolal Jéeoba sáamsamal. Tsʼoʼoleʼ maʼalob ka a xakʼalxokt le Biblia junmúuchʼ yéetel a familia cada semanaoʼ. Kex minaʼan a paalaleʼ maʼalob xan ka a xakʼalxokt le Bibliaoʼ.

UTIAʼAL A MAAS NAʼATIK

4. Kaʼans a paalal yéetel yaabilaj

Maʼ chéen chʼaʼabil u kaʼansaʼal juntúul paaliʼ. ¿Pero bix jeʼel u yáantaʼal le taatatsiloʼob tumen le Bibliaoʼ? Xokeʼex Santiago 1:19, 20, kéen tsʼoʼokkeʼ ka tsikbaltikeʼex lelaʼ:

• ¿Bix jeʼel u yeʼesik le taatatsiloʼob u yaabiltmaj u paalaloʼob le kéen tsikbalnakoʼob tu yéeteloʼoboʼ?

• ¿Baʼaxten le taatatsiloʼoboʼ maʼ unaj u tsolkoʼob u nuʼuk tiʼ u paalaloʼob wa pʼujaʼanoʼobiʼ?a

5. Kanáant a paalal

Utiaʼal u kanáantaʼal le paalaloʼob tumen u taataʼoboʼ kʼaʼabéet u tʼaanoʼob tu yéeteloʼob yoʼolal sexo kex yaan hora maʼ chéen chʼaʼabil u beetkoʼobiʼ. Chaʼanteʼex le VIDEOOʼ, kéen tsʼoʼokkeʼ ka tsikbaltikeʼex lelaʼ:

VIDEO: Taatatsileʼex, kanáant a paalaleʼex (2:58)

• ¿Baʼaxten jujuntúul taatatsiloʼobeʼ istikyaj u tʼaanoʼob yoʼolal sexo yéetel u paalaloʼob?

• ¿Baʼax tsʼoʼok u yáantik jujuntúul taatatsiloʼob utiaʼal u tʼaanoʼob yéetel u paalaloʼob yoʼolal sexo?

Jeʼex u yaʼalik le Bibliaoʼ, le yóokʼol kaab nuʼuktaʼan tumen Satanásoʼ táan u bin u maas kʼastal. Xokeʼex 2 Timoteo 3:1, 13, kéen tsʼoʼokkeʼ ka tsikbaltikeʼex lelaʼ:

• Ichil le máakoʼob kʼasaʼanoʼob ku yaʼalik le versículo 13, táakaʼan le ku violarkoʼob mejen paalaloʼoboʼ. Le oʼolaleʼ ¿baʼaxten kʼaʼabéet u tʼaan le taatatsiloʼob yéetel u paalaloʼob yoʼolal sexooʼ? ¿Baʼax jeʼel u beetkoʼob utiaʼal u kanáantik u mejen paalaloʼob tiʼ le clase máakoʼob beyoʼ?

¿A wojel wa?

U testigoʼob Jéeobaeʼ yaʼab publicaciónoʼob yaantiʼob utiaʼal u yáantaʼal le paalaloʼob tumen u taataʼob utiaʼal u kanáantkubaʼob tiʼ le máaxoʼob jeʼel u violarkoʼoboʼ. Jujunpʼéeloʼobeʼ letiʼe jeʼeloʼobaʼ:

• Kanáant a paalaleʼex (video)

• Kaanbalnakoʼon tiʼ le Maʼalob j-Kaʼansajoʼ, xookil 10 yéetel 32

• «Bix jeʼel a tʼaan yéetel a paalal yoʼolal relaciones sexualeseʼ» (¡Aajkech!, núm. 5 2016)

6. Respetart a papá yéetel a maama

VIDEO: Bix jeʼel a tsikbal yéetel a taataʼobeʼ (2:19)

• ¿Bix jeʼel u yeʼesik juntúul paal ku respetartik u taataʼob le kéen tʼaanak tu yéeteloʼobeʼ?

• ¿Bix jeʼel u yeʼesik juntúul táankelem ku respetartik u taataʼobeʼ?

Xokeʼex Proverbios 1:8, kéen tsʼoʼokkeʼ ka tsikbaltikeʼex lelaʼ:

• ¿Baʼax unaj u beetik juntúul táankelem paal kéen aʼalaʼaktiʼ baʼax unaj u beetik tumen u taataʼob?

7. Adorart Jéeoba junmúuchʼ yéetel a familia

U testigoʼob Jéeobaeʼ cada semana ku jóoʼskoʼob tiempo utiaʼal u adorarkoʼob Jéeoba ich familia. ¿Bix túun u beetkoʼob leloʼ? Chaʼanteʼex le VIDEOOʼ, kéen tsʼoʼokkeʼ ka tsikbaltikeʼex lelaʼ:

VIDEO: Adoración ich familia: Baʼaxoʼob talamkúuntik, utsiloʼob ku taasik (8:04)

• ¿Baʼax jeʼel u yáantaj utiaʼal ka beetaʼak le adoración ich familia cada semanaoʼ?

• ¿Baʼax jeʼel u beetik le taatatsiloʼob utiaʼal maʼ u náakal u yóol u paalaloʼob bey xan utiaʼal ka jatsʼutschajak u yilkoʼob le adoración ich familiaoʼ? (Ilawil le foto yaan tu káajbal le xookaʼ).

• ¿Bey baʼax jeʼel u kʼatkuba tu beel a familia utiaʼal maʼ a beetkeʼex le adoración ich familiaoʼ?

Úuchjeakileʼ Jéeobaeʼ tu yaʼalaj tiʼ le israelitaʼob ka u jóoʼsoʼob tiempo utiaʼal u tsikbaloʼob yéetel u familiaʼob yoʼolal le baʼax ku yaʼalik u Leyoʼ. Xokeʼex Deuteronomio 6:6, 7, kéen tsʼoʼokkeʼ ka tsikbaltikeʼex lelaʼ:

• ¿Bix jeʼel a beetik le baʼax ku yaʼalik le tekstooʼ?

Bix jeʼel a beetik le adoración ich familiaoʼ:

• Preparartabaʼex utiaʼal le reuniónoʼoboʼ.

• Múul xokeʼex yéetel tsikbalteʼex u kuxtal wa máax ku yaʼalik le Bibliaoʼ.

• Wa yaan a paalaleʼ descargart wa imprimirt le baʼaloʼob utiaʼal mejen paalal yaan teʼ jw.org.

• Wa táankelem a paalaleʼ meyajnaktech le xokoʼob yéetel le videoʼob utiaʼal paalal yaan teʼ jw.org.

• Beeteʼex junpʼéel drama tiʼ junpʼéel baʼax ku tsikbaltik le Bibliaoʼ.

• Chaʼanteʼex yéetel tsikbalteʼex junpʼéel tiʼ le videoʼob yaan teʼ jw.org.

BAʼAX TSOʼOLI

Jéeobaeʼ u kʼáat ka kanáantaʼak yéetel ka yaabiltaʼak le paalaloʼob tumen u taataʼoboʼ. Le paalaloʼoboʼ kʼaʼabéet u respetarkoʼob yéetel u yuʼubikoʼob u tʼaan u taataʼob. Tuláakal le máaxoʼob yanoʼob ichil le familiaoʼ kʼaʼabéet u múul adorarkoʼob Jéeoba.

Baʼax ta kanaj

• ¿Bix jeʼel u kaʼansaʼal yéetel u kanáantaʼal le paalaloʼob tumen u taataʼoboʼ?

• ¿Bix jeʼel u respetartaʼal le taatatsiloʼob tumen u paalaloʼoboʼ?

• ¿Baʼax utsil jeʼel u taasik wa ku beetaʼal le adoración ich familia cada semanaoʼ?

KAN U MAASIL

¿Bey baʼaxoʼob unaj a kaʼansik tiʼ a paalal utiaʼal ka xiʼiktiʼob maʼalob kéen nojochchajkoʼobeʼ?

«Seis baʼaloʼob unaj a kaʼansik tiʼ a paalal» (¡Aajkech!, núm. 2 2019)

Ilawil jujunpʼéel consejoʼob ku tsʼaʼabal tiʼ le máaxoʼob táan u kanáantik u taataʼob tsʼoʼok u chʼíijloʼoboʼ.

«¿Ku yaʼalik wa Dios ka k-kanáant k-taataʼob tsʼoʼok u chʼíijloʼoboʼ?» (Xok teʼ jw.org)

Juntúul máak kaʼacheʼ maʼ u yojel bix jeʼel u kaʼansik u paalaleʼ. Ilawil baʼax áant utiaʼal u beetik tubeel.

Jéeobaeʼ tu yáantoʼon k-kaʼans tubeel k-paalal (5:58)

Ilawil bix jeʼel u maas biskuba juntúul taatatsil yéetel u paalaleʼ.

«¿Bix jeʼel u maas biskuba juntúul taatatsil yéetel u hijoeʼ?» (U Pʼíich Tulumil Kanan, enero tiʼ 2012)