¿Bix u yáantkoʼon u yeʼesaʼal u jelaʼanil kaʼapʼéel baʼal?

Yaʼab máax aʼalikeʼ maʼ anak uláakʼ j-Kaʼansaj jeʼex Jesuseʼ. ¿Bey wa a tuklik xanoʼ? Wa beyoʼ, maʼ xaaneʼ utiaʼal a kaʼansaj jeʼex letiʼeʼ tsʼoʼok u meyajtech kettʼaanoʼob yéetel kʼáatchiʼob. Baʼaleʼ ¿a wojel wa letiʼeʼ suuk xan u yeʼesik kaʼach u jelaʼanil kaʼapʼéel baʼal?

U suukileʼ ken tʼaanak máakeʼ ku yaʼalik u jelaʼanil kaʼapʼéel baʼal kex maʼatech u tsʼáaik cuenta. Yaan kʼiineʼ k-aʼalik: «Tu yaʼaloʼob láaj takʼan u yich le cheʼoʼ, baʼaleʼ le jeʼeloʼobaʼ maʼatech» wa «Kaʼacheʼ jach suʼlak le x-chʼúupalaʼ, baʼaleʼ bejlaʼeʼ séeb u tsikbal».

Jeʼex k-ilkoʼ yaan kʼiineʼ ku yáax aʼalik máak junpʼéel baʼax jach jaaj wa junpʼéel baʼax ku yaʼalaʼal, tsʼoʼoleʼ ku yaʼalik: baʼaleʼ, baʼaxeʼ, baʼax unajeʼ wa baʼax unaj k-beetkeʼ. Le tʼaanoʼobaʼ ku yaʼalik máak utiaʼal u yeʼesik u jelaʼanil le baʼax ku seguer u yaʼalikoʼ. Yaan kʼiin xaneʼ ken tsʼoʼokok u yaʼalik máak, baʼaleʼ wa baʼaxeʼ, le baʼax ku seguer u yaʼalikoʼ ku maas tsʼáaik u muukʼ baʼax tsʼoʼok u yáax aʼalik wa ku yaʼalik wa baʼax utiaʼal u maas naʼataʼal. Beyoʼ séeb u naʼataʼal baʼax ku yaʼalik máak tumen bey suuk u yúuchul tʼaanoʼ.

Kex maʼ tuláakal tuʼux wa tuláakal máak suuk u yeʼesik u jelaʼanil kaʼapʼéel baʼal ken tʼaanakeʼ, ¿baʼaxten maʼalob ka k-ojéelt baʼax oʼolal ku beetaʼal? Maʼalob tumen teʼ Bibliaoʼ yaʼab u chíikpajliʼ. Tiʼ Jesuseʼ jach suuk u meyaj kaʼachi. Koʼoneʼex ilik jujunpʼéeliʼ: «Maʼatech u tʼaʼabal junpʼéel lámpara ku tsʼoʼokoleʼ ku nokkíintaʼal junpʼéel xaak tu yóokʼol, baʼaxeʼ ku tsʼaʼabal kaʼanal»; «Maʼ taalen in [xuʼuls le Leyoʼ], baʼaxeʼ taalen in béeykunte»; «A wuʼuymeʼex aʼalaʼab úuchjeakil: ‹Maʼ unaj a lúubul tiʼ adulterioiʼ›. Baʼaleʼ teneʼ kin waʼalikteʼexeʼ tuláakal máax ku sen chaʼantik juntúul koʼolel [...]», yéetel «Aʼalaʼab xan úuchjeakil: ‹Máax ku puchʼik u yich wa máaxeʼ yaan xan u puʼuchʼul u yich, máax ku jutik u koj wa máaxeʼ yaan xan u juʼutul u koj›. Baʼaleʼ teneʼ kin waʼalikteʼex: Maʼ a sutkeʼex u jeel le loob ku beetaʼalteʼexoʼ, baʼaxeʼ máax ku lajkech ta x-noʼoj pʼuʼukeʼ, sut uláakʼ u tséel a pʼuʼuk tiʼ» (Mat. 5:15, 17, 27, 28, 38, 39).

Tiʼ uláakʼ libroʼob tiʼ le Bibliaoʼ ku yeʼesaʼal xan u jelaʼanil kaʼapʼéel baʼal. Lelaʼ jeʼel u yáantkoʼon k-maas naʼat junpʼéel baʼaleʼ wa ku yeʼesik baʼax maas maʼalob ka k-beete. Wa taatatsilecheʼ jach tukult baʼax taak u kaʼansik lelaʼ: «Taatatsileʼex, teʼex xaneʼ maʼ a beetkeʼex u pʼuʼujul a paalaleʼex, baʼaleʼ mantatsʼ líiʼseʼexoʼob yéetel u kaʼansaj bey xan yéetel u tsolnuʼuk Jéeoba» (Efe. 6:4). Wa ka u yaʼal Apóstol Pablo tiʼ le taatatsiloʼob ka u kaʼans u paalaloʼob jeʼex uts tu tʼaan Jéeobaeʼ, maʼalob kaʼach baʼax ken u yaʼale. Baʼaleʼ ¿baʼax tu beetaj utiaʼal u jach eʼesik baʼax taak u kaʼansik? Tu yeʼesaj u jelaʼanil kaʼapʼéel baʼal: maʼ u beetaʼal u pʼuʼujul le paalaloʼ, baʼaleʼ ka kaʼansaʼakoʼob jeʼex uts tu tʼaan Jéeobaeʼ.

Láayliʼ teʼ capítulo, baʼaleʼ junpʼíit maas táanileʼ, Pabloeʼ tu yaʼalaj: «Táan k-baʼateʼel, maʼ tu contra bakʼ yéetel kʼiʼikʼiʼ, baʼaxeʼ tu contra [...] le kʼaakʼas muukʼoʼob yanoʼob teʼ kaʼanilbeʼen kúuchiloʼob yéetel maʼ chíikaʼan u yilaʼaloʼoboʼ» (Efe. 6:12). Lelaʼ ku yáantkoʼon k-maas naʼat bukaʼaj talamil le baʼateʼel yaantoʼonoʼ. Maʼ táan k-baʼateʼel chéen yéetel wíinikoʼobiʼ, baʼaxeʼ yéetel kʼasaʼan angeloʼob.

BIX JEʼEL K-JÓOʼSIK U YUTSILEʼ

Teʼ carta tu tsʼíibtaj Pablo tiʼ le efesoiloʼoboʼ, yaʼab u téenel tu yeʼesaj u jelaʼanil kaʼapʼéel baʼal. Wa k-xakʼaltikeʼ yaan u yáantkoʼon k-naʼat baʼax taak u kaʼansik kaʼach Pablo yéetel yaan u yáantkoʼon k-il baʼax unaj k-beetik.

Jach yaʼab baʼax jeʼel a kanik wa ka xakʼaltik le tabla tuʼux ku yeʼesaʼal u jelaʼanil kaʼapʼéel baʼal chʼaʼan teʼ capítulo 4 yéetel 5 tiʼ Efesoiloʼoboʼ. Le táan a xokikoʼ, tukle: «¿Bix in wilik teen? ¿Baʼax kin beetik ken úuchukten beyoʼ? Tiʼ le kaʼapʼéel baʼal ku yeʼesaʼal u jelaʼaniloʼ, ¿máakalmáak ku yilik u maasil táan in beetik?». Wa ku yáantkech a wil yaan baʼax unaj a wutskíintikeʼ, káajak a beetik.

Le tabla xanaʼ jeʼel u páajtal a xakʼaltik ta adoración ich familiaeʼ. Yáaxeʼ ku xoʼokol tuláakal le listaoʼ, ku tsʼoʼoleʼ juntúuleʼ ku xokik u yáax jaatsʼ le baʼax ku yeʼesaʼal u jelaʼaniloʼ ken tsʼoʼokkeʼ u maasileʼ ku yilik wa kʼajaʼantiʼob u tsʼook jaatsoʼ. Lelaʼ yaan u beetik u káajal u tsikbaltaʼal bix jeʼel u maas beetaʼal le baʼax tsʼoʼok u naʼataʼaloʼ. Yoʼolal le u yeʼesaʼal u jelaʼanil kaʼapʼéel baʼaloʼ yaʼab táankelmoʼob yéetel máaxoʼob yaan u jaʼabiloʼobeʼ yaan u béeytal u yeʼeskoʼob jatsʼuts modos, tu yotochoʼob bey xan tuláakʼ tuʼux.

Ken a wil bix u yeʼesaʼal u jelaʼanil kaʼapʼéel baʼaleʼ, séeb ken a wilil le yanoʼob teʼ Bibliaoʼ yéetel yaan a wilik maʼalob utiaʼal a kʼaʼaytaj. Maʼ xaaneʼ jeʼel u páajtal a waʼalik tiʼ juntúul máax tu jool yotocheʼ: «Yaʼab máax tuklikeʼ yaan baʼax ku pʼáatal kuxaʼanil tiʼ máak ken kíimik, baʼaleʼ ilawil baʼax ku yaʼalik le Bibliaoʼ». Jeʼel xan u páajtal a kʼáatik tiʼ máax ku xook ta wéeteleʼ: «Yaʼab máax tuklikeʼ Dios yéetel Jesuseʼ juntúuliliʼob, baʼaleʼ jeʼex tsʼoʼok k-ilkoʼ, ¿baʼax ku yaʼalik le Bibliaoʼ? Techeʼ, ¿bix a wilik?».

Jeʼex k-ilkoʼ teʼ Bibliaoʼ yaʼab u yeʼesaʼal u jelaʼanil kaʼapʼéel baʼal. Lelaʼ ku yáantkoʼon utiaʼal maʼ u xuʼulul k-meyajtik Jéeoba yéetel k-kaʼansik u jaajil tiʼ k-éet máakil.