U ocho xookil
Táan k-baʼateʼel tu contra u muukʼ kʼaakʼas pixanoʼob
1. ¿Baʼaxten jach unaj k-kanáantikba tiʼ le kʼaakʼas pixanoʼoboʼ?
YAʼAB máakeʼ ku cheʼejtik ken u yuʼub u yaʼalaʼal yaan kʼaakʼas pixanoʼob, baʼaleʼ lelaʼ maʼ chéen báaxaliʼ. Kex ka creertaʼak wa maʼeʼ, u jaajileʼ yanoʼob, yéetel táan u yilik u kʼaskuntikoʼob u kuxtal máak. Máaxoʼob jach u yichmoʼobeʼ letiʼe máaxoʼob meyajtik Jéeobaoʼ. Le apóstol Pablooʼ bey u yeʼesik: «Maʼ táan k-baʼateʼel tu contra máakoʼobiʼ, baʼaleʼ tu contra u muukʼ kʼaakʼas pixanoʼob yanoʼob tiʼ le kaʼanilbeʼen kúuchiloʼoboʼ, u kʼáat u yaʼaleʼ, máaxoʼob ku tusbeloʼob [...] yéetel yaan páajtalil tiʼob tu yóokʼol le éekʼjochʼeʼen yóokʼol kaabaʼ» (Efesoiloʼob 6:12). Teʼ kʼiinoʼobaʼ, le kʼaakʼas pixanoʼobaʼ, wa le kʼasaʼan angeloʼobaʼ, tsʼoʼok u jach kʼaskuntikoʼob u kuxtal máak, tumen Satanaseʼ jach kʼuuxchajaʼan úuchik u tojolchʼintaʼal teʼ kaʼanoʼ, yéetel u yojel taʼaytak u xuʼulsaʼal (Apocalipsis 12:12).
2. ¿Bix jeʼel u páajtal k-ganartik le baʼateʼel yantoʼon tu contra le kʼaakʼas pixanoʼoboʼ?
2 ¿Jeʼel wa u páajtal k-ganartik le baʼateʼel yantoʼon tu contra le kʼaakʼas pixanoʼoboʼ? Jeʼeleʼ, baʼaleʼ kʼaʼabéet kaxtik u yáantaj Jéeoba. Kʼaʼabéet k-beetik baʼax ku yaʼaliktoʼon teʼ Bibliaoʼ; wa k-beetik beyoʼ yaan kanáantikba tiʼ le yaʼab talamiloʼob yéetel muʼyajiloʼob ku máansik le máaxoʼob yanoʼob yáanal u kʼab Satanasoʼ (Santiago 4:7).
Le máaxoʼob gobernartik le yóokʼol kaabaʼ
3. ¿Máaxoʼob ku sen chʼaʼapachtik Satanás, yéetel bix u beetik?
3 Jéeobaeʼ ku yeʼesiktoʼon baʼax ku yúuchul way yóokʼol kaabeʼ. Tiʼ upʼéel baʼax tu tsʼáaj u yil le apóstol Juanoʼ, Satanaseʼ ku keʼetel yéetel utúul «nojoch chak kaan» táan u páaʼtik u síijil u Reino Dios teʼ kaʼan tu jaʼabil 1914 utiaʼal u xuʼulsikoʼ. Tumen maʼ béeychajeʼ, Satanaseʼ káaj u sen chʼaʼapachtik way Luʼum u yalab tiʼ le máakoʼob ken u kʼamoʼob le Reino teʼ kaʼanoʼ (Apocalipsis 12:3, 4, 13, 17). ¿Bix u baʼateʼel tu contraʼob? Ku beetik u chʼaʼapachtaʼaloʼob tumen le máaxoʼob beetik baʼax u kʼáat way Luʼumeʼ.
4. ¿Tiʼ máax u taal u gobierno wíinikoʼob, yéetel bix k-ojéeltik?
4 Le apóstol Juanoʼ tu yilaj xan utúul nojoch baʼalcheʼ yaan siete u pooloʼob yéetel diez u tsʼíitil u baakoʼob; le nojoch baʼalcheʼaʼ yaan «páajtalil tiʼ tu yóokʼol tuláakal chʼiʼibal, kaaj [yéetel] jejeláas tʼaan». Tiʼ Juaneʼ aʼalaʼabeʼ «le kaan», wa Satanasoʼ, le «tsʼáaj u muukʼ yéetel u jalach kʼáancheʼ [...] bey xan [u] nojoch páajtalil» le nojoch baʼalcheʼoʼ (Apocalipsis 13:1, 2, 7). K-ilik túuneʼ, u gobierno wíinikoʼobeʼ tiʼ u taal tiʼ Satanaseʼ. Le oʼolaleʼ, jeʼex tu yaʼalil le apóstol Pablooʼ, le máaxoʼob jach tu jaajil gobernartik le yóokʼol kaabaʼ letiʼe «kʼaakʼas pixanoʼob yanoʼob tiʼ le kaʼanilbeʼen kúuchiloʼoboʼ»; letiʼob suʼusutik u gobierno wíinikoʼob. Máax u kʼáat u meyajt Jéeobaeʼ kʼaʼabéet u naʼatik baʼax u kʼáat u yaʼal tuláakal lelaʼ (Lucas 4:5, 6).
5. ¿Utiaʼal baʼax táan u muchʼkintaʼal u reyiloʼob yóokʼol kaab?
5 Yaʼab tiʼ le máakoʼob ku gobernaroʼoboʼ ku yaʼalkoʼob ku creerkoʼob yaan Dios, baʼaleʼ mix utúul tiʼ letiʼob ku tsʼáaikubaʼob yáanal u gobernación Jéeoba yéetel Cristo, le máax u beetmaj reyiloʼ. Mix upʼéel gobierno u kʼáat u pʼat u autoridad tiʼ yaanal. Apocalipsiseʼ ku yeʼesikeʼ le kʼaakʼas pixanoʼoboʼ táan u «muchʼkin[k]oʼob tuláakal u [reyiloʼob] yóokʼol kaab utiaʼal u baʼatelil u nojoch kʼiinil [...] Jajal Dios», teʼ Armagedonoʼ (Apocalipsis 16:13, 14, 16; 19:17-19).
6. ¿Baʼaxten maʼ unaj k-oksikba tiʼ mix upʼéel u baʼatelil yóokʼol kaab?
6 Baʼax ku sen ilaʼal sáamsamaleʼ baʼateʼel ichil le politicoʼoboʼ, ichil le máakoʼoboʼ yéetel ichil le religionoʼoboʼ. Yaʼab máak túuneʼ ku tsʼáaikuba tu favor le máaxoʼob ku tʼaanoʼob tu yoʼolaloʼoboʼ, tu favor u religionoʼob wa tu favor u razaʼob. Tak máaxoʼob maʼ táakaʼanoʼob ichil le baʼateloʼobaʼ ku tʼaanoʼob tu favor u jaats le máaxoʼob ku baʼateloʼoboʼ. Baʼaleʼ kex tu favor jeʼel máaxak ka yanakoʼobeʼ, u jaajileʼ, ¿tu favor máax yanoʼob? Le Bibliaoʼ u taatsʼ u yaʼalik: «U túulisil yóokʼol kaabeʼ tiʼ yaan yáanal u páajtalil kʼaasibaʼaleʼ» (1 Juan 5:19). ¿Bix jeʼel k-kanáantikba utiaʼal maʼ k-tuʼusul tumen Satanaseʼ? Kʼaʼabéet k-eʼesik tiʼ yanoʼon tu favor u Reino Dios tiʼ tuláakal baʼaleʼ yéetel maʼ k-oksikba tiʼ mix upʼéel u baʼatelil yóokʼol kaab (Juan 17:15, 16).
Bix u tusik máak Satanás
7. ¿Bix u yilaʼal jach u yojel tuus Satanás?
7 Satanaseʼ tsʼoʼok u yilik u náachkuntik le máakoʼob tiʼ le adoración kʼambeʼen tu táan Diosoʼ. Utiaʼal lelaʼ tsʼoʼok u yilik u jach pʼektaʼal máaxoʼob meyajtik Dios jeʼex u kʼáateʼ. Baʼaleʼ tsʼoʼok xan u tusik le máakoʼob yéetel le kaʼansajoʼob maʼ jaajtak ku beetik le religionoʼob minaʼan u jaajil tiʼoboʼ, le beetik u millonesi máakoʼobeʼ tiaʼanoʼob ich éeʼjochʼeʼenileʼ. Satanaseʼ tsʼoʼok u beetik u tuklikoʼob jach tu jaajil táan u meyajkoʼob Dios. Yaʼab máakoʼobeʼ, tumen maʼ u yojloʼob baʼax ku yaʼalik u Tʼaan Dioseʼ yéetel tumen maʼ jach u kʼáat u kʼaj óoltoʼob u jaajileʼ, séeb u kóolaloʼob tumen religionoʼob ku yaʼalik ku beetkoʼob milagroʼob wa tumen religionoʼob tuʼux maases chéen kʼaay ku yúuchliʼ (2 Tesalonicailoʼob 2:9, 10). Baʼaleʼ le Bibliaoʼ ku yaʼaliktoʼoneʼ yaan tak tiʼ máaxoʼob meyajtik Jéeobaeʼ «bíin u tselubaʼob» tiʼ u jaajil «utiaʼal u yuʼubikoʼob kaʼansajoʼob tiʼ kʼaakʼas pixanoʼob u taal» (1 Timoteo 4:1). ¿Bix jeʼel u yúuchul baʼal beyaʼ?
8. Satanaseʼ, ¿bix jeʼel u beetik k-lúubul tiʼ baʼax maʼ utstutʼaan Jéeobaeʼ?
8 Le Kʼaasilbaʼaloʼ jach u kʼaj óoloʼon xan. ¿Saajkoʼon wa tiʼ baʼax jeʼel u yaʼalik u maasileʼ? Wa beyoʼ, maʼ xaaneʼ ken invitartaʼakoʼon tumen k-láakʼtsiloʼob wa tumen k-kʼaj óolaloʼobeʼ, jeʼel k-táakpajal tiʼ kʼiimbesajoʼob maʼ tiʼ le Biblia u taaloʼ. ¿Séeb wa k-kʼuuxil? Wa beyoʼ, maʼ xaaneʼ jeʼel k-kʼuuxtal ken tsoʼoloktoʼon u nuʼukeʼ, wa jeʼel k-kʼuuxtal tumen jelaʼan bix u tuukul yaanal máax tiʼ toʼoneʼ (Proverbios 15:10; 29:25; 1 Timoteo 6:3, 4). Maʼ xaaneʼ maas jatsʼuts k-uʼuyik baʼax ku yaʼalik le máaxoʼob ku yaʼalkoʼob chéen yéetel k-xokik le Biblia yéetel k-bisik upʼéel maʼalob kuxtaleʼ, maʼ tsaa ka k-beet u maasiliʼ (2 Timoteo 4:3). Satanaseʼ baʼaliʼ u kʼáat tiʼ ka okokoʼon tiʼ yaanal religión bey xan wa k-creertik jeʼel baʼalakeʼ, baʼax u kʼáateʼ maʼ k-meyajtik Jéeoba jeʼex u yaʼaliktoʼon teʼ Bibliaoʼ.
9. Satanaseʼ, ¿bix u tusik yaʼab máakoʼob?
9 Satanaseʼ jach xan u yojel bix jeʼel u beetik k-tsʼíiboltik baʼaloʼob maʼ maʼalobtakeʼ. Maʼ kʼaas u chital utúul xiib yéetel utúul koʼolel wa tsʼoʼokaʼan u beeloʼobiʼ. Baʼaleʼ, kex le Biblia ku yaʼalik maʼ maʼalob ka chilak utúul xiib yéetel utúul koʼolel wa maʼ tsʼokaʼan u beeloʼobeʼ, yaʼab máakoʼobeʼ maʼ kʼaas u yilkoʼobiʼ. ¿Baʼax jeʼel k-aʼalik tu yoʼolal le tsʼokaʼan u beeloʼoboʼ? Yaʼab tiʼ letiʼobeʼ ku tusik u núupoʼob yéetel yaanal, yaneʼ ku divorciarkubaʼob wa ku pʼatkubaʼob chéen utiaʼal u kajtaloʼob yéetel yaanal. Satanaseʼ táan u kʼaskuntik u tuukul máakoʼob utiaʼal ka u beetoʼob baʼaloʼob ku taaskoʼob chéen u chan súutuk kiʼimak óolal yéetel maʼ u tuklikoʼob bukaʼaj yajil jeʼel u taasik tiʼ letiʼob bey xan tiʼ u maasil le baʼax ku beetkoʼoboʼ; u maas yajileʼ Satanaseʼ ku beetik u tuʼubskoʼob maʼ maʼalob tu táan Dios baʼax ku beetkoʼobiʼ (1 Corintoiloʼob 6:9, 10; Galaciailoʼob 6:7, 8).
10. ¿Baʼaxoʼob ku meyaj tiʼ Satanás utiaʼal u yilik u kʼaskuntik k-tuukul?
10 U kiʼimakkuntik u yóol máakeʼ maʼ kʼaasiʼ, ku taasik utsil tiʼ k-wíinklil bey xan tiʼ k-puksiʼikʼal. Baʼaleʼ wa tu yorai táan k-chaʼan ku chíikpajal baʼaloʼob jeʼel u kʼaskuntik tuukuleʼ, ¿baʼax k-beetik? Toʼoneʼ k-ojeleʼ, Jéeobaeʼ u pʼekmaj le baʼaloʼob kʼaastak ku beetik yaʼab máakoʼoboʼ, u pʼekmaj xan u beetaʼal loob tiʼ máak. Baʼaleʼ le baʼaloʼobaʼ ken chíikpajkoʼob tiʼ peliculaʼob wa tiʼ baʼax ku máansaʼal teʼ televisionoʼ, ¿pʼáatal wa k-chaʼante? Maʼ unaj u tuʼubultoʼoneʼ, jeʼex kun bin u maas náatsʼal u kʼiinil u xuʼulsaʼal Satanaseʼ, letiʼeʼ yaan u beetik u maas kʼastal le yóokʼol kaabaʼ. Le Bibliaoʼ ku yaʼalikeʼ «le máaxoʼob kʼasaʼanoʼoboʼ [...] bíin xiʼikoʼob tiʼ kʼaas tak tu maas kʼaasil, táan u tuusoʼob yéetel táan u tuʼusuloʼob» (2 Timoteo 3:13). Le oʼolaleʼ, mantatsʼ kʼaʼabéet kanáantikba utiaʼal maʼ u kʼaskuntaʼal k-tuukul tumen Satanás (Génesis 6:13; Salmo 11:5; Romailoʼob 1:24-32).
11. Kex k-ojel maʼ uts le espiritismooʼ, wa maʼ k-kanáantikbaeʼ, ¿bix jeʼel k-táakbesikba ichileʼ?
11 K-ojel xaneʼ, Jéeobaeʼ u pʼekmaj le máaxoʼob ku beetkoʼob baʼaloʼob yaan u yil yéetel espiritismooʼ, jeʼex le jóoʼsaj suerteoʼ, le j-meeniloʼ wa u tʼaan máak yéetel le kimenoʼoboʼ (Deuteronomio 18:10-12). Le oʼolal maʼ k-bin yiknal utúul j-meen mix xan jeʼel k-kʼamik ka u beet u meyajoʼob t-otocheʼ. Baʼaleʼ wa ku chíikpajal teʼ televisión wa tiʼ Interneteʼ, ¿pʼáatal wa k-chaʼant baʼax ku beetik? Mix utéen jeʼel k-kʼamik ka u tsʼakoʼon utúul j-meeneʼ, baʼaleʼ ¿jeʼel wa k-kʼaxik upʼéel chan cinta tu kʼab chan k-hijo tumen k-tuklik le kun kanáantik maʼ u beetaʼal kʼaas tiʼ? K-ojel xaneʼ maʼ uts u hechizartaʼal máakiʼ, baʼaleʼ ¿jeʼel wa k-chaʼik hipnotizartaʼal utiaʼal u controlartaʼal k-tuukuleʼ? (Galaciailoʼob 5:19-21.)
12. 1) U letrailoʼob upʼéel kʼaayeʼ, ¿bix jeʼel u beetik u máan t-tuukul baʼaloʼob kʼaastakeʼ? 2) ¿Bix jeʼel k-eʼesik kʼáat kuxtal jeʼex le máaxoʼob ku biskoʼob upʼéel kuxtal maʼ maʼalob tu táan Jéeobaoʼ? 3) ¿Bix jeʼel k-kanáantikba utiaʼal maʼ k-tuʼusul tumen Satanaseʼ?
12 Le Bibliaoʼ ku yaʼalikeʼ maʼ uts ka k-aʼal baʼaloʼob kʼaastakiʼ (Efesoiloʼob 5:3-5). Baʼaleʼ ¿kux túun wa u letrai upʼéel kʼaay ku tʼaan tiʼ baʼaloʼob kʼaastak, jatsʼuts u yuʼubal u paaxil yéetel séeb u pʼáatal u tonadai tiʼ máak? ¿Yaan wa k-kʼayik? Kex xan k-ojel maʼ unaj k-kuxtal jeʼex le máaxoʼob beetik baʼaloʼob beyaʼ, baʼaleʼ le nookʼob k-takikoʼ, le bix k-xáacheʼtik pooloʼ wa le bix k-tʼaanoʼ, ¿bey wa jeʼex tiʼ letiʼoboʼ? Satanaseʼ jach u yojel bix jeʼel u kʼaskuntik u tuukul máakeʼ (2 Corintoiloʼob 4:3, 4). Utiaʼal k-kanáantikba tiʼ letiʼeʼ, kʼaʼabéet k-ilik maʼ k-beetik le baʼaloʼob ku beetaʼal teʼ yóokʼol kaabaʼ. Kʼaʼabéet u kʼaʼajaltoʼon máaxoʼob jach tu jaajil gobernartik le yóokʼol kaabaʼ yéetel k-jach kanáantikba tiʼ letiʼob (1 Pedro 5:8).
Tsʼaʼantoʼon u nuʼukulil utiaʼal k-ganartik le baʼateloʼ
13. Kex kʼeban wíinkoʼoneʼ, ¿bix jeʼel u páajtal k-ganartik le baʼateʼel yantoʼon tu contra le kʼaakʼas pixanoʼoboʼ?
13 U áakʼabil táanil tiʼ u kíimileʼ, Jesuseʼ tu yaʼalaj tiʼ u apostoloʼob: «Yanak a wóoleʼex, tumen teneʼ tsʼoʼok in tsʼáancheʼetik yóokʼol kaab» (Juan 16:33). U disipuloʼob xaneʼ jeʼel u páajtal u ganartikoʼob le baʼatelaʼ. Ku máan kʼiineʼ le apóstol Juanoʼ tu tsʼíibtaj: «¿Máax ku páajtal u tsʼáanchaʼatik yóokʼol kaab wa maʼ chéen le máax ku yoksaj óoltik Jesuseʼ u Paal Jajal Dios?» (1 Juan 5:5). Utiaʼal k-eʼesik yaan k-fejeʼ unaj k-beetik baʼaxoʼob tu yaʼalaj Jesús yéetel unaj k-chʼaʼanuʼuktik baʼax ku yaʼalik u Tʼaan Dios, jeʼex tu beetil Jesuseʼ. ¿Baʼax uláakʼ unaj k-beetik? Unaj u suuktal k-muchʼikba yéetel le sukuʼunoʼoboʼ, tumen Jesús ku nuʼuktaj tu yóokʼol le congregacionoʼ. Wa k-lúubul tiʼ kʼebaneʼ, kʼaʼabéet k-jach arrepentir yéetel k-kʼáat óoltik tiʼ Jéeoba ka u perdonartoʼon tu kʼaabaʼ Jesús. Wa k-beetik beyaʼ, kex kʼeban wíinkoʼoneʼ, yaan u páajtal k-ganartik le baʼateʼel yantoʼon tu contra le kʼaakʼas pixanoʼoboʼ (Salmo 130:3, 4).
14. Xok Efesoiloʼob 6:13-17, ku tsʼoʼoleʼ, yéetel u yáantaj le tekstos ku chʼaʼachiʼitaʼaloʼoboʼ, núuk le kʼáatchiʼob ku beetaʼal ku tsʼoʼokol le parrafooʼ.
14 Utiaʼal k-ganartik le baʼatelaʼ, kʼaʼabéet búukintik «tuláakal le u nuʼukulil baʼateʼel ku [tsʼáaiktoʼon] Jajal Diosoʼ». Utiaʼal a wojéeltik máakalmáakoʼobeʼ, xok Efesoiloʼob 6:13-17. Ku tsʼoʼoleʼ núuk le kʼáatchiʼob ku beetaʼal ken tsʼoʼokok le parrafoaʼ utiaʼal a wilik bix u kanáantkoʼon cada upʼéel tiʼ le nuʼukulil baʼatelaʼ.
«A kʼaxnakʼ[majeʼex] le jaajoʼ bey jumpʼéel kʼaxnakʼeʼ»
Kex tsʼoʼok k-kanik u jaajileʼ, ¿baʼaxten kʼaʼabéet xokik le Biblia sáamsamaloʼ, tuklik baʼax ku kaʼansiktoʼon yéetel u suuktal k-muchʼikba yéetel k-sukuʼunoʼob? (1 Corintoiloʼob 10:12, 13; 2 Corintoiloʼob 13:5; Filiposiloʼob 4:8, 9.)
«Kanáantaʼaneʼex tumen le toj[il] jeʼel bix le u búukil baʼateʼel ku kanáantik u tseem le soldadooʼ»
¿Máax unaj u yaʼalik baʼax toj? (Apocalipsis 15:3.)
Tsol baʼax talamiloʼob jeʼel k-muʼyajtik wa maʼ t-uʼuyik u tʼaan Jéeobaeʼ (Deuteronomio 7:3, 4; 1 Samuel 15:22, 23).
«Nuʼuktabaʼex utiaʼal a tseʼektikeʼex u maʼalob péektsilil le jeetsʼeloʼ, jeʼel bix le soldado ku nuʼuktikuba le ken u tsʼáa xanab tu yookoʼ»
¿Bix u yáankoʼon u suuktal k-jóokʼol tsikbalt baʼaxoʼob tsʼoʼok u beetik Dios utiaʼal u taasik jeetsʼelil? (Salmo 73:2, 3; Romailoʼob 10:15; 1 Timoteo 5:13.)
«Yanakteʼex le oksaj óolal bey jeʼel bix jumpʼéel pixibeʼ»
Wa muʼukʼaʼan k-fejeʼ, ¿baʼax ken k-beet wa yaan máax u kʼáat u beet creertik baʼaloʼob maʼ jaajtakiʼ bey xan wa yaan máax u kʼáat u sajakkuntoʼon? (2 Reyes 6:15-17; 2 Timoteo 1:12.)
«Yanakteʼex le [salvación] bey jeʼel bix jumpʼéel chichich pʼóokeʼ»
Kʼaʼajsik yaan u tsʼáaiktoʼon Jéeoba upʼéel kuxtal maas maʼalobeʼ, ¿bix u yáankoʼon utiaʼal maʼ k-bin chéen tu paach ayikʼaliloʼob? (1 Timoteo 6:7-10, 19.)
«Le máaskab ku tsʼáaikteʼex le Kiliʼich pixanoʼ»
¿Baʼax unaj k-beetik wa yaan máax taak u náachkuntikoʼon tiʼ Jéeoba? (Salmo 119:98; Proverbios 3:5, 6; Mateo 4:3, 4.)
¿Baʼax uláakʼ jach kʼaʼabéet k-beetik utiaʼal k-ganartik le baʼateloʼ? ¿Jaytéen unaj k-kʼáat óoltik u yáantaj Dios? ¿Tu yoʼolal xan máaxoʼob unaj k-kʼáat óolal? (Efesoiloʼob 6:18, 19.)
15. ¿Bix jeʼel u páajtal k-máan tu táanilil le baʼateʼel yantoʼon tu contra le kʼaakʼas pixanoʼoboʼ?
15 Toʼoneʼexeʼ beyoʼon u soldadoʼob Cristo táan k-baʼateʼel tu contra kʼaakʼas pixanoʼobeʼ. Wa maʼ tu náayal k-óoleʼ bey xan wa k-búukintik tuláakal le u nuʼukulil baʼateʼel ku tsʼáaiktoʼon Diosoʼ, maʼ chéen maʼ ken peʼert k-kuxtaliʼ, yaan xan u béeytal k-áantik k-sukuʼunoʼob. Yaan xan u taaktal k-máan tu táanilil le baʼatelaʼ, le beetik yaan k-jóokʼol predicart u Reino Dios, le gobierno yaan teʼ kaʼan jach u tsʼáamuba Satanás tu contraoʼ.
Kʼaʼajsaj
• Máaxoʼob meyajtik Jéeobaeʼ, ¿baʼaxten maʼatech u yoksikubaʼob tiʼ u baʼateliloʼob le yóokʼol kaabaʼ?
• Satanaseʼ, ¿bix u yilik u tusik yéetel u kʼaskuntik u tuukul máaxoʼob meyajtik Jéeoba?
• ¿Bix u kanáantkoʼon tuláakal le u nuʼukulil baʼateʼel ku tsʼáaiktoʼon Diosoʼ?
[U tsolajil le oochel teʼ táan juʼun 76]
U gobiernoiloʼob yóokʼol kaab bey xan u kajnáaliloʼob le Luʼumaʼ táan u muchʼkintaʼaloʼob utiaʼal u baʼatelil Armagedón