Le Armagedonoʼ yaan u salvartik wíinik

1, 2. 1) ¿Baʼax kun úuchul kéen kʼuchuk le Armagedonoʼ? 2) ¿Baʼax kʼáatchiʼiloʼob ken k-núuk teʼ xookaʼ?

YAʼAB máakeʼ ku tuklikeʼ le Armagedonoʼ yaan u taasik yaʼab muʼyajil, tumen yaan u yantal junpʼéel guerra nuclear wa yaan u kʼastal le baʼaxoʼob beetik u yantal kuxtal way Luʼumoʼ. Baʼaleʼ kéen tʼaanak le Biblia tiʼ le Armagedonoʼ ku beetik u kiʼimaktal k-óol (Apo. 1:3). Le Armagedonoʼ maʼ ken u xuʼuls tiʼ wíinik, baʼaxeʼ yaan u salvartik. ¿Bix ken u beetil?

² Le Bibliaoʼ ku yeʼesikeʼ le Armagedonoʼ yaan u xuʼulsik tiʼ u gobierno wíinik yéetel tiʼ le kʼasaʼan máakoʼoboʼ, baʼaleʼ yaan u salvartik le máaxoʼob beetik baʼax maʼaloboʼ yéetel maʼ ken u chaʼa u kʼaskúuntaʼal le Luʼumaʼ (Apo. 11:18). Utiaʼal k-maas naʼatik lelaʼ koʼoneʼex xakʼaltik u núukil le kʼáatchiʼobaʼ: ¿Baʼax le Armagedonoʼ? ¿Baʼaxoʼob kun úuchul le jach taʼaytak u káajaloʼ? ¿Baʼax unaj k-beetik utiaʼal k-salvartikba? ¿Baʼax unaj k-beetik utiaʼal u chúukpajal k-óol le táan u náatsʼal u kʼiiniloʼ?

BAʼAX LE ARMAGEDONOʼ

3. 1) ¿Baʼax u kʼáat u yaʼal le tʼaan Armagedonoʼ? 2) Yoʼolal le baʼax ku yaʼalik Apocalipsis 16:14 yéetel 16, ¿baʼaxten k-aʼalik Armagedoneʼ maʼ junpʼéel kaajiʼ?

³ (Xok Apocalipsis 16:14, 16). Le tʼaan Armagedonoʼ chéen juntéen ku chíikpajal ichil le Kiliʼich Tsʼíiboʼoboʼ, ku taal tiʼ junpʼéel tʼaan hebreo u kʼáat u yaʼal «u Puʼukil Meguidó» (Apo. 16:16, tsolajil). Meguidoeʼ junpʼéel kaaj yaan tu úuchben luʼumil Israel (Jos. 17:11). Baʼaleʼ le Armagedonoʼ maʼ junpʼéel kaajiʼ. Baʼaxeʼ letiʼe baʼax kun úuchul kéen u muchʼuba tu contra Jéeoba «u reyiloʼob tuláakal yóokʼol kaab[oʼ]» (Apo. 16:14). Teʼ xookaʼ yaan u meyaj xan le tʼaan Armagedón utiaʼal u yúuchul tʼaan tiʼ le baʼateltáambal kun antal jach kéen tsʼoʼokok u muchʼkuba u reyiloʼob tuláakal yóokʼol kaaboʼ. ¿Bix k-ojéeltik Armagedoneʼ maʼ junpʼéel kaajiʼ? Yáaxeʼ, tumen u puʼukil Meguidó ku yaʼalikoʼ minaʼan. U kaʼapʼéeleʼ, tumen le kúuchil yaan tu baʼpach u kaajil Meguidooʼ jach chichan, le oʼolal maʼ tu yokol «u reyiloʼob tuláakal yóokʼol kaab[iʼ]», u soldadoʼob bey xan tuláakal u nuʼukuliloʼob u baʼateloʼob. U yóoxpʼéeleʼ, jeʼex ken k-il teʼ xookaʼ, le Armagedonoʼ yaan u káajal le kéen líikʼik u «reyiloʼob» Luʼum tu contra le máaxoʼob meyajtik Dios yanoʼob tiʼ tuláakal yóokʼol kaaboʼ.

4. ¿Baʼaxten chʼaʼchiʼitaʼab Meguidó tumen Jéeoba le ka tʼaanaj tiʼ u kʼiinil le xuʼulsajiloʼ?

⁴ ¿Baʼaxten chʼaʼchiʼitaʼab Meguidó tumen Jéeoba le ka tʼaanaj tiʼ u kʼiinil le xuʼulsajiloʼ? Tumen Meguidó yéetel u táax luʼumil Jezreeleʼ yaʼab baʼateltáambaloʼob anchajiʼ. Jéeobaeʼ tu yáantaj u kaajal utiaʼal u ganartikoʼob jujunpʼéel tiʼ le baʼateloʼobaʼ. Jeʼex «tu jáal u jaʼiloʼob Meguido[eʼ]» tu yáantaj juez Barak, juntúul israelita, utiaʼal u xuʼulsik tiʼ u soldadoiloʼob Canaán ku nuʼuktaʼaloʼob kaʼach tumen Sísara. Barak yéetel Débora, le profetisaoʼ, jach tu tsʼáajoʼob u graciasil úuchik u yáantaʼaloʼob u ganartoʼob le máaxoʼob pʼekmiloʼoboʼ. Tu yaʼaloʼob ichil junpʼéel kʼaay: «Líikʼbal kaʼan, líikʼbal tu beel le eekʼoʼoboʼ, baʼatelnajoʼob utiaʼal u beetik loob tiʼ Sísara [...], [tu] tʼoʼol jaʼil Cisón tu láaj míistajoʼob» (Jue. 5:19-21).

5. ¿Baʼax u jelaʼanil le Armagedón tiʼ le baʼateltáambaloʼob tu beetaj Barakoʼ?

⁵ Barak yéetel Déboraeʼ tu tsʼoʼoksoʼob le kʼaay yéetel le tʼaanoʼobaʼ: «¡Yuumtsil, bey ka láaj xuʼulsaʼak a j-pʼeekoʼob[oʼ], léembalnak le máaxoʼob ku yaabiltikechoʼoboʼ jeʼel bix le kʼiin ku léembal yéetel tuláakal u muukʼoʼ!» (Jue. 5:31). Teʼ Armagedonoʼ yaan u xuʼulsaʼal le máaxoʼob pʼekmil Jéeobaoʼ, baʼaleʼ yaan u salvartaʼal le máaxoʼob yaabiltmiloʼ. Baʼaleʼ yaan u jelaʼanil le Armagedón tiʼ le baʼateltáambaloʼob tu beetaj Barakoʼ. Le máaxoʼob meyajtik Diosoʼ maʼ kun baʼateloʼob teʼ Armagedonoʼ. Mix u nuʼukul baʼatel ken u bisoʼob. Mix baʼal unaj u beetkoʼob, chéen unaj u kʼubik u yóoloʼob tiʼ Jéeoba yéetel tiʼ u angeloʼob (Isa. 30:15; Apo. 19:11-15).

6. ¿Baʼaxoʼob jeʼel u meyaj tiʼ Jéeoba utiaʼal u xuʼulsik tiʼ le máaxoʼob pʼekmil teʼ Armagedonoʼ?

⁶ ¿Bix ken u xuʼulsil Jéeoba tiʼ le máaxoʼob pʼekmil teʼ Armagedonoʼ? Jejeláas bix jeʼel u páajtal u beetkeʼ. Maʼ xaaneʼ jeʼel u beetik u tíitkuba le luʼumoʼ, u beetik u kʼáaxal bat wa u beetik u jaatsʼ cháak (Job 38:22, 23; Eze. 38:19-22). Maʼ xaan xaneʼ jeʼel u beetik u paklan baʼatel le máaxoʼob pʼekmiloʼ (2 Cró. 20:17, 22, 23). Tsʼoʼoleʼ jeʼel xan u túuxtik u angeloʼob utiaʼal u xuʼulsoʼob tiʼ le kʼasaʼan máakoʼoboʼ (Isa. 37:36). Kex jeʼel baʼalak ka meyajnaktiʼeʼ yaan u ganar. Tuláakal le máaxoʼob pʼekmiloʼ yaan u xuʼulsaʼaltiʼob, baʼaleʼ le máakoʼob utsoʼoboʼ yaan u salvartaʼaloʼob (Pro. 3:25, 26).

BAʼAXOʼOB KUN ÚUCHUL TÁANIL TIʼ U KÁAJAL LE ARMAGEDONOʼ

7, 8. 1) Jeʼex u yaʼalik Yáax tiʼ Tesalonicailoʼob 5:1 tak 6, ¿baʼax ken u yaʼal u gobiernoiloʼob tuláakal yóokʼol kaab? 2) ¿Baʼaxten leloʼ chéen junpʼéel tuus?

⁷ Yaan u yaʼalaʼal «¡tuláakal jejetsʼkil yéetel maʼalob yanil!» táanil tiʼ u kʼuchul «u kʼiinil Jéeoba» (xok 1 Tesalonicailoʼob 5:1-6). Le «u kʼiinil Jéeoba» ku yaʼalaʼal tiʼ Yáax tiʼ Tesalonicailoʼob 5:2, táan u tʼaan tiʼ «le nojoch yaayaj óolaloʼ» (Apo. 7:14). ¿Bix ken k-ojéeltil jach taʼaytak u káajal le nojoch yaayaj óolaloʼ? Le Bibliaoʼ ku yaʼalikeʼ yaan baʼax kun aʼalbil kun áantkoʼon k-il nukaʼaj káajal.

⁸ Le gobiernoʼoboʼ yaan u yaʼalikoʼobeʼ «¡tuláakal jejetsʼkil yéetel maʼalob yanil!». ¿Baʼaxten yaan u yaʼalikoʼob? ¿Tak wa u nuuktakil le religionoʼob kun aʼalik xanoʼ? Maʼ xaaniʼ. Baʼaleʼ lelaʼ chéen uláakʼ junpʼéel tuus ken u beet le kʼasaʼan angeloʼoboʼ. Tumen yaan u beetik u tuklaʼal tumen u maasil tuláakal jejetsʼkil yéetel maʼalob yanil le jach taʼaytak u káajal le nojoch yaayaj óolal mix juntéen ilaʼakoʼ. Bey túunoʼ chéen «ken téek taalak xuʼulsajil tu yóokʼoloʼob», bey jeʼex le kʼiʼinam ku muʼyajtik juntúul koʼolel nukaʼaj antal u chaambaloʼ. Baʼaleʼ ¿baʼax kun úuchul tiʼ le máaxoʼob meyajtik Jéeobaoʼ? Tumen maʼ u yojloʼob jach baʼax kʼiin kéen káajak le nojoch muʼyajiloʼ, maʼ xaaneʼ yaan u péek u yóoloʼob kéen úuchuk, baʼaleʼ u yojliliʼob yaan u yúuchleʼ.

9. ¿Bix ken u xuʼulsil Jéeoba u yóokʼol kaab Satanás?

⁹ Jéeobaeʼ maʼ junpuul ken u xuʼulsil tiʼ u yóokʼol kaab Satanás, jeʼex tu beetil tu kʼiiniloʼob Noeeʼ. Baʼaxeʼ kaʼajaats ken u xuʼulsil. Yáaxeʼ, yaan u xuʼulsik le Nojoch Babiloniaoʼ wa tuláakal le religionoʼob maʼatech u kaʼanskoʼob u jaajiloʼ. Kéen tsʼoʼokkeʼ, teʼ Armagedonoʼ yaan u xuʼulsik tiʼ u yalab u yóokʼol kaab Satanás, tuʼux táakaʼan le politicaoʼ, u soldadoiloʼob tuláakal luʼumiloʼob yéetel u taakʼin le yóokʼol kaabaʼ. Koʼoneʼex ilik jach bix kun úuchul cada junpʼéel jaats.

10. Jeʼex u yaʼalik Apocalipsis 17:1 yéetel 6, bey xan le 18:24, ¿baʼaxten yaan u xuʼulsaʼal le Nojoch Babilonia tumen Jéeobaoʼ?

¹⁰ «Le juicio kun taal tu yóokʼol le x-nuk koʼolel chéen bey u máanoʼ» (xok Apocalipsis 17:1, 6; 18:24). Le Nojoch Babiloniaoʼ tsʼoʼok u pʼatik kʼaasil u kʼaabaʼ Dios. Ku kaʼansik baʼaloʼob maʼ jaajtak tu yoʼolaliʼ yéetel tsʼoʼok u núupkʼebantal jeʼex u beetik juntúul koʼolel chéen bey u máanoʼ, tumen tsʼoʼok u yoksikuba yéetel u gobiernoiloʼob le yóokʼol kaabaʼ. Ku meyajtiʼ le páajtalil yaantiʼ utiaʼal u beetik kʼaas tiʼ le máaxoʼob yanoʼob yáanal u nuʼuktajoʼ. Tsʼoʼoleʼ tsʼoʼok u wekik u kʼiʼikʼel yaʼabkach máakoʼob, táakaʼan tak le máaxoʼob meyajtik Diosoʼ (Apo. 19:2). ¿Bix kun xuʼulsbil tiʼ le Nojoch Babilonia tumen Jéeobaoʼ?

11. ¿Baʼax le «chak tsʼíitsʼik baʼalcheʼ[oʼ]», yéetel bix kun meyaj tiʼ Dios utiaʼal u xuʼulsik le Nojoch Babiloniaoʼ?

¹¹ Jéeobaeʼ yaan u meyajtiʼ tu diezil «u baakoʼob» juntúul «chak tsʼíitsʼik baʼalcheʼ» utiaʼal u xuʼulsik tiʼ le koʼolel chéen bey u máanoʼ. Le tsʼíitsʼik baʼalcheʼoʼ ku chíikbesik le Organización tiʼ le Naciones Unidasoʼ yéetel le u diez baakoʼoboʼ ku chíikbesik tuláakal le gobiernoʼob yanoʼob tu tséel teʼ kʼiinoʼobaʼ. Kéen tsʼaʼabak tu tuukuloʼob tumen Dioseʼ, le gobiernoʼobaʼ yaan u líikʼloʼob tu contra le religionoʼob maʼatech u kaʼanskoʼob u jaajiloʼ. Letiʼobeʼ «yaan u tokikoʼob tuláakal baʼax yaantiʼ, yaan u pʼatkoʼob x-maʼ nookʼil», tumen yaan u yeʼeskoʼob le baʼaxoʼob kʼaastak u beetmoʼ (Apo. 17:3, 16). Tumen chéen bey «ichil junpʼéel kʼiin» kéen xuʼulsaʼakeʼ, yaan u jaʼakʼal u yóol le máaxoʼob creertik baʼaxoʼob ku kaʼansikoʼ, maases tumen jach ku yaʼalik: «Kulukbalen bey juntúul reinaeʼ, maʼ kimen in wíichamiʼ, yéetel mix bikʼin bíin okʼolnaken» (Apo. 18:7, 8).

12. ¿Baʼax maʼ ken u chaʼa Dios u beetaʼal tumen le gobiernoʼoboʼ, yéetel baʼaxten maʼ ken u chaʼe?

¹² Dioseʼ maʼ ken u chaʼa u xuʼulsaʼal tiʼ le máaxoʼob meyajtik tumen le gobiernoʼoboʼ, tumen letiʼobeʼ ku biskoʼob u kʼaabaʼ yéetel tsʼoʼok u jóokʼloʼob ichil le Nojoch Babilonia, jeʼex u yaʼalikoʼ (Bax. 15:16, 17; Apo. 18:4). Tsʼoʼoleʼ tsʼoʼok u yáantkoʼob u maasil utiaʼal ka jóokʼkoʼob xaniʼ. Le oʼolal maʼ ken u kʼamoʼob «le noj yajiloʼob kun taal tu yóokʼoloʼ». Kex beyoʼ yaan u kʼaʼabéettal u yeʼeskoʼob wa muʼukʼaʼan u fejoʼob.

13. 1) ¿Máax Gog? 2) Jeʼex u yaʼalik Ezequiel 38:2, 8 yéetel 9, ¿bix kun kʼuchul Gog teʼ kúuchil ku kʼaabaʼtik Armagedonoʼ?

¹³ Kéen líikʼik Gog tu contra u kaajal Jéeoba (xok Ezequiel 38:2, 8, 9). Kéen tsʼoʼokok u xuʼulsaʼal tuláakal le religionoʼob maʼatech u kaʼanskoʼob u jaajiloʼ, u kaajal Jéeobaeʼ yaan u pʼáatal waʼatalil jeʼex junkúul cheʼ ku pʼáatal waʼatalil chéen tu juunal kéen tsʼoʼokok junpʼéel kʼaʼamkach iikʼeʼ. Satanaseʼ jach yaan u pʼuʼujul. Le oʼolal yaan u péeksik u kʼasaʼan angeloʼob utiaʼal u biskoʼob «kʼuben tʼaanoʼob jach éekʼtakoʼob» utiaʼal u beetkoʼob u líikʼil le múuchʼ kaajoʼob tu contra le máaxoʼob meyajtik Jéeobaoʼ (Apo. 16:13, 14). Le múuchʼ kaajoʼobaʼ ku kʼaabaʼtik Gog ku taal tiʼ u luʼumil Magog. Le kéen líikʼkoʼob tu contra u kaajal Dioseʼ, bey ka kʼuchkoʼob tiʼ junpʼéel kúuchil ku kʼaabaʼtik Armagedoneʼ (Apo. 16:16).

14. ¿Baʼax ken u tsʼáa cuenta Gog?

¹⁴ Gogueʼ yaan u kʼubik u yóol tiʼ «u muukʼ wíinikoʼob» wa tiʼ le bukaʼaj soldadoʼob yaan tiʼ tuláakal le kaajoʼoboʼ (2 Cró. 32:8). Baʼaleʼ toʼoneʼ yaan k-kʼubik k-óol tiʼ Jéeoba, k-Dios. Lelaʼ bey chéen kunel kun ilbil tumen le kaajoʼoboʼ. Tumen kex jach yaan u páajtalil le Nojoch Babiloniaoʼ, maʼ páajchaj u salvartaʼal tiʼ «le tsʼíitsʼik baʼalcheʼ» yéetel u «diez baakoʼob» tumen u diosoʼoboʼ (Apo. 17:16). Le oʼolal Gogueʼ yaan u tuklik maʼ talam ken u xuʼulsil tiʼ u kaajal Jéeobaiʼ. Bey túunoʼ yaan u líikʼil tu contra (Eze. 38:16). Baʼaleʼ kéen u tsʼáa cuentaeʼ minaʼan tuʼux u púutsʼul. Jeʼex úuchik tiʼ faraón teʼ Chak kʼáaʼnáaboʼ, yaan u tsʼáaik cuenta táan u baʼateʼel tu contra Jéeoba (Éxo. 14:1-4; Eze. 38:3, 4, 18, 21-23).

15. ¿Baʼax ken u beet Jesús tu baʼatelil Armagedón?

¹⁵ Cristo yéetel u angeloʼobeʼ yaan u salvartikoʼob le máaxoʼob meyajtik Diosoʼ yéetel yaan u xuʼulsik Gog wa le múuchʼ kaajoʼob paʼteʼ yéetel u soldadoʼoboʼ (Apo. 19:11, 14, 15). ¿Baʼax túun kun úuchul tiʼ Satanás, le máax péeks le múuchʼ kaajoʼob utiaʼal ka baʼatelnakoʼob teʼ Armagedonoʼ? Yaan u puʼulul tumen Jesús paʼteʼ yéetel u kʼasaʼan angeloʼob ichil le taamkach jool utiaʼal mil añosoʼ (Apo. 20:1-3).

BAʼAX UNAJ K-BEETIK UTIAʼAL K-SALVARTIKBA

16. 1) ¿Baʼax unaj k-beetik utiaʼal k-eʼesik k-kʼaj óol Dios? 2) ¿Baʼax kun úuchul tiʼ le máaxoʼob u kʼaj óoloʼob Jéeoba tu kʼiinil le Armagedonoʼ?

¹⁶ Kex úuch joʼopʼok k-meyajtik Jéeoba bey xan wa maʼatecheʼ, utiaʼal k-salvartikba tu kʼiinil le Armagedonoʼ, kʼaʼabéet k-eʼesik k-kʼaj óol Dios yéetel k-tsʼáaik ichil k-kuxtal le baʼax ku yaʼalik «le maʼalob péektsil yaan yil yéetel k-Yuumtsil Jesusoʼ» (2 Tes. 1:7-9). Wa k-ojel baʼax uts tu tʼaan Dios yéetel baʼax maʼatecheʼ k-eʼesik k-kʼaj óol Dios. Bey xan kéen k-eʼes k-yaabiltmaj, kéen k-beet baʼax u kʼáat yéetel kéen k-adorart chéen letiʼ (1 Juan 2:3-5; 5:3). Wa k-kʼaj óol Dioseʼ, letiʼeʼ yaan xan u kʼaj óoltikoʼon, leloʼ le kun beetik k-salvartikba tu kʼiinil le Armagedonoʼ (1 Cor. 8:3). ¿Baʼaxten? Tumen wa kʼaj óolaʼanoʼon tumen Dioseʼ u kʼáat u yaʼaleʼ ku kʼamkoʼon.

17. ¿Baʼax táakaʼan ichil «le maʼalob péektsil yaan yil yéetel k-Yuumtsil Jesusoʼ»?

¹⁷ «Le maʼalob péektsil yaan yil yéetel k-Yuumtsil Jesusoʼ» táakaʼan tuláakal le baʼaxoʼob tu kaʼansaj yaan ichil le Bibliaoʼ. Kéen k-tsʼáa ichil k-kuxtal le baʼaxoʼob ku yaʼalikoʼ k-eʼesik táan k-uʼuyik u tʼaan. Ichil lelaʼ táakaʼan k-tsʼáaik táanil k-meyajtik Jéeoba, k-beetik baʼax ku yaʼalik yéetel k-kʼaʼaytik u Reino (Mat. 6:33; 24:14). Táakaʼan xan k-áantik le sukuʼunoʼob yéeyaʼanoʼob utiaʼal u binoʼob kaʼan utiaʼal u tsʼoʼokbeskoʼob le meyaj kʼubéentaʼantiʼoboʼ (Mat. 25:31-40).

18. ¿Baʼax ken u beet le sukuʼunoʼob yéeyaʼanoʼob utiaʼal u binoʼob kaʼan tu yoʼolal le «uláakʼ tamanoʼob[oʼ]»?

¹⁸ Maʼ kun xáantaleʼ le sukuʼunoʼob yéeyaʼanoʼob utiaʼal u binoʼob kaʼanoʼ yaan u taaskoʼob yaʼab utsiloʼob yóokʼol le «uláakʼ tamanoʼob» yoʼolal le utsil eʼesaʼabtiʼoboʼ (Juan 10:16). ¿Bix ken u beetiloʼob? Táanil tiʼ u káajal u baʼatelil Armagedoneʼ, tuláakal le 144,000, tsʼokaʼaniliʼ u láaj kuxtaloʼob teʼ kaʼanoʼ. Yaan u táakpajloʼob ichil le angeloʼob kun xuʼulskoʼob tiʼ Gogoʼ yéetel yaan u kanáantkoʼob le «yaʼabkach máakoʼob» beyoʼob tamanoʼoboʼ (Apo. 2:26, 27; 7:9, 10). Le yaʼabkach máakoʼoboʼ jach yaan u kiʼimaktal u yóoloʼob úuchik u yáantkoʼob le sukuʼunoʼob yéeyaʼanoʼob utiaʼal u binoʼob kaʼan le tiaʼanoʼob way Luʼumoʼ.

BIX JEʼEL U CHÚUKPAJAL K-ÓOL LE TÁAN U NÁATSʼAL LE XUʼULSAJILOʼ

19, 20. ¿Baʼax jeʼel u yáantkoʼon utiaʼal ka chúukpajak k-óol le táan u náatsʼal le Armagedonoʼ?

¹⁹ Teʼ tu tsʼook kʼiinoʼobaʼ yaʼab máaxoʼob meyajtik Jéeoba aktáantik talamiloʼob. Baʼaleʼ jeʼel u páajtal u chúukpajal k-óol yéetel u kiʼimaktal k-óoleʼ (Sant. 1:2-4). Junpʼéel baʼax jeʼel u yáantkoʼoneʼ letiʼe maʼ u xuʼulul k-tsʼáaik k-óol oraroʼ (Luc. 21:36). Tsʼoʼoleʼ unaj k-xakʼalxoktik le Biblia sáamsamaloʼ yéetel k-tuukul tiʼ le baʼax ku yaʼalikoʼ, jeʼex le profecíaʼob ku tʼaanoʼob tiʼ le baʼaloʼob ku yilaʼaloʼob teʼ kʼiinoʼobaʼ (Sal. 77:12). Wa k-beetik bey yéetel k-táakpajal teʼ kʼaʼaytajoʼ yaan u maas muʼukʼaʼantal k-fe yéetel yaan k-páaʼtik yéetel kiʼimak óolal le baʼaxoʼob u yaʼalmaj Dios u beetkoʼ.

²⁰ Tuukulnakoʼon tiʼ bukaʼaj kun kiʼimaktal k-óol kéen xuʼulsaʼak tiʼ le Nojoch Babilonia yéetel kéen tsʼoʼokok le Armagedonoʼ. Baʼaleʼ bukaʼaj wal kun kiʼimaktal k-óol kéen nojbeʼenkúuntaʼak u kʼaabaʼ Dios yéetel kéen chíikpajak chéen tiʼ letiʼ yaan u derechoil u gobernareʼ (Eze. 38:23). Jeʼex túun tsʼoʼok k-ilkoʼ, le Armagedonoʼ yaan u taasik yaʼab utsiloʼob tiʼ le máaxoʼob u kʼaj óoloʼob Diosoʼ, tiʼ le máaxoʼob ku yuʼubikoʼob u tʼaan u Hijooʼ yéetel tiʼ le kun chúukpajal u yóoloʼoboʼ (Mat. 24:13).