3. 1) ¿Baʼax kʼiin ka kʼaj óoltaʼab u kaʼansaj Jesús tumen Timoteo, yéetel baʼax tu beetaj ka tsʼoʼoki? 2) ¿Máakalmáak le óoxpʼéel baʼaloʼob tu yaʼalaj Pablo tiʼ Timoteooʼ?

³ Ku tuklaʼaleʼ Timoteoeʼ tu kʼaj óoltaj u kaʼansaj Jesús tu añoil 47, ka yáax xíimbaltaʼab u noj kaajil Listra tumen apóstol Pablo. Maʼ xaaneʼ teʼ kʼiinoʼob jeʼeloʼ jach táankelem, baʼaleʼ jach tu tsʼáaj ichil u kuxtal le baʼax tu kanoʼ, le oʼolal ka máan dos añoseʼ bin kʼaʼaytaj yéetel Pablo. Kex dieciséis años tiʼ leloʼ Pabloeʼ tu yaʼalajtiʼ: «Maʼ u xuʼulul a tsʼáaik a wóol tiʼ le baʼaxoʼob ta kanaj yéetel oksaʼab ta tuukul a creertoʼ, tumen a wojel tiʼ máaxoʼob ta kanaj. Tsʼoʼoleʼ desde ta chichnil ta kʼaj óoltaj le Kiliʼich Tsʼíiboʼob [ich Hebreo] jeʼel u tsʼáaikoʼobtech naʼat utiaʼal ka a salvartaba tu yoʼolal le fe ka tsʼáaik tiʼ Cristo Jesusoʼ» (2 Tim. 3:14, 15). Koʼoneʼex xakʼaltik le óoxpʼéel tʼaanoʼobaʼ: 1) «ta kʼaj óoltaj le Kiliʼich Tsʼíiboʼo[boʼ]», 2) «oksaʼab ta tuukul a creert[e]» yéetel 3) «jeʼel u tsʼáaikoʼobtech naʼat utiaʼal ka a salvartaba tu yoʼolal le fe ka tsʼáaik tiʼ Cristo Jesusoʼ».

«OKSAʼAB TA TUUKUL A CREERT[E]»

5. 1) ¿Baʼax u kʼáat u yaʼal ‹oksaʼab ta tuukul a creerte›? 2) ¿Baʼaxten k-aʼalik Timoteoeʼ kʼuch u jach creert Jesuseʼ letiʼ le Mesíasoʼ?

⁵ Maʼ chéen unaj a kaʼansik tiʼ a mejen paalal baʼaxoʼob ku tsikbaltik le Bibliaoʼ. Timoteoeʼ ‹oksaʼab tu tuukul u creerte›. Le tʼaan griegooʼ jeʼel xan u tsʼáaik naʼatbil «a wáantaʼal a creert wa baʼax» wa «a creertik jach tu jaajil junpʼéel baʼal». Timoteoeʼ desde tu chichnil u kʼaj óol le Kiliʼich Tsʼíiboʼob ich Hebreooʼ. Baʼaleʼ ka máan kʼiineʼ tu yilaj le baʼaxoʼob eʼesik Jesuseʼ letiʼ le Mesíasoʼ. Yoʼolal baʼaxoʼob kʼuch u jach creerteʼ okjaʼanajeʼ ka bin kʼaʼaytaj yéetel Pablo.

6. ¿Bix jeʼel a wáantik a paalal u jach creert le baʼax ku kanik teʼ Bibliaoʼ?

⁶ ¿Bix jeʼel a wáantik a paalal u jach creert baʼax ku kanik jeʼex áantaʼabik Timoteoeʼ? Yáaxeʼ kʼaʼabéet u yantaltech paciencia. Le paaloʼ maʼ chéen ichil junsúutuk ken u jáan creert wa baʼaxiʼ, mix xan wa chéen tumen u taataʼob creertik jach jaaj. Utiaʼal u creertik le chan paal jach jaaj baʼax ku yaʼalik le Bibliaoʼ, unaj u meyajtiʼ le páajtalil yaantiʼ utiaʼal u tuukul (xok Romailoʼob 12:1). Le taatatsiloʼoboʼ jach nojoch u yáantajoʼob, maases ken beetaʼak kʼáatchiʼob tumen u paalaloʼob. Koʼoneʼex ilik bix u beetik juntúul taatatsil.

7, 8. 1) ¿Bix u yeʼesik paciencia juntúul taatatsil ken u kaʼans u hija? 2) ¿Bix tsʼoʼok a weʼesik paciencia utiaʼal a kaʼansik a paalal?

⁷ Juntúul sukuʼun ku kʼaabaʼtik Thomaseʼ yaan juntúul u hija de 11 años. Ku yaʼalikeʼ u hijaeʼ yaan kʼiineʼ ku kʼáatik: «¿Maʼ wa ta tʼaan meyajnaj tiʼ Jéeoba le evolución utiaʼal u beetik le baʼaxoʼob kuxaʼanoʼoboʼ? ¿Baʼaxten maʼatech k-votar yéetel k-beetik uláakʼ baʼaloʼob utiaʼal k-áantik k-éet kaajaloʼob?». Yaan kʼiineʼ Thomaseʼ ku yilik maʼ u jáan núukiktiʼ chéen yéetel junpʼéel tʼaan. U yojel maas jeʼel u yáantik u creert jujunpʼíitileʼ.

⁸ Le máaxoʼob meyajtik Diosoʼ jach kʼaʼanaʼan u yeʼeskoʼob paciencia. Utiaʼal u kaʼansik u hijaeʼ Thomaseʼ u yojel kʼaʼabéet u yeʼesik paciencia (Col. 3:12). U yojel ku bisik tiempo, yéetel yaʼab u téenel kun tsikbaloʼob. Yaan u beetik u tuukul u hija utiaʼal ka kʼuchuk u creert jach jaaj le baʼax ku yaʼalik le Bibliaoʼ. Thomaseʼ ku yaʼalik: «Teen yéetel in wataneʼ k-ilik wa jach ku creertik le baʼax ku kanikoʼ yéetel wa ku naʼatik baʼaxten letiʼ u jaajil, maases ken tʼaanakoʼon tiʼ baʼaloʼob kʼaʼanaʼantak. Maʼalob ka u beet kʼáatchiʼob. Maas jeʼel in tuklik wa maʼ tu beetik kʼáatchiʼob yoʼolal baʼaxoʼob ku kaʼansaʼaltiʼeʼ».

9. ¿Bix unaj u yáantaʼal le paalaloʼob u creertoʼob le baʼax ku yaʼalik le Bibliaoʼ?

⁹ Wa ka weʼesik pacienciaeʼ, a paalaloʼobeʼ jujunpʼíitil ken u kanoʼob «bukaʼaj u kóochil, u chowakil, u kaʼanlil yéetel u taamil» le baʼax ku kaʼansik le Bibliaoʼ (Efe. 3:18). Unaj a chʼaʼik en cuenta jaypʼéel jaʼab yaantiʼob yéetel baʼaxoʼob jeʼel u páajtal u naʼatkoʼob ken a kaʼansoʼobeʼ. Wa jach tu jaajil ku creertikoʼob le baʼax ku kankoʼoboʼ, maas yaan u páajtal u tsolkoʼob tiʼ u yéet xookoʼob yéetel tiʼ uláakʼ máakoʼob (1 Ped. 3:15). ¿Jeʼel wa u páajtal u tsolkoʼob yéetel le Biblia baʼax ku yúuchul tiʼ máak ken kíimkoʼ? ¿Jach wa ku creertikoʼob?a Jeʼex túun k-ilkoʼ kʼaʼabéettech paciencia utiaʼal a kaʼansik tiʼ a paalal baʼax ku yaʼalik le Bibliaoʼ, baʼaleʼ jach ku taasik utsil (Deu. 6:6, 7).

10. ¿Baʼax unaj u beetik le taatatsiloʼoboʼ?

¹⁰ Chéen baʼaleʼ utiaʼal ka u jach creert le paalaloʼob letiʼ u jaajiloʼ, yáaxeʼ letiʼe taatatsiloʼob unaj u yeʼeskoʼob ku creertikoʼoboʼ. Stephanie, yaan óoxtúul u hijaʼobeʼ, ku yaʼalik: «Desde tu mejentakiloʼobeʼ kin tuklik: ‹¿Kin tsolik wa tiʼob baʼaxten kin creertik yaan Jéeoba, toj baʼax ku beetik yéetel u yaabiltmoʼon? ¿Ku tsʼáaikoʼob wa cuenta jach tu jaajil in yaabiltmaj?›. Wa teen maʼ tin creertikeʼ maʼ tu páajtal in páaʼtik ka u creertoʼob xan letiʼob».