Íichamtsil yéetel atantsil, chaʼa u kanáantkeʼex Jéeoba

1, 2. 1) Le 24 mil israelitaʼoboʼ, ¿baʼaxten tu peʼertoʼob le herencia aʼalaʼantiʼoboʼ? 2) ¿Baʼax ku kaʼansiktoʼon le baʼax úuch tiʼ le israelitaʼoboʼ?

LE TAʼAYTAK u yokol u kaajil Israel teʼ Luʼum Aʼalaʼan u Tsʼaʼabaltiʼoboʼ yaʼab tiʼ le xiiboʼoboʼ «joʼopʼ u kʼastaloʼob yéetel u koʼoleliloʼob Moab». Úuchik u kʼebantaloʼobeʼ 24 mil israelitaʼob kíimoʼob. Le israelitaʼoboʼ jach taʼaytak u kʼamkoʼob kaʼach le herencia aʼalaʼantiʼoboʼ. Chéen baʼaleʼ úuchik u núupkʼebantaloʼobeʼ tu peʼertoʼob (Núm. 25:1-5, 9).

² Le baʼaxoʼob úuch tiʼ le israelitaʼoboʼ «tsʼíibtaʼaboʼob utiaʼal [...] k-kanáant[ik] maʼ u yúuchultoʼon beyoʼ, toʼon máaxoʼon kuxaʼanoʼon teʼ tu tsʼook kʼiiniloʼob le yóokʼol kaabaʼ» (1 Cor. 10:6-11). Toʼoneʼ kuxaʼanoʼon «tu tsʼook kʼiinoʼob», le yaayaj kʼiinoʼobaʼ maʼ kun xáantal ken xuʼuluk utiaʼal u páajtal k-antal teʼ túumben luʼumoʼ (2 Tim. 3:1; 2 Ped. 3:13). Chéen baʼaleʼ teʼ kʼiinoʼobaʼ jujuntúul máaxoʼob meyajtik Dioseʼ tsʼoʼok u beetkoʼob baʼax maʼ uts tu tʼaan Diosiʼ yéetel tsʼoʼok u lúubloʼob tiʼ núupkʼeban. Yoʼolal le baʼax tu beetoʼobaʼ bejlaʼeʼ táan u muʼyajoʼob, tsʼoʼoleʼ wa maʼ tu arrepentiroʼobeʼ yaan u peʼertikoʼob le kuxtal minaʼan u xuul teʼ Paraísooʼ.

3. Le máaxoʼob tsʼokaʼan u beeloʼoboʼ, ¿baʼaxten unaj u chaʼik u nuʼuktaʼaloʼob yéetel u kanáantaʼaloʼob tumen Jéeoba? (Ilawil le fotoʼob yaan tu káajbal le xookaʼ.)

³ Le máaxoʼob tsʼokaʼan u beeloʼoboʼ kʼaʼabéet u chaʼikoʼob u nuʼuktaʼaloʼob yéetel u kanáantaʼaloʼob tumen Jéeoba tumen u máakiloʼob le yóokʼol kaabaʼ chéen táan u tuukuloʼob tiʼ baʼaloʼob yaan yil yéetel le sexooʼ (xok Salmo 127:1). Teʼ xookaʼ yaan k-ilik bix jeʼel u páajtal u kanáantkuba le máaxoʼob tsʼokaʼan u beeloʼoboʼ, yaan k-ilik bix jeʼel u kanáantik u puksiʼikʼaloʼobeʼ, bix jeʼel u natsʼkubaʼob tiʼ Dioseʼ, bix jeʼel u búukbeskubaʼob yéetel junpʼéel túumben kuxtaleʼ, bix unaj u múul tsikbaloʼob yéetel bix jeʼel u tsʼáaik cada juntúul baʼax kʼaʼabéet tiʼ u núupeʼ.

KANÁANT A PUKSIʼIKʼALEʼEX

4. ¿Baʼax jeʼel u beetik u lúubul tiʼ núupkʼeban juntúul máax meyajtik Dioseʼ?

⁴ ¿Baʼax jeʼel u beetik u lúubul tiʼ núupkʼeban juntúul máax meyajtik Dioseʼ? U suukileʼ ku káajal yéetel baʼax ku yilik máak. Jesuseʼ tu yaʼalaj: «Tuláakal máax ku sen chaʼantik juntúul koʼolel utiaʼal u tsʼíiboltik u núupchital tu yéeteleʼ, tsʼoʼok u lúubul tiʼ adulterio tu yéetel ichil u puksiʼikʼal» (Mat. 5:27, 28; 2 Ped. 2:14). Yaʼab tiʼ le máaxoʼob tsʼoʼok u kʼebantaloʼoboʼ maʼ xaaneʼ yáaxeʼ tu chaʼantoʼob pornografía, tu xokoʼob revistaʼob, libroʼob wa ookoʼob tiʼ paginaʼob tiʼ Internet ku tʼaanoʼob tiʼ sexo. Uláakʼoʼobeʼ tu chaʼantoʼob peliculaʼob, obraʼob de teatro wa programaʼob tiʼ televisión tuʼux ku sen chíikpajal baʼaloʼob yaan yil yéetel le sexooʼ. Yanoʼob xaneʼ binoʼob tiʼ centros nocturnos, binoʼob teʼ tuʼuxoʼob ku yóokʼot le xiiboʼob wa le koʼoleloʼob le táan u pitik u nookʼoʼoboʼ (wa striptease), wa binoʼob teʼ tuʼuxoʼob ku tsʼaʼabal masajeʼob utiaʼal u yajsaʼal u kʼaakʼas tsʼíibolal máakoʼ.

5. ¿Baʼaxten maʼ unaj k-confiar tiʼ k-puksiʼikʼaliʼ?

⁵ Jujuntúul sukuʼunoʼobeʼ ikil u jach biskubaʼob yéetel máax maʼ u núupoʼobeʼ lúuboʼob tiʼ núupkʼeban. U máakiloʼob le yóokʼol kaabaʼ maʼatech u controlartik u kʼaakʼas tsʼíibolaloʼob, tsʼoʼoleʼ jach uts tu tʼaanoʼob tuláakal baʼax yaan yil yéetel sexo. Le Bibliaoʼ ku yaʼalikeʼ kʼaʼabéet k-kanáantikba tumen j-kʼebanoʼon yéetel k-puksiʼikʼaleʼ jach kʼasaʼan yéetel ku tuus, le oʼolal séeb jeʼel u káajal u yutstal t-ich juntúul máax maʼ k-núupeʼ (xok Jeremías 17:9, 10). Jesuseʼ tu yaʼalaj: «Tu puksiʼikʼal máakeʼ ku jóokʼol kʼaakʼas tuukuloʼob, u kíimsik u yéet máakil, u lúubul tiʼ adulterio, u núupkʼebantal» (Mat. 15:19).

6, 7. 1) ¿Baʼax jeʼel u yúuchul wa tsʼoʼok u káajal u yantal junpʼéel kʼaakʼas tsʼíibolal t-puksiʼikʼaleʼ? 2) ¿Baʼax jeʼel u yáantkoʼon utiaʼal maʼ k-kʼebantal tu táan Jéeobaeʼ?

⁶ Ken káajak u yantal junpʼéel kʼaakʼas tsʼíibolal tu puksiʼikʼal máakeʼ jeʼel u káajal u yutstal tu yich máax maʼ u núupiʼ, tsʼoʼoleʼ jeʼel u tsikbaltiktiʼ le baʼaloʼob chéen u núup unaj u yojéeltikoʼ. Maʼ xaaneʼ ku joʼopʼol u kaxtikoʼob bix jeʼel u páajtal u yilkubaʼobeʼ. Letiʼobeʼ maʼ tu tsʼáaikoʼob cuenta táan u beetkoʼob baʼax kʼaas tumen ku tuklikoʼobeʼ chéen casualidad úuchik u yilkubaʼob. Jujunpʼíitileʼ ku káajal u yuʼubikoʼob u yaabiltmubaʼob, tu tsʼookeʼ kex u yojloʼob maʼ maʼalob baʼax ku beetkoʼobeʼ maʼ tu xuʼulul u biskubaʼob (Pro. 7:21, 22).

⁷ Letiʼobeʼ ku tuʼubskoʼob junpuliʼ le baʼaxoʼob ku kaʼansik Jéeobaoʼ. Tsʼoʼoleʼ u kʼaakʼas tsʼíibolaloʼob yéetel le baʼax ku tsikbaltikoʼoboʼ ku beetik u káajal u machik u kʼaboʼob, u tsʼuʼutsʼkubaʼob, u méekʼikubaʼob yéetel ku joʼopʼol u maʼamachik u wíinkliloʼob. Ku tuʼubultiʼobeʼ le baʼaloʼobaʼ chéen unaj u beetkoʼob yéetel u núupoʼob. Beyoʼ cada juntúul tiʼ letiʼobeʼ «ku túuntaʼal u yóol ken jíiltaʼak yéetel ken táabsaʼak tumen u tsʼíibolal». Ken pʼáatak túun maʼ tu páajtal u controlartikubaʼobeʼ ku núupchitaloʼob (Sant. 1:14, 15). Wa ka u chaʼob kaʼach u yáantaʼaloʼob tumen Jéeoba utiaʼal ka u yeʼesoʼob tsiikil tiʼ le tsʼoʼokol beeloʼ bejlaʼa maʼ tu kʼebantaloʼobeʼ. ¿Baʼax jeʼel u yáantik máak u yeʼes tsiikil tiʼ le tsʼoʼokol beeloʼ?

NATSʼABAʼEX TIʼ DIOS

8. K-bisikba yéetel Jéeobaeʼ, ¿bix u yáantkoʼon utiaʼal maʼ k-núupkʼebantal?

⁸ (Xok Salmo 97:10.) Wa k-bisikba yéetel Jéeobaeʼ maʼ ken k-lúubul tiʼ núupkʼeban. Ken kaanbalnakoʼon tiʼ u jatsʼuts modos Dioseʼ ku taaktal k-beetik jeʼex letiʼeʼ tumen u paalaloʼon yéetel mantatsʼ ken k-eʼes yaabilaj. Wa k-beetik beyoʼ yaan u chúukpajal k-óol, maʼ ken k-lúubul tiʼ «le núupkʼebanoʼ» mix tiʼ «tuláakal le u jejeláasil baʼaloʼob éekʼtakoʼ» (Efe. 5:1-4). Le máaxoʼob tsʼokaʼan u beeloʼoboʼ u yojloʼobeʼ «Dioseʼ yaan u juzgartik le máaxoʼob ku núupkʼebantaloʼoboʼ bey xan le ku lúubloʼob tiʼ adulteriooʼ», le oʼolaleʼ ku kanáantkubaʼob utiaʼal maʼ u tusik u núupoʼob (Heb. 13:4).

9. 1) ¿Baʼax áant José utiaʼal maʼ u núupkʼebantal yéetel u yatan u patrón? 2) ¿Baʼax ku kaʼansiktoʼon le baʼax úuch tiʼ Joseoʼ?

⁹ Jujuntúul máaxoʼob meyajtik Dioseʼ tsʼoʼok u beetkoʼob baʼax kʼaas ikil u máanskoʼob yaʼab tiempo yéetel u yéet meyajoʼob ken tsʼoʼokok u yorail u meyajoʼob. Uláakʼoʼobeʼ tu yorail u meyajoʼob ku túuntaʼal u yóoloʼob. Lelaʼ bey úuchik tiʼ juntúul xiʼipal tu kʼaabaʼtaj José. Letiʼeʼ le táan u meyajoʼ tu tsʼáaj cuenta jatsʼuts u yilaʼal tumen u yatan u patrón. Le koʼolelaʼ sáamsamal u yaʼalik kaʼach tiʼ José ka chilak tu yéetel. Juntéenjeakileʼ «le koʼoleloʼ tu machaj tu nookʼ Joseeʼ ka tu yaʼalajtiʼ: Chilen tin wéetel». Joseeʼ ka tu yuʼubaj lelaʼ púutsʼi. ¿Baʼax áant José utiaʼal maʼ u lúubul tiʼ baʼax kʼaas? Letiʼeʼ u kʼáat kaʼach u bisuba mantatsʼ yéetel Dios. Yoʼolal le baʼax úuchoʼ Joseeʼ tu peʼertaj u meyaj yéetel kʼaʼal cárcel, chéen baʼaleʼ bendecirtaʼab tumen Jéeoba (Gén. 39:1-12; 41:38-43). Le baʼax úuch tiʼ Joseoʼ ku kaʼansiktoʼoneʼ kex wa tiaʼanoʼon teʼ tuʼux k-meyaj wa jeʼel tuʼuxak ka yanakoʼoneʼ mantatsʼ unaj k-kanáantikba tiʼ tuláakal le baʼaxoʼob jeʼel u beetik k-lúubul tiʼ núupkʼebanoʼ.

BÚUKBESABAʼEX YÉETEL JUNPʼÉEL TÚUMBEN KUXTAL

10. ¿Bix jeʼel u kanáantkoʼon k-búukbesikba yéetel le túumben kuxtaloʼ?

¹⁰ Uláakʼ baʼal jeʼel u yáantik le máaxoʼob tsʼokaʼan u beeloʼob utiaʼal maʼ u núupkʼebantaloʼoboʼ, letiʼe u búukbeskubaʼob yéetel le túumben kuxtal «beetaʼan jeʼex uts tu tʼaan Dioseʼ, jeʼex u yaʼalik le jaajil justiciaoʼ bey xan le chúukaʼan óolaloʼ» (Efe. 4:24). Ken k-búukbesba yéetel le túumben kuxtaloʼ ‹k-kíimsik› le kʼaakʼas tsʼíibolaloʼob yaan t-wíinklil jeʼex «núupkʼeban, éekʼ kuxtalil, u sen tsʼíiboltaʼal núupchital, kʼaakʼas tsʼíibolaloʼob bey xan u tsʼíiboltaʼal baʼax u tiaʼal yaanal» (xok Colosasiloʼob 3:5, 6). Le tʼaan «kíimseʼex» ku chíikpajal teʼ tekstooʼ ku yeʼesik u kʼaʼanaʼanil k-controlartik le kʼaakʼas tsʼíibolaloʼob yaantoʼonoʼ. U kʼáat xan u yaʼaleʼ unaj k-náachkuntikba tiʼ tuláakal baʼax jeʼel u beetik k-núupkʼebantaleʼ (Job 31:1). Ken k-beet baʼax u kʼáat Dioseʼ k-pʼektik «le kʼaasoʼ» yéetel k-beetik «baʼax uts» (Rom. 12:2, 9).

11. ¿Tiʼ baʼax ku yáantaj u búukbeskuba yéetel le túumben kuxtal le máaxoʼob tsʼokaʼan u beeloʼoboʼ?

¹¹ Ken u búukbesuba yéetel le túumben kuxtal le íichamtsil yéetel le atantsiloʼ ku yeʼeskoʼob u jatsʼuts modos Jéeoba (Col. 3:10). Le Bibliaoʼ ku yaʼalik tiʼ le máaxoʼob tsʼokaʼan u beeloʼoboʼ: «Búukbesabaʼex yéetel le nojoch yaabilaj ku yeʼesaʼal tu yoʼolal le chʼaʼ óotsilaloʼ; búukbesabaʼex xan yéetel utsil, yéetel kabal óolal, yéetel jeetsʼel óolal bey xan yéetel chúukaʼan óolal» (Col. 3:12). Wa ku yeʼeskoʼob le jatsʼuts modosoʼobaʼ yaan u maas yaabiltikubaʼob yéetel yaan u bendecirtaʼaloʼob tumen Jéeoba. Yaan xan u yantal kiʼimak óolal ichiloʼob wa ku chaʼik u yantal tu puksiʼikʼaloʼob «u jeetsʼelil Cristo» (Col. 3:15). Wa ku yeʼeskoʼob «nojoch yaabilaj» ichiloʼobeʼ, cada juntúuleʼ yaan u yilik u yáax eʼesik tsiikil tiʼ u núup (Rom. 12:10).

12. Techeʼ, ¿baʼax modosil ka tuklik jeʼel u yáantaj utiaʼal ka yanaktech kiʼimak óolal yéetel a núupeʼ?

¹² Le ka kʼáataʼab tiʼ juntúul íichamtsil yéetel u yatan baʼax áantoʼob utiaʼal ka yanak kiʼimak óolal tiʼobeʼ, Sid, le íichamtsiloʼ, tu yaʼalaj: «Le modos maas k-ilik eʼesikoʼ letiʼe yaabilajoʼ. Uláakʼ baʼax jach kʼaʼabéeteʼ letiʼe jeetsʼel óolaloʼ». Sonja, u yataneʼ, ku yaʼalik: «Le utsiloʼ junpʼéel baʼal jach táaj kʼaʼabéet. Tsʼoʼoleʼ kex maʼ chéen chʼaʼabileʼ k-ilik xan k-eʼesik kabal óolal».

MÚUL TSIKBALNENEʼEX

13. ¿Baʼax jeʼel u yáantaj utiaʼal ka xiʼik utsil tiʼ le máaxoʼob tsʼokaʼan u beeloʼoboʼ, yéetel baʼaxten?

¹³ Junpʼéel tiʼ le baʼaxoʼob jeʼel xan u yáantaj utiaʼal ka xiʼik utsil tiʼ le máaxoʼob tsʼokaʼan u beeloʼoboʼ letiʼe u tsikbaloʼob yéetel yaabilajoʼ. Pero yaan horaeʼ le íichamtsil wa le atantsiloʼ, maas ku tʼankoʼob yéetel tsiikil yaanal máax wa u yaalakʼoʼob. Wa ku yantal «kʼaakʼas kʼuuxilil, pʼujaʼanil, tsʼíikilil, awat tʼaan, poochʼil» ichil le máaxoʼob tsʼokaʼan u beeloʼoboʼ jujunpʼíitil kun xuʼulul u biskubaʼob (Efe. 4:31). Wa ku criticarkubaʼob yéetel ku chʼinchʼin aʼalikoʼob baʼaleʼ yaan u yantal yaʼab problemaʼob ichiloʼob. Bey túunoʼ utiaʼal u maas biskubaʼobeʼ ken tsikbalnakoʼobeʼ kʼaʼabéet u yeʼeskoʼob utsil, yaabilaj yéetel tsiikil (Efe. 4:32).

14. ¿Baʼax maʼ unaj u beetik le máaxoʼob tsʼokaʼan u beeloʼob ken yanak problemaʼob tiʼoboʼ?

¹⁴ Le Bibliaoʼ ku yaʼalikeʼ «yaan junsúutuk utiaʼal mak chiʼ» (Ecl. 3:7). Pero lelaʼ maʼ u kʼáat u yaʼal wa yaan u xuʼulul k-tʼanik k-núupiʼ, tumen le Bibliaoʼ ku yaʼalik xaneʼ le máaxoʼob tsʼokaʼan u beeloʼoboʼ jach kʼaʼabéet u tsikbaloʼob. Juntúul atantsil alemanaeʼ ku yaʼalik: «Ken yanak problemaʼobeʼ wa maʼ tu tʼanik máak u núupeʼ jeʼel u maas yantal kʼuuxileʼ». Le atantsilaʼ ku yaʼalik xan: «Kex maʼ chéen chʼaʼabil u controlarkuba máak utiaʼal maʼ u kʼuuxileʼ, maʼ maʼalob ka sen pʼuʼujuk máakiʼ. Wa k-sen pʼuʼujuleʼ jeʼel k-beetik u yaatal u yóol k-núupeʼ, tsʼoʼoleʼ yaan u maas nojochtal le problemaoʼ». Le íichamtsil yéetel le atantsiloʼ mix bikʼin ken u yutskíint u problemaʼob wa chéen ku sakachtʼaanoʼob bey xan wa maʼ tu tʼankubaʼob. Baʼax jeʼel u yáantaj utiaʼal u biskubaʼobeʼ letiʼe u séeb kaxtikoʼob bix jeʼel u yutskíintikoʼob le problemaʼoboʼ.

15. ¿Baʼax utsil ku taasik u múul tsikbal le máaxoʼob tsʼokaʼan u beeloʼoboʼ?

¹⁵ Utiaʼal u maas biskuba le máaxoʼob tsʼokaʼan u beeloʼoboʼ unaj u jóoʼskoʼob tiempo utiaʼal u tsikbaltikoʼob baʼax ku tuklikoʼob yéetel bix u yuʼubikubaʼob. Tsʼoʼoleʼ kʼaʼabéet u kanáantkoʼob baʼax ku yaʼalikoʼob yéetel bix u yaʼalikoʼob. Tak ken yanak kʼuuxilil ichiloʼobeʼ unaj u yeʼeskoʼob yaabilaj yéetel tsiikil utiaʼal u tsikbaltikoʼob bix ken u yutskíintiloʼob. Beyoʼ maʼ kun talamtal u paklan chʼenxikintkubaʼob (xok Colosasiloʼob 4:6). Jeʼex k-ilkoʼ utiaʼal u maas yaabiltikubaʼobeʼ unaj u múul tsikbaloʼob, tsʼoʼoleʼ ken tsikbalnakoʼobeʼ unaj u paklan líiʼsik u yóoloʼob yéetel u múul kaxtik u yutsiloʼob (Efe. 4:29).

TSʼÁAʼEX BAʼAX KʼAʼABÉET TIʼ A NÚUPEʼEX

16, 17. Le máaxoʼob tsʼokaʼan u beeloʼoboʼ, ¿baʼaxten unaj u chʼaʼikoʼob en cuenta le baʼaxoʼob kʼaʼabéet tiʼ u núupoʼob tak tiʼ baʼaxoʼob yaan yil yéetel le núupchitaloʼ?

¹⁶ Utiaʼal u maas yaabiltikuba le máaxoʼob tsʼokaʼan u beeloʼoboʼ unaj u tsʼáaikoʼob tuláakal baʼax kʼaʼabéet tiʼ u núupoʼob, tsʼoʼoleʼ cada juntúul unaj u kaxtik u yutsil u núup (Fili. 2:3, 4). Le íichamtsil yéetel le atantsiloʼ unaj u kanik u yil baʼax kʼaʼabéet tiʼ u núup, tak tiʼ baʼaxoʼob yaan yil yéetel le núupchitaloʼ (xok 1 Corintoiloʼob 7:3, 4).

¹⁷ Teʼ kʼiinoʼobaʼ jujuntúul máaxoʼob tsʼokaʼan u beeloʼobeʼ maʼ uts tu tʼaan u yeʼeskoʼob yaabilaj tiʼ u núupoʼobiʼ mix u núupchitaloʼob. Yaan íichamtsiloʼob ku tuklikoʼobeʼ wa ku yeʼeskoʼob yaabilaj tiʼ u yatanoʼobeʼ, maʼ xiiboʼobiʼ. Pero le Bibliaoʼ ku yaʼalik: «Teʼex xaneʼ, íichamtsileʼex, bey unaj u seguer a kajtaleʼex yéetel a wataneʼexaʼ, yéetel kʼaj óolalil» (1 Ped. 3:7). Le íichamtsiloʼ unaj u naʼatikeʼ utiaʼal u tsʼáaik baʼax kʼaʼabéet tiʼ u yataneʼ maʼ chéen unaj u núupchital tu yéeteliʼ. Letiʼeʼ mantatsʼ unaj u yeʼesik yaabilaj tiʼ u yatan, beyoʼ le atantsiloʼ maas jeʼel u disfrutartik u núupchital tu yéeteleʼ. Wa tu kaʼatúulal ku yeʼeskoʼob yaabilajeʼ, maas maʼ kun talamtal u tsʼáaikoʼob baʼax kʼaʼabéet tiʼ u núupoʼob tak tiʼ baʼaxoʼob yaan yil yéetel le núupchitaloʼ.

18. ¿Baʼax unaj u beetik le máaxoʼob tsʼokaʼan u beeloʼob utiaʼal ka xiʼik utsil tiʼoboʼ?

¹⁸ U jaajileʼ mix juntéen unaj u tuklik máak wa tu tusaj u núup yéetel yaanal tumen u kaxtmaj. Pero yaan horaeʼ le íichamtsil wa le atantsiloʼ jeʼel u tusik u núupeʼ tumen maʼatech u yeʼesaʼal yaabiltaʼan mix tech u núupchitaloʼob (Pro. 5:18; Ecl. 9:9). Le oʼolal le Bibliaoʼ ku yaʼalik: «Cada juntúul tiʼ teʼexeʼ maʼ u pʼáatal maʼ u tsʼáaik baʼax kʼaʼabéet tiʼ u núup, chéen jaʼaliʼ wa bey a chʼaʼtukultmileʼex a beetkeʼex ichil wa jaypʼéel kʼiinoʼob[oʼ]». ¿Baʼaxten unaj u beetaʼal le tsolnuʼukaʼ? Le Bibliaoʼ ku yaʼalik: «Beyoʼ Satanaseʼ maʼ kun seguer u túuntik a wóoleʼex ikil maʼ tu páajtal a controlartik a tsʼíibolaleʼex» (1 Cor. 7:5). Ken u yil Satanás ‹maʼ tu páajtal u controlartik u tsʼíibolal› máakeʼ ku túuntik u yóol, tu tsʼookeʼ ku beetik u lúubul máak tiʼ adulterio, lelaʼ jach ku beetik u muʼyaj le máaxoʼob tsʼokaʼan u beeloʼoboʼ. Jeʼex k-ilkoʼ utiaʼal ka xiʼik utsil tiʼ le máaxoʼob tsʼokaʼan u beeloʼoboʼ unaj u kaxtikoʼob u yutsil u núupoʼob, unaj u yeʼeskoʼob u yaabiltmubaʼob yéetel u núupchitaloʼob, tuláakal lelaʼ unaj u beetkoʼob yoʼolal yaabilaj maʼ chéen tumen u yojloʼob kʼaʼabéet u beetkoʼobiʼ (1 Cor. 10:24).

KANÁANTABAʼEX MANTATSʼ

19. Le máaxoʼob tsʼokaʼan u beeloʼoboʼ, ¿baʼax unaj u beetkoʼob, yéetel baʼaxten?

¹⁹ Jach taʼaytak k-okol teʼ túumben luʼumoʼ. ¿Máasaʼ maʼ k-kʼáat ka úuchuktoʼon le baʼax úuch tiʼ le 24 mil israelitaʼob kʼebanchajoʼob tu táax luʼumil Moaboʼ? Ka tsʼoʼok u yaʼalik le Biblia baʼax úuch tiʼ le israelitaʼoboʼ, tu yaʼalaj xan: «Le máax ku tuklik waʼalakbal maʼalobeʼ, u kanáant maʼ u lúubul» (1 Cor. 10:12). Le oʼolal wa tsʼokaʼan k-beeleʼ unaj k-yaabiltik k-núup mantatsʼ yéetel u chúukpajal k-óol tiʼ Jéeoba (Mat. 19:5, 6). Bey túunoʼ tuláakloʼon unaj k-ilik k-beetik le baʼax ku yaʼalik le Bibliaaʼ: «Beeteʼex tuláakal le ku páajtal utiaʼal ka u yil Dios minaʼan a siʼipileʼex, minaʼan a kʼasaʼanileʼex yéetel kuxaʼaneʼex ich jeetsʼelil» (2 Ped. 3:13, 14).