¿Bix u yilken Jéeoba?
1. ¿Baʼaxten k-aʼalikeʼ le Bibliaoʼ bey junpʼéel néeneʼ?
1 ¿Ka néentkaba wa sáamsamal? Óoliʼ tuláakloʼoneʼ sáamsamal k-néentikba utiaʼal k-xáacheʼtik k-pool wa utiaʼal k-ilik bix anikoʼon. Le Bibliaoʼ bey junpʼéel néeneʼ. Ken k-xokeʼ ku páajtal k-ilik bix anik k-puksiʼikʼal, le baʼax maas kʼaʼanaʼan utiaʼal Jéeobaoʼ (1 Sam. 16:7; Sant. 1:22-24). Le Bibliaoʼ jeʼel u páajtal «u xakʼaltik baʼaxoʼob yaan tu tuukul yéetel tu puksiʼikʼal máakeʼ» (Heb. 4:12). Wa k-xokik le Biblia yéetel k-tuukul tiʼ baʼax ku yaʼalikeʼ yaan k-ilik baʼax jeʼel u páajtal k-beetik utiaʼal k-meyajtik Dios maas maʼalobeʼ (Sal. 1:1-3).
2. ¿Bix jeʼel u yáantkoʼon le Biblia utiaʼal k-ilik baʼax kʼeexil unaj k-beetkeʼ?
2 Néentaba teʼ Bibliaoʼ. Ken k-xok bix chúukpajik u yóol le máaxoʼob meyajt Jéeoba úuchjeakiloʼ, k-kanik baʼax modosil unaj u yantaltoʼon. Jeʼex Davideʼ, letiʼeʼ maʼ tu chʼaʼaj saajkil u defendert u kʼaabaʼ Diosiʼ (1 Sam. 17:45, 46). Isaíaseʼ chúukpaj u yóol kʼaʼaytaj kex maʼ kʼaʼam maʼalob teʼ kaaj tuʼux túuxtaʼaboʼ (Isa. 6:8, 9). Jesuseʼ tumen jach u yaabiltmaj u Taataeʼ, tu meyajtaj yéetel kiʼimak óolal, maʼ tu yilaj bey junpʼéel kuucheʼ (Juan 4:34). Le yáax cristianoʼoboʼ tu tsʼáaj u yóol u meyajtoʼob Jéeoba, tu kʼubaj u yóoloʼob tiʼ letiʼ yéetel maʼ xuʼul u meyajtikoʼobiʼ (Bax. 5:41, 42; 2 Cor. 4:1; 2 Tim. 4:17). K-tuukul tiʼ le máaxoʼob meyajt Dios úuchjeakiloʼ ku yáantkoʼon k-il baʼax kʼeexil unaj k-beetik utiaʼal k-meyajtik Dios maas maʼalob.
3. ¿Baʼaxten unaj k-séeb utskíintik le baʼax kʼaʼabéetoʼ?
3 Utskíint baʼax kʼaʼabéet. Wa k-paktikba teʼ néen yéetel maʼ t-utskíintik le baʼax kʼaʼabéetoʼ mix junpʼéel utsil ken u taastoʼon. Le oʼolal unaj k-kʼáatik tiʼ Jéeoba ka u yáantoʼon k-il baʼax kʼeexoʼob unaj k-beetik yéetel ka u yáantoʼon k-beete (Sal. 139:23, 24; Luc. 11:13). Tumen chéen junpʼíit tiempo pʼaatal utiaʼal u salvarkuba yaʼab máakoʼobeʼ, maʼ unaj k-páaʼtik u máan kʼiin utiaʼal k-utskíintik le baʼax kʼaʼabéetoʼ (1 Cor. 7:29; 1 Tim. 4:16).
4. ¿Baʼax ku yúuchul tiʼ juntúul máak ku néentkuba teʼ Biblia yéetel ku yutskíintik baʼax kʼaʼabéetoʼ?
4 Utiaʼal Jéeobaeʼ maas kʼaʼanaʼan baʼax yaan t-puksiʼikʼal, maʼ le baʼaxoʼob ku yilik chéen wíinikoʼ (1 Ped. 3:3, 4). ¿Baʼax ku yúuchul tiʼ juntúul máak ku néentkuba yéetel u tʼaan Dios tsʼoʼoleʼ ku beetik le kʼeexoʼob kʼaʼabéetoʼ? «Ku kʼuchul u beetuba juntúul máak maʼ tu tuʼubsik baʼax ku yuʼubik yéetel ku tsʼoʼokbesik le tʼaanoʼ, tsʼoʼoleʼ yaan u kiʼimaktal u yóol ikil u beetik beyoʼ.» (Sant. 1:25.) Beyoʼ. Wa «k-eʼesik u nojbeʼenil Jéeoba jeʼex u yilaʼal tiʼ junpʼéel néeneʼ» yaan u kiʼimaktal k-óol yéetel yaan k-maas maʼalobkíintik bix k-meyajtik (2 Cor. 3:18).