U kaʼapʼéel xookil

Koʼoneʼex nojbeʼenkuntik Jéeoba, le utúuliliʼ jaajil Diosoʼ

1. ¿Máax u juntúuliliʼ jaajil Dios?

LE Bibliaoʼ ku yaʼalikeʼ, kex yaʼab baʼaloʼob ku adorartaʼaleʼ, «chéen juntúuliliʼ Jajal Dios yaan, le Taataoʼ» (1 Corintoiloʼob 8:5, 6). Le «juntúuliliʼ Jajal Diosoʼ» Jéeoba, le Máax beetmil tuláakal baʼaloʼ (Deuteronomio 6:4; Apocalipsis 4:11). Jesuseʼ tu yaʼalaj tu yoʼolal Jéeoba: «In Jajal Dios» yéetel «a Jajal Dioseʼex xan» (Juan 20:17). Moisés xaneʼ tu yaʼalaj: «Minaʼan u jeel», u kʼáat u yaʼaleʼ chéen Jéeoba u jaajil Dios (Deuteronomio 4:35). Tuláakal baʼax ku adorartaʼal, jeʼex imagenoʼob, wíinikoʼob yéetel tak Satanás, «u [diosil] le yóokʼol kaabaʼ», mix baʼaloʼob tu tséel Jéeoba (2 Corintoiloʼob 4:3, 4). Jeʼex tu yaʼalil Jesuseʼ, Jéeobaeʼ letiʼ u «juntúuliliʼ» jaajil Dios (Juan 17:3).

2. ¿Baʼax unaj u péekskoʼon k-beet le baʼax k-kanik tiʼ Jéeobaoʼ?

² Máaxoʼob kiʼimak u yóol u kʼaj óolkoʼob Jéeoba, yéetel kiʼimak u yóol u kʼaj óolkoʼob baʼaxoʼob ku beetik t-óolaleʼ, ku taaktal u natsʼikubaʼob tiʼ letiʼ. Jeʼex u maas natsʼikubaʼob tiʼ Jéeobaeʼ, bey u maas taaktal u nojbeʼenkuntikoʼob. ¿Bix u nojbeʼenkuntikoʼob? Ku beetkoʼob ken u tsikbaltoʼob baʼax ku kanikoʼob tiʼ letiʼ. Le Bibliaoʼ ku yaʼalikeʼ «yéetel le chiʼ[oʼ]» ku yúuchul tʼaan «utiaʼal ka yanak [salvación] tiʼ máak» (Romailoʼob 10:10). Ku nojbeʼenkuntikoʼob xan ken u yil u yeʼeskoʼob u jatsʼuts modos Dios. Efesoiloʼob 5:1 ku yaʼalik: «Il a wileʼex a [beetkeʼex] jeʼel bix [Dioseʼ]». Utiaʼal ka páatak k-beetkeʼ jach unaj k-kʼaj óoltik Jéeoba tubeel.

3. ¿Tiʼ baʼax ku yilaʼal u sen kiʼichkelmil Dios?

³ Le Bibliaoʼ jach ku yeʼesiktoʼon bix u sen kiʼichkelmil Dios. U sen kiʼichkelmileʼ ku yilaʼal tiʼ le kampʼéel baʼaloʼobaʼ: jach yaan u naʼat, toj tuláakal baʼax ku beetik, jach yaan u páajtalil yéetel jach yaan u yaabilaj. «[Dioseʼ] yaan u naʼat.» (Job 12:13.) «Baʼaxoʼob ku beetikeʼ tojtak.» (Deuteronomio 32:4.) «Sen nojoch u páajtalil.» (Isaías 40:26.) «Jajal Dioseʼ yaakunaj.» (1 Juan 4:8.) Tiʼ le kampʼéel baʼaloʼobaʼ, ¿máakalmáak jach eʼesik bix Diosiʼ?

«Jajal Dioseʼ yaakunaj»

4. ¿Baʼax péeks Jéeoba u beet le angeloʼoboʼ, le wíinikoʼoboʼ yéetel tuláakal baʼal?

⁴ ¿Baʼax péeks Jéeoba u beet le angeloʼob, le wíinikoʼoboʼ yéetel tuláakal baʼal? ¿U naʼat? ¿U páajtalil? Maʼatech. Kex jach yaan u naʼat yéetel u páajtalileʼ, maʼ le péeksiʼ. Kex xan toj tuláakal baʼax ku beetikeʼ, leloʼ mix baʼal yaan u yil yéetel u tsʼáaik kuxtal. Baʼaxeʼ u yaakunaj péeks u beet le angeloʼob yéetel le wíinikoʼob utiaʼal xan ka yanak kuxtal tiʼoboʼ; yoʼolal xan u yaabilajeʼ tu tuklaj u tsʼáaik upʼéel paraíso utiaʼal ka kuxlak minaʼan u xuul le wíinikoʼob uʼuyik u tʼaanoʼ (Génesis 1:28; 2:15). Yoʼolal xan u yaabilajeʼ yaan u luʼsik le kíimil ku taal yoʼolal u kʼeban Adanoʼ.

5. Jeʼex u yaʼalik le Bibliaoʼ, ¿baʼax jach eʼesik bix Jéeoba, yéetel baʼaxten?

⁵ Le yaabilaj túunoʼ le jach eʼesik bix Dios. Jeʼel u páajtal k-aʼalikeʼ le búukbesmai. Dioseʼ toj yéetel jach yaan u naʼat yéetel u páajtalil, baʼaleʼ le Bibliaoʼ mix utéen ku yaʼalik wa Dioseʼ tojil, wa Dioseʼ naʼat bey xan wa Dioseʼ páajtalil. Chéen baʼaleʼ ku yaʼalikeʼ letiʼeʼ yaabilaj. Lelaʼ u kʼáat u yaʼaleʼ Jéeobaeʼ bey suunajaʼan yaabilajileʼ. U yaabilajeʼ maʼ jeʼex tiʼ toʼoneʼ, tumen ku chʼaʼik en cuenta baʼax toj, maʼ chéen baʼax ku yuʼubik tu puksiʼikʼaliʼ. Minaʼan maas maʼalob yaabilaj jeʼex le jeʼelaʼ, tumen ku taal tiʼ u nojoch yutsil Dios, yéetel le máax kʼamikoʼ chíikaʼan u yilik táan u yeʼesik u yaabilaj Dios tiʼ.

6. ¿Baʼaxten ku páajtal k-beetik baʼax u kʼáat Dios, kex kʼeban wíinkoʼon?

⁶ Tumen u yaabilmoʼon Jéeobaeʼ, ku páajtal k-beetik baʼax u kʼáat. Maʼ xaaneʼ, tumen kʼeban wíinkoʼon yéetel tumen mix baʼaloʼon tu tséeleʼ, jeʼel k-tuklik maʼ tu páajtal k-beetik baʼax u kʼáateʼ. Baʼaleʼ tiʼ ku yilaʼal u nojoch yaabilaj Jéeobaeʼ, tumen u yojel yaan oraeʼ k-beetik baʼax maʼ maʼalobiʼ, tumen kʼeban wíinkoʼon. Jéeobaeʼ u yojel siijloʼon ich kʼeban (Salmo 51:5). Le oʼolal Salmo 130:3, 4 ku yaʼalik: «Yuumtsil, wa ka tsʼáa a wich tiʼ le kʼasaʼaniloʼ, ¿máax jeʼel u pʼáatal waʼalakbal ta táaneʼ? Baʼaleʼ tiʼ teech [k-]kʼamik saʼatsaj siʼipil [wa perdón]». Jach beyoʼ, Jéeobaeʼ «muun u puksiʼikʼal[,] ku chʼaʼa óotsilil, chúukaʼan yóol, nojoch u yaakunaj» (Éxodo 34:6). «Techeʼ Yuumtsil utsech, ka saʼatsaj siʼipil.» (Salmo 86:5.) ¿Máasaʼ jach ku taasiktoʼon kiʼimak óolal k-meyajtik utúul Dios jach u yaabilmoʼon yéetel ku chʼaʼiktoʼon óotsilil?

7. ¿Bix u yilaʼal u yaabilaj Jéeoba tiʼ toʼon yoʼolal baʼaxoʼob u beetmaj?

⁷ U yaabilaj Jéeobaeʼ k-ilik xan tiʼ baʼaxoʼob u beetmaj. Yaʼabach maʼalob baʼal u tsʼaamajtoʼon, jeʼex le nukuch puʼukoʼoboʼ, le jatsʼuts kʼáaxoʼoboʼ yéetel le kʼáaʼnáaboʼoboʼ. U tsʼaamajtoʼon xan yaʼabach kiʼikiʼ baʼaloʼob utiaʼal k-jaante, u jejeláasil kiʼibok looloʼob yéetel u jejeláasil baʼalcheʼob. Yaʼab baʼaxoʼob tu beeteʼ, tu beetaj utiaʼal u kiʼimak óolal wíinik. Bejlaʼeʼ yaʼab baʼaxoʼob u beetmaj Jéeobaeʼ maʼ tu jach taasiktoʼon le kiʼimak óolal unaj u taasiktoʼonoʼ, tumen kʼeban wíinkoʼob yéetel tumen kuxaʼanoʼon teʼ yóokʼol kaab tsʼoʼok u jach kʼastalaʼ (Romailoʼob 8:22). Baʼaleʼ teʼ Paraísooʼ jach yaʼab baʼax ken u beet Jéeoba t-oʼolal. Le Bibliaoʼ ku yaʼalik: «Ka jeʼik a kʼabeʼ, [...] ka naʼajkunsik tuláakal le kuxaʼan baʼaloʼoboʼ» (Salmo 145:16).

8. ¿Bix tu yeʼesil u maas nojoch yaabilaj Dios tiʼ toʼon?

⁸ ¿Bix tu yeʼesil u maas nojoch yaabilaj Dios tiʼ wíinik? Le Bibliaoʼ ku yaʼalik: «Dioseʼ tu sen yaabiltaj le yóokʼol kaabaʼ, ka tu tsʼáaj u juntúuliliʼ Paal, utiaʼal tuláakal le máax ku yoksik u yóol tiʼeʼ maʼ u saʼatal, baʼaleʼ ka yanak kuxtal minaʼan u xuul tiʼ» (Juan 3:16). Jéeobaeʼ, ¿yoʼolal wa u yutsil wíinik tu túuxtaj u Hijo? Romailoʼob 5:8 ku núukik: «Dioseʼ ku yeʼesiktoʼon tu jaajil u yaabiltmajoʼon ikil kíimik Cristo t-oʼolal kex láayliʼ j-kʼebanoʼon kaʼacheʼ». Dios túuneʼ tu túuxtaj u Hijo kíimil t-oʼolal utiaʼal u salvarkoʼon tiʼ le kʼeban yéetel tiʼ le kíimiloʼ (Mateo 20:28). Bey jeʼebik u bejil utiaʼal u kʼaʼamal kuxtal minaʼan u xuul tumen máaxoʼob yaabiltmil Jéeobaoʼ. Jéeobaeʼ ku kʼamik tuláakal máax uʼuyik u tʼaan, tumen le Bibliaoʼ ku yaʼalik: «Dioseʼ mix máak jelaʼan u paktik, baʼaleʼ tiʼ jeʼel baʼalak kaajileʼ ku kʼamik le máax [...] ku beetik baʼax utsoʼ» (Beetaʼanoʼob 10:34, 35).

9. Úuchik u kʼubik u kuxtal Jesús t-oʼolaleʼ, ¿baʼax unaj u péekskoʼon k-beete?

⁹ Úuchik u kʼubik u kuxtal Jesús t-oʼolal utiaʼal u yantaltoʼon kuxtal minaʼan u xuuleʼ, ¿baʼax unaj u péekskoʼon k-beete? Kʼaʼabéet u maas muʼukʼankuntik k-yaabilaj tu yoʼolal Jéeoba, le Máax túuxtoʼ, yéetel unaj u péekskoʼon k-uʼuy u tʼaan Jesús, u Hijo. «Cristoeʼ j-kíim tu yoʼolal tuláakal, utiaʼal [...] maʼ u kuxtaloʼob chéen utiaʼal letiʼob, baʼaleʼ ka kuxlakoʼob tu yoʼolal letiʼ.» (2 Corintoiloʼob 5:15.) Cristoeʼ tu yeʼesaj jach yaan u yaabilaj yéetel ku chʼaʼik óotsilil jeʼex u Taataeʼ, le oʼolal ku taasiktoʼon kiʼimak óolal k-beetik baʼax ku yaʼalik. Bey u yeʼesik le baʼax tu yaʼalaʼ: «Koʼoteneʼex tiʼ teen, tuláakaleʼex máaxeʼex kaʼananeʼex tiʼ a meyajeʼex yéetel aal a kucheʼex, teen bíin in beet a jeʼeleʼex. Biseʼex in kuuch ta wóokʼoleʼex, yéetel kaambalneneʼex tiʼ teen, tumen teneʼ chúukaʼan in wóol yéetel kabal u yóol in puksiʼikʼal; beyoʼ bíin a kaxteʼex jeʼelel [...]. Tumen in kuucheʼ maʼ aaliʼ yéetel sáal u bisaʼal» (Mateo 11:28-30).

Kʼaʼabéet k-eʼesik yaabilaj tiʼ u maasil

10. ¿Bix k-eʼesik yaabilmaj k-sukuʼunoʼob?

¹⁰ ¿Bix k-eʼesik jach yaabilmaj k-sukuʼunoʼob, jeʼel bix u yaabiltmoʼon Jéeoba yéetel Jesuseʼ? Le Bibliaoʼ ku yeʼesik bixi: «Máax yaan u yaakunajeʼ [...] uts u puksiʼikʼal, minaʼan kʼaakʼas tsʼíibolal tiʼ, maʼ tu nojbaʼalkunsikuba, maʼ tu kaʼanaltal u yich. Maʼ tu kʼaakʼas tʼaan, maʼ tu kaxtik baʼal utiaʼal, maʼ tu pʼuʼujul, maʼ tu chʼaʼakʼuxtik mix máak. Maʼ tu kiʼimaktal u yóol tu yoʼolal u kʼebanoʼob uláakʼ máak, baʼaleʼ ku kiʼimaktal u yóol tu yoʼolal [u jaajil]. Tuláakal ku mukʼyajtik [...]. Le yaakunajoʼ mix bikʼin ku kíimil» (1 Corintoiloʼob 13:4-8; 1 Juan 3:14-18; 4:7-12).

11. ¿Tiʼ máaxoʼob xan kʼaʼabéet k-eʼesik yaabilaj, yéetel bixi?

¹¹ ¿Tiʼ máaxoʼob uláakʼ kʼaʼabéet k-eʼesik yaabilaj, yéetel bixi? Jesuseʼ tu yaʼalaj: «Xeeneʼex túun tiʼ u kajnáaliloʼob tuláakal kaajoʼobeʼ ka a beeteʼexoʼob [disipuloʼob]; yéetel tsʼaʼex u yokjaʼob tu kʼaabaʼ le Taataoʼ, le Paaloʼ yéetel le Kiliʼich Pixanoʼ, yéetel kaʼanseʼexoʼob u tsʼoʼokbesoʼob tuláakal baʼax in waʼalmaj tiʼ teʼex» (Mateo 28:19, 20). Utiaʼal lelaʼ unaj k-tsikbaltik tiʼ u maasil máakoʼob bix le kuxtal kun ilbil teʼ Paraíso ken u tsʼáaj Dios maʼ kun xáantaloʼ. Jesuseʼ tu yeʼesaj maʼ chéen k-sukuʼunoʼob unaj k-yaabiltikiʼ, tumen tu yaʼalaj: «Wa teʼex ka yaabiltikeʼex chéen le máaxoʼob yaabiltikeʼexoʼ, ¿baʼax boʼolil bíin a kʼameʼex tu yoʼolal leloʼ? Tak le j-kʼam [impuestoʼob] bey u beetikoʼoboʼ. Wa ka tsikikeʼex xan chéen a sukuʼuneʼexeʼ, ¿baʼax maʼalobil ka beetikeʼex? Tak le máaxoʼob [maʼ u kʼaj óoloʼob Dios beetik] beyoʼ» (Mateo 5:46, 47; 24:14; Galaciailoʼob 6:10).

Baʼax u kʼáat u yaʼal k-máan tu kʼaabaʼ Jéeoba

12. ¿Baʼaxten chéen Dios unaj u kʼaabaʼtik Jéeoba?

¹² Utiaʼal xan k-nojbeʼenkuntik Jajal Dioseʼ kʼaʼabéet k-kʼaj óoltik yéetel k-chʼaʼachiʼitik u kʼaabaʼ, yéetel kʼaʼabéet xan k-kaʼansik tiʼ uláakʼ máakoʼobeʼ u kʼaabaʼeʼ Jéeoba.a Le salmistaoʼ tu kʼáat óoltaj: «Utiaʼal ka ojéeltaʼak tumen le máakoʼoboʼ teech, a kʼaabaʼeʼ Jéeoba, chéen teech u Sen Kaʼanlil yóokʼol tuláakal le luʼumaʼ» (Salmo 83:18, Nuevo Mundo). Le kʼaabaʼ Jéeobaoʼ u kʼáat u yaʼal «Letiʼ beetik u yúuchul». U kʼáat u yaʼaleʼ Dioseʼ ku béeykuntik tuláakal baʼax u kʼáat. Chéen letiʼ unaj u bisik le kʼaabaʼaʼ, tumen wíinikeʼ maʼ u yojel wa jeʼel u páajtal u béeykuntik baʼax ku tuklik u beetikeʼ (Santiago 4:13, 14). Chéen Jéeoba jeʼel u páajtal u yaʼalik yaan u béeytal baʼax ku yaʼalikeʼ (Isaías 55:11). Yaʼab máaxeʼ jach ku kiʼimaktal u yóol ken u yil u kʼaabaʼ Dios teʼ Bibliaoʼ yéetel ken u yojéelt baʼax u kʼáat u yaʼale. Baʼaleʼ utiaʼal u jóoʼskoʼob u yutsil u kʼaj óoltkoʼob u kʼaabaʼ Jéeobaeʼ, kʼaʼabéet u máanoʼob tu kʼaabaʼ wa u yuʼubkoʼob u tʼaan mantatsʼ (Miqueas 4:5).

13. ¿Baʼax u kʼáat u yaʼal k-kʼaj óoltik u kʼaabaʼ Jéeoba yéetel k-máan tu kʼaabaʼ?

¹³ Salmo 9:10 ku yaʼalik yoʼolal Jéeoba: «Le máaxoʼob u kʼaj óoltmajechoʼoboʼ u [kʼubmaj u] yóoloʼob tiʼ teech». U kʼaj óoltaʼal u kʼaabaʼ Jéeobaeʼ maʼ chéen u kʼáat u yaʼal u yojéeltaʼal u kʼaabaʼeʼ, tumen u yojéeltik máak u kʼaabaʼ Dioseʼ maʼ u kʼáat u yaʼal wa yaan u fe tiʼ letiʼ. U kʼaj óoltaʼal u kʼaabaʼeʼ u kʼáat u yaʼal u yaabiltaʼal yoʼolal bix letiʼ, u yuʼubaʼal u tʼaan yéetel u kaxtaʼal u nuʼuktaj tiʼ tuláakal baʼal (Proverbios 3:5, 6). Utiaʼal xan k-máan tu kʼaabaʼ Jéeobaeʼ kʼaʼabéet k-kʼubik k-kuxtal tiʼ letiʼ yéetel k-kuxtal jeʼex u kʼáateʼ, beyoʼ yaan k-eʼesik utúuloʼon tiʼ máaxoʼob meyajtik (Lucas 10:27). Techeʼ, ¿táan wa a beetik lelaʼ?

14. ¿Baʼax unaj k-beetik utiaʼal k-meyajtik Jéeoba utiaʼal mantatsʼ?

¹⁴ Wa taak k-meyajtik Jéeoba utiaʼal mantatsʼeʼ, maʼ unaj k-meyajtik chéen tumen unaj k-beetikiʼ. Kex Timoteo yaʼab jaʼaboʼob káajak u meyajtik Jéeobaeʼ, le apóstol Pablooʼ tu yaʼalaj tiʼeʼ ka u maas kʼububa u meyajt Dios (1 Timoteo 4:7). Máax jach u kʼubmuba tiʼ Dioseʼ ku meyajtik tumen jach u kʼáat u tsʼáa nib óolal wa gracias tiʼ; ku yeʼesik upʼéel nojoch tsiikil tiʼ, yéetel u jach yaabilmaj tu yoʼolal bix letiʼ. Máax jach tu jaajil u kʼubmuba u meyajt Dioseʼ ku tsʼíiboltik ka eʼesaʼak upʼéel nojoch tsiikil tiʼ u kʼaabaʼ Dios tumen tuláakal máak. Utiaʼal túun k-máan mantatsʼ tu kʼaabaʼ Jéeoba, le utúuliliʼ jaajil Diosoʼ, unaj k-ilik maas kʼubikba k-meyajte (Salmo 37:4; 2 Pedro 3:11).

15. ¿Bix k-eʼesik kʼáat meyajt chéen Jéeoba?

¹⁵ Jéeobaeʼ u kʼáat ka k-meyajt chéen letiʼ, tumen letiʼeʼ utúul Dios «u pʼeek u kʼeʼexel» (Deuteronomio 4:24). Máax u yaabilmaj Jéeobaeʼ maʼ tu yaabiltik le yóokʼol kaab yaan yáanal u kʼab Satanasoʼ (Santiago 4:4; 1 Juan 2:15-17). Jéeobaeʼ u yojel wa jach tu jaajil k-kʼáat meyajte (Jeremías 17:10). Wa jach tu jaajil taak k-beetik baʼax u kʼáateʼ, letiʼeʼ yaan u yilik, yéetel yaan u yáantkoʼon utiaʼal u chúukpajal k-óol ken máankoʼob tiʼ talamiloʼob. Yaan u muʼukʼankuntkoʼon yéetel u kiliʼich pixan, wa u espíritu santo, utiaʼal maʼ k-lúubul tiʼ le baʼaloʼob kʼaastak ku beetaʼal teʼ yóokʼol kaabaʼ (2 Corintoiloʼob 4:7). Yaan u yáantkoʼon xan utiaʼal maʼ u xuʼulul k-páaʼtik le kuxtal minaʼan u xuul teʼ Luʼum suunajaʼan paraísoiloʼ. ¡Jach maʼalob le baʼax k-páaʼtikoʼ! Unaj k-tsʼáaik nib óolal tu yoʼolal, yéetel unaj k-meyajtik Jéeoba yéetel kiʼimak óolal, tumen letiʼ kun tsʼáaik le kuxtal minaʼan u xuuloʼ.

16. ¿Baʼax ku páaʼtaʼal ka a beet, jeʼex táan u beetik u millonesi máakoʼoboʼ?

¹⁶ U millonesi máakoʼob tiʼ tuláakal yóokʼol kaabeʼ yéetel kiʼimak óolal táan u beetkoʼob le baʼax ku yaʼalik le Bibliaaʼ: «Koʼoneʼex kiʼikiʼtʼantik [...] u nojbeʼenil u kʼaabaʼ Yuumtsil» (Salmo 34:3). Jéeobaeʼ u kʼáat ka yanakech ichil le yaʼabach máakoʼob tiʼ tuláakal yóokʼol kaab táan u nojbeʼenkuntkoʼob u kʼaabaʼoʼ.

[Tsolajiloʼob]

Kʼaʼajsaj

• ¿Bix Jéeoba? ¿Baʼaxten maʼalob ka k-maas k-kʼaj óolt bix letiʼ?

• ¿Bix jeʼel k-áantik uláakʼ máakoʼob ka u kʼaj óoltoʼob Dioseʼ?

• ¿Baʼax u kʼáat u yaʼal k-kʼaj óoltik u kʼaabaʼ Jéeoba yéetel k-máan tu kʼaabaʼ?

[U tsolajil le oochel teʼ táan juʼun 22]

[U tsolajil le oochel teʼ táan juʼun 14]

Jéeobaeʼ, yoʼolal u nojoch yaabilajeʼ, yaan u jeʼik u kʼab utiaʼal u naʼajkunsik tuláakal baʼal kuxaʼan

[U tsolajil le oochel teʼ táan juʼun 15]