KÁAJS A TSIKBAL
XOOK 4
Eʼes kabal óolal
Le Bibliaoʼ ku yaʼalik: «Yéetel kabal óolaleʼ ileʼex u maasil bey maas importanteʼob ke teʼexeʼ» (Fili. 2:3).
¿Bix tu beetil Pablo?
1. Chaʼant le VIDEOOʼ, wa xok Hechos 26:2, 3. Tsʼoʼoleʼ ka tuukul tiʼ le kʼáatchiʼobaʼ:
1) ¿Bix tu yeʼesil Pablo kabal u yóol le ka tsikbalnaj yéetel le rey Agripaoʼ?
2) ¿Baʼax tu beetaj Pablo utiaʼal maʼ u tuukul le máakoʼob tiʼ letiʼoʼ, baʼaxeʼ ka tuukulnakoʼob tiʼ Jéeoba yéetel tiʼ le baʼax ku yaʼalik u Tʼaanoʼ? (Ilawil Hechos 26:22).
¿Baʼax k-kanik tiʼ Pablo?
2. Wa k-eʼesik kabal óolal yéetel respeto tiʼ le máakoʼoboʼ maas jeʼel u taaktal u yuʼubikoʼob le baʼax k-tsikbaltikoʼ.
Beet jeʼex Pabloeʼ
3. Tʼaanen yéetel respeto. Maʼ a tsʼáaik naʼatbil chéen teech a wojel tuláakal baʼal, pero u yuumil najeʼ mix baʼal u yojel.
4. Áant utiaʼal u naʼatikeʼ teʼ Biblia u taal le baʼax ka kaʼansikoʼ. U Tʼaan Dioseʼ yaan páajtalil tiʼ utiaʼal u kʼexik u tuukul yéetel u kuxtal máak. Wa ku meyajtoʼon le Biblia utiaʼal k-tsikbaloʼ yaan k-áantik le máakoʼob u tsʼáa u fejoʼob tiʼ le baʼax ku yaʼalikoʼ maʼ tiʼ baʼax k-aʼaliktoʼoniʼ.
5. Maʼ a tsʼíikil. Maʼ a pechkaba a weʼes jaaj le baʼax ka kaʼansikoʼ. Maʼ a discutir. Wa ka weʼesik kabal óolaleʼ yaan u yáantkech utiaʼal maʼ a tsʼíikil yéetel utiaʼal a naʼatik baʼax súutukil unaj a xotʼik le tsikbaloʼ (Pro. 17:14; Tito 3:2). Wa maʼ ta tsʼíikileʼ le máakoʼ maas jeʼel u yuʼubikech tuláakʼ kʼiineʼ.