¿Bix jeʼel u yantaltoʼon jeetsʼelileʼ?

TEʼ YÓOKʼOL KAAB chuup yéetel talamiloʼobaʼ, maʼ chéen chʼaʼabil u kuxtal máak ich jeetsʼeliliʼ. Tsʼoʼoleʼ kex yaantoʼon junpʼíit jeetsʼelileʼ, séeb jeʼel k-peʼertikeʼ. ¿Bix jeʼel u yáantkoʼon le Biblia utiaʼal ka yanaktoʼon jeetsʼelil mantatsʼoʼ? ¿Bix jeʼel k-áantik u maasil utiaʼal ka yanaktiʼobeʼ?

¿BAʼAX KʼAʼABÉET UTIAʼAL U YANTAL JEETSʼELIL TIʼ MÁAK?

Utiaʼal ka yanaktoʼon jeetsʼelileʼ unaj k-uʼuyik kanáantaʼanoʼon, maʼalob yaniloʼon yéetel u yantaltoʼon maʼalob amigoʼob. Baʼaleʼ u maas kʼaʼanaʼanileʼ unaj k-bisikba maʼalob yéetel Dios. Koʼox ilik bix jeʼel u yantaltoʼon jeetsʼelileʼ.

Wa k-beetik baʼax ku yaʼalik Jéeobaeʼ yaan k-eʼesik k-kʼubik óol tiʼ yéetel k-kʼáat ka yanaktoʼon jeetsʼelil tu yéetel (Jer. 17:7, 8; Sant. 2:22, 23). Kéen k-beet beyaʼ Dioseʼ ku natsʼkuba tiʼ toʼon yéetel ku beetik k-uʼuyik jeetsʼelil. Isaías 32:17, ku yaʼalik: «Tojileʼ bíin u beet u xuʼulul baʼateʼel, bíin yanak jeetsʼel óolal yéetel x-maʼ saajkil utiaʼal mantatsʼ». Jeʼex túun k-ilkoʼ wa k-beetik tu jaajil k-óol baʼax ku yaʼalik Jéeobaeʼ yaan u yantaltoʼon jeetsʼelil (Isa. 48:18, 19).

Utiaʼal ka yanaktoʼon jeetsʼelil mantatsʼeʼ, Jéeobaeʼ ku tsʼáaiktoʼon u kiliʼich muukʼ (Bax. 9:31).

U YÁANTAJ LE KILIʼICH MUUKʼOʼ

Ka tʼaanaj apóstol Pablo tiʼ «u yich le kiliʼich muukʼoʼ», le u yóoxpʼéel modos tu yaʼaloʼ letiʼe jeetsʼeliloʼ (Gal. 5:22, 23). Bey túunoʼ wa k-kʼáat ka yanaktoʼon le jaajil jeetsʼeliloʼ, unaj k-chaʼik u nuʼuktikoʼon le kiliʼich muukʼoʼ. Koʼox ilik kaʼapʼéel baʼax jeʼel u páajtal k-beetik utiaʼal ka u yáantoʼon u kiliʼich muukʼ Dioseʼ.

Yáax: Unaj u suuktal k-xokik u Tʼaan Dios (Sal. 1:2, 3). Kéen tuukulnakoʼon tiʼ le baʼax ku kaʼansik le Bibliaoʼ, k-áantaʼal tumen le kiliʼich muukʼ utiaʼal k-naʼatik bix u yilik Jéeoba junpʼéel baʼaloʼ. Junpʼéel baʼax k-naʼatikeʼ letiʼe baʼax ku beetik utiaʼal ka yanak jeetsʼeliloʼ yéetel baʼaxten jach kʼaʼanaʼan u yilik. Wa k-beetik le baʼaxoʼob k-kanikoʼ, maas yaan u yantaltoʼon jeetsʼelil (Pro. 3:1, 2).

Kaʼapʼéel: Unaj k-orar tiʼ Jéeoba yéetel k-kʼáatik ka u tsʼáatoʼon u kiliʼich muukʼ (Luc. 11:13). Jéeobaeʼ ku yaʼalik tiʼ le máaxoʼob kaxtik u yáantajoʼ: «U jeetsʼelil Dios ku táatsʼmáansik tuláakal tuukuloʼobeʼ, tu yoʼolal Cristo Jesuseʼ yaan u kanáantik a puksiʼikʼaleʼex yéetel a tuukuleʼex». (Fili. 4:6, 7). Wa mantatsʼ k-kʼáatik u kiliʼich muukʼeʼ, Jéeobaeʼ yaan u beetik u yantaltoʼon le jeetsʼelil ku tsʼáaik chéen tiʼ le máaxoʼob jach u amigoʼoboʼ (Rom. 15:13).

Le Bibliaoʼ tsʼoʼok u yáantik yaʼab máakoʼob u kʼex u kuxtaloʼob utiaʼal ka yanak jeetsʼelil tiʼob yéetel Jéeoba bey xan yéetel u maasil. Koʼox ilik bix u yáantik máak.

BIX ANCHAJIK JEETSʼELIL TIʼOB

Ichil u kaajal Jéeobaeʼ yaan sukuʼunoʼob yéetel kiikoʼob séeb u kʼuuxiloʼob kaʼachi, baʼaleʼ bejlaʼeʼ maʼ séeb u kʼuuxiloʼobiʼ, ku kaxtikoʼob jeetsʼelil yéetel maʼalob u biskubaʼob yéetel u maasila (Pro. 29:22). Koʼox ilik bix úuchik u kanik kaʼatúul sukuʼun u controlartubaʼob utiaʼal u biskubaʼob maʼalob yéetel u maasil.

Davideʼ séeb u pʼuʼujul kaʼachi, le oʼolal kʼaas u tʼaan. Táanil tiʼ u yokjaʼeʼ suuk u yaʼalik baʼal tiʼ u maasil, mix u láakʼtsiloʼob ku respertartik. Junpʼéel kʼiineʼ tu tsʼáaj cuentaeʼ unaj u kʼexik u modos. ¿Baʼax áant utiaʼal ka yanak jeetsʼelil tiʼ? Letiʼeʼ ku yaʼalik: «Káaj in tsʼáaik ichil in kuxtal le baʼaxoʼob ku kaʼansik le Bibliaoʼ. Leloʼ tu yáanten utiaʼal ka in bisinba maas maʼalob yéetel in láakʼtsiloʼob yéetel utiaʼal ka k-paklan respetarkba».

Yoʼolal le bix líiʼsaʼabik Racheloʼ talam u controlartik u modos. Letiʼeʼ ku yaʼalik: «Líikʼen ichil junpʼéel familia mantatsʼ táan u baʼateʼel, le oʼolal talam in wilik in controlartik maʼ in séeb pʼuʼujul». ¿Baʼax áantik utiaʼal maʼ u séeb pʼuʼujul? Letiʼeʼ ku yaʼalik: «Mantatsʼ kin kʼáatik u yáantaj Jéeoba».

Le bix úuchik u kʼexik u kuxtal David yéetel Racheloʼ, ku yeʼesik le utsil ku taasik u beetik máak le baʼax ku yaʼalik le Bibliaoʼ yéetel u kaxtik u yáantaj le kiliʼich muukʼoʼ. Kex tiʼ u maasil minaʼan jeetsʼelileʼ, toʼoneʼ yaantoʼon jeetsʼelil ichil k-familia bey xan teʼ múuchʼuliloʼ. Chéen baʼaleʼ Jéeobaeʼ ku yaʼaliktoʼon: «Yanakteʼex jeetsʼelil yéetel tuláakal máak» (Rom. 12:18). ¿Bix jeʼel u páajtal k-beetkeʼ? ¿Baʼax utsiloʼob jeʼel k-kʼamik wa k-ilik u yantaltoʼon jeetsʼelileʼ?

MAʼ U XUʼULUL K-KAXTIK JEETSʼELIL

Kéen kʼaʼaytajnakoʼoneʼ k-tsikbaltik u maʼalob péektsilil le Reino tiʼ le máakoʼoboʼ (Isa. 9:6, 7; Mat. 24:14). Ku kiʼimaktal k-óol k-ilik yaʼab máakeʼ ku kʼamkoʼob u maʼalob péektsilil le jeetsʼeliloʼ. Bejlaʼeʼ maʼ séeb u kʼuuxiloʼob yoʼolal le baʼaxoʼob ku sen úuchloʼoboʼ. Letiʼobeʼ ku creertikoʼob le jatsʼuts baʼaloʼob ku taal u kʼiinoʼ yéetel ku beetkoʼob le baʼax ku yaʼalik le Bibliaaʼ: «Kanáant le jeetsʼeloʼ[,] xeen xan tu paach». (Sal. 34:14).

U jaajileʼ maʼ tuláakal máak kʼamik le maʼalob péektsiloʼ (Juan 3:19). Kex beyoʼ u kiliʼich muukʼ Jéeobaeʼ ku yáantkoʼon utiaʼal ka tʼaanakoʼon tu yéeteloʼob yéetel jeetsʼelil bey xan yéetel tsiikil. Beyoʼ k-beetik le baʼax tu yaʼalaj Jesusaʼ: «Ken ookkeʼex teʼ najoʼ, saludarteʼex le máaxoʼob yanoʼoboʼ táan a tsʼíiboltkeʼex ka yanak jeetsʼelil tiʼob. Wa ku náajmatkoʼobeʼ yanaktiʼob le jeetsʼelil ka tsʼíiboltkeʼexoʼ; baʼaleʼ wa maʼ tu náajmatkoʼobeʼ pʼáatak tiʼ teʼex le jeetsʼeliloʼ» (Mat. 10:11-13). K-beetik le baʼax tu yaʼalaj Jesusoʼ ku yáantkoʼon utiaʼal maʼ k-kʼuuxil kéen lukʼkoʼon tu yiknaloʼob, beyoʼ maʼ xaaneʼ kéen máanak kʼiineʼ jeʼel u kʼamkoʼob le maʼalob péektsiloʼ.

Kéen k-respetart le máaxoʼob yaan autoridad tiʼob, tak le u pʼeekoʼob u kʼaʼaytaʼal le maʼalob péektsiloʼ, k-áantaj utiaʼal ka yanak jeetsʼelil. Koʼox ilik junpʼéel baʼax úuch África. U gobiernoil junpʼéel luʼumil yaan teʼeloʼ u pʼekmaj le sukuʼunoʼoboʼ yéetel maʼatech u tsʼáaik permiso tiʼob utiaʼal u beetkoʼob U Najiloʼob Reino. Utiaʼal u yutskíintaʼal le talamiloʼ, túuxtaʼab juntúul sukuʼun u beetmaj u misioneroil teʼ luʼumiloʼ. Letiʼeʼ tu tsolaj tiʼ u nojchil le gobierno yaan Londres, Inglaterraoʼ, le meyaj k-beetkoʼ maʼatech u tsʼáaik tuʼux u kaxtik máak baʼateʼel. ¿Baʼax túun úuchiʼ?

Le sukuʼunoʼ ku yaʼalik: «Ka kʼucheneʼ tin wilaj bix u nookʼ le koʼolel kʼamik le uʼulaboʼoboʼ, ka tin tsʼáaj cuentaeʼ in wojel in tʼaan le idioma ku tʼankoʼ. Le oʼolal tin tsikaj ichil u idioma. Letiʼeʼ jaʼakʼ u yóol ka tu yuʼubaj, ka tu kʼáatajten baʼax oʼolal bineniʼ. Tin waʼalajtiʼeʼ taak in tʼaan yéetel le embajadoro. Letiʼeʼ tu tʼanaj tiʼ telefonoeʼ ka jóokʼi, ka tu tʼanen tu idioma. Letiʼeʼ tu chʼenxikintaj le baʼaxoʼob tin tsolajtiʼ yoʼolal le meyaj ku beetik le j-Jaajkunajoʼoboʼ».

Le bix úuchik u tsolik le sukuʼun tiʼ le embajador le meyaj k-beetkoʼ áantajnaj utiaʼal ka u kʼex baʼax ku tuklik yoʼolal le sukuʼunoʼoboʼ. Ka máan kʼiineʼ le gobiernooʼ káaj u tsʼáaik u permisoil u beetaʼal u Najiloʼob Reino. ¡Lelaʼ tu beetaj u jach kiʼimaktal u yóol le sukuʼunoʼoboʼ! Jeʼex túun k-ilkoʼ u yeʼesaʼal tsiikil tiʼ u maasileʼ ku taasik utsiloʼob yéetel ku beetik u yantal jeetsʼelil.

YANAKTOʼON JEETSʼELIL MANTATSʼ

Bejlaʼeʼ kuxaʼanoʼon tiʼ junpʼéel paraíso espiritual tuʼux yaan jeetsʼelil. Wa k-ilik u yantaltoʼon mantatsʼ u yich le kiliʼich muukʼoʼ yaan k-áantaj utiaʼal maʼ u xuʼulul u yantal jeetsʼelil. Baʼaleʼ u maas kʼaʼanaʼanileʼ, yaan k-bendecirtaʼal tumen Jéeoba yéetel yaan u yantaltoʼon jeetsʼelil teʼ túumben luʼum utiaʼal mantatsʼoʼ (2 Ped. 3:13, 14).