马太福音

19 耶稣讲完呢啲说话，就离开加利利，去到约旦河对岸，犹地亚嘅边界附近。 2 有一大班人跟随佢，佢就喺嗰度医好佢哋。

3 法利赛派嘅人想试探耶稣，就去问佢：“一个男人系咪用咩理由同佢嘅老婆离婚，都合法㗎？” 4 耶稣回答：“最初上帝创造男人同女人嘅记载，你哋冇读过咩？ 5 上帝话：‘所以人*要离开父母，同佢太太长相厮守，二人合为一体。’ 6 即系话夫妻唔再系两个人，而系一体。上帝结合嘅*，人就唔可以分开。” 7 佢哋同耶稣讲：“噉点解摩西规定，俾份离婚文书老婆，就可以同佢离婚呀？” 8 耶稣同佢哋讲：“系因为你哋硬颈，摩西先至容许你哋同太太离婚，但系最初唔系噉㗎。 9 我同你哋讲，如果唔系因为太太淫乱*，佢丈夫离婚再娶，就系通奸。”

10 门徒同耶稣讲：“如果结婚之后系噉，唔结婚好过喇。” 11 耶稣同佢哋讲：“啱啱讲嘅唔系个个都做到*㗎，净系有呢种恩赐嘅人先至做到。 12 有啲人因为天生身体有残缺*而唔结婚，而有啲人系因为人哋令佢哋身体有残缺而唔结婚，不过有啲人系为咗天上嘅王国而自愿唔结婚。可以做到嘅就做啦*。”

13 嗰个时候有啲人带小朋友去到耶稣嗰度，请佢将手放喺小朋友身上*，为小朋友祷告，不过门徒就责备嗰啲人。 14 但系耶稣话：“俾啲小朋友嚟我呢度啦，唔好阻止佢哋，因为天上嘅王国系属于好似佢哋噉样嘅人。” 15 耶稣就将手放喺佢哋身上。之后，就离开咗嗰度嘞。

16 有个人嚟见耶稣，问佢：“老师，我要点样表现良善*先能够得到永远嘅生命呢？” 17 耶稣同佢讲：“你点解问我点样表现良善呢？只有上帝称得上系良善。不过，如果你想得到生命，就要继续遵守上帝嘅诫命。” 18 佢问：“边啲诫命呢？”耶稣话：“就系唔可以杀人，唔可以通奸，唔可以偷嘢，唔可以作假见证， 19 要孝敬*父母，要爱人如己。” 20 呢个年轻人同佢讲：“呢啲我一直都有遵守吖，噉我仲争咗啲乜嘢呢？*” 21 耶稣同佢讲：“如果你想做到完美嘅地步*，就要卖咗啲财物，分俾穷人，噉你就有财宝喺天上嘞。然后你仲要嚟跟随我。” 22 佢听到耶稣噉讲，就好唔开心噉走咗，因为佢有好多财产。 23 耶稣同门徒讲：“我可以好肯定噉话俾你哋知，有钱人要进入天上嘅王国系唔容易㗎。 24 我再话俾你哋知，骆驼穿过针眼，仲容易过有钱嘅人进入上帝嘅王国呀！”

25 门徒听到，就好惊讶，话：“如果系噉，仲有人可以得救咩？” 26 耶稣就望住佢哋，话：“对人嚟讲，呢个系唔可能嘅；但系对上帝嚟讲，乜嘢都可能。”

27 于是彼得话：“你睇，我哋已经揼低晒所有嘢跟随你喇。我哋会得到啲乜嘢呢？” 28 耶稣同佢哋讲：“我可以好肯定噉话俾你哋知，当人子坐喺佢荣耀嘅宝座，上帝会更新一切，到时你哋都会坐喺12个宝座，审判以色列12个部族，因为你哋一直跟随我。 29 任何人为咗做我嘅门徒而揼低房屋、兄弟、姊妹、爸爸、妈妈、仔女或者土地，都会得到一百倍，亦都会得到永远嘅生命。

30 “不过有好多人，而家系最先嘅，将来系最后嘅；而家系最后嘅，将来系最先嘅。”