马太福音

4 之后，神圣力量将耶稣带到去旷野。喺嗰度，耶稣受到魔鬼引诱。 2 佢禁食咗40日40夜，就觉得肚饿嘞。 3 魔鬼嚟引诱佢，同佢讲：“如果你系上帝嘅仔，就令呢啲石头变成食物啦。” 4 耶稣话：“圣经噉样讲：‘人生存唔可以净系靠食物，仲必须靠耶和华*所讲嘅每一句说话。’”

5 之后，魔鬼带佢入咗圣城，令佢企喺圣殿嘅外墙上面*， 6 魔鬼同佢讲：“如果你系上帝嘅仔，就跳落去啦，因为圣经话：‘佢会命令啲天使帮你’，仲话‘佢哋会用手托住你，等你嘅脚唔会撞落石头度。’” 7 耶稣答佢：“圣经亦都话：‘唔可以试探*耶和华*你嘅上帝。’”

8 魔鬼又将耶稣带到一座非常之高嘅山，将世上所有国家同埋佢哋强大嘅国力展示俾佢睇， 9 之后，魔鬼同耶稣讲：“只要你跪低拜一拜我，我就会将呢啲嘢俾晒你。” 10 耶稣同佢讲：“撒但，走开！因为圣经话：‘要崇拜耶和华*你嘅上帝，净系可以敬奉佢。’” 11 跟住，魔鬼就走咗，有啲天使嚟服侍耶稣。

12 耶稣听到约翰俾人拉咗，就返番去加利利。 13 后嚟，佢离开咗拿撒勒，去咗迦百农，住喺嗰度。迦百农系喺西布伦同埋拿弗他利地区入面，近住海边嘅。 14 呢个应验咗先知以赛亚所讲嘅说话，佢话： 15 “喺西布伦同拿弗他利地区，外族人嘅加利利啊！你喺约旦河嘅对岸*，通往海边嘅路上面。 16 身处黑暗嘅人，见到明亮嘅光；身处死亡阴影之下嘅人，有光照耀佢哋。” 17 由嗰阵时开始，耶稣就传道同人讲：“你哋要悔改，因为天上嘅王国就快到嘞。”

18 耶稣沿住加利利嘅海边一路行嘅时候，见到两兄弟，就系西门同埋安得烈。西门又叫做彼得。佢哋系渔夫，当时喺海度撒网。 19 耶稣同佢哋讲：“嚟跟从我啦，我会令你哋成为另一种渔夫。不过，你哋嘅收获唔系鱼，而系人**。” 20 佢哋就即刻揼低渔网，跟从耶稣。 21 耶稣继续向前行，又见到两兄弟，就系雅各同埋约翰。佢哋系西庇太嘅仔。嗰时，佢哋同爸爸西庇太一齐喺船上面补紧渔网。耶稣就邀请佢哋跟随佢。 22 呢两兄弟就即刻离开渔船同埋爸爸，跟从耶稣嘞。

23 之后，耶稣去匀全个加利利，喺啲会堂入面教导人，传讲王国嘅好消息，帮人医好各种各样嘅病。 24 关于佢嘅事传遍咗成个叙利亚。嗰度嘅人将受到各种疾病同埋痛症折磨嘅人，仲有俾邪灵操纵嘅、患咗癫痫嘅、瘫痪嘅，全部带去佢嗰度，耶稣就医好佢哋。 25 于是有一大班人由加利利、德卡波利斯*、耶路撒冷、犹地亚仲有约旦河嘅对岸*嚟跟随佢。