马太福音

14 喺嗰个时候，分封侯希律听到关于耶稣嘅事。 2 佢同仆人讲：“佢肯定系施浸者约翰。佢返生嘞，所以先施行到呢啲奇迹。” 3 原来之前希律*为咗令佢哥哥腓力嘅太太希罗底开心，就逮捕约翰，绑起佢，韫佢入监， 4 原因系约翰好多次同希律讲：“你娶呢个女人系唔合法㗎。” 5 佢好想杀咗约翰，但系又好怕啲民众，因为大家都相信约翰系先知。 6 到咗庆祝希律生日嘅时候，希罗底嘅女出嚟跳舞助兴，氹到希律好开心， 7 于是希律发誓话，无论希罗底个女想要啲乜嘢，都会俾佢。 8 佢受到妈妈教唆，就话：“将施浸者约翰个头放落个盘度，送嚟俾我吖。” 9 王好忧愁，无奈自己发咗誓，而宴席嘅宾客又听到，就唯有叫人噉样做。 10 佢派人去监狱斩约翰嘅头落嚟， 11 放喺个盘度，交俾嗰个女仔，个女仔就拎去俾佢妈妈。 12 后嚟约翰嘅门徒嚟到，拎佢嘅尸体去埋葬，之后佢哋去话俾耶稣知呢件事。 13 耶稣听到呢个消息，就坐船离开嗰度，去咗一个偏僻嘅地方，唔想俾人打扰。一大班嚟自唔同城镇嘅人，知道耶稣上咗船，就徒步跟住佢。

14 佢上岸之后见到一大班人，就怜悯佢哋，医好佢哋当中嘅病人。 15 就快天黑嘅时候，门徒嚟同佢讲：“时候都唔早嘞，呢个地方又咁偏僻。不如叫啲民众走，等佢哋入村自己买嘢食啦。” 16 但系耶稣同佢哋讲：“唔好叫佢哋走，你哋攞啲嘢俾佢哋食啦。” 17 门徒就话：“我哋呢度乜都冇，得五个饼、两条鱼咋㖞。” 18 耶稣话：“你哋拎嚟俾我吖。” 19 跟住佢叫民众坐喺草地，然后拎起五个饼、两条鱼，望向天，祷完告，就搣开啲饼，交俾门徒，门徒再俾民众。 20 每个人都食，而且食到饱。佢哋将净低嘅饼收拾好，装满咗12个篮。 21 食嘢嘅人，男人大约有5000人，另外仲有女人同埋小朋友。 22 之后耶稣即刻叫门徒上船，过去对面岸先，而自己就留低送民众离开。

23 民众走晒之后，耶稣就自己一个人上山祷告。入夜之后，佢仍然一个人喺嗰度。 24 当时门徒坐嘅船已经离岸好远*嘞，由于逆风航行，海浪又好大，佢哋好难控制只船。 25 就快天光*嗰阵，耶稣喺海上面行，行去门徒嗰度。 26 门徒一见到佢喺海上面行，就好惊，佢哋话：“系幻觉呀！”佢哋惊到嗌咗出嚟。 27 耶稣就即刻同佢哋讲：“放心！*系我呀，唔使惊。” 28 彼得就话：“主啊，如果真系你，俾我可以喺海上面行去你度吖。” 29 耶稣话：“过嚟吖！”彼得就落船，喺水上面行，行去耶稣嗰度。 30 但系，彼得见到风暴，就好惊，开始向下沉，佢大嗌：“主啊，救我呀！” 31 耶稣即刻伸只手出嚟捉住佢，同佢讲：“你信心唔够呀，点解要怀疑呢？” 32 佢哋上咗船之后，风暴就停咗嘞。 33 船上嘅人就向耶稣下拜，话：“你真系上帝嘅仔呀！” 34 佢哋过咗对面岸，喺革尼撒勒落船。

35 嗰度嘅人一认出系耶稣，就通知嗰一带嘅人，于是大家都带啲病人去见耶稣。 36 佢哋恳求耶稣，话只系想掂一掂佢外衣嘅穗边。所有掂到嘅人都好返晒。