马可福音

8 喺嗰段日子，又有一大班人聚集去耶稣嗰度，由于佢哋冇晒嘢食，耶稣就叫门徒嚟，同佢哋讲： 2 “佢哋同我一齐已经三日嘞，而家冇晒嘢食，我觉得佢哋好可怜呀。 3 如果我由得佢哋饿住个肚返屋企，佢哋会喺半路晕低，而且有啲人系喺好远嘅地方嚟㗎。” 4 门徒同耶稣讲：“呢度咁偏僻，去边度揾咁多饼喂饱佢哋呀？” 5 耶稣问佢哋：“你哋有几多个饼？”佢哋话：“七个。” 6 于是耶稣叫大家坐喺地下。佢拎起七个饼，感谢完上帝就搣开啲饼，交俾门徒去分俾民众。 7 佢哋仲有几条细嘅鱼，耶稣祷完告之后，就叫门徒分埋俾大家。 8 大家都有食，而且食到饱。佢哋收拾好净低嘅饼，装满咗七个箩。 9 当时大约有4000个男人在场。之后，耶稣就叫民众离开。

10 耶稣即刻同门徒一齐上船，去咗达玛努他地区。 11 法利赛派嘅人去到耶稣嗰度挑起争论，佢哋想试探耶稣，就要求佢奉上帝嘅名施行一个神迹*。 12 耶稣深深悲叹，话：“你哋呢一代人点解成日想睇神迹*呢？我好肯定噉同你哋讲，唔会有神迹俾你哋呢一代人睇。” 13 耶稣就离开佢哋，又上船去到对面岸。

14 船上面除咗一个饼之外，就冇其他嘢食嘞，因为门徒唔记得咗带饼。 15 耶稣明确噉警告佢哋，话：“你哋要小心*，要提防法利赛派嘅酵同埋希律嘅酵。” 16 佢哋就因为冇人带饼而嘈起上嚟。 17 耶稣留意到，就同门徒讲：“点解要因为冇带饼而争论呢？你哋仲未理解，仲唔明？你哋嘅心思仲系咁迟钝？ 18 你哋‘有眼但系睇唔到，有耳但系听唔到’咩？你哋记唔记得， 19 我用5个饼喂饱5000人嗰次，你哋将净低嘅饼装满咗几多个篮呀？”佢哋答：“12个。” 20 “噉我用7个饼喂饱4000人嗰次，你哋将净低嘅饼装满咗几多个箩呢？”佢哋答：“7个。” 21 耶稣同佢哋讲：“噉你哋仲未明？”

22 佢哋去到伯赛大。有人带咗个盲人去见耶稣，恳求耶稣摸一摸佢，医好佢。 23 耶稣捉住盲人嘅手，带佢去村外面，然后吐口水喺佢对眼度，又将手放喺个盲人身上，问佢：“你睇到啲乜嘢呀？” 24 佢岳高头望吓，然后话：“我谂我见到啲人呀，不过睇落好似啲树喺度行嚟行去噉。” 25 耶稣又将手放喺佢对眼，佢就好返嘞。佢恢复咗视力，所有嘢都睇得好清晰。 26 耶稣叫嗰个人返屋企，不过同佢讲：“唔好入返呢条村。”

27 耶稣同门徒离开嗰度，去凯撒里亚腓立比嘅村庄。喺路上，佢问门徒：“你哋听到其他人话我系边个？” 28 门徒就答：“有啲话你系施浸者约翰，有啲话系以利亚，仲有啲话你系其中一位先知。” 29 耶稣问佢哋：“噉你哋呢？你哋话我系边个呀？”彼得话：“你系基督。” 30 耶稣郑重噉吩咐佢哋，唔好话俾人听佢系边个。 31 另外，耶稣开始话俾门徒知，人子一定会受好多苦，而且俾长老、祭司长、抄经士鄙视，仲会俾人杀死，三日之后复活。 32 耶稣好坦白噉同佢哋讲呢番说话，彼得就将佢拉埋一边，开口劝阻耶稣。 33 耶稣拧转身，望住啲门徒，斥责彼得话：“撒但，够嘞，唔好再讲嘞！因为你谂嘅，系人嘅谂法，唔系上帝嘅谂法。”

34 耶稣叫民众同门徒一齐嚟，同佢哋讲：“边个想嚟跟从我，就唔好再为自己而活，要孭起自己嘅苦刑柱*，一直跟随我。 35 边个想救自己嘅生命，就会失去生命；边个为咗我同埋好消息失去生命，就会得到生命。 36 老实讲，一个人就算赚到呢个世界嘅所有嘢，但系因为噉而失去生命，又有乜嘢益处呢？ 37 人仲可以攞啲乜嘢嚟换取自己嘅生命呢？ 38 喺呢代又不忠*又有罪嘅人当中，边个因为我同埋我嘅说话而觉得羞耻，噉人子带住佢爸爸嘅荣耀，同埋圣天使嚟到嘅时候，都会以呢个人为耻。”