马可福音

14 过两日就系逾越节同埋无酵节。嗰啲祭司长同抄经士谂方法用诡计拘捕耶稣，想杀死佢。 2 不过佢哋话：“唔好喺节期落手，费事引起民众骚乱。”

3 耶稣喺伯大尼，去咗麻风病人西门屋企食饭*，当时有一个女人嚟咗。佢带住一樽馨香油，系用雪花石樽装住嘅纯正甘松油，非常贵重。佢打烂雪花石樽嘅樽口，将油倒喺耶稣嘅头上面。 4 有几个人就好唔高兴，佢哋议论话：“点解咁嘥啲馨香油呀？ 5 原本呢樽馨香油可以卖成300几银元*，啲钱可以分俾穷人㗎嘛！”佢哋都因为嗰个女人而觉得好激气*。 6 不过，耶稣话：“唔好阻止佢。何必难为佢呢？佢向我做嘅系美好嘅事呀。 7 你哋身边几时都有穷人，想嘅话，随时都可以向佢哋行善，但系我就唔会一直喺你哋身边。 8 其实佢系尽力而为，预先将馨香油倒喺我身上，为安葬我做准备。 9 我好肯定噉话俾你知，无论好消息传到世界边一个地方，都会有人提到呢个女人做嘅事嚟纪念佢。”

10 十二使徒当中嘅加略人犹大去见嗰啲祭司长，想出卖耶稣，交耶稣俾佢哋。 11 佢哋听到就好开心，应承会俾钱佢。犹大就开始揾机会出卖耶稣。

12 无酵节嘅第一日，亦即系啲人按照惯例宰杀逾越节祭牲嘅嗰日，门徒问耶稣：“你想我哋去边度为你准备逾越节嘅晚餐呀？” 13 于是耶稣派咗两个门徒，同佢哋讲：“你哋入咗城，会遇到一个人，拎住一个水瓶，你哋要跟住佢。 14 佢入咗边间屋，你哋就同嗰间屋嘅主人讲：‘老师问：“我同门徒一齐食逾越节晚餐嘅客房喺边度呢？”’ 15 佢就会带你哋去睇楼上一个阔落嘅房间，入面家具齐全，布置整齐。你哋就喺嗰度为我哋准备啦。” 16 门徒就出去，入咗城，发现所有嘢真系同耶稣讲嘅一模一样。佢哋就准备好逾越节嘅晚餐。

17 傍晚时分，耶稣同十二使徒一齐嚟到。 18 佢哋坐低*食饭嘅时候，耶稣话：“我好肯定噉话俾你哋知，你哋当中，同我一齐食饭嘅，有一个会出卖我。” 19 佢哋就忧愁起嚟，个个都同耶稣讲：“唔系我啩？” 20 耶稣同佢哋讲：“系你哋十二使徒之一，呢个人同紧我一齐将手伸入同一个碗入面。 21 正如圣经所讲，人子系会离开你哋㗎，但系出卖人子嘅有祸嘞！嗰个人从来冇出世仲好。”

22 佢哋仲食紧嘢嘅时候，耶稣拎起一块饼，祷告之后搣开，递俾佢哋，话：“你哋拎去食啦。呢个指嘅系我嘅身体。” 23 佢拎起个杯，祷告感谢上帝之后递俾佢哋，佢哋所有人都饮咗。 24 耶稣话：“呢个指嘅系我嘅‘立约之血’，系为好多人流出嚟㗎。 25 我好肯定噉话俾你哋听，我绝对唔会再饮葡萄酒，直到我喺上帝嘅王国入面饮新酒嘅嗰一日。” 26 最后，佢哋唱歌*赞美上帝，然后离开嗰度，去橄榄山。

27 耶稣同佢哋讲：“你哋所有人都会离弃我*，因为圣经话：‘我会打击牧人，绵羊就会四散。’ 28 但系我复活之后，会早过你哋去到加利利，喺嗰度等你哋。” 29 不过彼得同佢讲：“就算其他人个个都离弃你*，我都唔会离弃你呀。” 30 耶稣同彼得讲：“我好肯定噉话俾你知，就喺今日，呢一晚，鸡叫两次之前，你会三次唔认我。” 31 彼得好坚决噉话：“就算我一定要同你一齐死，都绝对唔会唔认你。”其他门徒全部都噉样讲。

32 佢哋嚟到一个叫客西马尼嘅地方。耶稣同门徒讲：“你哋坐喺呢度，我去祷告。” 33 佢带埋彼得、雅各、约翰一齐去。佢非常苦恼，亦都非常难过， 34 就同佢哋讲：“我嘅心非常忧愁，几乎要死。你哋要留喺呢度，不断守望。” 35 佢行前少少，跪喺度祷告，祈求上帝如果可以嘅话，就令佢唔使经历嗰个艰难嘅时刻。 36 佢话：“阿爸，父亲啊，对你嚟讲乜嘢都可能，求你为我拎走呢个杯*。不过唔好照我嘅意思去做，照你嘅意思就得嘞。” 37 佢返到嚟，见到门徒瞓着咗，就同彼得讲：“西门，你点解瞓觉呢？你连守望一个钟都做唔到？ 38 你哋要不断守望，不断祷告，噉先可以避免喺引诱下屈服。人嘅心好愿意做啱嘅事*，不过肉体就软弱嘞。” 39 耶稣再一次去祷告，讲咗同样嘅说话。 40 佢第二次返嚟，见到门徒又瞓着咗，门徒攰到眼都掰唔大。佢哋都唔知道点样回答耶稣先至好。 41 佢第三次返嚟，同佢哋讲：“你哋喺呢个时候，仲喺度瞓觉，仲喺度休息！够嘞！时候到嘞！人子会俾人出卖，落喺罪人手上。 42 起身，我哋走啦。睇吓！出卖我嘅人就快到嘞。”

43 耶稣都仲未讲完，突然之间十二使徒之一嘅犹大嚟到。有班人带住剑同埋棍跟住佢嚟，佢哋系祭司长、抄经士同埋长老派嚟㗎。 44 出卖耶稣嘅嗰个人事先同佢哋讲好咗一个暗号，话：“我锡吓边个，边个就系你哋想捉嘅人嘞。你哋拘捕佢，押佢走啦。” 45 犹大直接行到耶稣面前，叫佢一声“老师*”，然后温柔噉亲吻佢。 46 佢哋就捉住耶稣，拘捕咗佢。 47 有个企喺旁边嘅人掹把剑出嚟，斩向大祭司嘅奴隶，削咗佢一只耳仔落嚟。 48 耶稣同佢哋讲：“唔通我系贼，需要你哋带埋剑同埋棍嚟捉我咩？ 49 我日日喺圣殿入面教导人，同你哋一齐，又唔见你哋嚟拘捕我。不过，呢个系要应验圣经嘅话。”

50 门徒全部都揼低佢逃走。 51 有个后生仔，跟喺耶稣后面，当时佢身上只系着住一件上等细麻衣。嗰啲人想捉住佢， 52 佢就揼低细麻衣，冇着衫*走咗。

53 佢哋押咗耶稣去大祭司嗰度，祭司长、长老、抄经士全部都聚集埋一齐。 54 彼得离远跟住耶稣，一路去到大祭司嘅庭院，佢同啲仆人一齐坐喺火边取暖。 55 呢个时候，嗰啲祭司长同埋成个公议会，都喺度揾人俾假证供嚟指控耶稣，想处死佢，但系就揾唔到。 56 其实有好多人作伪证诬告佢，不过佢哋嘅证供就各有出入。 57 另外有几个人企出嚟，作伪证指控佢话： 58 “我哋听佢讲过：‘我会拆咗呢座人手所造嘅圣殿，三日之内起过一座唔系人手造嘅殿。’” 59 不过关于呢一点，佢哋嘅证供都系有出入㗎。

60 大祭司喺大家面前企起身，问耶稣：“你冇嘢要回应咩？佢哋作证指控你嘅事，你听唔到呀？” 61 不过耶稣都系冇出声，一句都冇回应。大祭司又问佢：“你系咪配受称颂嗰位嘅仔基督呀？” 62 耶稣话：“我系。你哋会见到人子坐喺大能者嘅右边，带住天云嚟到。” 63 大祭司就撕裂身上嘅衫，话：“我哋仲需要证人咩？ 64 你哋都听到佢亵渎上帝啦。大家认为应该点呢？”佢哋全部都认为佢有罪，应该将佢处死。 65 有啲人向佢吐口水，蒙住佢块面，用拳头打佢，同佢讲：“如果你系先知，话俾我哋知边个打你吖！”差役带佢走嗰阵仲掴佢块面。

66 彼得喺下面嘅庭院嗰度，大祭司嘅一个女仆嚟到， 67 见到彼得喺度取暖，佢望实彼得，话：“你都系同嗰个拿撒勒人耶稣一齐㗎噃。” 68 但系彼得否认话：“我唔识佢㗎，都唔知道你讲紧乜。”佢就行咗出外面嘅门厅*。 69 喺嗰度，个女仆见到佢，又同企喺旁边嘅人讲：“呢个人系同佢哋一齐㗎。” 70 彼得再一次否认。过咗一阵，企喺旁边嘅人又同彼得讲：“你肯定系同佢哋一齐嘅，因为你系个加利利人。” 71 彼得就开始发毒誓话：“我唔识你哋讲嘅嗰个人哩。” 72 就喺嗰一刻，鸡就叫第二次。彼得谂起耶稣同佢讲过嘅说话：“鸡叫两次之前，你会三次唔认我。”佢就忍唔住痛哭起嚟。