马太福音

28 安息日过咗嘞，到咗之后嗰个星期嘅第一日清晨，末大拉人马利亚同另一个马利亚去坟墓睇吓。

2 突然间发生咗场大地震，耶和华*嘅天使从天而降，推开坟墓嘅石头，坐喺上面。 3 天使好似闪电咁光，件衫好似雪咁白。 4 看守嘅人见到就好惊，成身震晒，变到好似死人噉郁唔到。

5 天使同啲妇女讲：“唔使惊呀，我知道你哋揾紧喺木柱度被处死嘅耶稣。 6 佢唔喺呢度嘞，佢已经复活咗，就好似佢之前讲过嘅噉。你哋嚟吖，睇下之前安放佢尸体嘅地方， 7 然后快啲去话俾佢嘅门徒知，耶稣已经死而复生嘞。佢已经去紧加利利，你哋会喺嗰度见到佢。我嚟就系要话俾你哋知呢件事。”

8 佢哋虽然好惊，但系亦都好开心，就急急脚离开坟墓，跑去将呢个消息话俾耶稣嘅门徒知。 9 突然间，耶稣去到佢哋面前，话：“你哋好呀！”佢哋上前捉住耶稣对脚，向佢下拜。 10 耶稣同佢哋讲：“唔使惊！你哋去话俾我啲弟兄知吖，叫佢哋去加利利。佢哋会喺嗰度见到我。”

11 啲妇女仲赶紧路嘅时候，有啲守卫入城，将发生咗嘅事全部报告俾嗰啲祭司长知。 12 祭司长同长老聚埋一齐商量过之后，俾咗好多银币啲士兵， 13 仲话：“你哋要同人讲：‘佢啲门徒漏夜嚟到，趁我哋瞓着咗嗰阵，偷走咗佢条尸。’ 14 如果呢件事传到去总督嗰度，我哋会同佢解释*㗎喇，你哋唔使担心。” 15 士兵就攞咗啲钱，按照吩咐去做。就系噉，呢个讲法喺犹太人当中广泛流传，直到今日。

16 嗰11个门徒去咗加利利一座山，即系耶稣约好同佢哋见面嘅地方。 17 佢哋见到耶稣就下拜，不过有啲人*仍然怀疑佢系咪真系耶稣。 18 耶稣行近门徒同佢哋讲：“上帝已经将天上地上嘅权力全部赐俾我嘞。 19 所以你哋要去，教导所有国族嘅人，令佢哋成为我嘅门徒，奉天父、佢嘅仔，同埋神圣力量嘅名为佢哋施浸*， 20 亦都要教导佢哋遵守我吩咐你哋嘅一切。可以放心，直到呢个制度*嘅末期，我都会一直同你哋同在。”