马可福音

3 耶稣再一次去到会堂。喺嗰度有一个人，只手系萎缩*咗嘅。 2 法利赛派嘅人想揾耶稣嘅把柄，就一路留意住耶稣会唔会喺安息日医好嗰个人。 3 耶稣同嗰个只手萎缩*咗嘅人讲：“起身，企喺中间。” 4 然后佢同法利赛派嘅人讲：“喺安息日做啲咩事系合法㗎呢？系做好事吖，定系做坏事？系拯救生命吖？定系杀人呢？”不过佢哋冇出声。 5 耶稣愤慨噉望住周围嘅人，见佢哋内心麻木，就好悲伤。耶稣同嗰个人讲：“伸只手出嚟吖。”佢一伸只手出嚟，只手就好返嘞。 6 法利赛派嘅人离开嗰度，就即刻同希律党徒商量点样对付耶稣，杀死佢。

7 耶稣同门徒离开嗰度，去咗海边。有一大班人由加利利同埋犹地亚嚟到，跟住佢。 8 仲有一大班人甚至由耶路撒冷、以土迈、约旦河对岸、泰尔同埋西顿一带，嚟到佢嗰度，因为佢哋听闻佢做咗好多奇妙嘅事。 9 耶稣叫门徒帮佢准备一只细嘅船，如果啲人拥埋嚟嘅话，佢就可以上船嘞。 10 所有患咗重病嘅人都围住佢，想摸吓佢，因为佢医好咗好多人。 11 邪灵*每次见到佢，都喺佢面前下拜，大嗌话：“你系上帝嘅仔。” 12 不过耶稣好严肃噉吩咐佢哋，唔可以透露佢嘅身份。

13 耶稣上咗山，叫咗一啲门徒嚟到佢身边。 14 佢喺当中拣*咗12个人，称为“使徒*”，佢哋经常同耶稣一齐，耶稣会派佢哋出去传道， 15 亦都俾力量佢哋驱逐邪灵。

16 耶稣拣选*嘅12个人有西门（耶稣俾咗另一个名佢，叫做彼得）， 17 有西庇太嘅仔雅各同埋雅各嘅兄弟约翰（耶稣俾咗另一个名佢哋，叫做博尼格，意思系“雷霆之子”）， 18 仲有安得烈、腓力、巴多罗买、马太、多马、亚勒腓嘅仔雅各、达太、热心人西门， 19 同埋后嚟出卖耶稣嘅加略人犹大。

之后，耶稣入咗一间屋， 20 又有一班人聚集喺嗰度，佢同门徒就连饭都食唔到。 21 佢嘅亲人听到发生嘅事，就出嚟想捉住佢，佢哋话：“佢癫咗呀。” 22 由耶路撒冷落嚟嘅抄经士亦都话：“佢俾魔鬼*附身喇。佢系靠住邪灵嘅首领去驱逐邪灵嘅。” 23 耶稣叫啲抄经士过嚟，用比喻回应佢哋：“撒但点可能驱逐撒但呢？ 24 如果一个国家分裂内讧，就冇办法存留； 25 如果一个家庭分裂内讧，亦都冇办法存留。 26 如果撒但同自己对抗，分裂内讧，都一样冇办法存留，好快会灭亡嘞。 27 一个人想打劫一个强壮嘅人，如果唔绑起佢先，就入唔到佢屋企抢走佢啲财物嘞。 28 我好肯定噉话俾你哋知，无论人犯咗乜嘢罪，讲咗乜嘢亵渎嘅话，都可以得到宽恕； 29 不过，亵渎神圣力量嘅，就永远唔会得到宽恕，反而要承担永远嘅罪。” 30 耶稣之所以噉讲，系因为佢哋话：“佢俾邪灵*附身。”

31 耶稣嘅妈妈同啲细佬嚟到，企喺出面。佢哋请人入去叫佢。 32 当时有一班人围住耶稣坐，佢哋同佢讲：“你睇！你妈妈同埋啲细佬喺出面，想揾你噃。” 33 耶稣回答佢哋：“边个系我嘅妈妈，边啲系我嘅兄弟呢？” 34 佢就望住坐喺佢周围嘅人，然后话：“睇吓，佢哋就系我啲兄弟，我嘅妈妈！ 35 边个照上帝嘅旨意去做，边个就系我嘅兄弟姊妹、我嘅妈妈。”