马太福音
21 佢哋就快到耶路撒冷，途中去到橄榄山上面伯法其呢个地方，耶稣派两个门徒出去， 2 同佢哋讲：“你哋去前面嗰条村啦，一入到去就会见到一只绑住咗嘅驴，仲有只驴仔同佢一齐。你哋解开佢哋，拉过嚟俾我。 3 如果有人问你哋做乜嘢，你哋就话：‘主需要用佢哋。’佢就会即刻俾你哋带两只驴走。”
4 呢件事后嚟真系噉样发生，实现先知讲过嘅说话，就系： 5 “你哋要话俾锡安城*知：‘睇吓！你嘅王嚟紧你嗰度。佢性情温和，骑喺驴上面，佢骑嘅系一只驴仔，一只驴嘅幼畜。’”
6 门徒就照住耶稣嘅吩咐去做。 7 佢哋将只驴同埋驴仔带过嚟，然后将外衣铺喺驴嘅背脊上面，耶稣就坐上去。 8 人群当中有好多人将自己嘅外衣铺喺条路嗰度，亦都有人斩咗啲树枝落嚟铺喺路上面。 9 行喺佢前面，同埋喺后面跟住嘅人，都不断大声话：“上帝啊，求你拯救大卫嘅子孙！奉耶和华*嘅名而嚟嘅嗰位系有福嘅！祈求天上嘅上帝拯救佢！”
10 耶稣入咗耶路撒冷城，全城就开始哄动，啲人问：“系边个嚟㗎？” 11 民众不断话：“佢系先知耶稣呀，系喺加利利嘅拿撒勒嚟㗎！”
12 耶稣入咗圣殿，将所有喺圣殿里面做生意嘅人，同埋佢哋嘅顾客赶出去，仲推冧兑换货币嘅商人嘅枱，同埋卖鸽嘅人嘅凳。 13 耶稣同佢哋讲：“圣经话：‘我嘅圣殿要称为祷告嘅殿。’但系你哋竟然令呢度成为强盗嘅巢穴。” 14 盲嘅人同埋跛脚嘅人嚟圣殿揾佢，耶稣就医好佢哋。
15 祭司长同抄经士见到耶稣施行嘅奇迹，又见到啲男仔喺圣殿入面大声话“上帝啊，求你拯救大卫嘅子孙”，就好嬲， 16 同耶稣讲：“你听唔听到佢哋讲紧乜嘢呀？”耶稣话：“听到吖。圣经话‘你令小朋友同埋婴儿嘅口讲出赞美嘅说话。’你哋冇读过咩？” 17 之后，耶稣离开呢班人，去到城外面嘅伯大尼，喺嗰度过夜。
18 一朝早耶稣返入城嘅途中，觉得肚饿。 19 佢见到路边有棵无花果树，就行埋去，点知发现棵树净系得叶，冇果实，于是就同棵树讲：“从今以后你都唔会有果实。”无花果树就即刻枯萎嘞。 20 门徒见到就好惊讶，话：“点解眨吓眼棵无花果树就枯咗嘅？” 21 耶稣答佢哋话：“我可以好肯定噉同你哋讲，只要有信心*，一啲都唔怀疑，你哋就唔单止做到我对无花果树做嘅事，就连吩咐呢座山，‘起身，去到海嗰度’，都做得到。 22 只要你哋有信心，无论你哋祷告求啲乜嘢，都会得到。”
23 耶稣入咗圣殿，教导紧人嘅时候，祭司长同人民当中嘅长老嚟问佢：“你凭咩权力做呢啲事呀？边个叫你噉做㗎？” 24 耶稣答佢哋：“噉我都问你哋一样嘢吖。如果你哋答到我，我就话俾你哋知，我凭乜嘢权力做呢啲事啦。 25 边个派约翰嚟施浸呢？系天上嘅上帝吖，定系人呢？”佢哋就讨论，话：“如果我哋答系‘天上嘅上帝’，佢就会同我哋讲：‘既然系噉，你哋点解唔相信约翰呀？’ 26 但系如果我哋答‘系人’，又怕激嬲啲民众噃，因为佢哋个个都认为约翰系先知。” 27 所以佢哋就答耶稣：“我哋唔知呀。”于是耶稣同佢哋讲：“噉我都唔话俾你哋知，我凭乜嘢权力做呢啲事。
28 “听吓你哋嘅睇法吖？假设一个人有两个仔。佢同第一个仔讲：‘阿仔，今日你去葡萄园度做嘢吖。’ 29 呢个仔话：‘我唔去。’后嚟佢觉得后悔，就去咗。 30 爸爸亦都同第二个仔讲咗同样嘅说话。呢个仔答：‘好呀，爸爸。’但系后嚟冇去到。 31 噉呢两个仔，边个系照住爸爸嘅意思去做呢？”佢哋答：“第一个啰。”耶稣同佢哋讲：“我可以好肯定噉话俾你哋知，收税人同埋娼妓会早过你哋进入上帝嘅王国。 32 因为约翰嚟到，向你哋指明正确嘅道路，不过你哋唔相信佢，收税人同埋娼妓反而相信佢。你哋即使见到噉样，都冇觉得后悔，仲系唔肯相信约翰。
33 “又听吓另一个比喻吖：有个人拥有一笪地，喺嗰度种植葡萄，四面安咗围栏，入面挖咗个酒榨，起咗座瞭望塔。佢将葡萄园租*俾一啲农户之后，就出咗国嘞。 34 到咗收割葡萄嘅季节，佢派奴隶去农户嗰度收取佢应得嘅葡萄*。 35 点知嗰班农户将佢啲奴隶捉住，毒打一个，杀咗一个，用石头掟死一个。 36 之后佢再派其他奴隶去，仲多过之前，班农户都系噉样对待佢哋。 37 最后，佢派自己嘅仔去农户嗰度，因为佢心谂：‘佢哋会尊重我个仔嘅。’ 38 班农户见到佢嘅仔，就商量话：‘佢就系继承葡萄园嗰个人呀。等我哋杀咗佢，噉佢会继承嘅产业就系我哋㗎喇！’ 39 佢哋就捉住佢，将佢拖到去葡萄园外面杀死。 40 噉葡萄园嘅主人返嚟嗰阵，佢会点样处置嗰啲农户呢？” 41 啲听众同耶稣讲：“既然佢哋咁邪恶，主人应该将佢哋全部杀晒，而且将葡萄园租俾准时交果实嘅农户。”
42 耶稣同佢哋讲：“圣经话‘建筑嘅人抛弃嘅石头，成为咗最重要嘅房角石*。呢块房角石系嚟自耶和华*㗎，对我哋嚟讲真系好奇妙。’你哋从来冇读过呢句说话咩？ 43 所以我话俾你哋知，上帝会将佢王国嘅福分喺你哋嗰度攞走，赐俾一个能够结果实嘅国族。 44 边个因为呢块石头而失足跌倒，就会遍体鳞伤。而边个俾呢块石头击中，就会被粉碎。”
45 嗰啲祭司长同埋法利赛派嘅人听完佢嘅比喻，就睇出耶稣系讲紧佢哋。 46 佢哋虽然想拘捕佢，不过好惊啲民众，因为民众认为耶稣系先知。