马可福音

2 过咗一排，耶稣再返到去迦百农。啲人知道佢喺间屋入面，呢个消息传开咗， 2 有好多人就嚟到聚集喺嗰度，连门外面都企满人。耶稣向佢哋传讲上帝嘅话语。 3 有四个人抬住一个瘫痪嘅人去揾耶稣。 4 不过由于嗰度太多人，佢哋冇办法将瘫痪嘅人抬去耶稣面前，于是拆咗耶稣上面嘅屋顶，将嗰个人连埋担架，由个窿放落去。 5 耶稣见佢哋咁有信心，就同瘫痪嘅人讲：“阿仔，你嘅罪赦免嘞。” 6 有几个抄经士坐喺嗰度，心谂*： 7 “呢个人点可以噉样讲嘢㗎？佢喺度亵渎上帝呀。除咗上帝，冇人可以赦罪㗎㖞。” 8 耶稣即刻睇出佢哋谂*紧啲乜嘢，就话：“点解你哋内心有呢啲谂法呢？ 9 其实任何人都可以同呢个瘫痪嘅人讲‘你嘅罪赦免嘞’，但系有边个可以话‘起身，拎起你嘅担架行啦’，而佢又真系行到呢？ 10 不过为咗令你哋知道，人子*喺地上有权赦罪——”耶稣同瘫痪嘅人讲： 11 “起身，拎起你嘅担架，返屋企啦。” 12 嗰个人就起身，即刻拎起担架，喺所有人面前行出去。大家都好惊讶，赞美*上帝，话：“我哋从来冇见过噉样嘅事呀！”

13 耶稣又去到海边。民众全部都去到佢嗰度，佢就教导佢哋。 14 耶稣向前行，见到亚勒腓嘅仔利未坐咗喺收税嘅地方，就同佢讲：“嚟跟随我啦。”利未就起身，跟随耶稣。 15 后嚟，耶稣去咗利未屋企，有好多收税人同埋罪人同耶稣仲有佢嘅门徒一齐食饭。佢哋当中有好多人都跟随耶稣。 16 属于法利赛派嘅抄经士见到耶稣同罪人仲有收税人一齐食饭，就同耶稣啲门徒讲：“佢竟然同啲收税人仲有罪人一齐食饭？” 17 耶稣听到，就同佢哋讲：“健康嘅人唔需要医生，病咗嘅人就需要嘞。我嚟唔系叫正义嘅人悔改，而系叫罪人悔改。”

18 约翰嘅门徒同埋法利赛派都有禁食嘅习惯。有人嚟问耶稣：“约翰啲门徒仲有法利赛派嘅门徒都有禁食嘅习惯，点解你啲门徒就冇呢？” 19 耶稣就答佢哋：“新郎同啲朋友一齐嘅时候，佢啲朋友冇理由禁食吖，系咪？只要新郎仲同佢哋一齐，佢哋就唔应该禁食。 20 但系，新郎俾人带走，离开佢哋嘅嗰段时期，一定会嚟到。到时，佢哋就会禁食嘞。 21 冇人会将新嘅布补喺旧嘅衫上面，因为新布一缩水，就会扯烂件衫，噉反而烂得更犀利。 22 亦都冇人会将新酒装落旧皮袋里面；因为噉会挣爆个皮袋，唔单止酒会漏出嚟，皮袋都唔用得嘞。所以，新酒系应该装喺新皮袋入面嘅。”

23 有一次，安息日嘅时候，耶稣同啲门徒穿过麦田。门徒一路行，一路摘啲麦穗嚟食。 24 法利赛派嘅人就同佢讲：“你睇！点解你啲门徒喺安息日噉样做嘅？唔合法㗎㖞！” 25 耶稣同佢哋讲：“有次大卫同跟随佢嘅人冇晒嘢食，好肚饿，当时佢点样做，你哋冇读过咩？ 26 根据同祭司长亚比亚他有关嘅记载，大卫入咗上帝嘅居所*，食咗呈献嘅饼*，仲分俾佢啲手下。按照法律，呢种饼净系得祭司可以食，其他人都唔可以食。” 27 然后，耶稣同佢哋讲：“上帝设立安息日系为咗帮助人，但系佢创造人唔系为咗要人守安息日。 28 人子系安息日嘅主呀。”