马可福音

11 佢哋去咗耶路撒冷附近，嚟到橄榄山上面嘅伯法其同埋伯大尼，耶稣就派两个门徒出去， 2 同佢哋讲：“你哋去前面嗰条村啦。一入到去，就会见到一只驴仔绑咗喺嗰度，系从来冇人骑过嘅。你哋解开佢，带佢嚟呢度吖。 3 如果有人问你哋：‘点解你哋要解开只驴仔？’你哋就话：‘主需要用佢，用完就会即刻送返嚟。’” 4 佢哋去到，真系见到路边一间屋有只驴仔绑咗喺门口，就解开佢。 5 有啲企喺嗰度嘅人问佢哋：“点解你哋要解开只驴仔呀？” 6 于是门徒照耶稣讲嘅噉回答，嗰啲人就俾佢哋带走只驴仔。

7 佢哋拉只驴仔去耶稣嗰度，然后将外衣铺喺驴嘅背脊上面，耶稣就坐上去。 8 好多人都将自己嘅外衣铺喺条路嗰度，亦都有人喺路边斩啲枝叶落嚟。 9 行喺佢前后嘅人，都不断大声话：“上帝啊，求你施行拯救！奉耶和华*嘅名而嚟嘅嗰位系有福嘅！ 10 我哋祖先大卫嗰个将要嚟到嘅王国系得到福分嘅！祈求高天之上嘅上帝施行拯救！” 11 耶稣到咗耶路撒冷，入去圣殿睇吓嗰度嘅所有嘢。不过时候唔早嘞，佢就同十二使徒出城，去伯大尼。

12 第二日，佢哋离开伯大尼嘅时候，耶稣觉得肚饿。 13 佢离远见到一棵无花果树已经出咗叶，就走埋去，睇吓棵树有冇果实。点知行到埋去，发现除咗树叶就乜都冇，因为嗰阵时唔系结无花果嘅季节。 14 耶稣同棵树讲：“从今以后唔会再有人食你嘅果实嘞。”门徒都听到佢噉讲。

15 佢哋嚟到耶路撒冷。耶稣入咗圣殿，将喺圣殿入面做生意嘅人同埋佢哋嘅顾客赶出去，仲推冧兑换货币嘅商人嗰啲枱同埋卖鸽嘅人嗰啲凳， 16 亦都唔俾人将圣殿当做捷径带住器具穿过去。 17 耶稣教导人，同佢哋讲：“圣经上面唔系写住，‘我嘅圣殿要称为万国祷告嘅殿’咩？你哋竟然令佢成为强盗嘅巢穴。” 18 祭司长同埋抄经士听到，就谂办法要杀死耶稣。由于民众都对耶稣嘅教导非常惊叹，祭司长同抄经士就好怕耶稣。

19 到咗黄昏，耶稣同门徒离开嗰座城。 20 佢哋喺清晨经过嗰棵无花果树，见到棵树连根都枯萎埋。 21 彼得谂起之前发生过嘅事，就同耶稣讲：“老师*，你睇！你咀咒嘅无花果树枯萎咗呀。” 22 于是耶稣同佢哋讲：“要对上帝有信心。 23 我可以好肯定噉同你哋讲，边个吩咐呢座山‘起身，去到海嗰度’，而且心里面唔怀疑，相信自己讲嘅会实现，就一定会实现。 24 所以我话俾你哋听，凡系你哋祷告求嘅，只要有信心，睇成系已经得到嘞，就一定会得到。 25 无论边个做咗啲乜嘢得罪你哋，你哋企喺度祷告嘅时候，都要宽恕佢，噉你哋嘅天父都会宽恕你哋嘅过错。” 26 －－－*

27 佢哋又返到耶路撒冷。耶稣喺圣殿行紧嘅时候，祭司长、抄经士同埋长老嚟揾佢， 28 问佢：“你凭咩权力做呢啲事呀？边个叫你噉做㗎？” 29 耶稣同佢哋讲：“噉我都问你哋一个问题吖，你哋回答我，我就话俾你哋知我凭咩权力做呢啲事啦。 30 派约翰嚟施浸嘅系天上嘅上帝吖，定系人呢？你哋答我。” 31 佢哋就讨论，话：“如果我哋答‘系天上嘅上帝’，佢就会话：‘既然系噉，点解你哋唔相信约翰呀？’ 32 但系我哋又点够胆话‘系人派佢嚟’嘅呢？”原来佢哋怕咗民众，因为啲民众个个都认定约翰系先知。 33 佢哋就答耶稣：“我哋唔知。”耶稣就同佢哋讲：“噉我都唔话俾你哋知我凭乜嘢权力做呢啲事。”