马可福音
10 耶稣离开嗰度，去到约旦河对岸，犹地亚嘅边界附近。又有一班人聚集去佢嗰度，耶稣就好似之前一样教导佢哋。 2 法利赛派嘅人嚟到想试探佢，问佢做丈夫嘅同太太离婚合唔合法。 3 耶稣答佢哋：“摩西俾你哋嘅吩咐系乜嘢呢？” 4 佢哋话：“摩西准人写离婚文书同太太离婚㗎。” 5 耶稣同佢哋讲：“摩西写呢条诫命俾你哋，系因为你哋硬颈。 6 但系最初上帝创造嘅时候，‘佢创造咗男人同女人。 7 所以人要离开父母， 8 二人合为一体’，噉夫妻就唔再系两个人，而系一体嘞。 9 所以，上帝结合嘅*，人就唔可以分开。” 10 返番入屋之后，门徒就问耶稣呢件事。 11 耶稣同佢哋讲：“边个同太太离婚，另外娶妻，就系通奸，对太太不忠； 12 而边个女人同丈夫离婚，另外嫁人，亦都系通奸。”
13 有人将小朋友带去耶稣嗰度，请佢将手放喺啲小朋友身上*，不过门徒就责备嗰啲人。 14 耶稣见到，就好唔高兴，同门徒讲：“俾啲小朋友嚟我呢度吖，唔好阻止佢哋，因为上帝嘅王国系属于噉样嘅人㗎。 15 我可以好肯定噉同你哋讲，边个唔好似小朋友一样接受上帝嘅王国，就绝对唔能够进入呢个王国。” 16 于是耶稣揽住啲小朋友，又将手放喺佢哋身上，祝福佢哋。
17 耶稣行紧嘅时候，有个人跑过嚟，跪喺佢面前，问佢：“良善嘅老师，我要做啲乜嘢先至可以得到永远嘅生命呢？” 18 耶稣同佢讲：“你点解称呼我做良善嘅老师呢？除咗上帝一位，冇边个配称为良善。 19 诫命你系知道嘅，包括唔可以杀人，唔可以通奸，唔可以偷窃，唔可以作伪证，唔可以欺诈，要孝敬*父母。” 20 佢话：“老师，所有呢啲诫命我自细就有遵守。” 21 耶稣爱佢，望住佢，同佢讲：“你仲争咗一样。去卖晒你啲嘢，分俾穷人啦，噉你就有财宝喺天上；仲有你要做我嘅门徒。” 22 听到耶稣噉样讲，佢好唔开心，好忧愁噉走咗，因为佢有好多财产。
23 耶稣望吓周围啲人，然后同门徒讲：“有钱人要进入上帝嘅王国，系几咁难呀！” 24 门徒听到耶稣噉讲，觉得好惊讶。耶稣就再同佢哋讲：“仔啊，一个人要进入上帝嘅王国，系几咁难呀！ 25 骆驼穿过针眼，比有钱嘅人进入上帝嘅王国更加容易呀！” 26 佢哋就更加惊讶，同耶稣讲*：“噉仲有人可以得救咩？” 27 耶稣望住佢哋话：“对人嚟讲，呢个系唔可能嘅，但系上帝就唔同嘞；对上帝嚟讲，乜嘢都有可能。” 28 彼得就同佢讲：“我哋已经揼低晒所有嘢跟随你嘞。” 29 耶稣话：“我可以好肯定噉话俾你哋知，任何人为咗我同好消息，揼低房屋、兄弟、姊妹、妈妈、爸爸、仔女或者田地， 30 而家都一定会得到一百倍嘅房屋、兄弟、姊妹、妈妈、仔女、田地，亦都会受迫害，喺将来嘅制度*会得到永远嘅生命。 31 但系有好多人，而家系最先嘅，将来系最后嘅；而家系最后嘅，将来系最先嘅。”
32 喺佢哋上去耶路撒冷嘅路上。耶稣行喺前面，门徒好惊讶，而喺后面跟住嘅人都战战兢兢。耶稣又带十二使徒行埋一边，将自己一定会遭遇嘅事讲俾佢哋知，佢话： 33 “而家我哋上耶路撒冷，有人会将人子交俾祭司长同抄经士。佢哋会定佢死罪，将佢交俾外族人。 34 嗰啲人会嘲笑佢，向佢吐口水，鞭打佢，杀死佢，但系三日之后佢会复活。”
35 西庇太嘅仔雅各同埋约翰嚟揾耶稣，同佢讲：“老师，无论我哋求你啲咩都好，请你应承我哋吖。” 36 耶稣同佢哋讲：“你哋想我为你哋做啲乜嘢？” 37 佢哋话：“喺你得到荣耀嘅时候，求你俾我哋一个坐喺你右边，一个坐喺你左边吖。” 38 耶稣话：“你哋根本唔知道自己求紧啲乜嘢。我饮紧嘅杯*，你哋能够饮咩？我接受紧嘅浸礼，你哋都一样可以接受咩？” 39 佢哋答：“我哋得呀。”耶稣就话：“我饮紧嘅杯，你哋都会饮；我接受紧嘅浸礼，你哋都会接受。 40 但系边个坐喺我嘅右边同左边，唔系我可以决定㗎，而系上帝准备俾边个就俾边个。”
41 其余十个人听到呢件事，就好嬲雅各同埋约翰。 42 耶稣就叫佢哋嚟，同佢哋讲：“你哋知道，喺列国当中，被视为统治者嘅人辖制百姓，大臣掌权管辖人民。 43 你哋之间千祈唔好噉样。边个想喺你哋当中做大嘅，就要为人服务； 44 边个想喺你哋中间做第一，就要做大家嘅奴隶。 45 因为人子嚟到，都唔系要人为佢服务，而系嚟为人服务，而且献出生命，作为代价救赎好多人*。”
46 之后佢哋到咗耶利哥。耶稣同门徒仲有一大班人由耶利哥出嚟嘅时候，有个盲嘅乞儿坐喺路边，佢系提迈嘅仔巴提迈。 47 佢听到拿撒勒人耶稣经过，就大声嗌，话：“大卫嘅子孙耶稣，可怜吓我吖！” 48 好多人闹佢，叫佢唔好出声，点知佢更加大声噉嗌：“大卫嘅子孙，可怜吓我吖！” 49 耶稣就停低，话：“叫佢过嚟吖。”啲人就去叫个盲人，同佢讲：“唔使惊！*起身啦，佢叫你呀。” 50 盲人就揼低外衣，跳起身，行去耶稣嗰度。 51 耶稣问佢：“你想我为你做啲乜嘢呢？”个盲人话：“老师*，求你令我睇得返嘢吖。” 52 耶稣同佢讲：“返屋企啦，你嘅信心令你好返嘞。”佢即刻睇返嘢，然后就跟住耶稣上路。