马可福音

13 耶稣喺圣殿出嚟嗰阵，有个门徒同佢讲：“老师，你睇吓啲建筑同埋大石，几咁壮观呀！” 2 不过耶稣同佢讲：“你见到嘅呢啲宏伟建筑，上面所有石头都会被拆晒落嚟，绝对唔会有一块石头留喺石头上面。”

3 耶稣坐喺橄榄山上面，面向住圣殿，彼得、雅各、约翰、安得烈私底下嚟问佢： 4 “请话俾我哋知吖，呢啲事会几时发生呢？呢一切去到末期嗰阵，有乜嘢征象呀？” 5 耶稣就同佢哋讲：“你哋要小心，唔好俾人误导。 6 有好多人将会冒我嘅名嚟到，声称话‘我就系基督’，结果好多人就被误导嘞。 7 当你哋听到附近有战争嘅声音，远方有战争嘅消息，都唔使恐慌，呢啲事一定会发生，不过末日仲未到。

8 “民族会攻打民族，国家*会攻打国家，一个接一个地方有地震，仲会有粮食短缺。呢一切只系苦难*嘅开始。

9 “你哋要小心警惕！啲人会将你哋交俾地方法庭，你哋会喺会堂俾人殴打，亦都会因为我而企喺总督同埋君王面前，结果就有机会向佢哋作见证。 10 末日嚟到之前，好消息一定会先传遍万国万族。 11 啲人将你哋押去受审嘅时候，你哋唔使事先担心应该讲啲乜嘢。到时神圣力量令你哋谂到乜嘢，你哋就讲乜嘢，因为讲说话嘅唔系你哋，而系神圣力量。 12 兄弟会交兄弟出嚟，爸爸会交仔女出嚟，令佢哋被杀；仔女会同父母作对，害死佢哋。 13 你哋会因为我嘅名俾所有人憎恨。但系，忍耐到底嘅人一定会得救。

14 “有个可憎之物会造成荒凉，你哋一见到佢企喺唔应该企嘅地方（读呢句话嘅人要辨明含意），喺犹地亚嘅人就应该逃走上山。 15 喺屋顶度嘅，唔好落嚟，亦都唔好返入屋攞任何嘢； 16 喺田里面嘅，唔好返去拎外衣。 17 喺嗰段时期，怀孕嘅妇女同埋喂奶嘅妈妈有祸嘞！ 18 你哋要不断祷告，祈求呢件事唔好喺寒冬发生。 19 因为嗰段时期会有患难，噉样嘅患难由上帝创造万物以嚟，直到嗰个时候，从来冇发生过，以后都唔会再发生。 20 如果唔系耶和华*缩短嗰段时期，就冇人可以得救。不过为咗佢拣选嘅嗰啲人，佢会缩短嗰段时期。

21 “到时，如果有人同你哋讲‘睇吓！基督喺呢度’，或者话‘睇吓！基督喺嗰度’，你哋唔好信。 22 因为会有假基督同埋假先知出现，佢哋会施行神迹同埋奇异嘅事误导人，如果可以嘅话，佢哋想将上帝拣选嘅人引入歧途。 23 所以你哋要小心！我已经预先将一切话俾你哋听。

24 “喺嗰段时期，嗰场患难之后，太阳会变黑，月亮唔会再有光芒， 25 星辰喺天上坠落，天上嘅力量都会动摇。 26 到时，啲人会睇见人子喺云彩当中带住强大嘅力量同埋荣耀嚟到。 27 到时，佢会派天使从四方，由地极到天边，将被拣选嘅人聚集起嚟。

28 “用无花果树打个比喻吖：树开始出嫩枝，生啲新叶出嚟，你哋就知道夏天好快到嘞。 29 同样，当你哋见到呢一切发生，就知道人子好快到嘞。 30 我可以好肯定噉同你哋讲，喺呢一代人消逝之前，呢一切一定会发生。 31 天地都会消逝，但系我嘅说话绝对唔会消逝。

32 “至于几时系嗰个日子、嗰个时刻，边个都唔知道，天上嘅天使唔知道，上帝嘅仔亦都唔知道，净系得我嘅爸爸知道。 33 你哋要留心，时刻警醒，因为你哋唔知道指定嘅时候几时嚟到。 34 情形就好似一个人离开屋企出国，佢将权力交俾奴隶管理屋企嘅事，分派工作俾每个人，又吩咐守门嘅人不断守望。 35 所以，你哋要不断守望，因为你哋唔知道屋企嘅主人会喺几时嚟到，可能系黄昏，半夜，黎明之前*，或者系清晨。 36 噉佢突然嚟到嗰阵，就唔会见到你哋瞓紧觉嘞。 37 我同你哋讲嘅，亦都系同所有人讲㗎：就系要不断守望。”