马太福音

22 耶稣又用比喻同佢哋讲说话，佢话： 2 “天上嘅王国就好似一个王为佢嘅仔预备婚宴。 3 佢派奴隶出去，叫嗰啲受邀请嘅人嚟参加婚宴，但系嗰啲人唔肯嚟。 4 佢再派其他奴隶出去，同佢哋讲：‘话俾受邀请嘅人知：“我嘅宴会已经准备好嘞，公牛同埋肥美嘅牲畜都㓥好晒，万事俱备。嚟参加婚宴吖。”’ 5 但系嗰啲人一啲都唔在乎，走咗去做其他嘢，一个去咗自己块田，另一个走咗去做生意。 6 其他人就捉住王嘅奴隶，虐待佢哋，杀死佢哋。

7 “王就非常之嬲，派军队杀咗嗰啲杀人凶手，烧咗佢哋嘅城。 8 跟住王同奴隶讲：‘婚宴已经准备好嘞，但系嗰啲受邀请嘅人唔配嚟参加。 9 所以，你哋要去嗰啲出城嘅大路，见到边个，就邀请边个嚟参加婚宴啦。’ 10 于是嗰啲奴隶就出去，叫晒所有喺大路遇到嘅人嚟，有邪恶嘅人，亦都有良善嘅人。举行婚礼嘅场地就坐满宾客。

11 “王入嚟睇吓啲宾客，见到有个人冇着到婚宴嘅礼服。 12 王就问佢：‘朋友，点解你入嚟唔着婚宴嘅礼服呀？’嗰个人无言以对。 13 跟住王同啲仆人讲：‘绑起佢嘅手脚，将佢揼去外面嘅黑暗之中啦。喺嗰度，佢就会痛哭流泪，咬牙切齿*嘞。’

14 “受上帝邀请嘅人多，但系佢拣选嘅人少。”

15 嗰个时候法利赛派嘅人离开，商量点样喺耶稣讲嘅说话嗰度揾把柄陷害佢。 16 于是，佢哋派自己嘅门徒，同希律党徒一齐去揾耶稣，话：“老师，我哋知道你唔讲大话，又教导人关于上帝嘅真理。你唔会去讨好人，仲对人一视同仁*添。 17 所以，请话俾我哋听，你觉得点吖？纳人头税俾凯撒，啱唔啱*嘅呢？” 18 耶稣知道佢哋不怀好意，就话：“虚伪嘅人，你哋点解试探我呢？ 19 拎个用嚟交税嘅钱币嚟吖。”佢哋就攞咗个第纳流斯*钱币俾佢。 20 耶稣问佢哋：“呢个系边个嘅头像，边个嘅名号呀？” 21 佢哋答：“系凯撒啰。”于是耶稣同佢哋讲：“所以，属于凯撒嘅要俾返凯撒，属于上帝嘅要俾返上帝。” 22 佢哋听到觉得好惊讶，于是就转身离开。

23 撒都该派系唔相信复活㗎。喺嗰一日佢哋嚟揾耶稣，问佢： 24 “老师，摩西话：‘如果一个人未有仔女就死咗，佢嘅兄弟就一定要娶咗个遗孀，帮死咗嘅兄弟传宗接代。’ 25 我哋呢度曾经有七兄弟，第一个结咗婚，未有仔女就已经死咗嘞，噉佢嘅一个兄弟就娶咗佢嘅老婆。 26 而呢个兄弟都系未有仔女就死咗嘞，同样嘅事都发生喺第三个，至到第七个身上。 27 最后连嗰个女人都死埋。 28 噉复活嗰阵，佢系七个人当中边个嘅老婆呢？佢哋个个都娶过佢噃。”

29 耶稣答佢哋：“你哋错嘞，因为你哋唔明白圣经，亦都唔明白上帝嘅力量几咁强大。 30 复活嘅时候，人唔娶亦都唔嫁，就好似天使噉。 31 上帝讲过俾你哋知死人系会复活㗎，你哋冇读过咩？佢话： 32 ‘我系亚伯拉罕嘅上帝，以撒嘅上帝，雅各嘅上帝。’佢唔系死人嘅上帝，而系活人嘅上帝。” 33 听到耶稣嘅教导，民众都觉得好惊讶。

34 法利赛派嘅人听讲耶稣令撒都该派哑口无言，就一齐嚟揾耶稣。 35 佢哋当中有一个精通摩西法典嘅人想试探耶稣，就问佢： 36 “老师，法典入面边条诫命系最大嘅呢？” 37 耶稣答佢：“‘你要全心，全意，用全部生命爱耶和华*你嘅上帝。’ 38 呢个系最大、最重要嘅诫命。 39 第二条诫命都相关㗎，就系‘要爱人如己’。 40 成套法典同埋先知书嘅说话都基于*呢两条诫命。”

41 法利赛派嘅人仲喺嗰度嘅时候，耶稣问佢哋： 42 “你哋对基督有乜嘢睇法呢？佢系边个嘅子孙呀？”佢哋答：“系大卫嘅子孙啰。” 43 耶稣问佢哋：“噉点解大卫喺神圣力量指引下称呼佢做‘主’呢？大卫话： 44 ‘耶和华*同我主讲：“你坐喺我嘅右边，直到我将你嘅敌人放喺你嘅脚下*。”’ 45 既然大卫称呼基督做‘主’，噉点解基督又会系大卫嘅子孙呢？” 46 法利赛派嘅人一句说话都答唔到耶稣。由嗰一日起，冇人再敢质问耶稣啲乜嘢。