马太福音

18 嗰个时候，门徒嚟问耶稣：“喺天上嘅王国入面，到底边个系最大㗎？” 2 耶稣就叫咗个小朋友嚟，请佢企喺门徒当中， 3 佢话：“我可以好肯定噉同你哋讲，如果你哋唔彻底改变态度*，好似小朋友一样谦卑，就绝对唔能够进入天上嘅王国。 4 所以，边个好似呢个小朋友噉样系谦卑嘅，边个喺天上嘅王国入面就系最大㗎嘞； 5 边个为咗我嘅名而接待一个好似呢个小朋友噉样嘅人，就即系接待我嘞。 6 呢啲卑微嘅人信从我，边个令佢哋其中一个失足跌倒*嘅话，噉佢不如挂块大磨石*喺自己条颈度，沉入大海好过嘞。

7 “因为有绊脚石，世人有祸嘞！世上一定会出现绊脚石，但系边个带绊脚石嚟令人跌倒，边个就有祸嘞！ 8 如果你嘅一只手或者一只脚令你失足跌倒，就斩落嚟揼咗佢！你伤残或者跛脚，但系得到生命，点都好过有两只手两只脚，但系被揼入永恒嘅火*。 9 如果你嘅一只眼令你失足跌倒，就挖出嚟揼咗佢！你得返一只眼，但系得到生命，点都好过有两只眼，但系被揼入欣嫩谷*嘅火。 10 我话俾你哋知，你哋千祈唔好睇小呢啲卑微嘅人当中嘅一个。因为佢哋嘅天使喺天上，经常同我嘅天父见面*。 11 －－－*

12 “你哋觉得呢？如果有个人有100只绵羊，其中一只走失咗，佢实会将99只留喺山上面，去揾嗰只走失咗嘅羊㗎，系咪？ 13 我可以好肯定噉同你哋讲，如果佢揾到嗰一只羊，就会好开心，比起有99只冇走失嘅羊更加开心。 14 同样，我嘅*天父都唔想呢啲卑微嘅人有一个走失*。

15 “如果你嘅弟兄犯罪，而对你做成损害*，你就要同佢单独见面，讲清楚佢错喺边*。如果佢听你讲，噉你就帮到你嘅弟兄做返啱嘅事嘞*。 16 如果佢唔听，你就带一两个人去见佢。噉根据两三个人嘅口作证*，所有事情都可以清清楚楚。 17 如果佢唔听佢哋讲，就话俾会众*知。如果佢连会众都唔听，就将佢当做外族人同埋收税人啦。

18 “我可以好肯定噉同你哋讲：凡系你哋喺地上会绑住*嘅，上帝喺天上都已经绑住咗；凡系你哋喺地上会解开*嘅，上帝喺天上都已经解开咗*。 19 我又好肯定噉样同你哋讲：如果你哋有两个人喺地上同心合意噉求一啲重要嘅事，无论系咩事，我嘅天父都会成全你哋。 20 因为喺边度有两三个人奉我嘅名聚集埋一齐，边度就有我喺佢哋当中。”

21 嗰个时候，彼得嚟问耶稣：“主啊，我嘅弟兄得罪咗我，我要宽恕佢几多次呢？7次够唔够呀？” 22 耶稣同佢讲：“我话俾你听，唔系7次，系77次。

23 “所以，天上嘅王国就好似一个王想佢啲奴隶偿还债务。 24 当佢开始收取欠债，佢嘅仆人将一个争咗佢6000万银元*嘅人带入嚟。 25 但系呢个人冇能力还债，于是王下令将佢、佢嘅老婆仔女，仲有佢拥有嘅嘢全部卖晒，用嚟还债。 26 呢个奴隶就跪低向佢下拜，话：‘求你俾啲时间我吖，我一定会还返晒俾你㗎。’ 27 王可怜佢，就放咗佢，仲将佢嘅债一笔勾销。 28 呢个奴隶出去之后，遇到*另一个奴隶。嗰个人争佢100银元*。佢竟然捉住嗰个人，捻住佢条颈话：‘将你争我嘅通通还返俾我！’ 29 嗰个奴隶就跪低求佢，话：‘俾啲时间我吖，我一定会还返俾你㗎。’ 30 但系佢唔肯，仲揾人韫个奴隶入监，直到佢还清争落嘅债务为止。 31 其他奴隶见到呢件事，都好唔开心，佢哋就将所有嘢话晒俾王知。 32 王就叫嗰个奴隶嚟，同佢讲：‘邪恶嘅奴隶，你求我，我就完全唔使你还债。 33 你唔系应该怜悯同你一样做奴隶嘅人，好似我怜悯你噉样咩？’ 34 王非常之嬲，就交佢俾狱吏韫起佢，直到佢还清所有债务为止。 35 如果你哋唔发自内心原谅弟兄，我嘅天父都会噉样对待你哋。”