马可福音

4 耶稣又去到海边教导人。有一大班人聚集到佢嗰度，佢就上船坐低，离开岸边，而民众就留喺岸上面。 2 耶稣用比喻教导佢哋好多真理。佢话： 3 “你哋要留心听！有个人出去撒种， 4 撒种嘅时候，有啲种子跌咗喺路边，有雀仔嚟到食咗。 5 有啲跌咗喺泥土唔多嘅岩石地，因为土壤唔深，种子就即刻生长， 6 但系太阳一出嚟，幼苗就晒干咗，加上冇扎根*，就枯萎咗嘞。 7 另外有啲种子跌咗落荆棘度，荆棘一长高就阻碍幼苗生长，幼苗就结唔到果实嘞。 8 仲有啲种子撒咗喺好嘅土壤上面，生长茂盛，结出果实，有啲30倍、有啲60倍、有啲100倍。” 9 耶稣又话：“有耳仔嘅，就应该留心听。”

10 民众离开咗耶稣之后，有啲门徒同埋十二使徒嚟问佢比喻嘅意思。 11 耶稣同佢哋讲：“上帝王国嘅神圣秘密净系俾你哋知道，而外人听到嘅只系啲比喻啫。 12 噉样，虽然佢哋睇到我做啲乜嘢，但系就唔会睇得明，听到我讲啲乜嘢，但系理解唔到，佢哋唔会回头改过，得到宽恕。” 13 耶稣又同佢哋讲：“你哋唔明白呢个比喻，又点能够明白其他比喻呢？

14 “比喻入面嗰个人撒嘅种子，系上帝嘅话语。 15 有啲种子跌咗喺路边，就系指人一听到话语，撒但就嚟到，将喺佢哋心入面嘅话语攞走。 16 而种子跌咗喺岩石地，就系指人一听到上帝嘅话语就开心噉接受。 17 不过，净系维持咗一段时间，种子冇喺佢哋心入面扎根，后嚟佢哋因为上帝嘅话语而面对患难或者迫害，就即刻放弃信仰*嘞。 18 种子跌咗喺荆棘入面，就系指人听到上帝嘅话语， 19 但系俾而家呢个制度*嘅忧虑、财富嘅诱惑*同埋各种欲望侵害佢嘅内心，结果妨碍咗话语嘅生长，就结唔到果实嘞。 20 种子撒喺好嘅土壤上面，就系指人听到上帝嘅话语，乐意接受，仲结出果实，有30倍嘅，有60倍嘅，有100倍嘅。”

21 耶稣同佢哋讲：“冇人会攞盏灯出嚟，然后攞个篮*冚住或者放喺床下底，反而会放喺灯台上面。 22 隐藏嘅事一定会揭露出嚟，原本小心收埋嘅嘢始终都会被公开。 23 有耳仔嘅，都应该留心听。”

24 耶稣又同佢哋讲：“我同你哋讲嘅嘢，你哋要留心听。你哋用乜嘢工具量嘢俾人，人哋亦都会用乜嘢工具量俾你哋，而且会俾更多你哋。 25 因为边个有嘅，就要俾多啲佢；边个冇嘅，就连佢有嘅，都要攞走埋。”

26 耶稣同民众讲：“上帝嘅王国好似一个人喺田地撒种。 27 佢夜晚瞓觉，日头起身，喺呢段时间，种子点样发芽生长，佢完全唔知道。 28 田地生产谷物系自然而逐渐嘅，先长出幼苗，然后有麦穗生出嚟，最后麦穗上面生满谷粒。 29 当谷物成熟，嗰个人就用镰刀收割，因为收成嘅时候到嘞。”

30 耶稣话：“上帝嘅王国好似啲乜嘢呢？我哋可以用乜嘢比喻去说明呢？ 31 上帝嘅王国好似一粒芥菜嘅种子*，撒喺田地嗰阵系地上所有种子当中最细嘅。 32 但系到佢长大之后，就比田园入面其他植物更加大，仲生出粗壮嘅树枝，天上嘅雀仔都可以喺佢嘅树荫下栖息。”

33 耶稣根据听众嘅理解力，讲咗好多噉样嘅比喻，向佢哋传讲上帝嘅话语。 34 佢同佢哋讲嘢嘅时候，一定会用比喻，但系佢会私下向门徒解释呢啲比喻。

35 喺嗰日嘅傍晚时分，耶稣同门徒讲：“我哋过去对面岸吖。” 36 门徒等民众离开之后，就同耶稣坐船过去*，亦都有其他船跟住佢一齐去。 37 突然间，刮起一股非常强劲嘅暴风，海浪不断打入船里面，只船几乎入满晒水。 38 但系耶稣就喺船尾挨住个枕头*瞓紧觉。门徒叫醒佢，同佢讲：“老师，我哋就快冇命喇，你唔在乎嘅咩？” 39 耶稣就起身，斥责风，对住个海话：“唔好出声！静落嚟啦！”风就停咗，周围就即刻完全平静落嚟嘞。 40 耶稣同佢哋讲：“你哋点解咁惊呀？你哋唔相信上帝会帮你哋咩？” 41 不过佢哋都系非常之恐惧，大家都话：“呢个人到底系边个嚟㗎？连风同海都服从佢？”