马太福音

11 耶稣俾完指示嗰12个门徒，就喺嗰度出发，去周围嘅城传道教人。

2 约翰喺监狱度听到基督所做嘅事，就派门徒去 3 问耶稣：“你系咪就系我哋等待嘅嗰一位*呀？定系我哋要期待另一位嚟呢？” 4 耶稣回答佢哋话：“返去话俾约翰知，你哋听到乜嘢，见到乜嘢啦： 5 盲嘅睇到嘢，跛嘅行到路，有麻风病嘅好返*，聋嘅听到嘢，死人复活，穷人听到好消息。 6 冇因为我而失足跌倒嘅人*系有福*嘅。”

7 约翰嘅门徒走咗之后，耶稣同民众讲到约翰，佢话：“你哋以前喺旷野见到嘅嗰个人系点样嘅呢？佢系咪好似随风摇摆嘅芦苇噉吖？唔系呀！ 8 噉你哋见到嘅嗰个人系点嘅呢？佢系咪着得好奢华*嘅呢？都唔系呀！着得好奢华嘅嗰啲人都住喺王宫入面㗎。 9 噉佢到底系咩人呢？系咪一个先知？冇错！我话俾你哋听，佢系先知，但系唔只系先知咁简单。 10 佢仲系圣经讲过嘅嗰一位，圣经话：‘睇吓！我要派我嘅使者行喺你前面*，佢会为你预备道路！’ 11 我可以好肯定噉话俾你哋知，喺世人当中*，未出现过一个人比施浸者约翰更大，但系喺天上嘅王国入面，再渺小嘅都比佢大。 12 天上嘅王国好似一个奖赏，由施浸者约翰开始传道直到而家，人一直竭尽全力想得到，而竭尽全力嘅人就得到嘞。 13 先知书同埋法典预告将来会发生嘅事，约翰嚟到，呢啲预言就开始得到应验。 14 无论你哋愿唔愿意相信都好，佢就系嗰位要嚟嘅以利亚。 15 有耳仔嘅，就应该留心听。

16 “呢一代人就好似点样嘅人噉呢？就好似一班坐喺市集广场度玩嘅小朋友，有啲大声同同伴 17 讲：‘我哋帮你哋吹笛伴奏，你哋唔跳舞；我哋唱哀歌，你哋一啲哀伤嘅反应都冇*。’ 18 类似㗎，约翰嚟到，佢禁食亦都唔饮酒，啲人就话：‘佢有邪灵附身。’ 19 但系人子嚟到，有食嘢有饮酒，啲人就话：‘睇吓！呢个人贪食好酒，又同收税人仲有罪人做朋友。’不过，一个人系咪有智慧，睇佢嘅行为*就知道*嘞。”

20 耶稣大部分奇迹都系喺几座城入面施行嘅，不过呢啲城嘅人冇悔改，于是耶稣谴责佢哋，话： 21 “哥拉逊啊，伯赛大啊，你哋大祸临头嘞！因为我喺你哋嗰度施行嘅奇迹，如果喺泰尔同埋西顿施行嘅话，嗰度嘅人一早就着起粗布，坐喺灰嗰度悔改嘞。 22 我话俾你哋知，喺审判日，泰尔同埋西顿经历嘅，都比你哋容易呀。 23 迦百农啊，唔通你会被捧上天咩？其实你会被贬到坟墓呀！因为我喺你嗰度施行嘅奇迹，如果喺所多玛施行出嚟，嗰座城就可以继续存留到今日嘞。 24 我话俾你哋知，喺审判日，你所受嘅惩罚，比所多玛更加重呀。”

25 当时耶稣话：“爸爸，天地嘅主啊，我公开赞美你，因为你将呢啲真理向有智慧、有学识嘅人隐藏起嚟，但系就向小朋友*显露出嚟。 26 冇错，爸爸啊，因为呢个系你钟意*嘅做事方式。 27 我爸爸已经将一切都交俾我嘞。除咗爸爸，冇人完全认识我；除咗我同埋我愿意启示嘅人*，冇人完全认识爸爸。 28 你哋所有辛苦劳碌、背负重担嘅人啊，嚟我呢度吖，我会令你哋觉得舒畅。 29 你哋要负起我嘅担子*，向我学习，因为我性情温和，内心谦卑。噉样，你哋就会觉得舒畅嘞。 30 我嘅担子*系容易负起㗎，我叫你哋孭起嘅嘢系轻㗎。”